Biblica® Open Lao Contemporary Version
ມີກາ 7
ຄວາມທຸກຍາກຂອງອິດສະຣາເອນ
ໝົດຫວັງແລ້ວນໍ!
ຂ້າພະເຈົ້າເປັນເໝືອນຄົນໄປເກັບໝາກໄມ້ໃນລະດູຮ້ອນ
ຫລັງຈາກເພິ່ນເກັບໝາກອະງຸ່ນໄປໝົດສວນແລ້ວ
ບໍ່ມີພວງໝາກອະງຸ່ນໃຫ້ຮັບກິນເລີຍ,
ບໍ່ມີທັງໝາກເດື່ອຕົ້ນລະດູທີ່ຂ້າພະເຈົ້າຢາກກິນ.
ຄົນຊອບທຳນັ້ນຖືກກວາດໄປຈາກແຜ່ນດິນ;
ບໍ່ມີຄົນສັດຊື່ເຫລືອຢູ່ແມ່ນແຕ່ຄົນດຽວ.
ທຸກຄົນດັກລໍຖ້າຂ້າຄົນ;
ພວກເຂົາຕ່າງກໍແກວ່ງຕາໜ່າງດັກພີ່ນ້ອງຂອງຕົນ.
ມືທັງສອງເບື້ອງກໍຊຳນານໃນການເຮັດຊົ່ວ;
ຜູ້ປົກຄອງຮຽກຮ້ອງຂອງຂັວນ,
ຜູ້ຕັດສິນຄະດີກໍຮັບສິນບົນ,
ຜູ້ມີອິດທິພົນກໍສັ່ງການຕາມໃຈມັກຂອງພວກເຂົາ
ພວກເຂົາທັງໝົດຮ່ວມຫົວກັນ.
ແມ່ນແຕ່ຄົນທີ່ດີທີ່ສຸດໃນທ່າມກາງພວກເຂົາກໍເປັນເໝືອນຕົ້ນໜາມ,
ຄົນທີ່ທ່ຽງທຳທີ່ສຸດກໍຊົ່ວຍິ່ງກວ່າຮົ້ວໜາມ.
ມື້ຂອງຜູ້ທີ່ຈັບຕາເບິ່ງເຈົ້ານັ້ນກໍມາເຖິງແລ້ວ,
ເປັນວັນທີ່ພຣະເຈົ້າມາຫາພວກເຈົ້າ.
ບັດນີ້ ເຖິງເວລາແລ້ວທີ່ພວກເຂົາຈະສັບສົນວຸ້ນວາຍ.
ຢ່າວາງໃຈເພື່ອນບ້ານ;
ຢ່າໝັ້ນໃຈໃນມິດສະຫາຍ.
ແມ່ນແຕ່ຍິງທີ່ນອນຢູ່ໃນອ້ອມເອິກຂອງພວກເຈົ້າ
ຈົ່ງລະວັງຄຳເວົ້າຂອງຮີມສົບຂອງພວກເຈົ້າ.
ເພາະລູກຊາຍຈະດູຖູກພໍ່ຂອງຕົນ,
ລູກສາວຈະລຸກຂຶ້ນຕໍ່ຕ້ານແມ່ຂອງຕົນ,
ລູກໃພ້ຂັດແຍ້ງກັບແມ່ຍ່າ
ສັດຕູຂອງລາວຈະເປັນຄົນທີ່ຢູ່ໃນຄົວເຮືອນຂອງລາວເອງ.
ແຕ່ສ່ວນຂ້າພຣະເຈົ້າ, ຂ້າພະເຈົ້າຈະມຸ່ງຫວັງໃນພຣະເຈົ້າຢາເວ,
ຂ້າພຣະເຈົ້າລໍຖ້າພຣະເຈົ້າ ພຣະຜູ້ຊ່ວຍຂອງຂ້າພຣະເຈົ້າ;
ພຣະເຈົ້າຂອງຂ້າພະເຈົ້າຈະຟັງສຽງຂອງຂ້າພະເຈົ້າ.
ອິດສະຣາເອນຈະລຸກຂຶ້ນມາ
ສັດຕູຂອງຂ້ອຍ, ຢ່າຍິ້ມເຢາະເຢີ້ຍຂ້ອຍເລີຍ!
ເຖິງແມ່ນວ່າຂ້ອຍໄດ້ລົ້ມລົງ, ຂ້ອຍກໍຈະລຸກຂຶ້ນມາອີກ.
ເຖິງແມ່ນວ່າຂ້ອຍນັ່ງຢູ່ໃນຄວາມມືດ,
ພຣະເຈົ້າຢາເວກໍຈະເປັນຄວາມສະຫວ່າງຂອງຂ້ອຍ.
ເພາະຂ້າພະເຈົ້າໄດ້ເຮັດບາບຕໍ່ພຣະອົງ,
ຂ້າພະເຈົ້າກໍຈະທົນຮັບຄວາມໂກດຮ້າຍຂອງພຣະເຈົ້າຢາເວ,
ຈົນພຣະອົງວ່າຄະດີຄວາມໃຫ້ຂ້າພະເຈົ້າ
ແລະ ປົກປ້ອງສິດຂອງຂ້າພຣະເຈົ້າໄວ້.
ພຣະອົງຈະນຳຂ້ອຍອອກມາສູ່ຄວາມສະຫວ່າງ;
ຂ້າພະເຈົ້າຈະເຫັນຄວາມຊອບທຳຂອງພຣະອົງ.
ແລ້ວສັດຕູຂອງຂ້າພະເຈົ້າກໍຈະເຫັນ
ແລະ ຖືກປົກຄຸມດ້ວຍຄວາມອັບອາຍ,
ຜູ້ທີ່ໄດ້ເວົ້າກັບຂ້າພະເຈົ້າວ່າ,
“ພຣະເຈົ້າຢາເວ ພຣະເຈົ້າຂອງເຈົ້າຢູ່ໃສ?”
ຕາຂອງຂ້າພະເຈົ້າກໍຈະເຫັນລາວລົ້ມລົງ
ບັດນີ້ແຫລະ ລາວຈະຖືກຢຽບຢ່ຳຢູ່ກ້ອງຕີນ.
ເໝືອນຂີ້ຕົມຢູ່ເທິງຖະໜົນ.
ມື້ສ້າງກຳແພງໃຫ້ເຈົ້ານັ້ນຈະມາເຖິງ,
ເປັນວັນທີ່ຈະຂະຫຍາຍເຂດແດນຂອງເຈົ້າອອກໄປ.
ໃນມື້ນັ້ນ ຄົນທັງຫລາຍຈະມາຫາເຈົ້າ
ຈາກອັດຊີເຣຍ ແລະ ເມືອງຕ່າງໆຂອງເອຢິບ,
ເຖິງແມ່ນວ່າຈາກເອຢິບໄປຫາເອີຟຣັດ
ຈາກທະເລໄປຫາທະເລ
ແລະ ຈາກພູເຂົາໄປຫາພູເຂົາ.
ແຜ່ນດິນໂລກຈະແຫ້ງແລ້ງເພາະຊາວໂລກ.
ນັ້ນເປັນຜົນຈາກການກະທຳຂອງພວກເຂົາ.
ຄຳອະທິຖານ ແລະ ສັນລະເສີນ
ຂໍໂຜດລ້ຽງດູປະຊາຊົນຂອງພຣະອົງດ້ວຍໄມ້ຄ້ອນເທົ້າຂອງພຣະອົງ,
ລ້ຽງດູຝູງແກະທີ່ເປັນກຳມະສິດຂອງພຣະອົງ,
ເຊິ່ງດຳລົງຊີວິດດ້ວຍຕົນເອງຢູ່ໃນປ່າ,
ໃນທົ່ງຫຍ້າທີ່ອຸດົມສົມບູນ.1
ໃຫ້ພວກເຂົາຫາກິນໃນບາຊານ ແລະ ກີເລອາດ
ເໝືອນໃນອະດີດດົນມາແລ້ວ.
“ເໝືອນເມື່ອຄັ້ງທີ່ພວກເຈົ້າອອກມາຈາກເອຢິບ
ເຮົາຈະສະແດງໃຫ້ພວກເຈົ້າເຫັນການອັດສະຈັນຂອງເຮົາ”.
ປະຊາຊາດທັງຫລາຍຈະເຫັນ ແລະ ຕ້ອງອັບອາຍ,
ແລະ ສູນເສຍອຳນາດທັງໝົດຂອງພວກເຂົາ.
ພວກເຂົາຈະເອົາມືຂອງພວກເຂົາປິດປາກຕົນເອງ
ແລະ ຫູຂອງພວກເຂົາກໍຈະໜວກໄປ.
ພວກເຂົາຈະເລຍຝຸ່ນເໝືອນງູ
ເໝືອນສິ່ງມີຊີວິດທີ່ເລືອຄານຢູ່ຕາມພື້ນດິນ.
ພວກເຂົາຈະໂຕສັ່ນເຊັນອອກມາຈາກຖ້ຳຂອງພວກເຂົາ
ພວກເຂົາຈະຫັນມາຫາພຣະເຈົ້າຢາເວ ພຣະເຈົ້າຂອງພວກເຮົາດ້ວຍຄວາມຢຳເກງ
ແລະ ຈະຢ້ານພຣະອົງ.
ຜູ້ໃດທີ່ເປັນພຣະເຈົ້າເໝືອນກັບພຣະອົງ,
ຜູ້ທີ່ອະໄພບາບ ແລະ ອະໄພການລ່ວງລະເມີດ
ຂອງຄົນທີ່ເຫລືອພຽງຢິບມື ເຊິ່ງເປັນກຳມະສິດຂອງພຣະອົງ?
ພຣະອົງບໍ່ໄດ້ໃຈຮ້າຍຢູ່ຕະຫລອດໄປ
ແຕ່ປີຕິຍິນດີທີ່ຈະສະແດງຄວາມເມດຕາ.
ພຣະອົງຈະເອັນເມດຕາສົງສານພວກເຮົາອີກ;
ຈະຢຽບບາບທັງຫລາຍຂອງພວກເຮົາໄວ້ກ້ອງຕີນ
ແລະ ແກວ່ງຄວາມຊົ່ວຊ້າທັງໝົດຂອງພວກເຮົາລົງສູ່ທະເລເລິກ.
ພຣະອົງຈະສັດຊື່ຕໍ່ຢາໂຄບ,
ແລະ ຈະສະແດງຄວາມເມດຕາແກ່ອັບຣາຮາມ,
ເໝືອນດັ່ງທີ່ພຣະອົງໄດ້ປະຕິຍານໄວ້ກັບບັນພະບຸລຸດຂອງພວກເຮົາ
ແຕ່ດົນນານມາແລ້ວ.
Source notes (1)
- Footnote ຫລື ກາງພູເຂົາກາເມນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.