Biblica® Open Lao Contemporary Version
ເນເຫມີຢາ 2
ກະສັດອາກຕາເຊເຊັດໄດ້ສົ່ງເນເຫມີຢາໄປທີ່ເຢຣູຊາເລັມ
ໃນເດືອນນີຊານ ປີທີຊາວຂອງກະສັດອາກຕາເຊເຊັດ, ເມື່ອເວລາທີ່ເຫລົ້າອະງຸ່ນຖືກນຳມາຖວາຍແກ່ພຣະອົງ, ຂ້ານ້ອຍກໍເອົາເຫລົ້າອະງຸ່ນນັ້ນມາ ແລະ ຖວາຍເຫລົ້າອະງຸ່ນນັ້ນແກ່ກະສັດ. ຂ້ານ້ອຍບໍ່ເຄີຍໂສກເສົ້າໃນເວລາທີ່ຢູ່ຕໍ່ໜ້າພຣະອົງມາກ່ອນເລີຍ. ດັ່ງນັ້ນ ກະສັດຈຶ່ງໄດ້ຖາມຂ້ານ້ອຍວ່າ, “ເປັນຫຍັງໃບໜ້າຂອງເຈົ້າຈຶ່ງໂສກເສົ້າແທ້ໃນເມື່ອເຈົ້າກໍບໍ່ໄດ້ເຈັບປ່ວຍອັນໃດ? ຄົງບໍ່ມີເລື່ອງອັນໃດນອກຈາກຈະທຸກໃຈ”.
ຂ້ານ້ອຍຕົກໃຈຢ້ານຫລາຍ, ແຕ່ຂ້ານ້ອຍກໍໄດ້ເວົ້າກັບກະສັດວ່າ, “ຂໍໃຫ້ກະສັດຈົ່ງຈະເລີນ! ໃບໜ້າຂອງຂ້ານ້ອຍຈະບໍ່ໂສກເສົ້າໄດ້ຢ່າງໃດໃນເມື່ອເມືອງທີ່ຝັງສົບຂອງບັນພະບຸລຸດຂອງຂ້ານ້ອຍຕົກຢູ່ໃນສະພາບຫັກພັງ ແລະ ປະຕູເມືອງກໍຖືກທຳລາຍດ້ວຍໄຟ?”
ກະສັດໄດ້ເວົ້າກັບຂ້ານ້ອຍວ່າ “ເຈົ້າຕ້ອງການສິ່ງໃດ?”
ຂ້ານ້ອຍຈຶ່ງອະທິຖານຕໍ່ພຣະເຈົ້າແຫ່ງຟ້າສະຫວັນ, ແລະ ຂ້ານ້ອຍໄດ້ຕອບກະສັດວ່າ, “ຖ້າຫາກເປັນທີ່ພໍໃຈຂອງກະສັດ ແລະ ຖ້າຫາກຜູ້ຮັບໃຊ້ຂອງທ່ານເປັນທີ່ພໍໃຈໃນສາຍຕາຂອງເພິ່ນ, ກໍຂໍໃຫ້ເພິ່ນໄດ້ສົ່ງຂ້ານ້ອຍໄປຍັງເມືອງໃນຢູດາຍ ເຊິ່ງເປັນບ່ອນຝັງສົບຂອງບັນພະບຸລຸດຂອງຂ້ານ້ອຍເພື່ອຈະໄດ້ສ້າງເມືອງນັ້ນຂຶ້ນໃໝ່”.
ແລ້ວກະສັດພ້ອມດ້ວຍລາຊີນີທີ່ນັ່ງຢູ່ທາງຂ້າງເພິ່ນນັ້ນກໍໄດ້ຖາມຂ້ານ້ອຍວ່າ, “ເຈົ້າຈະໃຊ້ເວລາດົນປານໃດ? ແລະ ເຈົ້າຈະກັບມາເມື່ອໃດ?” ກະສັດພໍໃຈທີ່ຈະສົ່ງຂ້ານ້ອຍໄປ, ດັ່ງນັ້ນ ຂ້ານ້ອຍຈຶ່ງໄດ້ກຳນົດເວລາ.
ຂ້ານ້ອຍໄດ້ເວົ້າກັບເພິ່ນວ່າ, “ຖ້າເປັນທີ່ພໍໃຈຂອງກະສັດ, ຂ້ານ້ອຍຂໍຈົດໝາຍໄປເຖິງບັນດາຜູ້ປົກຄອງແຂວງທາງພາກຕາເວັນຕົກຂອງແມ່ນ້ຳເອີຟຣັດ, ເພື່ອວ່າພວກເຂົາຈະໄດ້ຊ່ວຍຂ້ານ້ອຍໃຫ້ຜ່ານເຂດແດນຈົນໄປເຖິງຢູດາຍໄດ້ຢ່າງປອດໄພ. ແລະ ຂ້ານ້ອຍຂໍຈົດໝາຍໄປເຖິງອາສັບ ຜູ້ຮັກສາປ່າໄມ້ຂອງຫລວງ, ເພື່ອເພິ່ນຈະໄດ້ມອບໄມ້ສຳລັບເຮັດຄານປະຕູປ້ອມໃກ້ວິຫານ ແລະ ສຳລັບກຳແພງເມືອງກັບສຳລັບເຮັດບ່ອນພັກທີ່ຂ້ານ້ອຍຈະອາໄສໃຫ້ຂ້ານ້ອຍ” ແລະ ກະສັດຈຶ່ງໄດ້ອະນຸມັດຕາມຄຳຂໍຂອງຂ້ານ້ອຍ, ເພາະມືອັນເຕັມດ້ວຍພຣະຄຸນຂອງພຣະເຈົ້າຢູ່ເໜືອຂ້ານ້ອຍ. ຂ້ານ້ອຍຈຶ່ງໄປພົບບັນດາຜູ້ປົກຄອງແຂວງທາງພາກຕາເວັນຕົກຂອງແມ່ນ້ຳເອີຟຣັດ ແລະ ໄດ້ມອບຈົດໝາຍໃຫ້ພວກເພິ່ນ ແລະ ກະສັດກໍຍັງໄດ້ສົ່ງບັນດານາຍທະຫານ ແລະ ກອງທະຫານມ້າໄປກັບຂ້ານ້ອຍດ້ວຍ.
ເມື່ອສານບັນລັດ ຊາວໂຮໂຣນ ແລະ ໂຕບີຢາຜູ້ຮັບໃຊ້ຊາວອຳໂມນ ໄດ້ຍິນເລື່ອງນີ້ກໍບໍ່ພໍໃຈທີ່ມີຄົນມາສົ່ງເສີມສະຫວັດດີການຂອງຊາວອິດສະຣາເອນ.
ເນເຫມີຢາສຳຫລວດກຳແພງເຢຣູຊາເລັມ
ຫລັງຈາກທີ່ຂ້ານ້ອຍໄດ້ມາຮອດເຢຣູຊາເລັມ ແລະ ຫລັງຈາກທີ່ພັກຢູ່ທີ່ນັ້ນໄດ້ສາມວັນ ຂ້ານ້ອຍພ້ອມກັບຄົນອື່ນໆອີກສອງສາມຄົນກໍອອກໄປໃນເວລາກາງຄືນ. ຂ້ານ້ອຍບໍ່ໄດ້ບອກຜູ້ໃດກ່ຽວກັບສິ່ງທີ່ພຣະເຈົ້າໄດ້ໃສ່ໄວ້ໃນໃຈຂ້ານ້ອຍໃຫ້ເຮັດເພື່ອເຢຣູຊາເລັມ. ຂ້ານ້ອຍບໍ່ໄດ້ນຳສັດອື່ນໄປນຳນອກຈາກໂຕທີ່ຂ້ານ້ອຍຂີ່ໄປ.
ຂ້ານ້ອຍອອກໄປທາງປະຕູຮ່ອມພູໃນເວລາກາງຄືນ ມຸ່ງໜ້າໄປທີ່ນ້ຳສ້າງໝາໄນ1 ແລະ ປະຕູກອງຂີ້ເຫຍື້ອ, ໄດ້ກວດເບິ່ງກຳແພງເຢຣູຊາເລັມທີ່ຫັກພັງລົງ ແລະ ປະຕູທີ່ຖືກທຳລາຍດ້ວຍໄຟ. ຫລັງຈາກນັ້ນ ຂ້ານ້ອຍໄດ້ມຸ່ງໜ້າໄປຮອດປະຕູນ້ຳພຸ ແລະ ໄປຮອດສະຂອງກະສັດ, ແຕ່ສັດທີ່ຂ້ານ້ອຍຂີ່ບໍ່ສາມາດຜ່ານຊ່ອງຫັກພັງນັ້ນໄປໄດ້; ຂ້ານ້ອຍຈຶ່ງຂຶ້ນໄປເທິງຮ່ອມພູໃນເວລາກາງຄືນເພື່ອສຳຫລວດກຳແພງ. ສຸດທ້າຍ, ຂ້ານ້ອຍກໍໄດ້ກັບຄືນມາ ແລະ ເຂົ້າຜ່ານປະຕູຮ່ອມພູຄືເກົ່າ. ບັນດາຜູ້ຮັບໃຊ້ໃນວັງບໍ່ຮູ້ວ່າຂ້ານ້ອຍໄປຢູ່ໃສ ຫລື ເຮັດຫຍັງຢູ່ ເພາະຂ້ານ້ອຍຍັງບໍ່ໄດ້ເວົ້າສິ່ງໃດກັບຊາວຢິວ ຫລື ພວກປະໂລຫິດ ຫລື ພວກເຈົ້ານາຍ ຫລື ຜູ້ຮັບໃຊ້ ຫລື ຄົນອື່ນໆທີ່ຈະເຮັດວຽກ.
ແລ້ວຂ້ານ້ອຍບອກພວກເພິ່ນວ່າ, “ພວກທ່ານກໍເຫັນແລ້ວວ່າພວກເຮົາທຸກໃຈເພາະເລື່ອງໃດ, ເຢຣູຊາເລັມກໍເຫລືອແຕ່ຊາກຫັກພັງ, ປະຕູເມືອງກໍຖືກເຜົາດ້ວຍໄຟ. ມາ, ໃຫ້ພວກເຮົາມາຊ່ວຍກັນສ້າງກຳແພງເຢຣູຊາເລັມຂຶ້ນໃໝ່ ແລະ ພວກເຮົາຈະໄດ້ບໍ່ຕ້ອງອັບອາຍອີກຕໍ່ໄປ”. ຂ້ານ້ອຍຍັງໄດ້ເລົ່າເລື່ອງທີ່ມືແຫ່ງພຣະຄຸນຂອງພຣະເຈົ້າຢູ່ເໜືອຂ້ານ້ອຍ ແລະ ສິ່ງທີ່ກະສັດໄດ້ກ່າວກັບຂ້ານ້ອຍໃຫ້ພວກເພິ່ນຟັງ.
ພວກເພິ່ນໄດ້ຕອບວ່າ “ໃຫ້ພວກເຮົາເລີ່ມງານສ້ອມແປງນີ້”. ດັ່ງນັ້ນ ພວກເພິ່ນຈຶ່ງເລີ່ມເຮັດວຽກທີ່ມີຄຸນຄ່ານີ້.
ແຕ່ເມື່ອສານບັນລັດ ຊາວໂຮໂຣນ, ໂຕບີຢາຜູ້ຮັບໃຊ້ ເຊິ່ງເປັນຊາວອຳໂມນ ແລະ ເກເຊມ ຊາວອາຣັບໄດ້ຍິນເລື່ອງນີ້ ພວກເຂົາກໍພາກັນເຢາະເຢີ້ຍ ແລະ ດູຖູກພວກເຮົາ. ພວກເຂົາໄດ້ຖາມວ່າ, “ພວກເຈົ້າກຳລັງເຮັດຫຍັງ? ພວກເຈົ້າຈະກະບົດຕໍ່ກະສັດບໍ?”
ຂ້ານ້ອຍຈຶ່ງຕອບພວກເຂົາວ່າ, “ພຣະເຈົ້າແຫ່ງຟ້າສະຫວັນຈະຊ່ວຍໃຫ້ພວກເຮົາເຮັດສຳເລັດ. ພວກເຮົາຜູ້ຮັບໃຊ້ຂອງພຣະອົງຈະເລີ່ມງານກໍ່ສ້າງ, ສ່ວນພວກທ່ານແລ້ວ, ພວກທ່ານແມ່ນບໍ່ມີສ່ວນກ່ຽວຂ້ອງອັນໃດໃນເຢຣູຊາເລັມ ຫລື ສິດຮຽກຮ້ອງ ຫລື ສິດທິທາງປະຫວັດສາດໃນເຢຣູຊາເລັມ”.
Source notes (1)
- Footnote ຫລື ງູ ຫລື ມັງກອນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.