Biblica® Open Lao Contemporary Version
ນາຮູມ 1
ຄຳທຳນວາຍກ່ຽວກັບນະຄອນນີເນເວ. ໜັງສືແຫ່ງນິມິດຂອງນາຮູມຊາວແອນໂກດ.
ຄວາມໂກດຮ້າຍຂອງພຣະເຈົ້າຢາເວຕໍ່ນີເນເວ
ພຣະເຈົ້າຢາເວເປັນພຣະເຈົ້າຜູ້ຫຶງຫວງ ແລະ ເຮັດການແກ້ແຄ້ນ;
ພຣະເຈົ້າໄດ້ແກ້ແຄ້ນ ແລະ ເຕັມໄປດ້ວຍຄວາມໂກດຮ້າຍ.
ພຣະເຈົ້າໄດ້ແກ້ແຄ້ນບັນດາສັດຕູຂອງພຣະອົງ
ແລະ ໄດ້ລະບາຍຄວາມໂກດຮ້າຍຂອງພຣະອົງໃສ່ບັນດາສັດຕູຂອງພຣະອົງ.
ພຣະເຈົ້າຢາເວບໍ່ຮ້າຍງ່າຍ ແລະ ມີອຳນາດຍິ່ງໃຫຍ່
ພຣະເຈົ້າຢາເວຈະບໍ່ປ່ອຍຄົນຜິດໄປໂດຍບໍ່ໄດ້ຮັບໂທດ.
ພຣະອົງສະແດງທາງຂອງພຣະອົງຢູ່ໃນພະຍຸໝຸນ ແລະ ໃນລົມພະຍຸ
ແລະ ເມກນັ້ນເປັນຂີ້ຝຸ່ນດິນຈາກຕີນຂອງພຣະອົງ.
ພຣະອົງສັ່ງທະເລ ແລະ ເຮັດໃຫ້ມັນແຫ້ງລົງ.
ພຣະອົງເຮັດໃຫ້ແມ່ນ້ຳທຸກສາຍແຫ້ງໄປ.
ບາຊານ ແລະ ກາເມນກໍຫ່ຽວແຫ້ງ
ແລະ ບັນດາດອກໄມ້ທີ່ເບັ່ງບານຂອງເລບານອນກໍຫລົ່ນລົງ.
ບັນດາພູເຂົາສັ່ນສະເທືອນຢູ່ຕໍ່ໜ້າພຣະອົງ
ແລະ ເນີນພູຕ່າງໆກໍພັງທະລາຍລົງ.
ເມື່ອພຣະອົງມາປາກົດແຜ່ນດິນໂລກກໍສັ່ນສະທ້ານ,
ໂລກ ແລະ ທຸກຄົນທີ່ຢູ່ໃນໂລກ.
ຜູ້ໃດສາມາດທົນຕໍ່ຄວາມໃຈຮ້າຍຂອງພຣະອົງໄດ້?
ຜູ້ໃດສາມາດທົນຕໍ່ຄວາມໂກດຮ້າຍອັນຮຸນແຮງຂອງພຣະອົງໄດ້?
ຄວາມໂກດຮ້າຍຂອງພຣະອົງພຸ່ງຂຶ້ນເໝືອນກັບໄຟ;
ຫີນແຕກຫັກຕໍ່ໜ້າພຣະອົງ.
ພຣະເຈົ້າຢາເວປະເສີດ
ເປັນທີ່ລີ້ໄພໃນເວລາຫຍຸ້ງຍາກ.
ພຣະອົງຫ່ວງໃຍບັນດາຜູ້ທີ່ວາງໃຈໃນພຣະອົງ,
ແຕ່ດ້ວຍນ້ຳຖ້ວມໜັກ
ພຣະອົງຈະເຮັດໃຫ້ນີນາເວສິ້ນສຸດລົງ;
ພຣະອົງຈະໄລ່ຕາມບັນດາສັດຕູຂອງພຣະອົງເຂົ້າສູ່ຄວາມມືດ.
ສິ່ງໃດກໍຕາມທີ່ພວກເຂົາວາງແຜນຕໍ່ສູ້ພຣະເຈົ້າຢາເວ
ພຣະອົງກໍຈະເຮັດ1ໃຫ້ສິ້ນສຸດລົງ;
ບັນຫາຈະບໍ່ເກີດຂຶ້ນເປັນຄັ້ງທີສອງ.
ພວກເຂົາຈະຕິດຢູ່ໃນທ່າມກາງດົງໜາມ
ແລະ ເມົາດ້ວຍເຫລົ້າອະງຸ່ນຂອງພວກເຂົາ;
ພວກເຂົາຈະຖືກເຜົາໄໝ້ເໝືອນກັບກໍເຟືອງແຫ້ງ.2
ນີເນເວ, ມີຜູ້ໜຶ່ງອອກມາຈາກເຈົ້າ
ຜູ້ທີ່ວາງແຜນຮ້າຍຕໍ່ສູ້ພຣະເຈົ້າຢາເວ
ແລະ ວາງແຜນຊົ່ວ.
ນີ້ແມ່ນສິ່ງທີ່ພຣະເຈົ້າຢາເວໄດ້ກ່າວດັ່ງນີ້:
“ເຖິງແມ່ນວ່າພວກເຂົາມີພັນທະມິດ ແລະ ມີຈຳນວນຫລາຍ
ພວກເຂົາກໍຈະຖືກທຳລາຍ ແລະ ສູນສິ້ນໄປ.
ຢູດາເອີຍ, ເຖິງແມ່ນເຮົາໃຫ້ເຈົ້າທຸກທໍລະມານ,
ເຮົາຈະບໍ່ໃຫ້ເຈົ້າທໍລະມານອີກຕໍ່ໄປ.
ບັດນີ້ ເຮົາຈະຫັກແອກຂອງພວກເຂົາຈາກຄໍຂອງເຈົ້າ
ແລະ ຫັກໂສ້ຂອງເຈົ້າຖິ້ມໄປ”.
ນີເນເວເອີຍ, ພຣະເຈົ້າໄດ້ສັ່ງກ່ຽວກັບເຈົ້າດັ່ງນີ້:
“ເຈົ້າຈະບໍ່ມີລູກຫລານສືບຕະກຸນຂອງເຈົ້າ.
ເຮົາຈະທຳລາຍຮູບແກະສະຫລັກ ແລະ ຮູບເຄົາລົບທັງຫລາຍ.
ທີ່ຢູ່ໃນວິຫານແຫ່ງພະທັງຫລາຍຂອງເຈົ້າ.
ເຮົາຈະຕຽມຂຸມຝັງສົບຂອງເຈົ້າ,
ເພາະເຈົ້າຊົ່ວຊ້າ”.
ເບິ່ງແມ, ຢູ່ເທິງພູເຂົານັ້ນ,
ຕີນຂອງຜູ້ນຳຂ່າວດີມາ,
ຜູ້ປະກາດສັນຕິສຸກ!
ຢູດາເອີຍ, ຈົ່ງສະຫລອງເທດສະການຕ່າງໆຂອງເຈົ້າ
ແລະ ເຮັດຕາມຄຳປະຕິຍານຂອງເຈົ້າ.
ຄົນຊົ່ວຮ້າຍຈະບໍ່ມາຮຸກຮານເຈົ້າອີກ;
ພວກເຂົາຈະຖືກທຳລາຍຈົນໝົດ.
Source notes (2)
- Footnote ຫລື ພວກເຈົ້າວາງແຜນຕໍ່ສູ້ພຣະເຈົ້າຢາເວຢ່າງໃດ ພຣະອົງກໍຈະນຳມັນມາໃຫ້
- Footnote ໃນພາສາເຮັບເຣີ ຂໍ້ນີ້ມີຄວາມຫມາຍບໍ່ຊັດເຈນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.