Biblica® Open Lao Contemporary Version
ມີກາ 4
ພູເຂົາຂອງພຣະເຈົ້າຢາເວ
(ອຊຢ 2:1-4)
ໃນບັ້ນປາຍ
ພູເຂົາທີ່ວິຫານຂອງພຣະເຈົ້າຢາເວຕັ້ງຢູ່ຈະໄດ້ຮັບການສະຖາປະນາ
ໃຫ້ເປັນເອກໃນທ່າມກາງພູເຂົາທັງຫລາຍ;
ວິຫານຈະໄດ້ຮັບການຍົກຂຶ້ນເໜືອບັນດາເນີນພູທັງຫລາຍ,
ແລະ ຄົນທັງຫລາຍຈະຫລັ່ງໄຫລໄປບ່ອນນັ້ນ.
ປະຊາຊາດທັງຫລາຍຈະມາ ແລະ ກ່າວວ່າ,
“ຈົ່ງມາ, ໃຫ້ພວກເຮົາຂຶ້ນໄປເທິງພູເຂົາຂອງພຣະເຈົ້າຢາເວ,
ໄປທີ່ວິຫານຂອງພຣະເຈົ້າຂອງຢາໂຄບ.
ພຣະອົງຈະສອນວິຖີທາງຂອງພຣະອົງໃຫ້ພວກເຮົາ,
ເພື່ອພວກເຮົາຈະເດີນໃນວິຖີທາງຂອງພຣະອົງ”.
ກົດບັນຍັດຈະອອກມາຈາກຊີໂອນ,
ຖ້ອຍຄຳຂອງພຣະເຈົ້າຢາເວຈະອອກມາຈາກເຢຣູຊາເລັມ.
ພຣະອົງຈະຕັດສິນຄວາມລະຫວ່າງຊົນຊາດທັງຫລາຍ
ແລະ ຈະຢຸດຕິກໍລະນີຜິດພາດໃຫ້ຊາດມະຫາອຳນາດທັງຫລາຍທີ່ຢູ່ໄກ ແລະ ຢູ່ໃກ້.
ພວກເຂົາຈະຕີດາບຂອງພວກເຂົາໃຫ້ເປັນໝາກກະສົບໄຖ
ແລະ ຕີຫອກຂອງພວກເຂົາໃຫ້ເປັນມີດຕັດກິ່ງໄມ້.
ຊົນຊາດທັງຫລາຍຈະເຊົາສູ້ຮົບກັນ,
ພວກເຂົາຈະບໍ່ມີການຝຶກສູ້ຮົບອີກຕໍ່ໄປ,
ທຸກຄົນຈະນັ່ງຢູ່ກ້ອງເຄືອອະງຸ່ນຂອງຕົນເອງ
ແລະ ກ້ອງຕົ້ນໝາກເດື່ອຂອງຕົນເອງ,
ແລະ ຈະບໍ່ມີຜູ້ໃດເຮັດໃຫ້ພວກເຂົາຢ້ານ,
ເພາະພຣະເຈົ້າຢາເວຜູ້ມີລິດອຳນາດຍິ່ງໃຫຍ່ໄດ້ກ່າວໄວ້ແລ້ວ.
ທຸກຊົນຊາດອາດຈະດຳເນີນ
ໃນນາມຂອງພະຂອງຕົນ,
ສ່ວນພວກເຮົາຈະດຳເນີນໃນນາມຂອງພຣະເຈົ້າຢາເວ
ພຣະເຈົ້າຂອງພວກເຮົາຕະຫລອດໄປເປັນນິດ.
ແຜນການຂອງພຣະເຈົ້າຢາເວ
ພຣະເຈົ້າຢາເວປະກາດວ່າ,
“ໃນວັນນັ້ນ, ເຮົາຈະເຕົ້າໂຮມຄົນຂາພິການ;
ເຮົາຈະຮວບຮວມບັນດາຊະເລີຍ
ແລະ ບັນດາຄົນທີ່ເຮົາໃຫ້ພົບກັບຄວາມໂສກເສົ້າ.
ເຮົາຈະໃຫ້ຄົນຂາພິການເປັນຄົນທີ່ເຫລືອຢູ່ຂອງເຮົາ,
ໃຫ້ບັນດາຄົນທີ່ຖືກເນລະເທດເປັນຊາດທີ່ແຂງແຮງ.
ພຣະເຈົ້າຢາເວຈະປົກຄອງພວກເຂົາຢູ່ໃນພູເຂົາຊີໂອນ
ຕັ້ງແຕ່ວັນນັ້ນ ແລະ ຕະຫລອດໄປ.
ສ່ວນເຈົ້າ, ຜູ້ເປັນຫໍຄອຍເຝົ້າຍາມຂອງຝູງແກະ,
ເປັນທີ່ໝັ້ນ1ຂອງລູກສາວແຫ່ງຊີໂອນ,2
ອຳນາດເດີມຈະກັບຄືນມາເປັນຂອງເຈົ້າ;
ລູກສາວແຫ່ງເຢຣູຊາເລັມ3ຈະໄດ້ຮັບອຳນາດຄອບຄອງ”.
ດ້ວຍເຫດໃດເຈົ້າຈຶ່ງຮ້ອງສຽງດັງ
ເຈົ້າບໍ່ມີກະສັດບໍ?
ທີ່ປຶກສາຂອງເຈົ້າພິນາດໄປແລ້ວບໍ?
ເຈົ້າຈຶ່ງເຈັບປວດເໝືອນແມ່ຍິງກຳລັງເກີດລູກ.
ລູກສາວແຫ່ງຊີໂອນ, ຈົ່ງດີ້ນດ້ວຍຄວາມເຈັບປວດ,
ເໝືອນແມ່ຍິງທີ່ກຳລັງເກີດລູກ,
ເພາະບັດນີ້ເຈົ້າຈະຕ້ອງຈາກເມືອງ
ໄປຕັ້ງຄ້າຍພັກຢູ່ກາງທົ່ງນາ.
ເຈົ້າຈະໄປທີ່ບາບີໂລນ;
ເຈົ້າຈະໄດ້ຮັບການຊ່ວຍເຫລືອຢູ່ບ່ອນນັ້ນ.
ພຣະເຈົ້າຢາເວຈະໄຖ່ເຈົ້າ
ອອກຈາກມືຂອງສັດຕູທັງຫລາຍຂອງເຈົ້າຢູ່ບ່ອນນັ້ນ.
ແຕ່ບັດນີ້ຫລາຍຊົນຊາດ
ໄດ້ຮວມໂຕກັນມາສູ້ຮົບກັບເຈົ້າ.
ພວກເຂົາກ່າວວ່າ, “ໃຫ້ຊີໂອນເປັນມົນທິນ,
ໃຫ້ຕາຂອງພວກເຮົາໄດ້ເບິ່ງຊີໂອນດ້ວຍຄວາມສະໃຈ!”
ແຕ່ພວກເຂົາບໍ່ຮູ້
ຄວາມຄິດຂອງພຣະເຈົ້າຢາເວ;
ພວກເຂົາບໍ່ເຂົ້າໃຈແຜນການຂອງພຣະອົງ,
ທີ່ພຣະອົງໄດ້ຮວບຮວມພວກເຂົາເໝືອນຮວບຮວມຟ່ອນເຂົ້າມາສູ່ລານຟາດເຂົ້າ.
“ລູກສາວແຫ່ງຊີໂອນ, ຈົ່ງລຸກຂຶ້ນຟາດເຂົ້າ,
ເພາະເຮົາຈະໃຫ້ເຈົ້າມີເຂົາເປັນເຫລັກ;
ເຮົາຈະໃຫ້ເຈົ້າມີກີບຕີນເປັນທອງສຳລິດ,
ແລະ ເຈົ້າຈະບົດຫລາຍຊາດໃຫ້ມຸ່ນໄປ”.
ພວກທ່ານຈະຖວາຍສິ່ງທີ່ພວກເຂົາໄດ້ມາໂດຍບໍ່ຊອບທຳນັ້ນແກ່ພຣະເຈົ້າຢາເວ,
ຖວາຍຄວາມຮັ່ງມີຂອງພວກເຂົາແກ່ອົງພຣະຜູ້ເປັນເຈົ້າແຫ່ງໂລກນີ້ທັງໝົດ.
Source notes (3)
- Footnote ຫລື ໂນນພູ
- Footnote ຄື ຊາວເຢຣູຊາເລັມ ເຊັ່ນດຽວກັບຂໍ້ 10 ແລະ 13
- Footnote ຄື ຊາວເຢຣູຊາເລັມ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.