Biblica® Open Lao Contemporary Version
ເຢເຣມີຢາ 52
ເຢຣູຊາເລັມແຕກ
(2ກສ 24:18-20; 25:1-21; 2ຂຄ 36:11-20; ຢມຢ 39:1-10)
ເມື່ອເຊເດກີຢາໄດ້ຂຶ້ນເປັນກະສັດແຫ່ງຢູດາຍ, ເພິ່ນມີອາຍຸຊາວເອັດປີ ແລະ ເພິ່ນໄດ້ປົກຄອງເຢຣູຊາເລັມເປັນເວລາສິບເອັດປີ. ແມ່ຂອງເພິ່ນຊື່ວ່າຮາມູຕານທີ່ເປັນລູກສາວຂອງເຢເຣມີຢາ, ນາງມາຈາກລິບນາ. ເຊເດກີຢາໄດ້ເຮັດສິ່ງທີ່ຊົ່ວໃນສາຍຕາຂອງພຣະເຈົ້າຢາເວເໝືອນດັ່ງທີ່ເຢໂຮຍອາກິມໄດ້ເຮັດ. ຍ້ອນຄວາມໃຈຮ້າຍຂອງພຣະເຈົ້າຢາເວຈຶ່ງເຮັດໃຫ້ເຫດການທັງໝົດນີ້ໄດ້ເກີດຂຶ້ນກັບເຢຣູຊາເລັມ ແລະ ຢູດາຍ, ໃນທີ່ສຸດພຣະອົງໂຍນພວກເຂົາໄປໃຫ້ພົ້ນຈາກໜ້າຂອງພຣະອົງ.
ບັດນີ້ ເຊເດກີຢາໄດ້ກະບົດຕໍ່ກະສັດບາບີໂລນ.
ສະນັ້ນ ໃນປີທີເກົ້າຂອງການປົກຄອງຂອງເຊເດກີຢາ, ໃນວັນທີສິບເດືອນທີສິບ, ກະສັດເນບູກາດເນັດຊາແຫ່ງບາບີໂລນໄດ້ຍົກກອງທັບທັງໝົດຂອງເພິ່ນເຂົ້າມາຕໍ່ສູ້ເຢຣູຊາເລັມ. ພວກເຂົາໄດ້ຕັ້ງຄ້າຍພັກຢູ່ນອກນະຄອນ ແລະ ສ້າງເຄື່ອງປິດລ້ອມອ້ອມເມືອງທັງໝົດໄວ້. ນະຄອນເຢຣູຊາເລັມຍັງຖືກປິດລ້ອມຢູ່ຈົນເຖິງປີທີສິບເອັດຂອງການປົກຄອງຂອງກະສັດເຊເດກີຢາ.
ເມື່ອເຖິງວັນທີເກົ້າຂອງເດືອນທີສີ່, ນະຄອນກໍໄດ້ເກີດການອຶດຢາກອາຫານຢ່າງໜັກໜ່ວງຈົນບໍ່ມີອາຫານໃຫ້ປະຊາຊົນກິນ. ແລ້ວກຳແພງເມືອງກໍຖືກພັງທະລາຍລົງ, ກອງທັບທັງໝົດກໍໜີໄປ, ພວກເຂົາໄດ້ໜີອອກຈາກເມືອງໄປໃນເວລາກາງຄືນຜ່ານປະຕູລະຫວ່າງກຳແພງສອງຊັ້ນໃກ້ສວນຂອງກະສັດ, ເຖິງແມ່ນວ່າຊາວບາບີໂລນ1ກໍາລັງປິດລ້ອມເມືອງໄວ້ຢູ່. ພວກເຂົາໄດ້ໜີອອກໄປມຸ່ງໜ້າໄປທີ່ອາຣາບາ2 ແຕ່ກອງທັບຂອງບາບີໂລນໄລ່ຕາມກະສັດເຊເດກີຢາ ແລະ ນໍາເພິ່ນທັນຢູ່ໃນທົ່ງພຽງເຢຣິໂກ. ທະຫານທັງໝົດຂອງເພິ່ນກໍແຕກໜີຈາກເພິ່ນໄປ ແລະ ກະຈັດກະຈາຍກັນໄປ. ແລ້ວເພິ່ນກໍຖືກຈັບ.
ເພິ່ນຖືກຈັບໄປຫາກະສັດບາບີໂລນທີ່ຣິບລາໃນດິນແດນຮາມັດ, ຢູ່ບ່ອນນັ້ນເນບູກາດເນັດຊາໄດ້ຕັດສິນລົງໂທດເພິ່ນ. ກະສັດແຫ່ງບາບີໂລນໄດ້ຂ້າບັນດາລູກຊາຍຂອງເຊເດກີຢາຢູ່ທີ່ຣິບລາຕໍ່ໜ້າເພິ່ນ; ເພິ່ນຍັງໄດ້ຂ້າບັນດາຂ້າລາຊະການທັງໝົດຂອງຢູດາຍດ້ວຍ. ຈາກນັ້ນເນບູກາດເນັດຊາກໍໄດ້ເຈາະແກ່ນຕາຂອງເຊເດກີຢາອອກພ້ອມທັງລ່າມເພິ່ນດ້ວຍໂສ້ທອງສຳລິດ ແລະ ໄດ້ນໍາເພິ່ນໄປທີ່ບາບີໂລນ, ເນບູກາດເນັດຊາໄດ້ຂັງເຊເດກີຢາຢູ່ໃນຄຸກຈົນເພິ່ນໄດ້ຕາຍໄປ.
ໃນວັນທີສິບຂອງເດືອນທີຫ້າ, ປີທີສິບເກົ້າຂອງການປົກຄອງຂອງເນບູກາດເນັດຊາກະສັດແຫ່ງບາບີໂລນ, ເນບູຊາຣາດານ ຜູ້ບັນຊາການທະຫານເຝົ້າຍາມທີ່ຮັບໃຊ້ກະສັດບາບີໂລນ, ລາວໄດ້ມາທີ່ເຢຣູຊາເລັມ. ລາວຈູດໄຟເຜົາວິຫານຂອງພຣະເຈົ້າຢາເວ, ລາຊະວັງ ແລະ ເຮືອນທຸກຫລັງໃນເຢຣູຊາເລັມ. ລວມທັງອາຄານສຳຄັນທຸກແຫ່ງ. ກອງທັບບາບີໂລນທັງໝົດຢູ່ພາຍໃຕ້ຜູ້ບັນຊາການທະຫານເຝົ້າຍາມ, ລາວໄດ້ທໍາລາຍກຳແພງທັງໝົດທີ່ອ້ອມເຢຣູຊາເລັມລົງ. ເນບູຊາຣາດານ ຜູ້ບັນຊາການທະຫານເຝົ້າຍາມໄດ້ນໍາເອົາປະຊາຊົນທີ່ທຸກຍາກທີ່ສຸດບາງຄົນ ແລະ ບັນດາປະຊາຊົນທີ່ເຫລືອຢູ່ໃນເມືອງ, ພ້ອມທັງຊ່າງຝີມື3ທີ່ຍັງເຫລືອຢູ່ ແລະ ບັນດາຜູ້ທີ່ຫັນມາຫາກະສັດບາບີໂລນໄປເປັນຊະເລີຍ. ແຕ່ເນບູຊາຣາດານໄດ້ປະປະຊາຊົນທີ່ທຸກຍາກທີ່ສຸດຂອງດິນແດນນັ້ນໄວ້ໃຫ້ເຮັດສວນອະງຸ່ນ ແລະ ເຮັດນາ.
ຊາວບາບີໂລນໄດ້ທຸບເສົາທອງສຳລິດ, ແທ່ນເຄື່ອນທີ່ ແລະ ອ່າງທີ່ເປັນທອງສຳຣິດຢູ່ໃນວິຫານຂອງພຣະເຈົ້າຢາເວ ແລະ ພວກເຂົາໄດ້ນໍາເອົາທອງສຳລິດທັງໝົດໄປທີ່ບາບີໂລນ. ພວກເຂົາຍັງໄດ້ນຳເອົາໝໍ້, ຊ້ວນ, ມີດຕັດໄສ້ຕະກຽງ, ຈານ ແລະ ເຄື່ອງໃຊ້ທອງສຳລິດທັງໝົດທີ່ໃຊ້ໃນວິຫານໄປດ້ວຍ. ຜູ້ບັນຊາການທະຫານເຝົ້າຍາມໄດ້ເອົາສິ່ງຂອງທັງໝົດທີ່ເຮັດດ້ວຍຄຳ ຫລື ເງິນບໍລິສຸດຄື ອ່າງ, ກະຖັງໄຟ, ໝໍ້, ຫລັກຕັ້ງຕະກຽງ, ຊາມ ແລະ ຖ້ວຍທີ່ໃຊ້ສໍາລັບເຄື່ອງດື່ມຖວາຍບູຊາໄປນໍາ.
ທອງສຳລິດຈາກເສົາສອງຕົ້ນ, ຂັນທີ່ມີຮູບປັ້ນຂອງງົວສິບສອງໂຕ ແລະ ແທ່ນເຄື່ອນທີ່, ທີ່ກະສັດໂຊໂລໂມນໄດ້ສ້າງຂຶ້ນເພື່ອວິຫານຂອງພຣະເຈົ້າຢາເວ, ສິ່ງເຫລົ່ານັ້ນມີປະລິມານຫລວງຫລາຍເກີນກວ່າຈະຊັ່ງນໍ້າໜັກໄດ້. ເສົາແຕ່ລະຕົ້ນສູງສິບແປດສອກ ແລະ ລວງກົມສິບສອງສອກ, ແຕ່ລະຕົ້ນໜາສີ່ຂໍ້ມື4 ແລະ ດ້ານໃນເປັນຮູ. ຫົວເສົາເປັນທອງສໍາລິດຢູ່ເທິງຍອດເສົາຕົ້ນໜຶ່ງມີຄວາມສູງຫ້າສອກ5 ແລະ ປະດັບປະດາດ້ວຍຮູບຕາໜ່າງ ແລະ ຮູບໝາກພີລາທີ່ເປັນທອງສຳຣິດອ້ອມທັງໝົດ, ອີກຕົ້ນໜຶ່ງປະດັບປະດາດ້ວຍຮູບໝາກພີລາທີ່ຄ້າຍຄືກັນ. ດ້ານຂ້າງມີຮູບໝາກພີລາເກົ້າສິບຫົກໜ່ວຍ; ຈຳນວນຮູບໝາກພີລາທີ່ຢູ່ເທິງອ້ອມຮູບຕາໜ່າງນັ້ນມີໜຶ່ງຮ້ອຍໜ່ວຍ.
ຜູ້ບັນຊາການທະຫານເຝົ້າຍາມໄດ້ຈັບຫົວໜ້າປະໂລຫິດເສຣາອີຢາ, ປະໂລຫິດຮອງເຊຟານີຢາ ແລະ ຄົນເຝົ້າຍາມປະຕູສາມຄົນໄວ້. ໃນບັນດາຄົນທີ່ຍັງຢູ່ໃນນະຄອນນັ້ນ, ລາວໄດ້ຈັບນາຍທະຫານເບິ່ງແຍງທະຫານຕໍ່ສູ້ ແລະ ບັນດາທີ່ປຶກສາຂອງກະສັດເຈັດຄົນ. ລາວຍັງໄດ້ຈັບເລຂາທິການຜູ້ເປັນຫົວໜ້ານາຍທະຫານໃນການເກນທະຫານໃນດິນແດນນັ້ນ, ແລະ ຄົນອີກຫົກສິບຄົນທີ່ພົບຢູ່ໃນນະຄອນນັ້ນໄປດ້ວຍ. ຜູ້ສັ່ງການເນບູຊາຣາດານໄດ້ນຳໂຕຄົນທັງໝົດນີ້ໄປພົບກະສັດບາບີໂລນຢູ່ທີ່ຣິບລາ. ກະສັດກໍໃຫ້ຂ້າຄົນເຫລົ່ານີ້ຢູ່ທີ່ຣິບລາໃນເຂດຮາມັດ.
ດັ່ງນັ້ນ ຢູດາຍຈຶ່ງຕົກເປັນຊະເລີຍ, ຕ້ອງຖືກພາກຈາກດິນແດນຂອງຕົນ.
ນີ້ແມ່ນຈຳນວນປະຊາຊົນທີ່ເນບູກາດເນັດຊາໄດ້ເອົາໄປເປັນຊະເລີຍມີດັ່ງນີ້:
ໃນປີທີເຈັດ, ມີຊາວຢິວ
3.023 ຄົນ;
ໃນປີທີສິບແປດຂອງການປົກຄອງຂອງເນບູກາດເນັດຊາ,
ມີປະຊາຊົນຈາກເຢຣູຊາເລັມ 832 ຄົນ;
ໃນປີທີຊາວສາມຂອງການປົກຄອງຂອງເພິ່ນ,
ເນບູຊາຣາດານ ຜູ້ບັນຊາການທະຫານໄດ້ເອົາຊາວຢິວ 745 ຄົນໄປເປັນຊະເລີຍ.
ມີປະຊາຊົນທັງໝົດ 4.600 ຄົນ.
ເຢໂຮຍອາກິນໄດ້ຮັບການປົດປ່ອຍ
ໃນປີທີສາມສິບເຈັດທີ່ກະສັດເຢໂຮຍອາກິນແຫ່ງຢູດາຍຕົກເປັນຊະເລີຍ, ໃນປີທີ່ເອວິນເມໂຣດັກໄດ້ຂຶ້ນເປັນກະສັດແຫ່ງບາບີໂລນ, ໃນວັນທີຊາວຫ້າເດືອນທີສິບສອງ, ເພິ່ນໄດ້ປ່ອຍກະສັດເຢໂຮຍອາກິນແຫ່ງຢູດາຍ ແລະ ໄດ້ປ່ອຍເພິ່ນອອກຈາກຄຸກ. ລາວກ່າວກັບເຢໂຮຢາກິນຢ່າງອ່ອນໂຢນ ແລະ ໃຫ້ຢູ່ໃນຕຳແໜ່ງທີ່ມີກຽດກວ່າກະສັດອື່ນໆທີ່ຖືກຈັບມາເປັນຊະເລີຍໃນບາບີໂລນ. ດັ່ງນັ້ນ ເຢໂຮຍອາກິນຈຶ່ງໄດ້ຖອດຊຸດນັກໂທດອອກ ແລະ ໄດ້ຮ່ວມກິນອາຫານກັບກະສັດເປັນປະຈຳຕະຫລອດຊີວິດທີ່ມີ. ກະສັດແຫ່ງບາບີໂລນໄດ້ໃຫ້ເບ້ຍລ້ຽງປະຈຳວັນແກ່ເຢໂຮຍອາກິນຕະຫລອດທີ່ເພິ່ນມີຊີວິດຢູ່ຈົນເພິ່ນໄດ້ຕາຍໄປ.
Source notes (5)
- Footnote ຫລື ຊາວຄານເດອາ ເຊັ່ນດຽວກັບຂໍ້ 8, 14 ແລະ 17
- Footnote ຫລື ຮ່ອມພູຈໍແດນ
- Footnote ຫລື ປະຊາຊົນ
- Footnote ຄື ສູງປະມານ 8,1 ແມັດ ແລະ ເສັ້ນຮອບວົງປະມານ 5,4 ແມັດ ໜາປະມານ 8 ຊັງຕີແມັດ
- Footnote ຄື ປະມານ 2,3 ແມັດ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.