Biblica® Open Lao Contemporary Version
ເນເຫມີຢາ 3
ຜູ້ສ້າງກຳແພງເມືອງ
ມະຫາປະໂລຫິດເອລີອາຊິບ ແລະ ບັນດາເພື່ອນຂອງຕົນທີ່ເປັນປະໂລຫິດ ຈຶ່ງໄດ້ລົງມືເຮັດວຽກ ແລະ ສ້າງປະຕູແກະຄືນໃໝ່. ພວກເຂົາໄດ້ເຮັດພິທີຖວາຍປະຕູ ແລະ ຕິດຕັ້ງປະຕູໃຫ້ເຂົ້າທີ່, ໂດຍສ້າງໄປໄກຈົນເຖິງຫໍຄອຍໜຶ່ງຮ້ອຍ, ເຊິ່ງພວກເຂົາເຮັດພິທີຖວາຍ ແລະ ສ້າງໄປໄກຈົນເຖິງຫໍຄອຍຮານາເນນ. ຊາວເມືອງເຢຣິໂກໄດ້ສ້າງສ່ວນຕໍ່ໄປ ແລະ ຊັກກູເຣ ລູກຊາຍຂອງອິມຣີກໍສ້າງສ່ວນຖັດໄປຈາກພວກເຂົາ.
ບັນດາລູກຊາຍຂອງຮັດເສນາຢາສ້າງປະຕູປາຄືນໃໝ່. ພວກເຂົາໄດ້ວາງໄມ້ຄານ, ຕິດຕັ້ງປະຕູ, ໄລປະຕູ ແລະ ກົງເຫລັກໃຫ້ເຂົ້າທີ່. ເມເຣໂມດ ລູກຊາຍຂອງອູຣິຢາ, ຜູ້ເປັນລູກຊາຍຂອງຮັກກົກ ໄດ້ສ້ອມແປງບ່ອນທີ່ຢູ່ຖັດໄປ. ເມຊຸນລຳ ລູກຊາຍຂອງເບເຣກີຢາ, ຜູ້ເປັນລູກຊາຍຂອງເມເຊຊາເບນ ໄດ້ສ້ອມແປງບ່ອນທີ່ຢູ່ຖັດໄປຈາກລາວ ແລະ ຊາດົກ ລູກຊາຍຂອງບາອານາ ໄດ້ສ້ອມແປງບ່ອນທີ່ຢູ່ຖັດໄປຈາກລາວເໝືອນກັນ. ສ່ວນຕໍ່ໄປແມ່ນຊາວເມືອງເຕກົວ, ແຕ່ບັນດາຂຸນນາງຂອງພວກເຂົາບໍ່ຍອມເຮັດວຽກຕາມຄຳສັ່ງຂອງຜູ້ເບິ່ງແຍງ.1
ໂຢອີອາດາ ລູກຊາຍຂອງປາເສຢາ ແລະ ເມຊຸນລຳ ລູກຊາຍຂອງເບໂສເດອີຢາ ໄດ້ສ້ອມແປງປະຕູເຢຊານາ.2 ພວກເຂົາວາງຄານ, ຕິດຕັ້ງປະຕູ, ໄລປະຕູ ແລະ ກົງເຫລັກໃຫ້ເຂົ້າທີ່. ຖັດໄປນັ້ນແມ່ນຂອງຄົນທີ່ມາຈາກກີເບໂອນ ແລະ ມີຊະປາ ຄືເມລາຕີຢາ ເປັນຄົນທີ່ມາຈາກກີເບໂອນ ແລະ ເບໂອນ ເປັນຄົນມາຈາກເມໂລໂນດ ໄດ້ສ້ອມແປງສະຖານທີ່ຕ່າງໆທີ່ຢູ່ໃຕ້ອຳນາດຂອງຜູ້ປົກຄອງອີກຟາກໜຶ່ງຂອງແມ່ນ້ຳຢູຟາເຕ. ອຸດຊີເອນ ລູກຊາຍຂອງຮາກຮາອີຢາ ເຊິ່ງເປັນຜູ້ໜຶ່ງໃນບັນດາຊ່າງຄຳ ກໍໄດ້ສ້ອມແປງສ່ວນຖັດໄປ. ຮານານີຢາ ກໍເປັນຄົນໜຶ່ງໃນບັນດາຜູ້ປຸງນ້ຳຫອມ ກໍໄດ້ຟື້ນຟູເຢຣູຊາເລັມໄປຈົນເຖິງກຳແພງກວ້າງ. ເຣຟາອີຢາ ລູກຊາຍຂອງຮູເຣ ຜູ້ປົກຄອງເຢຣູຊາເລັມເຄິ່ງໜຶ່ງ ກໍໄດ້ສ້ອມແປງສ່ວນຕໍ່ໄປ. ຢູ່ໃກ້ກັບບໍລິເວນນີ້, ເຢດາອີຢາ ລູກຊາຍຂອງຮາຣູແມບ ໄດ້ສ້ອມແປງສ່ວນທີ່ຢູ່ກົງກັນຂ້າມກັບບ້ານຂອງລາວ. ຮັດຕຸຊະ ລູກຊາຍຂອງຮາຊັບເນອີຢາ ກໍໄດ້ສ້ອມແປງບ່ອນທີ່ຢູ່ຖັດໄປຈາກລາວ. ມັນກີຢາ ລູກຊາຍຂອງຮາຣິມ ແລະ ຮັດຊຸບ ລູກຊາຍຂອງປາຮາດໂມອາບ ກໍໄດ້ສ້ອມແປງຢູ່ບ່ອນໜຶ່ງອີກ ພ້ອມທັງຫໍຄອຍເຕົາອົບ. ຊໍລູມ ລູກຊາຍຂອງຮັນໂລເຮັດ ພ້ອມດ້ວຍບັນດາລູກສາວຂອງລາວ ກໍໄດ້ສ້ອມແປງສ່ວນຖັດໄປ, ລາວເປັນຜູ້ທີ່ປົກຄອງເຢຣູຊາເລັມອີກເຄິ່ງໜຶ່ງ.
ຮານູນ ແລະ ຊາວຊາໂນອາ ກໍໄດ້ສ້ອມແປງປະຕູຮ່ອມພູ. ພວກເຂົາໄດ້ສ້າງປະຕູຂຶ້ນມາໃໝ່ ແລະ ຕິດຕັ້ງປະຕູພ້ອມດ້ວຍໄລປະຕູ ແລະ ກົງເຫລັກໃຫ້ເຂົ້າທີ່. ພວກເຂົາໄດ້ສ້ອມແປງກຳແພງທີ່ມີຄວາມຍາວ 1.000 ສອກ3 ໄປຈົນເຖິງປະຕູກອງຂີ້ເຫຍື້ອ.
ຜູ້ທີ່ສ້ອມແປງປະຕູກອງຂີ້ເຫຍື້ອແມ່ນມັນກີຢາ ເຊິ່ງເປັນລູກຊາຍຂອງເຣກາບ ຜູ້ປົກຄອງເຂດເບັດຮັກເກເຣມ. ລາວໄດ້ສ້າງປະຕູຄືນໃໝ່ ແລະ ຕິດຕັ້ງປະຕູພ້ອມດ້ວຍໄລປະຕູ ແລະ ກົງເຫລັກໃຫ້ເຂົ້າທີ່.
ຊໍລູມ ລູກຊາຍຂອງໂກນໂຮເຊ ຜູ້ປົກຄອງເຂດມີຊະປາ ໄດ້ສ້ອມແປງປະຕູນ້ຳພຸ. ລາວໄດ້ສ້າງປະຕູຄືນໃໝ່, ໃສ່ຫລັງຄາເທິງປະຕູ ແລະ ຕິດຕັ້ງປະຕູພ້ອມດ້ວຍໄລປະຕູ ແລະ ກົງເຫລັກໃຫ້ເຂົ້າທີ່. ລາວຍັງໄດ້ສ້ອມແປງກຳແພງຈາກສະນ້ຳຊີໂລອາມ4 ຂ້າງສວນຂອງກະສັດໄປໄກຈົນເຖິງຂັ້ນໄດທີ່ລົງໄປຈາກເມືອງຂອງດາວິດ. ຖັດຈາກລາວໄປກໍແມ່ນເນເຫມີຢາ ລູກຊາຍຂອງອາຊະບຸກ ຜູ້ປົກຄອງເຄິ່ງເມືອງຂອງເມືອງເບັດຊູເຣ ກໍໄດ້ສ້ອມແປງຈົນໄປເຖິງຈຸດໜຶ່ງທີ່ຢູ່ກົງກັນຂ້າມກັບອຸບມຸງ5ຂອງດາວິດ ໄກຈົນໄປເຖິງອ່າງເກັບນ້ຳ ແລະ ເຮືອນຂອງທະຫານ.
ຖັດໄປຈາກນີ້ກໍແມ່ນຄົນເລວີ ທີ່ຢູ່ພາຍໃຕ້ການນຳຂອງເຣຮຸມ ເຊິ່ງເປັນລູກຊາຍຂອງບານີ. ຢູ່ທາງຂ້າງລາວກໍແມ່ນຮາຊາບີຢາ, ຜູ້ປົກຄອງເມືອງເກອີລາເຄິ່ງເມືອງ, ໄດ້ສ້ອມແປງສ່ວນທີ່ຢູ່ໃນເມືອງຂອງລາວ. ຖັດຈາກລາວມາ, ຄົນເລວີຄົນອື່ນໆທີ່ຢູ່ໃຕ້ການນຳຂອງບິນນູອີ6 ເຊິ່ງເປັນລູກຊາຍຂອງເຮນາດາດ ຜູ້ປົກຄອງເມືອງເກອີລາເຄິ່ງເມືອງ. ຖັດຈາກລາວມາແມ່ນເອເຊ ລູກຊາຍຂອງເຢຊູອາ ເຊິ່ງເປັນຜູ້ປົກຄອງເຂດມີຊະປາ ໄດ້ສ້ອມແປງຈາກຈຸດທີ່ຫັນໜ້າໄປຫາທາງຂຶ້ນໄປຫາສາງອາວຸດຈົນສຸດມຸມກຳແພງ. ຖັດມາຈາກລາວອີກແມ່ນບາຣຸກ ເປັນລູກຊາຍຂອງສັບບາຍ ໄດ້ສ້ອມແປງອີກສ່ວນໜຶ່ງຢ່າງກະຕືລືລົ້ນ, ຈາກແຈກຳແພງໄປເຖິງທາງເຂົ້າເຮືອງຂອງມະຫາປະໂລຫິດເອລີອາຊິບ. ຖັດມາຈາກລາວກໍແມ່ນເມເຣໂມດ ຜູ້ເປັນລູກຊາຍຂອງອູຣິຢາ ເຊິ່ງເປັນລູກຊາຍຂອງຮັກກົກ ກໍໄດ້ສ້ອມແປງອີກສ່ວນໜຶ່ງ, ຈາກທາງເຂົ້າເຮືອນຂອງເອລີອາຊິບ ຈົນໄປເຖິງສຸດເຮືອນ.
ບັນດາປະໂລຫິດຈາກບໍລິເວນເຂດແດນນັ້ນກໍໄດ້ສ້ອມແປງຢູ່ບ່ອນທີ່ຢູ່ຖັດຈາກເມໂລໂມດ. ຖັດຈາກພວກເຂົາໄປກໍແມ່ນເບັນຢາມິນ ແລະ ຮັດຊຸບ ໄດ້ສ້ອມແປງຢູ່ໜ້າເຮືອນຂອງພວກເຂົາ; ແລະ ຖັດຈາກພວກເຂົາໄປນັ້ນ ກໍແມ່ນອາຊາຣີຢາ ລູກຊາຍຂອງມາອາເສອີຢາ ຜູ້ເປັນລູກຊາຍຂອງອານານິຢາ ໄດ້ສ້ອມແປງສ່ວນທີ່ຢູ່ຂ້າງເຮືອນຂອງລາວ. ຖັດໄປຈາກລາວກໍແມ່ນບິນນູອີ ລູກຊາຍຂອງເຮນາດາດ ໄດ້ສ້ອມແປງອີກສ່ວນໜຶ່ງ, ຕັ້ງແຕ່ເຮືອນຂອງອາຊາຣີຢາໄປຈົນເຖິງມຸມກຳແພງ. ແລະ ປາລານ ລູກຊາຍຂອງອູໄຊແມ່ນເຮັດວຽກຢູ່ກົງກັນຂ້າມກັບແຈກຳແພງ ແລະ ຫໍຄອຍທີ່ຍື່ນອອກມາຈາກວັງເທິງ ເຊິ່ງໃກ້ກັບເດີ່ນທະຫານຍາມ. ຖັດຈາກລາວມາກໍແມ່ນເປດາອີຢາ ລູກຊາຍຂອງປາຣົດ. ແລະ ບັນດາຜູ້ຮັບໃຊ້ໃນວິຫານທີ່ອາໄສຢູ່ເທິງໂນນພູໂອເຟນ ກໍໄດ້ສ້ອມແປງກຳແພງໄປຈົນເຖິງຈຸດກົງກັນຂ້າມກັບປະຕູນ້ຳໄປຫາທາງຕາເວັນອອກ ແລະ ຫໍຄອຍທີ່ຍື່ນອອກໄປ. ຖັດມາຈາກພວກເຂົາແມ່ນຊາວເຕກົວ ໄດ້ສ້ອມແປງກຳແພງອີກໜຶ່ງ, ຕັ້ງແຕ່ຫໍຄອຍໃຫຍ່ທີ່ຍື່ນອອກໄປຈົນເຖິງກຳແພງໂອເຟນ.
ບັນດາປະໂລຫິດທັງຫລາຍກໍໄດ້ສ້ອມແປງກຳແພງເໜືອປະຕູມ້າ ແຕ່ລະຄົນແມ່ນໄດ້ສ້ອມແປງສ່ວນທີ່ຢູ່ໜ້າເຮືອນຂອງຕົນ. ຖັດຈາກນັ້ນໄປກໍແມ່ນຊາດົກ ລູກຊາຍຂອງອິມເມ ໄດ້ສ້ອມແປງສ່ວນທີ່ຢູ່ກົງກັນຂ້າມກັບເຮືອນຂອງລາວ. ຖັດຈາກລາວມາແມ່ນເຊມາອີຢາ ລູກຊາຍຂອງເຊການີຢາ ຜູ້ເປັນຄົນຍາມປະຕູດ້ານຕາເວັນອອກເປັນຜູ້ສ້ອມແປງ. ຖັດຈາກລາວມາກໍແມ່ນຮານານີຢາ ລູກຊາຍຂອງເຊເລມີຢາ ແລະ ຮານູນ ລູກຊາຍຄົນທີຫົກຂອງຊາລາບ ໄດ້ສ້ອມແປງອີກສ່ວນໜຶ່ງ. ຖັດມາຈາກພວກເຂົາແມ່ນເມຊຸນລຳ ລູກຊາຍຂອງເບເຣກີຢາ ໄດ້ສ້ອມແປງສ່ວນທີ່ຢູ່ກົງກັນຂ້າມກັບທີ່ພັກຂອງລາວ. ຖັດມາຈາກລາວອີກກໍແມ່ນມັນກີຢາ ເຊິ່ງເປັນຊ່າງຄຳ ໄດ້ສ້ອມແປງໄປຈົນເຖິງເຮືອນຂອງຜູ້ຮັບໃຊ້ໃນວິຫານ ແລະ ເຮືອນຂອງພໍ່ຄ້າ ກົງກັນຂ້າມກັບປະຕູກວດກາໄປຈົນເຖິງຫ້ອງຊັ້ນເທິງບ່ອນຫົວມຸມ. ບັນດາຊ່າງຄຳ ແລະ ພໍ່ຄ້າຄົນອື່ນໆ ກໍໄດ້ສ້ອມແປງສ່ວນທີ່ຢູ່ລະຫວ່າງຫ້ອງຊັ້ນເທິງທີ່ຊື່ກັບຫົວມຸມນີ້ ໄປຈົນເຖິງປະຕູແກະ.
Source notes (6)
- Footnote ຫລື ເຈົ້ານາຍຂອງພວກເຂົາ ຫລື ຜູ້ປົກຄອງ
- Footnote ຫລື ປະຕູເກົ່າ
- Footnote ຄື ປະມານ 450 ແມັດ
- Footnote ພາສາເຮັບເຣີວ່າ ເຊລາ ເປັນອີກຮູບໜຶ່ງຂອງ ຊີໂລອາ ຄື ຊີໂລອາມ
- Footnote ສຳເນົາສະບັບເຊັບຕູອາຈິນວ່າອຸບມຸງຝັງສົບ
- Footnote ສຳເນົາຕົ້ນສະບັບພາສາເຮັບເຣີສ່ວນໃຫຍ່ວ່າ ບັບໄວ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.