Biblica® Open Lao Contemporary Version
ເພງຄໍ່າຄວນ 1
ໂອ ນະຄອນນີ້ຮົກຮ້າງແທ້,
ຄັ້ງໜຶ່ງເຄີຍມີປະຊາຊົນຢູ່ເຕັມ!
ເຊິ່ງເຄີຍຍິ່ງໃຫຍ່ໃນທ່າມກາງປະຊາຊາດທັງຫລາຍ,
ກັບເປັນເໝືອນແມ່ໝ້າຍແລ້ວ!
ນະຄອນນີ້ເຄີຍເປັນລາຊີນີໃນທ່າມກາງແຂວງຕ່າງໆ
ບັດນີ້ ກໍໄດ້ຕົກເປັນຂ້າທາດແລ້ວ.
ຍາມກາງຄືນນາງກໍຮ້ອງໄຫ້ຢ່າງຂົມຂື່ນ,
ນ້ຳຕາໄຫລອາບແກ້ມຂອງນາງ.
ໃນບັນດາຄົນຮັກຂອງນາງ
ບໍ່ມີຜູ້ໃດຈັກຄົນທີ່ເລົ້າໂລມນາງ.
ສະຫາຍທຸກຄົນກໍທໍລະຍົດນາງ;
ພວກເຂົາກາຍເປັນສັດຕູຂອງນາງ.
ຫລັງຈາກທຸກລຳບາກ ແລະ ເຮັດວຽກໜັກ,
ຢູດາກໍໄດ້ຕົກເປັນຊະເລີຍ.
ນາງໄດ້ອາໄສຢູ່ທ່າມກາງຊົນຊາດຕ່າງໆ;
ນາງກໍບໍ່ພົບບ່ອນພັກສະຫງົບ.
ທຸກຄົນທີ່ໄລ່ຕາມນາງກໍໄລ່ທັນນາງ
ໃນຍາມທີ່ນາງທຸກຍາກລຳບາກ.
ຫົນທາງໄປຫາຊີໂອນ ກໍຄ່ຳຄວນ,
ເພາະບໍ່ມີຜູ້ໃດມາງານເທດສະການຕາມທີ່ນາງກຳນົດໄວ້.
ປະຕູທັງໝົດຂອງນາງກໍຮົກຮ້າງ,
ບັນດາປະໂລຫິດຂອງນາງກໍໂອ່ຍຄາງ,
ບັນດາຍິງສາວຂອງນາງກໍໂສກເສົ້າ,
ແລະ ນາງກໍຢູ່ໃນຄວາມເຈັບປວດອັນຂົມຂື່ນ.
ບັນດາສັດຕູຂອງນາງກໍກາຍເປັນນາຍຂອງນາງ;
ສັດຕູທັງຫລາຍຂອງນາງຕ່າງກໍເບີກບານໃຈ.
ເພາະພຣະເຈົ້າຢາເວໄດ້ນຳຄວາມໂສກເສົ້າມາໃຫ້ນາງ
ເພາະບາບອັນຫລວງຫລາຍຂອງນາງ.
ລູກຂອງນາງກໍຖືກເນລະເທດ,
ຕົກໄປເປັນຊະເລີຍຕໍ່ໜ້າສັດຕູ.
ຄວາມສະຫງ່າງາມທັງໝົດ
ໄດ້ຖືກພາກໄປຈາກລູກສາວແຫ່ງຊີໂອນ1ແລ້ວ.
ເຈົ້ານາຍຂອງນາງນັ້ນເປັນເໝືອນກວາງ
ທີ່ຫາທົ່ງຫຍ້າບໍ່ໄດ້;
ພວກເຂົາຕ້ອງໜີໄປຕໍ່ໜ້ານັກລ່າ
ຢ່າງອ່ອນແຮງ.
ໃນຍາມທີ່ນາງທຸກລຳບາກ ແລະ ຕ້ອງພະເນຈອນໄປ
ເຢຣູຊາເລັມກໍລະນຶກເຖິງຊັບສົມບັດທັງໝົດ
ທີ່ນາງເຄີຍມີໃນເມື່ອກ່ອນ.
ເມື່ອປະຊາຊົນຂອງນາງຕົກຢູ່ໃນມືຂອງສັດຕູ,
ກໍບໍ່ມີຜູ້ໃດຊ່ວຍເຫລືອນາງ.
ສັດຕູທັງຫລາຍຂອງນາງຕ່າງກໍເບິ່ງນາງ
ແລະ ຫົວຂວັນຄວາມຈິບຫາຍຂອງນາງ.
ເຢຣູຊາເລັມໄດ້ເຮັດບາບຢ່າງໃຫຍ່ຫລວງ
ແລະ ດັ່ງນັ້ນນາງຈຶ່ງເປັນມົນທິນ.
ທຸກຄົນທີ່ເຄີຍໃຫ້ກຽດນາງຕ່າງກໍດູຖູກນາງ.
ເພາະພວກເຂົາໄດ້ເຫັນຄວາມເປືອຍກາຍຂອງນາງ;
ນາງເອງຄວນຄາງ
ແລະ ຫັນໜ້າໜີ.
ຄວາມສົກກະປົກທີ່ຝັງແໜ້ນຢູ່ໃນເຄື່ອງນຸ່ງຂອງນາງ;
ນາງບໍ່ຫ່ວງໃຍນຳອະນາຄົດຂອງນາງ
ຄວາມຫລົ້ມຈົມຂອງນາງເປັນຕາຕົກໃຈ;
ບໍ່ມີຜູ້ໃດເລົ້າໂລມໃຈນາງເລີຍ.
“ຂ້າແດ່ພຣະເຈົ້າຢາເວ, ເບິ່ງແມ, ຄວາມທຸກທໍລະມານຂອງຂ້ານ້ອຍ,
ເພາະສັດຕູໄດ້ຮັບໄຊຊະນະແລ້ວ”.
ສັດຕູໄດ້ຍາດເອົາ
ຊັບສົມບັດທັງໝົດຂອງນາງໄປ;
ນາງໄດ້ເຫັນຄົນຕ່າງຊາດທີ່ບໍ່ເຊື່ອພຣະເຈົ້າ
ບຸກເຂົ້າໄປໃນສະຖານນະມັດສະການຂອງນາງ
ຄືຄົນເຫລົ່ານັ້ນທີ່ພຣະອົງສັ່ງຫ້າມ
ບໍ່ໃຫ້ເຂົ້າມາທ່າມກາງຊຸມນຸມປະຊາຊົນຂອງພຣະອົງ.
ປະຊາຊົນຂອງນາງໄດ້ຄ່ຳຄວນ
ຂະນະທີ່ພວກເຂົາຊອກຫາອາຫານ;
ພວກເຂົາໄດ້ເອົາຂອງມີຄ່າອອກມາແລກປ່ຽນອາຫານ
ເພື່ອພວກເຂົາຈະໄດ້ມີຊີວິດຢູ່.
“ຂ້າແດ່ພຣະເຈົ້າຢາເວ ໂຜດເບິ່ງ ແລະ ພິຈາລະນາດ້ວຍ,
ເພາະຂ້ານ້ອຍຖືກດູຖູກ”.
“ພວກເຈົ້າທັງຫລາຍທີ່ຜ່ານໄປມາ ບໍ່ຮູ້ສຶກຫຍັງບໍ?
ຈົ່ງຫລຽວໄປອ້ອມຮອບ ແລະ ເບິ່ງ.
ມີຄວາມທຸກໃດທີ່ຄືກັບຄວາມທຸກຂອງຂ້ານ້ອຍ
ທີ່ເກີດກັບຂ້ານ້ອຍ,
ທີ່ພຣະເຈົ້າຢາເວໄດ້ນຳມາໃຫ້ຂ້ານ້ອຍ
ໃນວັນແຫ່ງຄວາມໂກດຮ້າຍຢ່າງຮຸນແຮງຂອງພຣະອົງ?
“ພຣະອົງໄດ້ສົ່ງໄຟລົງມາຈາກເບື້ອງເທິງ,
ໄດ້ສົ່ງໄຟນັ້ນລົງມາສູ່ກະດູກຂອງຂ້ານ້ອຍ.
ພຣະອົງໄດ້ກາງຕາໜ່າງເພື່ອດັກຕີນຂອງຂ້ານ້ອຍ
ແລະ ເຮັດໃຫ້ຂ້ານ້ອຍຫັນກັບ.
ພຣະອົງເຮັດໃຫ້ຂ້ານ້ອຍໂດດດ່ຽວ,
ເປັນລົມໝົດມື້.
“ຄວາມບາບທັງຫລາຍຂອງຂ້ານ້ອຍໄດ້ຖືກຜູກໃສ່ໄວ້ກັບແອກ2;
ບາບເຫລົ່ານັ້ນໄດ້ຖືກສານເຂົ້າກັນດ້ວຍມືຂອງພຣະອົງ.
ຄວາມບາບເຫລົ່ານັ້ນໄດ້ຖືກຫ້ອຍໄວ້ຢູ່ເທິງຄໍຂອງຂ້ານ້ອຍ,
ແລະ ອົງພຣະຜູ້ເປັນເຈົ້າໄດ້ຕັດກຳລັງຂອງຂ້ານ້ອຍ.
ພຣະອົງໄດ້ມອບຂ້ານ້ອຍໄວ້ໃນມື
ຂອງບັນດາຄົນທີ່ຂ້ານ້ອຍບໍ່ສາມາດຕ້ານທານໄດ້.
“ອົງພຣະຜູ້ເປັນເຈົ້າໄດ້ປະຕິເສດ
ນັກຮົບທັງໝົດທີ່ຢູ່ທ່າມກາງຂ້ານ້ອຍ;
ພຣະອົງໄດ້ລະດົມກອງທັບມາຕໍ່ສູ້ຂ້ານ້ອຍ
ເພື່ອ3ຍ່ອງພວກຄົນໜຸ່ມຂອງຂ້ານ້ອຍ.
ອົງພຣະຜູ້ເປັນເຈົ້າໄດ້ຢຽບລູກສາວທີ່ບໍລິສຸດຂອງຢູດາ
ໃນອ່າງຢຽບເຫລົ້າອະງຸ່ນ.
“ດ້ວຍເຫດນີ້ ຂ້ານ້ອຍຈຶ່ງຮ້ອງໄຫ້
ແລະ ຕາຂອງຂ້ານ້ອຍກໍລົ້ນດ້ວຍນ້ຳຕາ.
ບໍ່ມີຜູ້ໃດຢູ່ໃກ້ທີ່ຈະເລົ້າໂລມໃຈຂ້ານ້ອຍ,
ບໍ່ມີຜູ້ໃດຟື້ນຈິດວິນຍານຂອງຂ້ານ້ອຍໄດ້.
ລູກຂອງຂ້ານ້ອຍພາກັນຂັດສົນ
ເພາະສັດຕູໄດ້ຊະນະແລ້ວ”.
ຊີໂອນຍື່ນມືຂອງຕົນອອກ,
ແຕ່ບໍ່ມີຜູ້ໃດເລົ້າໂລມໃຈນາງ.
ພຣະເຈົ້າຢາເວໄດ້ອອກຄຳສັ່ງສຳລັບຢາໂຄບວ່າ
ໃຫ້ເພື່ອນບ້ານຂອງເພິ່ນກາຍເປັນສັດຕູຂອງເພິ່ນ
ເຢຣູຊາເລັມກາຍເປັນ
ສິ່ງທີ່ສົກກະປົກໃນທ່າມກາງພວກເຂົາ.
“ພຣະເຈົ້າຢາເວນັ້ນຊອບທຳ
ແຕ່ຂ້ານ້ອຍກໍກະບົດຕໍ່ຄຳສັ່ງຂອງພຣະອົງ.
ປະຊາຊົນທຸກຄົນ, ຈົ່ງຟັງ;
ຈົ່ງເບິ່ງຄວາມທຸກຍາກລຳບາກຂອງຂ້ານ້ອຍ
ຊາຍໜຸ່ມ ແລະ ຍິງໜຸ່ມຂອງຂ້ານ້ອຍ
ຕົກໄປເປັນຊະເລີຍ.
“ຂ້ານ້ອຍຮ້ອງຫາບັນດາພັນທະມິດຂອງຂ້ານ້ອຍ
ແຕ່ພວກເຂົາກໍທໍລະຍົດຂ້ານ້ອຍ
ບັນດາປະໂລຫິດ ແລະ ຜູ້ອາວຸໂສທັງຫລາຍຂອງຂ້ານ້ອຍ
ໄດ້ຕາຍໄປໃນນະຄອນ
ຂະນະທີ່ພວກເຂົາຊອກຫາອາຫານ
ເພື່ອເຮັດໃຫ້ຕົນເອງມີຊີວິດຢູ່.
“ຂ້າແດ່ພຣະເຈົ້າຢາເວ, ໂຜດເບິ່ງວ່າຂ້ານ້ອຍມີຄວາມທຸກຫລາຍເທົ່າໃດ!
ຂ້ານ້ອຍໄດ້ຮັບຄວາມທຸກທໍລະມານຢູ່ພາຍໃນ,
ແລະ ຂ້ານ້ອຍມີຄວາມກະວົນກະວາຍຢູ່ໃນໃຈຂອງຂ້ານ້ອຍ,
ເພາະຂ້ານ້ອຍໄດ້ກະບົດຫລາຍທີ່ສຸດ.
ຢູ່ທາງນອກ, ມີແຕ່ຄົມດາບຂ້າຊີວິດ;
ຢູ່ທາງໃນ, ມີແຕ່ຄວາມຕາຍ.
“ຄົນທັງຫລາຍໄດ້ຍິນສຽງຄ່ຳຄວນຂອງຂ້ານ້ອຍ,
ແຕ່ບໍ່ມີຜູ້ໃດເລົ້າໂລມໃຈຂ້ານ້ອຍ
ສັດຕູທັງໝົດຂອງຂ້ານ້ອຍໄດ້ຍິນເຖິງຄວາມທຸກຂອງຂ້ານ້ອຍ;
ພວກເຂົາກໍຊື່ນຊົມຍິນດີໃນສິ່ງທີ່ພຣະອົງໄດ້ເຮັດ.
ຂໍພຣະອົງນຳວັນທີ່ພຣະອົງໄດ້ປະກາດໄວ້ນັ້ນມາ
ເພື່ອພວກເຂົາຈະໄດ້ເປັນເໝືອນຂ້ານ້ອຍ.
“ຂໍໃຫ້ຄວາມຊົ່ວຮ້າຍຂອງພວກເຂົາມາຢູ່ຕໍ່ໜ້າພຣະອົງ;
ໂຜດຈັດການກັບພວກເຂົາ
ຢ່າງທີ່ພຣະອົງໄດ້ຈັດການກັບຂ້ານ້ອຍ
ເພາະຄວາມບາບທັງໝົດຂອງຂ້ານ້ອຍ.
ຂ້ານ້ອຍຄ່ຳຄວນຫລາຍ
ແລະ ຈິດໃຈຂອງຂ້ານ້ອຍກໍອິດເມື່ອຍອ່ອນເພຍ”.
Source notes (3)
- Footnote ຄື ຊາວເຢຣູຊາເລັມ ຄືກັນກັບບ່ອນອື່ນໆໃນພຣະທຳເຫລັ້ມນີ້
- Footnote ພຣະອົງເຝົ້າເບິ່ງຄວາມບາບຂອງຂ້ານ້ອຍ ໄດ້ຜູກຄວາມບາບເຫລົ່ານັ້ນເຂົ້າກັນ
- Footnote ຫລື ພຣະອົງໄດ້ກຳນົດເວລາສຳລັບຂ້ານ້ອຍ ເມື່ອພຣະອົງຈະ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.