Biblica® Open Lao Contemporary Version
ເນເຫມີຢາ 8
ປະຊາຊົນທັງປວງກໍມາຊຸມນຸມຢ່າງເປັນນ້ຳໜຶ່ງໃຈດຽວກັນຢູ່ທີ່ເດີ່ນຕໍ່ໜ້າປະຕູນ້ຳ. ພວກເຂົາໄດ້ຂໍໃຫ້ເອຊະຣາຄູສອນກົດບັນຍັດໃຫ້ນຳເອົາກົດບັນຍັດຂອງໂມເຊ ເຊິ່ງພຣະເຈົ້າຢາເວໄດ້ມອບໃຫ້ອິດສະຣາເອນນັ້ນອອກມາ.
ດັ່ງນັ້ນ ໃນມື້ທີໜຶ່ງຂອງເດືອນທີເຈັດ ປະໂລຫິດເອຊະຣາຈຶ່ງນຳເອົາມ້ວນກົດບັນຍັດມາຕໍ່ໜ້າປະຊາຊົນທັງໝົດ, ເຊິ່ງມີທັງຊາຍ ແລະ ຍິງ ແລະ ທຸກຄົນທີ່ສາມາດເຂົ້າໃຈໄດ້. ເອຊະຣາໄດ້ອ່ານກົດບັນຍັດນັ້ນສຽງດັງຕັ້ງແຕ່ຕອນເຊົ້າຈົນເຖິງຕອນທ່ຽງ ຂະນະທີ່ເພິ່ນຫັນໜ້າໄປຫາເດີ່ນທີ່ຢູ່ຕໍ່ໜ້າປະຕູນ້ຳ ຕໍ່ໜ້າຊາຍຍິງ ແລະ ຄົນທັງຫລາຍທີ່ສາມາດເຂົ້າໃຈໄດ້. ປະຊາຊົນທັງໝົດຕ່າງກໍພາກັນຕັ້ງໃຈຟັງໜັງສືກົດບັນຍັດນັ້ນ.
ຄູສອນກົດບັນຍັດເອຊະຣາກໍໄດ້ຢືນຢູ່ເທິງເວທີໄມ້ ທີ່ເຮັດຂຶ້ນເພື່ອໂອກາດນີ້ໂດຍສະເພາະ. ຜູ້ທີ່ຢູ່ຂ້າງຂວາມືຂອງເພິ່ນມີດັ່ງນີ້: ມັດຕີທີຢາ, ເຊມາ, ອານາອີຢາ, ອູຣິຢາ, ຮິນກີຢາ ແລະ ມາອາເສອີຢາ ແລະ ທາງຊ້າຍຂອງເພິ່ນມີດັ່ງນີ້: ເປດາອີຢາ, ມີຊາເອນ, ມັນກີຢາ, ຮາຊຸມ, ຮັດຊະບັດດານາ, ເຊກາຣີຢາ ແລະ ເມຊຸນລຳ.
ເອຊະຣາໄດ້ເປີດໜັງສືອອກ. ທຸກຄົນສາມາດເຫັນເພິ່ນໄດ້ ເພາະເພິ່ນຢືນຢູ່ສູງກວ່າປະຊາຊົນ ແລະ ຂະນະທີ່ເພິ່ນພືໜັງສືມ້ວນອອກ, ປະຊາຊົນທັງໝົດກໍລຸກຢືນຂຶ້ນ. ເອຊະຣາໄດ້ສັນເສີນພຣະເຈົ້າຢາເວ, ພຣະເຈົ້າຜູ້ຍິ່ງໃຫຍ່ ແລະ ປະຊາຊົນທັງໝົດກໍຍົກມືຂຶ້ນ ແລະ ຕອບວ່າ “ອາແມນ! ອາແມນ!” ຫລັງຈາກນັ້ນ ພວກເຂົາກໍໝອບໜ້າລົງທີ່ພື້ນນະມັດສະການພຣະເຈົ້າຢາເວ.
ຊາວເລວີມີດັ່ງນີ້: ເຢຊູອາ, ບານີ, ເຊເຣບີຢາ, ຢາມິນ, ອັກກຸບ, ຊັບເບທາຍ, ໂຮດີຢາ, ມາອາເສອີຢາ, ເກລີຕາ, ອາຊາຣີຢາ, ໂຢຊາບັດ, ຮານານ ແລະ ເປລາອີຢາ ໄດ້ສອນກົດບັນຍັດໃຫ້ປະຊາຊົນຂະນະທີ່ປະຊາຊົນທັງຫລາຍຢືນຢູ່ທີ່ນັ້ນ. ພວກເຂົາໄດ້ອ່ານຈາກໜັງສືກົດບັນຍັດຂອງພຣະເຈົ້າ, ມີການແປ ແລະ ອະທິບາຍຄວາມຫມາຍເພື່ອໃຫ້ປະຊາຊົນເຂົ້າໃຈສິ່ງທີ່ອ່ານນັ້ນ.
ເມື່ອທຸກຄົນໄດ້ຍິນເນື້ອໃນໃນກົດບັນຍັດກໍພາກັນຮ້ອງໄຫ້, ດັ່ງນັ້ນ ເນເຫມີຢາຜູ້ທີ່ເປັນຜູ້ປົກຄອງ ແລະ ປະໂລຫິດເອຊະຣາຜູ້ທີ່ເປັນຄູສອນກົດບັນຍັດ ແລະ ຄົນເລວີຜູ້ທີ່ກຳລັງສອນປະຊາຊົນຈຶ່ງໄດ້ເວົ້າກັບພວກເຂົາວ່າ: “ມື້ນີ້ເປັນວັນບໍລິສຸດແດ່ພຣະເຈົ້າຢາເວ ພຣະເຈົ້າຂອງພວກທ່ານ. ຢ່າຄ່ຳຄວນ ຫລື ຮ້ອງໄຫ້ເລີຍ”.
ເນເຫມີຢາໄດ້ເວົ້າວ່າ, “ຈົ່ງໄປກິນອາຫານ ແລະ ດື່ມເຄື່ອງດື່ມທີ່ມີລົດຫວານໃຫ້ອິ່ມໜຳສຳລານ ແລະ ສົ່ງໄປໃຫ້ບັນດາຄົນທີ່ບໍ່ໄດ້ຕຽມອັນໃດມາ. ວັນນີ້ເປັນວັນບໍລິສຸດແດ່ອົງພຣະຜູ້ເປັນເຈົ້າຂອງພວກເຮົາ. ຢ່າໂສກເສົ້າ ເພາະຄວາມຊື່ນຊົມຍິນດີໃນພຣະເຈົ້າຢາເວເປັນກຳລັງຂອງພວກທ່ານ”.
ຄົນເລວີເຮັດໃຫ້ປະຊາຊົນທັງໝົດສະຫງົບລົງໂດຍເວົ້າວ່າ, “ຈົ່ງມິດງຽບ, ເພາະວັນນີ້ເປັນວັນບໍລິສຸດ. ຢ່າໂສກເສົ້າ”.
ແລ້ວປະຊາຊົນທັງໝົດຈຶ່ງອອກໄປກິນ ແລະ ດື່ມ, ສົ່ງອາຫານສ່ວນຕ່າງໆ ແລະ ສະເຫລີມສະຫລອງກັນດ້ວຍຄວາມຊື່ນຊົມຍິນດີອັນໃຫຍ່ ເພາະດຽວນີ້ພວກເຂົາໄດ້ເຂົ້າໃຈຖ້ອຍຄຳທີ່ໄດ້ຮັບຟັງນັ້ນແລ້ວ.
ໃນວັນທີສອງຂອງເດືອນນັ້ນ, ຫົວໜ້າຄອບຄົວທຸກຄົນພ້ອມດ້ວຍປະໂລຫິດ ແລະ ຄົນເລວີ ໄດ້ພາກັນມາຮວມກັນອ້ອມເອຊະຣາຜູ້ທີ່ເປັນຄູສອນກົດບັນຍັດເພື່ອເອົາໃຈໃສ່ຕໍ່ເນື້ອໃນໃນກົດບັນຍັດ. ພວກເຂົາໄດ້ພົບຂໍ້ຄວາມທີ່ຂຽນໄວ້ໃນກົດບັນຍັດ ເຊິ່ງພຣະເຈົ້າຢາເວໄດ້ສັ່ງໄວ້ຜ່ານທາງໂມເຊວ່າໃຫ້ຊາວອິດສະຣາເອນອາໄສຢູ່ໃນຕູບຊົ່ວຄາວຕະຫລອດເທດສະການໃນເດືອນທີເຈັດ ແລະ ພວກເຂົາຄວນປະກາດເລື່ອງນີ້ ແລະ ກະຈາຍເລື່ອງນີ້ໃຫ້ໄປທົ່ວເມືອງຕ່າງໆ ແລະ ໃນເຢຣູຊາເລັມວ່າ: “ຈົ່ງອອກໄປເກັບງ່າໝາກກອກ, ຕົ້ນໝາກກອກປ່າ, ຕົ້ນໄມ້ຫອມ, ງ່າຕານ ແລະ ງ່າຂອງຕົ້ນໄມ້ໃບດົກອື່ນໆຢູ່ທີ່ໂນນພູ ເພື່ອສ້າງຕູບ” ຕາມທີ່ໄດ້ບັນທຶກໄວ້.1
ດັ່ງນັ້ນ ປະຊາຊົນຈຶ່ງອອກໄປເກັບເອົາງ່າໄມ້ມາ ແລະ ສ້າງຕູບຂຶ້ນສຳລັບຕົນເອງຢູ່ເທິງດາດຟ້າຫລັງຄາເຮືອນຂອງຕົນ, ຢູ່ຕາມເດີ່ນບ້ານຂອງພວກເຂົາ, ຕາມເດີ່ນວິຫານຂອງພຣະເຈົ້າ, ຕາມເດີ່ນຂ້າງປະຕູນ້ຳ ແລະ ຕາມເດີ່ນຂ້າງປະຕູເອຟຣາອິມ. ປະຊາຊົນທັງໝົດທີ່ກັບມາຈາກການເປັນຊະເລີຍກໍໄດ້ສ້າງຕູບ ແລະ ອາໄສຢູ່ໃນຕູບນັ້ນ. ນັບຕັ້ງແຕ່ສະໄໝຂອງໂຢຊວຍ ລູກຊາຍນູນຈົນເຖິງວັນນັ້ນ, ຊາວອິດສະຣາເອນບໍ່ໄດ້ສະເຫລີມສະຫລອງກັນຢ່າງນີ້ເລີຍ. ພວກເຂົາຈຶ່ງຊື່ນຊົມຍິນດີຫລາຍ.
ວັນຕໍ່ມາ, ຈາກວັນທຳອິດຈົນເຖິງວັນສຸດທ້າຍ, ເອຊະຣາໄດ້ອ່ານກົດບັນຍັດຂອງພຣະເຈົ້າ. ພວກເຂົາໄດ້ສະເຫລີມສະຫລອງເທດສະການເປັນເວລາເຈັດວັນ ແລະ ໃນວັນທີແປດກໍມີການປະຊຸມປະຊາຊົນຕາມລະບຽບທີ່ກຳນົດ.
Source notes (1)
- Footnote ລລວ 23:37-40
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.