Biblica® Open Lao Contemporary Version
ເນເຫມີຢາ 9
ຊົນຊາດອິດສະຣາເອນສາລະພາບຄວາມບາບ
ໃນວັນທີຊາວສີ່ຂອງເດືອນດຽວກັນນີ້ ຊາວອິດສະຣາເອນໄດ້ມາຊຸມນຸມກັນ, ຖືສິນອົດອາຫານ ແລະ ນຸ່ງເສື້ອຜ້າກະສອບເຂົ້າ ແລະ ໂຮຍຂີ້ຝຸ່ນດິນໃສ່ເທິງຫົວ. ບັນດາເຊື້ອສາຍຂອງຊົນອິດສະຣາເອນໄດ້ແຍກໂຕອອກມາຈາກຄົນຕ່າງຊາດທັງໝົດ. ພວກເຂົາຢືນປະຈຳທີ່ແລ້ວສາລະພາບຄວາມບາບຂອງຕົນ ແລະ ຄວາມຊົ່ວຮ້າຍຂອງບັນພະບຸລຸດຂອງພວກເຂົາ. ພວກເຂົາຢືນຢູ່ບ່ອນເກົ່າ ແລະ ອ່ານກົດບັນຍັດຂອງພຣະເຈົ້າຢາເວ ພຣະເຈົ້າຂອງພວກເຂົາເປັນເວລາສາມຊົ່ວໂມງ ແລະ ໃຊ້ເວລາອີກສາມຊົ່ວໂມງໃນການສາລະພາບຄວາມບາບ ແລະ ນະມັດສະການພຣະເຈົ້າຢາເວ ພຣະເຈົ້າຂອງພວກເຂົາ. ຄົນເລວີບາງຄົນຄື: ເຢຊູອາ, ບານີ, ກາດມີເອນ, ເຊບານີຢາ, ບັນນີ, ເຊເຣບີຢາ, ບານີ ແລະ ເກນານີ ພາກັນຢືນຢູ່ເທິງຂັ້ນໄດ. ພວກເຂົາຮ້ອງຂໍຕໍ່ພຣະເຈົ້າຢາເວ ພຣະເຈົ້າຂອງພວກເຂົາດ້ວຍສຽງດັງ. ແລະ ມີຄົນເລວີຄື: ເຢຊູອາ, ກາດມີເອນ, ບານີ, ຮາຊັບເນອີຢາ, ເຊເຣບີຢາ, ໂຮດີຢາ, ເຊບານີຢາ ແລະ ເປທາຮີຢາ, ເວົ້າວ່າ “ຈົ່ງຢືນຂຶ້ນ ແລະ ສັນເສີນພຣະເຈົ້າຢາເວ ພຣະເຈົ້າຂອງພວກທ່ານ ຜູ້ດຳລົງຢູ່ຕັ້ງແຕ່ນິລັນດອນຈົນເຖິງນິລັນດອນ”.1
“ຂໍຖວາຍສັນເສີນແດ່ນາມອັນຮຸ່ງເຮືອງຂອງພຣະອົງ ແລະ ຂໍໃຫ້ນາມຂອງພຣະອົງເປັນທີ່ເທີດທູນເໜືອການຍົກຍ້ອງສັນເສີນທັງໝົດ. ພຣະອົງຜູ້ດຽວທີ່ເປັນພຣະເຈົ້າຢາເວ. ພຣະອົງໄດ້ສ້າງຟ້າສະຫວັນ, ທັງສ້າງຟ້າສະຫວັນສູງສຸດ ແລະ ດວງດາວທັງໝົດໃນທ້ອງຟ້າ, ແຜ່ນດິນໂລກກັບທະເລ ແລະ ສັບພະສິ່ງທີ່ຢູ່ໃນນັ້ນ, ພຣະອົງໄດ້ໃຫ້ຊີວິດແກ່ທຸກສິ່ງ ແລະ ຊາວສະຫວັນກໍນະມັດສະການພຣະອົງ.
“ພຣະອົງເປັນພຣະເຈົ້າພຣະເຈົ້າຢາເວ ພຣະເຈົ້າຜູ້ເລືອກອັບຣາມ ແລະ ນຳເພິ່ນອອກມາຈາກເມືອງອູເຣຂອງຊາວຄານເດອາ ແລະ ຕັ້ງຊື່ໃຫ້ເພິ່ນວ່າອັບຣາຮາມ. ພຣະອົງເຫັນວ່າເພິ່ນມີຫົວໃຈທີ່ສັດຊື່ຕໍ່ພຣະອົງ ແລະ ພຣະອົງໄດ້ເຮັດຄຳໝັ້ນສັນຍາກັບເພິ່ນວ່າຈະມອບດິນແດນຂອງຊາວການາອານ, ຊາວຮິດຕີ, ຊາວອາໂມ, ຊາວເປຣີຊີ, ຊາວເຢບຸດ ແລະ ຊາວກີກາຊີໃຫ້ແກ່ເຊື້ອສາຍຂອງເພິ່ນ. ພຣະອົງເຮັດຕາມພຣະສັນຍາຂອງພຣະອົງ ເພາະພຣະອົງຊອບທຳ.
“ພຣະອົງໄດ້ເຫັນຄວາມທົນທຸກຂອງບັນພະບຸລຸດຂອງພວກຂ້ານ້ອຍໃນເອຢິບ; ພຣະອົງຟັງຄຳຮ້ອງຂໍຂອງພວກເຂົາທີ່ທະເລແດງ2 ພຣະອົງໄດ້ສະແດງໝາຍສຳຄັນ ແລະ ການອັດສະຈັນຕ່າງໆ ເພື່ອຕໍ່ສູ້ກັບຟາໂຣ, ຕໍ່ສູ້ບັນດາເຈົ້າໜ້າທີ່ຂອງຟາໂຣ ແລະ ຊາວເອຢິບທັງໝົດ. ເພາະຮູ້ວ່າຊາວເອຢິບປະຕິບັດຕໍ່ບັນພະບຸລຸດຂອງຂ້ານ້ອຍທັງຫລາຍຢ່າງຈອງຫອງ. ພຣະອົງເຮັດໃຫ້ນາມຂອງພຣະອົງໂດ່ງດັງ, ເຊິ່ງໂດ່ງດັງມາຈົນເຖິງທຸກວັນນີ້. ພຣະອົງແຍກທະເລອອກຕໍ່ໜ້າພວກເພິ່ນ, ເພື່ອບັນພະບຸລຸດຂອງພວກຂ້ານ້ອຍຈະໄດ້ຍ່າງຂ້າມເທິງດິນແຫ້ງ, ແຕ່ພຣະອົງໄດ້ກວາດສັດຕູທີ່ໄລ່ຕາມມານັ້ນລົງໃນຫ້ວງນ້ຳເລິກ, ເໝືອນດັ່ງກ້ອນຫີນຕົກສູ່ກະແສນ້ຳແຮງ. ພຣະອົງໄດ້ນຳພວກເພິ່ນໄປດ້ວຍເສົາເມກໃນເວລາກາງເວັນ ແລະ ໃຫ້ເສົາໄຟແກ່ພວກເພິ່ນໃນເວລາກາງຄືນເພື່ອໃຫ້ຄວາມສະຫວ່າງຕາມທາງທີ່ພວກເພິ່ນຈະໄປ.
“ພຣະອົງໄດ້ລົງມາເທິງພູເຂົາຊີນາຍ; ພຣະອົງໄດ້ເວົ້າກັບພວກເພິ່ນຈາກຟ້າສະຫວັນ. ພຣະອົງໄດ້ໃຫ້ກົດລະບຽບ ແລະ ກົດບັນຍັດທີ່ທ່ຽງທຳ ແລະ ຖືກຕ້ອງ, ແລ້ວໃຫ້ດຳລັດ ແລະ ຄຳສັ່ງອັນດີງາມແກ່ພວກເພິ່ນ. ພຣະອົງໄດ້ສອນພວກເພິ່ນໃຫ້ຮູ້ຈັກວັນຊະບາໂຕອັນບໍລິສຸດຂອງພຣະອົງ ແລະ ໄດ້ໃຫ້ຄຳສັ່ງ, ດຳລັດ ແລະ ກົດບັນຍັດຜ່ານທາງໂມເຊຜູ້ຮັບໃຊ້ຂອງພຣະອົງ. ເມື່ອພວກເພິ່ນຫິວ ພຣະອົງກໍໃຫ້ອາຫານຈາກຟ້າສະຫວັນ ແລະ ໃນເວລາທີ່ພວກເພິ່ນກະຫາຍຫານ້ຳ ພຣະອົງກໍໃຫ້ນ້ຳຈາກກ້ອນຫີນແກ່ພວກເພິ່ນ; ພຣະອົງໄດ້ສັ່ງໃຫ້ພວກເຂົາເຂົ້າໄປຢຶດຄອງດິນແດນທີ່ພຣະອົງໄດ້ຍົກມືປະຕິຍານວ່າຈະມອບໃຫ້ແກ່ພວກເພິ່ນ.
“ແຕ່ບັນພະບຸລຸດຂອງພວກຂ້ານ້ອຍນັ້ນຈອງຫອງ ແລະ ດື້ດ້ານ, ພວກເພິ່ນບໍ່ຍອມຟັງຄວາມຄຳສັ່ງຂອງພຣະອົງ. ພວກເພິ່ນບໍ່ຍອມຮັບຟັງ ແລະ ບໍ່ໄດ້ຈົດຈຳການອັດສະຈັນຕ່າງໆທີ່ພຣະອົງໄດ້ເຮັດຢູ່ທ່າມກາງພວກເພິ່ນ. ພວກເພິ່ນດື້ດ້ານ ແລະ ໃນການທໍລະຍົດຂອງພວກເພິ່ນ ພວກເພິ່ນໄດ້ແຕ່ງຕັ້ງຜູ້ນຳຄົນໜຶ່ງເພື່ອພວກເພິ່ນຈະພາກັນກັບໄປເປັນຂ້າທາດ. ແຕ່ພຣະອົງເປັນພຣະເຈົ້າຜູ້ໃຫ້ອະໄພ, ເຕັມລົ້ນດ້ວຍພຣະຄຸນ ແລະ ຄວາມເມດຕາສົງສານ, ບໍ່ໃຈຮ້າຍງ່າຍ ແລະ ເຕັມດ້ວຍຄວາມຮັກ. ເຫດສະນັ້ນ ພຣະອົງຈຶ່ງບໍ່ໄດ້ປະຖິ້ມພວກເພິ່ນ, ເຖິງແມ່ນວ່າຂະນະທີ່ພວກເຂົາໄດ້ສ້າງຮູບເຄົາລົບງົວຂຶ້ນສຳລັບຕົນເອງ ແລະ ປະກາດວ່າ, ‘ນີ້ຄືພະຂອງພວກເຈົ້າ, ຜູ້ທີ່ນຳພວກເຈົ້າອອກມາຈາກເອຢິບ’ ຫລື ຂະນະທີ່ພວກເພິ່ນໄດ້ໝິ່ນປະໝາດຢ່າງຮ້າຍແຮງ.
“ເພາະຄວາມເມດຕາອັນຍິ່ງໃຫຍ່ຂອງພຣະອົງ ພຣະອົງບໍ່ໄດ້ປະຖິ້ມພວກເພິ່ນໄວ້ໃນຖິ່ນແຫ້ງແລ້ງກັນດານ. ເສົາເມກຍັງຄົງນຳພວກເພິ່ນໄປຕາມທາງໃນເວລາກາງເວັນ ແລະ ເສົາໄຟຍັງສ່ອງທາງທີ່ພວກເພິ່ນຈະໄປຕະຫລອດເວລາກາງຄືນ. ພຣະອົງໄດ້ໃຫ້ພຣະວິນຍານອັນລ້ຳເລີດຂອງພຣະອົງມາສັ່ງສອນພວກເພິ່ນ. ພຣະອົງບໍ່ໄດ້ໃຫ້ມານາຂອງພຣະອົງຂາດຈາກປາກຂອງພວກເພິ່ນ ແລະ ພຣະອົງໃຫ້ນ້ຳດັບຄວາມກະຫາຍແກ່ພວກເພິ່ນ. ຕະຫລອດສີ່ສິບປີ ພຣະອົງໄດ້ລ້ຽງດູພວກເພິ່ນໃນຖິ່ນແຫ້ງແລ້ງກັນດານ; ພວກເພິ່ນບໍ່ຂັດສົນສິ່ງໃດ, ເຄື່ອງນຸ່ງຂອງພວກເພິ່ນບໍ່ໄດ້ເກົ່າ ຫລື ຫ້ຽນ ແລະ ຕີນຂອງພວກເພິ່ນກໍບໍ່ໄດ້ບວມ.
“ພຣະອົງໄດ້ມອບອານາຈັກ ແລະ ຊົນຊາດຕ່າງໆໃຫ້ແກ່ພວກເພິ່ນ, ໄດ້ມອບໃຫ້ພວກເພິ່ນແມ່ນແຕ່ຊາຍແດນທີ່ໄກທີ່ສຸດ. ພວກເພິ່ນໄດ້ຢຶດຄອງດິນແດນຂອງສີໂຫນຜູ້ເປັນກະສັດແຫ່ງເຮັດຊະໂບນ3 ແລະ ດິນແດນຂອງໂອກຜູ້ເປັນກະສັດແຫ່ງບາຊານ. ພຣະອົງໄດ້ໃຫ້ພວກເຂົາມີລູກຫລານຈຳນວນຫລວງຫລາຍເໝືອນດັ່ງດວງດາວໃນທ້ອງຟ້າ ແລະ ນຳພວກເພິ່ນມາຍັງດິນແດນທີ່ພຣະອົງໄດ້ບອກບັນພະບຸລຸດຂອງພວກເພິ່ນໃຫ້ເຂົ້າໄປ ແລະ ຄອບຄອງ. ລູກຫລານຂອງພວກເພິ່ນໄດ້ເຂົ້າໄປ ແລະ ຢຶດຄອງດິນແດນນັ້ນ. ພຣະອົງໄດ້ປາບຊາວການາອານທີ່ອາໄສຢູ່ໃນດິນແດນນັ້ນລົງຕໍ່ໜ້າພວກເພິ່ນ; ພຣະອົງໄດ້ມອບຊາວການາອານພ້ອມທັງກະສັດ ແລະ ປະຊາຊົນໃນດິນແດນນັ້ນໄວ້ໃນມືຂອງພວກເພິ່ນ, ເພື່ອຈັດການກັບພວກເຂົາຕາມທີ່ພວກເພິ່ນພໍໃຈ. ພວກເພິ່ນໄດ້ຢຶດບັນດາເມືອງທີ່ມີປ້ອມປ້ອງກັນ ແລະ ດິນແດນອັນອຸດົມສົມບູນ; ພວກເພິ່ນໄດ້ຢຶດຄອງເຮືອນທີ່ເຕັມໄປດ້ວຍຂອງດີທັງໝົດ, ມີນ້ຳສ້າງທີ່ຂຸດແລ້ວ, ສວນອະງຸ່ນ, ສວນໝາກກອກ ແລະ ຕົ້ນໝາກໄມ້ທີ່ອຸດົມສົມບູນ. ພວກເພິ່ນໄດ້ກິນຈົນອິ່ມ ແລະ ອິ່ມໜຳສຳລານ; ພວກເພິ່ນຊື່ນຊົມຍິນດີກັບຄວາມປະເສີດເລີດລ້ຳຂອງພຣະອົງ.
“ແຕ່ພວກເພິ່ນບໍ່ເຊື່ອຟັງ ແລະ ກະບົດຕໍ່ພຣະອົງ; ພວກເພິ່ນໄດ້ປະຖິ້ມກົດບັນຍັດຂອງພຣະອົງ. ພວກເພິ່ນໄດ້ຂ້າບັນດາຜູ້ທຳນວາຍຂອງພຣະອົງ ຜູ້ທີ່ໄດ້ເຕືອນພວກເພິ່ນໃຫ້ກັບຄືນມາຫາພຣະອົງ; ພວກເພິ່ນໄດ້ໝິ່ນປະໝາດພຣະອົງຢ່າງຮ້າຍແຮງ. ດັ່ງນັ້ນ ພຣະອົງຈຶ່ງໄດ້ມອບພວກເພິ່ນໄວ້ໃນມືຂອງສັດຕູ ຜູ້ທີ່ກົດຂີ່ຂົ່ມເຫັງພວກເພິ່ນ. ແຕ່ເມື່ອພວກເພິ່ນຖືກກົດຂີ່ຂົ່ມເຫັງ ພວກເພິ່ນກໍຮ້ອງຂໍຕໍ່ພຣະອົງ. ພຣະອົງໄດ້ຍິນສຽງຈາກຟ້າສະຫວັນ ແລະ ໄດ້ມອບຜູ້ຊ່ວຍກູ້ມາຊ່ວຍພວກເພິ່ນໃຫ້ພົ້ນຈາກມືຂອງບັນດາສັດຕູຂອງພວກເພິ່ນດ້ວຍຄວາມເມດຕາສົງສານຂອງພຣະອົງ.
“ແຕ່ພໍທັນທີທີ່ພວກເພິ່ນໄດ້ພັກສະຫງົບ, ພວກເພິ່ນກໍເຮັດສິ່ງທີ່ຊົ່ວຮ້າຍໃນສາຍຕາຂອງພຣະອົງອີກ. ພຣະອົງຈຶ່ງໄດ້ຖິ້ມພວກເຂົາໄວ້ໃນມືຂອງສັດຕູຂອງພວກເພິ່ນ ເພື່ອໃຫ້ສັດຕູປົກຄອງພວກເພິ່ນ ແລະ ເມື່ອພວກເພິ່ນຮ້ອງຂໍຕໍ່ພຣະອົງອີກ ພຣະອົງກໍໄດ້ຍິນຈາກຟ້າສະຫວັນ ແລະ ພຣະອົງໄດ້ກອບກູ້ພວກເພິ່ນທຸກຄັ້ງດ້ວຍຄວາມເມດຕາສົງສານຂອງພຣະອົງ.
“ພຣະອົງໄດ້ເຕືອນພວກເພິ່ນໃຫ້ກັບຄືນມາຍັງກົດບັນຍັດຂອງພຣະອົງ, ແຕ່ພວກເພິ່ນຈອງຫອງ ແລະ ບໍ່ເຊື່ອຟັງຄຳສັ່ງຂອງພຣະອົງ. ພວກເພິ່ນໄດ້ເຮັດບາບຕໍ່ຂໍ້ປະຕິບັດຂອງພຣະອົງ ເຊິ່ງພຣະອົງໄດ້ກ່າວໄວ້ວ່າ, ‘ຖ້າຜູ້ໃດເຊື່ອຟັງພວກເພິ່ນ ຜູ້ນັ້ນຈະມີຊີວິດຢູ່ໂດຍພວກເພິ່ນ’. ພວກເພິ່ນໄດ້ຫັນຫລັງຈາກພຣະອົງຢ່າງດື້ດ້ານ, ແຂງກະດ້າງ ແລະ ບໍ່ຍອມຟັງ. ພຣະອົງໄດ້ອົດທົນກັບພວກເພິ່ນມາຕະຫລອດຫລາຍປີ. ພຣະອົງໄດ້ເຕືອນສະຕິພວກເຂົາໂດຍພຣະວິນຍານຂອງພຣະອົງຜ່ານທາງບັນດາຜູ້ທຳນວາຍຂອງພຣະອົງ. ແຕ່ພວກເພິ່ນກໍບໍ່ສົນໃຈ, ດັ່ງນັ້ນ ພຣະອົງຈຶ່ງມອບພວກເພິ່ນໄວ້ໃນມືຂອງຊົນຊາດທີ່ໃກ້ຄຽງ. ແຕ່ດ້ວຍຄວາມເມດຕາອັນຍິ່ງໃຫຍ່ຂອງພຣະອົງ ພຣະອົງບໍ່ໄດ້ທຳລາຍພວກເພິ່ນໃຫ້ຈິບຫາຍ ຫລື ປະຖິ້ມພວກເພິ່ນໄປ. ເພາະພຣະອົງເປັນພຣະເຈົ້າຜູ້ເຕັມໄປດ້ວຍພຣະຄຸນ ແລະ ຄວາມເມດຕາ.
“ເຫດສະນັ້ນ ບັດນີ້, ຂ້າແດ່ພຣະເຈົ້າຂອງພວກຂ້ານ້ອຍ ພຣະເຈົ້າຜູ້ຍິ່ງໃຫຍ່, ມີລິດອຳນາດ ແລະ ໜ້າຢ້ານກົວ, ຜູ້ຮັກສາຄຳໝັ້ນສັນຍາແຫ່ງຄວາມຮັກຂອງພຣະອົງ, ຂໍຢ່າໃຫ້ຄວາມທຸກຍາກລຳບາກທັງໝົດນີ້ເປັນສິ່ງເລັກນ້ອຍໃນສາຍຕາຂອງພຣະອົງ ຄວາມທຸກຍາກທີ່ເກີດຂຶ້ນກັບພວກຂ້ານ້ອຍ, ບັນດາກະສັດ ແລະ ຜູ້ນຳຂອງພວກຂ້ານ້ອຍ, ບັນດາປະໂລຫິດ ແລະ ຜູ້ທຳນວາຍທັງຫລາຍຂອງພວກຂ້ານ້ອຍ, ບັນພະບຸລຸດຂອງພວກຂ້ານ້ອຍ ແລະ ປະຊາຊົນຂອງພຣະອົງ, ຕັ້ງແຕ່ສະໄໝຂອງບັນດາກະສັດແຫ່ງອັດຊີເຣຍຈົນເຖິງທຸກວັນນີ້. ທັງໝົດທີ່ເກີດຂຶ້ນກັບພວກຂ້ານ້ອຍນັ້ນ ພຣະອົງຍັງຄົງທ່ຽງທຳ; ພຣະອົງເຮັດທຸກຢ່າງດ້ວຍຄວາມສັດຊື່, ໃນຂະນະທີ່ພວກຂ້ານ້ອຍໄດ້ເຮັດຊົ່ວ. ບັນດາກະສັດ, ຜູ້ນຳ, ປະໂລຫິດ ແລະ ບັນພະບຸລຸດຂອງພວກຂ້ານ້ອຍບໍ່ໄດ້ປະຕິບັດຕາມກົດບັນຍັດຂອງພຣະອົງ; ພວກເພິ່ນກໍບໍ່ເອົາໃຈໃສ່ຕໍ່ຄຳສັ່ງຂອງພຣະອົງ ຫລື ກົດລະບຽບທີ່ພຣະອົງໄດ້ເຕືອນພວກເພິ່ນໃຫ້ປະຕິບັດຕາມ. ເຖິງແມ່ນວ່າຂະນະທີ່ພວກເພິ່ນຢູ່ໃນອານາຈັກຂອງຕົນ, ກຳລັງຊື່ນຊົມຍິນດີໃນຄວາມດີເລີດທີ່ພຣະອົງມີຕໍ່ພວກເພິ່ນໃນດິນແດນອັນກວ້າງຂວາງ ແລະ ອຸດົມສົມບູນທີ່ພຣະອົງໄດ້ມອບໃຫ້ແກ່ພວກເພິ່ນ, ພວກເພິ່ນບໍ່ໄດ້ບົວລະບັດຮັບໃຊ້ພຣະອົງ ຫລື ຫັນຈາກທາງຊົ່ວຮ້າຍຂອງພວກເພິ່ນ.
“ແຕ່ເບິ່ງແມ, ວັນນີ້ພວກຂ້ານ້ອຍໄດ້ຕົກເປັນຂ້າທາດໃນດິນແດນທີ່ພຣະອົງໄດ້ມອບໃຫ້ແກ່ບັນດາບັນພະບຸລຸດຂອງພວກຂ້ານ້ອຍ ເພື່ອພວກເພິ່ນຈະໄດ້ກິນພືດຜົນຈາກດິນແດນນັ້ນ ແລະ ສິ່ງດີງາມທັງຫລາຍຂອງດິນແດນນັ້ນ. ເພາະຄວາມບາບທັງຫລາຍຂອງພວກຂ້ານ້ອຍ ການເກັບກ່ຽວຜົນລະປູກຈຳນວນຫລວງຫລາຍຈຶ່ງຕົກເປັນຂອງບັນດາກະສັດທີ່ພຣະອົງໄດ້ແຕ່ງຕັ້ງໄວ້ໃຫ້ຢູ່ເໜືອພວກຂ້ານ້ອຍ. ພວກເຂົາໄດ້ປົກຄອງເໜືອຮ່າງກາຍຂອງພວກຂ້ານ້ອຍ ແລະ ປົກຄອງເໜືອສັດຂອງພວກຂ້ານ້ອຍຕາມທີ່ພວກເຂົາພໍໃຈ. ພວກຂ້ານ້ອຍຈຶ່ງທຸກໃຈຫລາຍ.
ຂໍ້ຕົກລົງຂອງປະຊາຊົນ
“ດ້ວຍເຫດນີ້ ພວກຂ້ານ້ອຍຈຶ່ງຂໍເຮັດຂໍ້ຕົກລົງອັນໝັ້ນຄົງ ແລະ ບັນທຶກໄວ້, ບັນດາຜູ້ນຳ, ຄົນເລວີ ແລະ ປະໂລຫິດຂອງພວກຂ້ານ້ອຍຈະປະທັບຕາຂອງພວກເຂົາຮັບຮອງໄວ້”.
Source notes (3)
- Footnote ຫລື ພຣະເຈົ້າຂອງພວກທ່ານຕະຫລອດໄປເປັນນິດ
- Footnote ຄື ທະເລຕົ້ນອໍ້
- Footnote ສຳເນົາຕົ້ນສະບັບພາສາເຮັບເຣີສ່ວນໃຫຍ່ວ່າ ດິນແດນຂອງ ສີໂຫນ ນັ້ນຄືດິນແດນຂອງກະສັດແຫ່ງເຮັດຊະໂບນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.