Biblica® Open Lao Contemporary Version
ຈົດບັນຊີ 24
ບັດນີ້ເມື່ອບາລາອາມເຫັນວ່າພຣະເຈົ້າຢາເວພໍໃຈທີ່ຈະອວຍພອນອິດສະຣາເອນແລ້ວ, ລາວກໍບໍ່ໄດ້ໄປເບິ່ງໂຊກເບິ່ງລາງເໝືອນຄັ້ງກ່ອນໆ, ແຕ່ຫັນໜ້າຂອງລາວໄປສູ່ຖິ່ນແຫ້ງແລ້ງກັນດານ. ເມື່ອບາລາອາມຫລຽວອອກໄປກໍເຫັນອິດສະຣາເອນແຍກຕັ້ງທີ່ພັກອາໄສຕາມເຜົ່າ, ພຣະວິນຍານຂອງພຣະເຈົ້າກໍມາຢູ່ເທິງບາລາອາມ ແລະ ລາວຈຶ່ງກ່າວຄຳທຳນວາຍຂອງພຣະອົງວ່າ:
“ຄຳທຳນວາຍຂອງບາລາອາມລູກຊາຍຂອງເບອໍ,
ຄຳທຳນວາຍຂອງຜູ້ມີຕາສະຫວ່າງ,
ຄຳທຳນວາຍຂອງຜູ້ໄດ້ຍິນຖ້ອຍຄຳຂອງພຣະເຈົ້າ,
ຜູ້ເຫັນນິມິດຈາກອົງຜູ້ມີລິດອຳນາດຍິ່ງໃຫຍ່,1
ຜູ້ລົ້ມລົງນອນຂ້ວມ ແລະ ຕາໄດ້ເປີດອອກ:
“ຢາໂຄບ! ບັນດາເຕັນຂອງທ່ານຊ່າງງາມແທ້,
ອິດສະຣາເອນ, ທີ່ຢູ່ອາໄສຂອງທ່ານງາມຫລາຍ!
“ພວກເຂົາແຜ່ກະຈາຍອອກໄປດັ່ງຮ່ອມພູ,
ດັ່ງສວນທີ່ຢູ່ແຄມແມ່ນ້ຳ,
ດັ່ງຕົ້ນເກດສະໜາທີ່ພຣະເຈົ້າຢາເວປູກໄວ້,
ດັ່ງຕົ້ນໄມ້ສີດາທີ່ຢູ່ແຄມນ້ຳ.
ນ້ຳຈະໄຫລລົ້ນຈາກຖັງຂອງພວກເຂົາ;
ເມັດພືດຂອງພວກເຂົາຈະມີນ້ຳຢ່າງອຸດົມສົມບູນ.
“ກະສັດຂອງພວກເຂົາຈະຍິ່ງໃຫຍ່ກວ່າອາກັກ;
ອານາຈັກຂອງພວກເຂົາໄດ້ຮັບການຍົກສູງ.
“ພຣະເຈົ້າໄດ້ນຳເອົາພວກເຂົາອອກມາຈາກເອຢິບ;
ພວກເຂົາມີກຳລັງເໝືອນງົວປ່າ.
ພວກເຂົາທຳລາຍຊົນຊາດຕ່າງໆທີ່ເປັນສັດຕູ
ແລະ ຫັກກະດູກຂອງພວກເຂົາເປັນຕ່ອນໆ;
ພວກເຂົາສຽບແທງຄົນເຫລົ່ານັ້ນດ້ວຍລູກທະນູ.
ພວກເຂົາລົ້ມຕົວລົງນອນເໝືອນດັ່ງນາງພະຍາສິງ
ຄ້າຍນາງສິງຜູ້ໃດກ້າກຸກກວນພວກເຂົາໄດ້?
“ຂໍໃຫ້ຜູ້ທີ່ອວຍພອນທ່ານໄດ້ຮັບພອນ
ແລະ ໃຫ້ຜູ້ທີ່ສາບແຊ່ງທ່ານຖືກສາບແຊ່ງ!”
ແລ້ວບາຫລາກກໍ່ເກີດຄວາມໃຈຮ້າຍຕໍ່ບາລາອາມ. ເພິ່ນທຸບກຳປັ້ນຕົນເອງ ແລະ ເວົ້າຕໍ່ບາລາອາມວ່າ, “ເຮົາໄດ້ເອີ້ນເອົາເຈົ້າມາເພື່ອສາບແຊ່ງສັດຕູຂອງເຮົາ, ແຕ່ເຈົ້າໄດ້ອວຍພອນພວກເຂົາເຖິງສາມຄັ້ງ. ຈົ່ງໜີໄປດຽວນີ້ ແລະ ກັບບ້ານໄປ! ເຮົາເວົ້າແລ້ວວ່າເຮົາຈະໃຫ້ລາງວັນເຈົ້າຢ່າງງົດງາມ, ແຕ່ພຣະເຈົ້າຢາເວໄດ້ຂັດຂວາງບໍ່ໃຫ້ໄດ້ຮັບລາງວັນ”.
ບາລາອາມຕອບບາຫລາກວ່າ, “ຂ້າພະເຈົ້າບໍ່ໄດ້ບອກຜູ້ສົ່ງຂ່າວທີ່ທ່ານສົ່ງໄປຫາຂ້າພະເຈົ້າບໍວ່າ, ‘ເຖິງແມ່ນວ່າບາຫລາກຈະມອບເງິນ ແລະ ຄຳທັງໝົດໃນລາຊະວັງຂອງເພິ່ນໃຫ້ຂ້າພະເຈົ້າກໍຕາມ, ຂ້າພະເຈົ້າກໍບໍ່ສາມາດເຮັດສິ່ງໃດຕາມໃຈມັກຂອງຂ້າພະເຈົ້າໄດ້, ບໍ່ວ່າດີ ຫລື ຮ້າຍ, ບໍ່ສາມາດທີ່ຈະໄປໄກເກີນຄຳສັ່ງຂອງພຣະເຈົ້າຢາເວໄດ້ ແລະ ຂ້າພະເຈົ້າຕ້ອງເວົ້າໃນສິ່ງທີ່ພຣະເຈົ້າຢາເວກ່າວເທົ່ານັ້ນ’? ບັດນີ້ ຂ້າພະເຈົ້າຈະກັບຄືນໄປຫາປະຊາຊົນຂອງຂ້າພະເຈົ້າ, ແຕ່ຂໍເຕືອນທ່ານເຖິງສິ່ງທີ່ປະຊາຊົນເຫລົ່ານີ້ຈະເຮັດແກ່ປະຊາຊົນຂອງທ່ານໃນວັນຂ້າງໜ້າ”.
ຄຳທຳນວາຍຄັ້ງທີສີ່ຂອງບາລາອາມ
ແລ້ວເພິ່ນຈຶ່ງກ່າວຄຳທຳນວາຍຂອງເພິ່ນວ່າ:
“ຄຳທຳນວາຍຂອງບາລາອາມລູກຊາຍຂອງເບອໍ,
ຄຳທຳນວາຍຂອງຜູ້ມີຕາສະຫວ່າງ,
ຄຳທຳນວາຍຂອງຜູ້ໄດ້ຍິນຖ້ອຍຄຳຂອງພຣະເຈົ້າ,
ຜູ້ມີຄວາມຮູ້ຈາກຜູ້ສູງສຸດ,
ຜູ້ເຫັນນິມິດຈາກອົງຜູ້ມີລິດອຳນາດຍິ່ງໃຫຍ່,
ຜູ້ລົ້ມລົງ ແລ້ວຕາໄດ້ເປີດອອກແລ້ວ:
“ຂ້າພະເຈົ້າເຫັນເພິ່ນ, ແຕ່ບໍ່ແມ່ນຂະນະນີ້
ຂ້າພະເຈົ້າເບິ່ງເຫັນ, ແຕ່ບໍ່ແມ່ນໄລຍະໃກ້.
ດາວດວງໜຶ່ງຈະອອກມາຈາກຢາໂຄບ;
ໄມ້ຄາທາອັນໜຶ່ງຈະຂຶ້ນມາຈາກອິດສະຣາເອນ.
ຜູ້ນັ້ນຈະຍ່ອງໜ້າຜາກຂອງໂມອາບ,
ແລະ ທຸບກະໂຫລກຫົວ2ຂອງ3ເຊື້ອສາຍຂອງເຊດ4.
ເອໂດມຈະຖືກພ່າຍແພ້;
ເສອີ, ສັດຕູຂອງເຂົາ, ກໍຈະຖືກພ່າຍແພ້,
ແຕ່ອິດສະຣາເອນຈະເຂັ້ມແຂງຂຶ້ນ
ຈະມີຜູ້ປົກຄອງຜູ້ໜຶ່ງອອກມາຈາກຢາໂຄບ
ແລະ ຈະທຳລາຍຜູ້ທີ່ລອດຊີວິດຂອງເມືອງນັ້ນ”.
ຄຳທຳນວາຍຄັ້ງທີຫ້າຂອງບາລາອາມ
ຈາກນັ້ນບາລາອາມແນມເບິ່ງຊາວອາມາເຫລັກ ແລະ ກ່າວຄຳທຳນວາຍຂອງເພິ່ນວ່າ:
“ອາມາເຫລັກເປັນທີໜຶ່ງໃນທ່າມກາງປະຊາຊາດຕ່າງໆ,
ແຕ່ບັ້ນປາຍພວກເຂົາຈະພັງພິນາດ”.
ຄຳທຳນວາຍຄັ້ງທີຫົກຂອງບາລາອາມ
ແລ້ວເຂົາກໍ່ແນມເບິ່ງຊາວເກນິດ ແລະ ກ່າວຄຳທຳນວາຍວ່າ:
“ບ່ອນທີ່ພວກເຈົ້າອາໄສຢູ່ກໍໝັ້ນຄົງ,
ຮັງຂອງພວກເຈົ້າກໍ່ຕັ້ງຢູ່ທີ່ຫລືບຫີນ;
ແຕ່ພວກເຈົ້າຊາວເກນິດຈະຖືກທຳລາຍ
ເມື່ອອັດຊູເຣຈັບພວກເຈົ້າໄປເປັນຊະເລີຍ”.
ຄຳທຳນວາຍຄັ້ງທີເຈັດຂອງບາລາອາມ
ແລ້ວບາລາອາມກໍກ່າວຄຳທຳນວາຍຂອງເພິ່ນວ່າ:
“ອະນິຈັງ! ມີຜູ້ໃດຈະມີຊີວິດຢູ່ໄດ້ເມື່ອພຣະເຈົ້າກະທຳເຊັ່ນນີ້?
ເຮືອຈະມາຈາກຝັ່ງທະເລຂອງໄຊປຣັດ;
ແລະ ພວກເຂົາຈະເອົາຊະນະທັງອັດຊູເຣ ແລະ ເອເບ,
ແຕ່ພວກເຂົາກໍຈະຈິບຫາຍໄປເຊັ່ນກັນ”.
ແລ້ວບາລາອາມກໍລຸກຂຶ້ນ ແລະ ກັບເມືອທີ່ຢູ່ຂອງຕົນ, ແລະ ບາຫລາກກໍໄປຕາມທາງຂອງຕົນ.
Source notes (4)
- Footnote ພາສາເຮັບເຣີວ່າ: ຊາດາຍ ເໝືອນກັນກັບໃນຂໍ້ 16
- Footnote ສະບັບຊາມາຣີຕັນເພັນເຕຕຸຍ (ເບິ່ງຄືກັນ ຢມຢ 48:45); ຄວາມໝາຍຂອງຄຳໃນພາສາເຮັບເຣີບໍ່ຊັດເຈນ.
- Footnote ຫລື ເປັນໄປໄດ້ວ່າໂມອາບ ປະທະ
- Footnote ຫລື ຂອງຜູ້ໂອ້ອວດສຽງດັງທັງຫລາຍ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.