ນາຮູມ 2

ນີເນເວ​ຈະ​ຫລົ້ມຈົມ

1ນີເນເວ, ຜູ້​ໂຈມຕີ​ໄດ້​ບຸກ​ໜ້າ​ມາ​ຕໍ່ສູ້​ເຈົ້າ​ແລ້ວ.

ຈົ່ງ​ເຂົ້າ​ປະຈຳ​ປ້ອມ,

ເຝົ້າ​ເບິ່ງ​ຫົນທາງ​ໄວ້,

ຕຽມ​ຕົວ​ໃຫ້​ພ້ອມ,

ແລະ ຮວບຮວມ​ກຳລັງ​ທັງໝົດ​ຂອງ​ເຈົ້າ!

2ພຣະເຈົ້າ​ຢາເວ​ຈະ​ຟື້ນຟູ​ຄວາມ​ຮຸ່ງເຮືອງ​ໃຫ້​ຢາໂຄບ

ເໝືອນ​ກັບ​ຄວາມ​ຮຸ່ງເຮືອງ​ຂອງ​ອິດສະຣາເອນ,

ເຖິງ​ແມ່ນ​ວ່າ​ຜູ້​ທຳລາຍ​ໄດ້​ທຳລາຍ​ມັນ​ຖິ້ມ​ໄປ

ແລະ ທຳລາຍ​ເຄືອ​ອະງຸ່ນ​ຂອງ​ມັນ.

3ໂລ່​ຂອງ​ທະຫານ​ເປັນ​ສີແດງ;

ນັກຮົບ​ກໍ​ສວມ​ຊຸດ​ສີແດງ​ເຂັ້ມ.

ໂລຫະ​ຢູ່​ເທິງ​ລົດມ້າ​ຈະ​ເປັ່ງ​ປະກາຍ

ໃນ​ວັນ​ທີ່​ພວກເຂົາ​ໄດ້​ຕຽມ​ພ້ອມ;

ຫອກ​ໄມ້ແປກ​ກໍ​ແກວ່ງໄກວ.1

4ລົດຮົບ​ຟ້າວ​ບຸກ​ໄປ​ຕາມ​ຖະໜົນ

ຟ້າວ​ແລ່ນ​ໄປ​ມາ​ຜ່ານ​ເດີ່ນ​ເມືອງ.

ພວກເຂົາ​ເບິ່ງ​ຄື​ກັນ​ກັບ​ກະບອງ​ໄຟ​ທີ່​ກຳລັງ​ລຸກ​ຢູ່;

ພວກເຂົາ​ພຸ່ງ​ໄປ​ມາ​ເໝືອນ​ຟ້າແມບ.

5ນີເນເວ​ໄດ້​ລະດົມ​ກອງ​ທະຫານ​ທີ່​ຕົນ​ເລືອກ​ໄວ້,

ແຕ່​ພວກເຂົາ​ສະດຸດ​ລົ້ມ​ກາງ​ທາງ.

ພວກເຂົາ​ຟ້າວ​ບຸກ​ເຂົ້າ​ໄປ​ທີ່​ກຳແພງ​ເມືອງ;

ໂລ່​ປ້ອງກັນ​ກໍ​ຕັ້ງ​ປະຈຳ​ທີ່.

6ປະຕູ​ດ້ານ​ແມ່ນ້ຳ​ກໍ​ຖືກ​ທຳລາຍ​ລົງ

ແລະ ວັງ​ກໍ​ພັງ​ລົງ.

7ມີ​ດຳລັດ2​ໃຫ້​ນີເນເວ​ນັ້ນ

ຖືກ​ເນລະເທດ ແລະ ຖືກ​ກວາດ​ຕ້ອນ​ໄປ.

ບັນດາ​ຂ້າທາດ​ຍິງ​ຂອງ​ນີເນເວ​ຮ້ອງ​ຄວນ​ຄາງ​ເໝືອນ​ນົກເຂົາ

ແລະ ຕີ​ເອິກ​ຂອງ​ຕົນ.

8ນີເນເວ​ເປັນ​ເໝືອນ​ສະນ້ຳ

ທີ່​ມີ​ນ້ຳ​ກຳລັງ​ໄຫລ​ອອກ​ໄປ​ໝົດ.

ພວກເຂົາ​ຮ້ອງ​ວ່າ, “ຢຸດ! ຢຸດ!”

ແຕ່​ບໍ່​ມີ​ຜູ້ໃດ​ຫັນ​ກັບ​ມາ.

9ຈົ່ງ​ປຸ້ນ​ເອົາ​ເງິນ!

ຈົ່ງ​ປຸ້ນ​ເອົາ​ຄຳ!

ເຄື່ອງ​ຂອງ​ມີ​ຫລວງຫລາຍ​ໃຊ້​ບໍ່​ໝົດ,

ຄວາມ​ຮັ່ງມີ​ຈາກ​ຊັບສົມບັດ​ຂອງ​ນີເນເວ!

10ນີເນເວ​ຖືກ​ປຸ້ນ, ຖືກ​ປຸ້ນ ຖືກ​ຢຶດ​ຂອງ​ມີ​ຄ່າ​ໄປ​ໝົດ!

ຫົວໃຈ​ສະຫລາຍ, ຫົວເຂົ່າ​ກໍ​ອ່ອນ​ແຮງ

ໂຕ​ສັ່ນ ແລະ ທຸກຄົນ​ໜ້າ​ຈືດ.

11ຖ້ຳ​ສິງ​ຢູ່​ບ່ອນ​ໃດ

ບ່ອນ​ທີ່​ພວກ​ມັນ​ເບິ່ງແຍງ​ລູກ​ນ້ອຍ​ຂອງ​ຕົນ

ພໍ່ ແລະ ແມ່​ລູກສິງ​ໄປ​ທີ່​ໃດ,

ແລະ ລູກສິງ​ກໍ​ບໍ່​ຕ້ອງ​ຢ້ານ​ກົວ​ສິ່ງໃດ?

12ສິງ​ທີ່​ຂ້າ​ເຫຍື່ອ​ມາ​ໃຫ້​ບັນດາ​ລູກ​ຂອງ​ຕົນ​ຢ່າງ​ພຽງພໍ

ແລະ ກໍ​ຄາບ​ມາ​ໃຫ້​ຄູ່​ຂອງ​ຕົນ,

ສະສົມ​ເຫຍື່ອ​ຂອງ​ຕົນ​ໄວ້​ທີ່​ຮັງ

ແລະ ສະສົມ​ສັດ​ທີ່​ຂ້າ​ໄວ້​ທີ່​ຖ້ຳ​ຂອງ​ມັນ.

13ພຣະເຈົ້າ​ຢາເວ​ຜູ້​ມີ​ລິດອຳນາດ​ຍິ່ງໃຫຍ່​ປະກາດ​ວ່າ,

“ເຮົາ​ເປັນ​ສັດຕູ​ກັບ​ເຈົ້າ.

ເຮົາ​ຈະ​ຈູດ​ລົດມ້າ​ຂອງ​ເຈົ້າ​ຈົນ​ຄວັນ​ພຸ່ງ​ຂຶ້ນ,

ແລະ ດາບ​ຈະ​ຟາດ​ແຂ້ວ​ສິງ​ໜຸ່ມ​ຂອງ​ເຈົ້າ

ເຮົາ​ຈະ​ບໍ່​ປະ​ເຫຍື່ອ​ໄວ້​ໃຫ້​ເຈົ້າ​ໃນ​ໂລກ​ນີ້.

ສຽງ​ຮ້ອງ​ຂອງ​ບັນດາ​ຜູ້ສົ່ງຂ່າວ​ຂອງ​ເຈົ້າ

ຈະ​ບໍ່​ໄດ້​ຍິນ​ອີກ​ຕໍ່​ໄປ”.