Biblica® Open Lao Contemporary Version
ເຢເຣມີຢາ 51
ພຣະເຈົ້າຢາເວກ່າວວ່າ:
“ເບິ່ງແມ, ເຮົາຈະກະຕຸ້ນຈິດວິນຍານຂອງຜູ້ທຳລາຍ
ມາຕໍ່ສູ້ບາບີໂລນ ແລະ ຊາວເລັບຄາມາຍ.1
ເຮົາຈະສົ່ງຄົນຕ່າງຊາດມາທີ່ບາບີໂລນ
ເພື່ອຝັດຮ່ອນ ແລະ ທໍາລາຍດິນແດນຂອງມັນ;
ພວກເຂົາຈະຕໍ່ຕ້ານມັນຢູ່ທຸກດ້ານ
ໃນເວລາແຫ່ງໄພພິບັດຂອງບາບີໂລນ.
ຢ່າໃຫ້ນັກທະນູເນັ່ງທະນູຂອງຕົນໄດ້,
ຫລື ຢ່າໃຫ້ລາວນຸ່ງເສື້ອເກາະຂອງຕົນ.
ຢ່າໄວ້ຊີວິດຊາຍໜຸ່ມຂອງມັນ;
ຈົ່ງທຳລາຍ2ກອງທັບມັນໃຫ້ໝົດສິ້ນ.
ພວກເຂົາຈະລົ້ມລົງຕາຍໃນບາບີໂລນ,3
ບາດເຈັບຢ່າງສາຫັດຢູ່ຕາມຖະໜົນຫົນທາງຂອງມັນ.
ເພາະພຣະເຈົ້າຂອງພວກເຂົາ, ພຣະເຈົ້າຢາເວ ຜູ້ມີລິດຍິ່ງໃຫຍ່
ບໍ່ໄດ້ປະຖິ້ມອິດສະຣາເອນ ແລະ ຢູດາຍ,
ແມ່ນວ່າດິນແດນຂອງພວກເຂົາ4ເຕັມໄປດ້ວຍຄວາມຜິດ
ຕໍ່ໜ້າອົງບໍລິສຸດແຫ່ງອິດສະຣາເອນກໍຕາມ.
“ຈົ່ງໜີໄປຈາກບາບີໂລນ!
ຈົ່ງແລ່ນໜີເອົາຊີວິດລອດ!
ຢ່າໃຫ້ຖືກທຳລາຍເພາະບາບຂອງມັນ.
ເວລາຂອງການແກ້ແຄ້ນຂອງພຣະເຈົ້າຢາເວມາເຖິງແລ້ວ;
ພຣະອົງຈະຕອບແທນບາບີໂລນຕາມສິ່ງທີ່ບາບີໂລນສົມຄວນໄດ້ຮັບ.
ບາບີໂລນເປັນຈອກຄຳໃນມືຂອງພຣະເຈົ້າຢາເວ;
ມັນເຮັດໃຫ້ທັງໂລກມືນເມົາ.
ຊົນຊາດທັງຫລາຍໄດ້ດື່ມເຫລົ້າອະງຸ່ນຂອງມັນ;
ເຫດສະນັ້ນ ບັດນີ້ພວກເຂົາຈຶ່ງໄດ້ເສຍສະຕິໄປ.
ບາບີໂລນຈະລົ້ມຈົມ ແລະ ແຕກກະຈາຍຢ່າງກະທັນຫັນ.
ຈົ່ງຮ້ອງໄຫ້ໃຫ້ກັບມັນ!
ເອົາຢາມາໃສ່ແກ້ຄວາມເຈັບປວດໃຫ້ມັນ!
ບາງທີມັນອາດຈະຫາຍດີກໍໄດ້.
“ ‘ພວກເຮົາຈະຮັກສາບາບີໂລນໃຫ້ຫາຍດີ;
ແຕ່ມັນບໍ່ສາມາດຮັກສາໄດ້;
ໃຫ້ພວກເຮົາປ່ອຍບາບີໂລນໄປ ແລະ ໃຫ້ທຸກຄົນກັບໄປຍັງດິນແດນຂອງຕົນ,
ເພາະໂທດຂອງບາບີໂລນສູງເຖິງທ້ອງຟ້າ;
ມັນສູງຂຶ້ນໄປຈົນເຖິງຟ້າສະຫວັນ’.
“ ‘ພຣະເຈົ້າຢາເວໄດ້ພິສູດພວກເຮົາແລ້ວ;
ຈົ່ງມາ, ໃຫ້ພວກເຮົາບອກຊີໂອນ
ເຖິງສິ່ງທີ່ພຣະເຈົ້າຢາເວ ພຣະເຈົ້າຂອງພວກເຮົາໄດ້ກະທຳ’.
“ຈົ່ງຝົນລູກທະນູໃຫ້ແຫລມຄົມ,
ຈົ່ງຖືໂລ່ຕຽມໄວ້!
ພຣະເຈົ້າຢາເວໄດ້ກະຕຸ້ນບັນດາກະສັດແຫ່ງເມເດຍ,
ເພາະຄວາມປະສົງຂອງພຣະອົງເພື່ອຈະທຳລາຍບາບີໂລນ.
ພຣະເຈົ້າຢາເວຈະແກ້ແຄ້ນ,
ຄືແກ້ແຄ້ນໃຫ້ວິຫານຂອງພຣະອົງ.
ຈົ່ງຍົກທຸງຂຶ້ນຕໍ່ສູ້ກຳແພງຂອງບາບີໂລນ!
ຈົ່ງເພີ່ມກຳລັງທະຫານເຝົ້າຍາມ,
ຈົ່ງຕັ້ງຄົນເຝົ້າຍາມປະຈຳການໄວ້,
ຈົ່ງຕຽມຫລອນໂຈມຕີ!
ພຣະເຈົ້າຢາເວຈະດໍາເນີນການຕາມຄວາມປະສົງຂອງພຣະອົງ,
ຕາມດໍາລັດຂອງພຣະອົງຕໍ່ສູ້ປະຊາຊົນບາບີໂລນ.
ເຈົ້າຜູ້ທີ່ອາໄສຕາມຫ້ວຍນ້ຳທັງຫລາຍ
ແລະ ມີຊັບສົມບັດຢ່າງຫລວງຫລາຍ,
ຈຸດຈົບຂອງພວກເຈົ້າໄດ້ມາເຖິງແລ້ວ,
ເຖິງເວລາແລ້ວທີ່ພວກເຈົ້າຈະຖືກທໍາລາຍ.
ພຣະເຈົ້າຢາເວ ຜູ້ມີລິດອຳນາດຍິ່ງໃຫຍ່ໄດ້ສາບານໄວ້ໂດຍນາມຂອງພຣະອົງເອງວ່າ:
ແນ່ນອນ, ເຮົາຈະເພີ່ມກອງທະຫານໃຫ້ເຈົ້າຈົນເຕັມເໝືອນດັ່ງຝູງຕັກແຕນ,
ແລະ ພວກເຂົາຈະໂຫ່ຮ້ອງຢ່າງມີໄຊເໜືອເຈົ້າ.
“ພຣະອົງສ້າງແຜ່ນດິນໂລກໂດຍລິດອໍານາດຂອງພຣະອົງ;
ພຣະອົງໄດ້ຕັ້ງໂລກໂດຍສະຕິປັນຍາຂອງພຣະອົງ
ແລະ ກາງຟ້າສະຫວັນອອກໂດຍຄວາມເຂົ້າໃຈຂອງພຣະອົງ.
ເມື່ອພຣະອົງເປັ່ງສຽງຮ້ອງ, ນ້ຳໃນຟ້າສະຫວັນກໍຮ້ອງດັງກຶກກ້ອງ;
ພຣະອົງເຮັດໃຫ້ເມກລອຍຂຶ້ນຈາກສຸດປາຍແຜ່ນດິນໂລກ.
ພຣະອົງສົ່ງຟ້າແມບມາພ້ອມກັບສາຍຝົນ
ແລະ ນຳເອົາລົມພັດມາຈາກຄັງຂອງພຣະອົງ.
“ທຸກຄົນກໍບໍ່ຮູ້ຈັກຄິດ ແລະ ຂາດຄວາມຮູ້;
ຊ່າງຄໍາທຸກຄົນກໍອັບອາຍຂາຍໜ້າເພາະຮູບເຄົາລົບຂອງຕົນ.
ບັນດາພະທີ່ລາວໄດ້ເຮັດຂຶ້ນກໍເປັນການຫລອກລວງ;
ພວກມັນບໍ່ໄດ້ມີລົມຫາຍໃຈ.
ພວກມັນບໍ່ມີຄຸນຄ່າຫຍັງ, ເປັນວັດຖຸທີ່ໜ້າເຢາະເຢີ້ຍ;
ເມື່ອການພິພາກສາຂອງພວກມັນມາເຖິງ, ພວກມັນກໍຈະພິນາດ.
ແຕ່ພຣະອົງຜູ້ທີ່ເປັນຂອງຢາໂຄບບໍ່ຄືກັນກັບພະເຫລົ່ານີ້,
ເພາະພຣະອົງເປັນພຣະຜູ້ສ້າງສັບພະທຸກສິ່ງ,
ລວມທັງປະຊາຊົນທີ່ເປັນກຳມະສິດຂອງພຣະອົງ
ນາມຂອງພຣະອົງຄື ພຣະເຈົ້າຢາເວ ຜູ້ມີລິດອຳນາດຍິ່ງໃຫຍ່.
“ເຈົ້າເປັນຄ້ອນຮົບຂອງເຮົາ,
ເປັນອາວຸດສູ້ຮົບຂອງເຮົາ
ເຮົາໃຊ້ເຈົ້າທຸບບັນດາຊົນຊາດຕ່າງໆໃຫ້ກະຈັດກະຈາຍໄປ,
ເຮົາໃຊ້ເຈົ້າທຳລາຍອານາຈັກຕ່າງໆ,
ເຮົາໃຊ້ເຈົ້າທຸບຝູງມ້າ ແລະ ຄົນຂີ່,
ເຮົາໃຊ້ເຈົ້າທຸບລົດມ້າ ແລະ ຄົນຂັບ,
ເຮົາໃຊ້ເຈົ້າທຸບຜູ້ຊາຍ ແລະ ແມ່ຍິງ,
ເຮົາໃຊ້ເຈົ້າທຸບຜູ້ເຖົ້າ ແລະ ເດັກນ້ອຍ
ເຮົາໃຊ້ເຈົ້າທຸບຊາຍໜຸ່ມ ແລະ ຍິງໜຸ່ມ
ເຮົາໃຊ້ເຈົ້າທຸບຄົນລ້ຽງແກະ ແລະ ຝູງແກະ
ເຮົາໃຊ້ເຈົ້າທຸບຊາວນາ ແລະ ງົວ,
ເຮົາໃຊ້ເຈົ້າທຸບຜູ້ປົກຄອງ ແລະ ຂ້າລາຊະການທັງຫລາຍໃຫ້ກະຈັດກະຈາຍໄປ.
“ເຮົາຈະຕອບແທນບາບີໂລນ ແລະ ບັນດາຄົນທີ່ອາໄສຢູ່ໃນບາບີໂລນທັງໝົດ5 ຕໍ່ໜ້າຂອງເຈົ້າເພາະຄວາມຜິດທັງໝົດທີ່ພວກເຂົາໄດ້ເຮັດໃນຊີໂອນ”, ພຣະເຈົ້າຢາເວປະກາດດັ່ງນີ້.
“ເຮົາເປັນສັດຕູກັບເຈົ້າ, ເຈົ້າຜູ້ທຳລາຍບັນດາພູເຂົາ,
ເຈົ້າຜູ້ທຳລາຍທົ່ວແຜ່ນດິນໂລກ”,
ພຣະເຈົ້າຢາເວປະກາດດັ່ງນີ້.
“ເຮົາຈະຢຽດມືຂອງເຮົາອອກຕໍ່ສູ້ເຈົ້າ,
ເຈົ້າຈະກິ້ງລົງຈາກໜ້າຜາ,
ແລະ ເຮັດໃຫ້ເຈົ້າເປັນດັ່ງພູເຂົາຖືກເຜົາຈົນໝົດກ້ຽງ.
ຈະບໍ່ມີຫີນກ້ອນກ້ອນໃດຈາກເຈົ້າໄປເປັນຫີນເສົາເອກ,
ຫລື ບໍ່ມີຫີນກ້ອນໃດເປັນຖານຮາກ,
ເພາະເຈົ້າຈະຖືກປະຖິ້ມໃຫ້ຮົກຮ້າງຕະຫລອດໄປ”, ພຣະເຈົ້າຢາເວປະກາດດັ່ງນີ້.
“ຈົ່ງຍົກທຸງຂຶ້ນໃນດິນແດນນັ້ນ!
ຈົ່ງເປົ່າແກໃນທ່າມກາງຊົນຊາດຕ່າງໆ!
ຈົ່ງຕຽມຊົນຊາດຕ່າງໆໄວ້ເພື່ອສູ້ຮົບບາບີໂລນ;
ຈົ່ງເອີ້ນອານາຈັກເຫລົ່ານີ້ມາຕໍ່ສູ້ກັບມັນ;
ຄືເອີ້ນອາຣາຣັດ, ມິນນີ ແລະ ອັດຊະເກນາດ.
ຈົ່ງຕັ້ງຜູ້ບັນຊາກອງທັບຕໍ່ສູ້ມັນ
ຈົ່ງສົ່ງຝູງມ້າມາເໝືອນດັ່ງຝູງຕັກແຕນ.
ຈົ່ງຕຽມຊົນຊາດຕ່າງໆໄວ້ເພື່ອຕໍ່ສູ້ບາບີໂລນ
ຄືບັນດາກະສັດແຫ່ງເມເດຍ,
ບັນດາຜູ້ປົກຄອງ ແລະ ບັນດາຂ້າລາຊະການທັງໝົດຂອງພວກເຂົາ,
ແລະ ປະເທດທັງໝົດທີ່ພວກເຂົາປົກຄອງ.
ດິນແດນກໍສັ່ນສະທ້ານ ແລະ ດິ້ນໄປມາ,
ເພາະຄວາມປະສົງຂອງພຣະເຈົ້າຢາເວເພື່ອຕໍ່ສູ້ບາບີໂລນ
ເພື່ອເຮັດໃຫ້ດິນແດນຂອງບາບີໂລນຮົກຮ້າງ
ເພື່ອວ່າຈະບໍ່ມີຜູ້ໃດອາໄສຢູ່ທີ່ນັ້ນ.
ພວກນັກຮົບຂອງບາບີໂລນໄດ້ຢຸດການຕໍ່ສູ້ແລ້ວ;
ພວກເຂົາຍັງຢູ່ໃນປ້ອມປ້ອງກັນຂອງຕົນ.
ກໍາລັງຂອງພວກເຂົາກໍໝົດໄປ;
ພວກເຂົາໄດ້ກາຍເປັນດັ່ງຄົນອ່ອນແອ.
ບ່ອນຢູ່ອາໄສໃນບາບີໂລນຖືກໄຟໄໝ້;
ໄລປະຕູເມືອງຕ່າງໆຂອງມັນກໍເພພັງ.
ຜູ້ສື່ສານຄົນໜຶ່ງແລ່ນນໍາອີກຄົນໜຶ່ງ
ແລະ ຜູ້ສົ່ງຂ່າວແລ່ນນໍາອີກຄົນໜຶ່ງ
ເພື່ອໄປລາຍງານແກ່ກະສັດແຫ່ງບາບີໂລນວ່າ
ທົ່ວນະຄອນຂອງລາວໄດ້ຖືກຢຶດແລ້ວ,
ທາງຂ້າມແມ່ນ້ຳກໍຖືກຢຶດ,
ບຶງນ້ຳຢູ່ທົ່ງຫຍ້າກໍຖືກເຜົາ,
ແລະ ພວກທະຫານກໍຕົກໃຈຢ້ານ”.
ພຣະເຈົ້າຢາເວ ຜູ້ມີລິດອໍານາດຍິ່ງໃຫຍ່, ພຣະເຈົ້າຂອງອິດສະຣາເອນກ່າວວ່າ:
“ລູກສາວບາບີໂລນ6 ເປັນເໝືອນລານຟາດເຂົ້າ
ເມື່ອເຖິງເວລາກໍຖືກຢຽບຢໍ່າ
ເວລາເກັບກ່ຽວບາບີໂລນໃກ້ຈະມາເຖິງແລ້ວ”.
“ກະສັດເນບູກາດເນັດຊາແຫ່ງບາບີໂລນໄດ້ທໍາລາຍພວກເຮົາ,
ເພິ່ນໄດ້ໂຍນພວກເຮົາໄປສູ່ຄວາມສັບສົນ,
ເພິ່ນໄດ້ເຮັດໃຫ້ພວກເຮົາເປັນໄຫເປົ່າ.
ເພິ່ນໄດ້ກືນພວກເຮົາເໝືອນດັ່ງງູ
ແລະ ອາຫານແຊບຂອງພວກເຮົາຈົນທ້ອງຂອງຕົນອີ່ມ,
ແລ້ວກໍໄດ້ຮາກພວກເຮົາອອກມາ.
ຈົ່ງໃຫ້ປະຊາຊົນຂອງຊີໂອນເວົ້າວ່າ,
ຂໍໃຫ້ຄວາມໂຫດຮ້າຍທີ່ໄດ້ເຮັດຕໍ່ເນື້ອໜັງຂອງພວກເຮົາຕົກໃສ່ບາບີໂລນ”,
ຈົ່ງໃຫ້ປະຊາຊົນຂອງເຢຣູຊາເລັມເວົ້າວ່າ,
“ຂໍໃຫ້ເລືອດຂອງພວກເຮົາຕົກໃສ່ບັນດາຄົນທີ່ອາໄສຢູ່ໃນບາບີໂລນ”.
ເຫດສະນັ້ນ ພຣະເຈົ້າຢາເວກ່າວວ່າ:
“ເບິ່ງແມ, ເຮົາຈະປົກປ້ອງຄະດີຂອງເຈົ້າ
ແລະ ແກ້ແຄ້ນໃຫ້ເຈົ້າ;
ເຮົາຈະເຮັດໃຫ້ທະເລ
ແລະ ບໍ່ນ້ຳຂອງບາບີໂລນແຫ້ງ.
ບາບີໂລນຈະເປັນຊາກຫັກເພພັງ,
ເປັນບ່ອນຢູ່ຂອງຝູງໝາໄນ,
ເປັນເປົ້າຂອງຄວາມໜ້າຢ້ານ ແລະ ການດູຖູກ,
ເປັນບ່ອນໜຶ່ງທີ່ບໍ່ມີຜູ້ໃດອາໄສຢູ່.
ປະຊາຊົນທັງໝົດຂອງບາບີໂລນຮ້ອງເໝືອນດັ່ງສິງໜຸ່ມ,
ພວກເຂົາຄວນຄາງເໝືອນດັ່ງລູກສິງ.
ແຕ່ຂະນະທີ່ພວກເຂົາຖືກຍົວະໃຫ້ໂກດຮ້າຍ,
ເຮົາຈະຈັດງານລ້ຽງໃຫ້ພວກເຂົາ
ແລະ ເຮັດໃຫ້ພວກເຂົາມືນເມົາ,
ເພື່ອວ່າພວກເຂົາຈະຫົວຂຶ້ນດັງໆ
ແລ້ວກໍນອນຫລັບຕະຫລອດໄປ ແລະ ບໍ່ຕື່ນຂຶ້ນມາ”,
ພຣະເຈົ້າຢາເວປະກາດດັ່ງນີ້.
“ເຮົາຈະນໍາພວກເຂົາລົງມາ
ເໝືອນດັ່ງແກະໜຸ່ມ, ແກະເຖິກ ແລະ ແບ້
ທີ່ຖືກນໍາເອົາໄປຂ້າ.
“ເຊຊັກ7 ຈະຖືກຢຶດ
ເມືອງທີ່ໂອ້ອວດຂອງທົ່ວໂລກຖືກຢຶດແລ້ວ!
ບາບີໂລນຈະຖືກປະຖິ້ມໄວ້ໃຫ້ຮົກຮ້າງ
ໃນທ່າມກາງຊົນຊາດທັງຫລາຍ!
ທະເລກໍຈະຂຶ້ນຖ້ວມບາບີໂລນ;
ຄື້ນທະເລຄຶກຄະນອງຈະປົກຄຸມມັນ.
ເມືອງຕ່າງໆຂອງບາບີໂລນຈະຖືກປະຖິ້ມໄວ້ໃຫ້ຮົກຮ້າງ,
ເປັນບ່ອນແຫ້ງແລ້ງ ແລະ ທະເລຊາຍ,
ເປັນດິນແດນທີ່ບໍ່ມີຜູ້ໃດອາໄສຢູ່,
ໂດຍບໍ່ມີຜູ້ໃດເດີນທາງຜ່ານໄປມາ.
ເຮົາຈະລົງໂທດພະເບນໃນບາບີໂລນ
ແລະ ເຮັດໃຫ້ມັນຄາຍສິ່ງທີ່ມັນໄດ້ກືນລົງໄປອອກມາ.
ຊົນຊາດທັງຫລາຍຈະບໍ່ຫລັ່ງໄຫລມາຫາມັນອີກຕໍ່ໄປ
ແລະ ກຳແພງຂອງບາບີໂລນຈະພັງທະລາຍ.
“ປະຊາຊົນຂອງເຮົາ! ຈົ່ງອອກມາຈາກບາບີໂລນ,
ຈົ່ງໜີເອົາຊີວິດລອດ!
ຈົ່ງແລ່ນໄປໃຫ້ພົ້ນຈາກຄວາມໂກດຮ້າຍອັນຮຸນແຮງຂອງພຣະເຈົ້າຢາເວ.
ຢ່າເສຍຂວັນ ຫລື ຢ່າຢ້ານ
ເມື່ອໄດ້ຍິນຂ່າວຊ່າລືໃນດິນແດນນັ້ນ;
ປີນີ້ຊ່າລືກັນແນວນີ້, ປີໜ້າຊ່າລືກັນແນວນັ້ນ,
ຄືຂ່າວຊ່າລືເລື່ອງຄວາມຮຸນແຮງໃນດິນແດນ
ແລະ ເລື່ອງຜູ້ປົກຄອງຕໍ່ສູ້ກັນ.
ເພາະເວລານັ້ນຈະມາເຖິງຢ່າງແນ່ນອນ
ເມື່ອເຮົາຈະລົງໂທດຮູບເຄົາລົບຕ່າງໆຂອງບາບີໂລນ;
ດິນແດນທັງໝົດຂອງມັນຈະອັບອາຍຂາຍໜ້າ
ແລະ ຄົນທີ່ຖືກຂ້າທັງໝົດຈະນອນຕາຍຢູ່ໃນບາບີໂລນ.
ແລ້ວຟ້າສະຫວັນ ແລະ ແຜ່ນດິນໂລກ ແລະ ທຸກສິ່ງທີ່ຢູ່ໃນນັ້ນ
ຈະໂຫ່ຮ້ອງຍິນດີເໜືອບາບີໂລນ,
ເພາະບັນດາຜູ້ທຳລາຍຈາກທາງທິດເໜືອ
ຈະໂຈມຕີບາບີໂລນ”,
ພຣະເຈົ້າຢາເວປະກາດດັ່ງນີ້.
“ບາບີໂລນຈະຕ້ອງລົ້ມລົງເພາະອິດສະຣາເອນທີ່ຖືກຂ້າ,
ຄືກັນກັບຄົນທົ່ວໂລກທີ່ຖືກຂ້າ
ທີ່ໄດ້ລົ້ມຕາຍເພາະບາບີໂລນ.
ພວກເຈົ້າທີ່ໄດ້ໜີລອດຈາກການຖືກຂ້າ,
ຈົ່ງໜີໄປ ແລະ ຢ່າລະເມີນຢູ່!
ຈົ່ງລະນຶກເຖິງພຣະເຈົ້າຢາເວໃນດິນແດນຫ່າງໄກ,
ແລະ ຄິດເຖິງເຢຣູຊາເລັມ”.
“ພວກເຮົາອັບອາຍຂາຍໜ້າ
ເພາະພວກເຮົາໄດ້ຖືກໝິ່ນປະໝາດ
ແລະ ຄວາມອັບອາຍປົກຄຸມໜ້າພວກເຮົາ,
ເພາະຄົນຕ່າງຊາດໄດ້ເຂົ້າໄປ
ໃນບ່ອນທີ່ບໍລິສຸດຂອງວິຫານຂອງພຣະເຈົ້າຢາເວ”.
ພຣະເຈົ້າຢາເວປະກາດວ່າ, “ແຕ່ວັນນັ້ນກໍາລັງມາເຖິງ,
ເມື່ອເຮົາຈະລົງໂທດຮູບເຄົາລົບຕ່າງໆຂອງບາບີໂລນ
ແລະ ທົ່ວດິນແດນຂອງມັນ
ຄົນທີ່ໄດ້ຮັບບາດເຈັບຈະຮ້ອງຄວນຄາງ.
ເຖິງແມ່ນວ່າບາບີໂລນສູງຂຶ້ນເທົ່າທ້ອງຟ້າ
ແລະ ປ້ອມປ້ອງກັນຂອງມັນແຂງແກ່ນກໍຕາມ,
ເຮົາຈະສົ່ງພວກຜູ້ທຳລາຍມາຕໍ່ສູ້ມັນ”,
ພຣະເຈົ້າຢາເວປະກາດດັ່ງນີ້.
“ສຽງຮ້ອງໄຫ້ດັງອອກມາຈາກບາບີໂລນ,
ສຽງຂອງການທໍາລາຍກໍໃຫຍ່ຫລວງ
ດັງອອກມາຈາກດິນແດນຂອງຊາວບາບີໂລນ.
ພຣະເຈົ້າຢາເວຈະທຳລາຍບາບີໂລນ;
ພຣະອົງຈະເຮັດໃຫ້ສຽງອຶກກະທຶກຂອງມັນມິດງຽບ.
ຄື້ນຂອງບັນດາສັດຕູຈະຊັດມາເໝືອນດັ່ງນໍ້າແມ່ນໍ້າໃຫຍ່;
ສຽງຂອງພວກມັນຈະດັງກ້ອງສະໜັ່ນ.
ຜູ້ທຳລາຍຈະມາຕໍ່ສູ້ບາບີໂລນ;
ພວກນັກຮົບຂອງບາບີໂລນຈະຖືກຈັບ,
ແລະ ລູກທະນູຂອງພວກເຂົາຈະຖືກຫັກຖິ້ມ.
ເພາະພຣະເຈົ້າຢາເວເປັນພຣະເຈົ້າແຫ່ງການຕອບແທນ;
ພຣະອົງຈະຕອບແທນຢ່າງສະສົມ.
ເຮົາຈະເຮັດໃຫ້ບັນດາຂ້າລາຊະການ ແລະ ບັນດານັກປາດມືນເມົາ,
ບັນດາຜູ້ປົກຄອງ, ພວກນາຍທະຫານ ແລະ ພວກນັກຮົບຂອງບາບີໂລນກໍມືນເມົາເໝືອນກັນ;
ພວກເຂົາຈະຫລັບຕະຫລອດໄປ ແລະ ບໍ່ຕື່ນຂຶ້ນມາອີກ”,
ອົງກະສັດຜູ້ມີນາມວ່າພຣະເຈົ້າຢາເວ ຜູ້ມີລິດອຳນາດຍິ່ງໃຫຍ່ປະກາດດັ່ງນີ້.
ພຣະເຈົ້າຢາເວ ຜູ້ມີລິດອຳນາດຍິ່ງໃຫຍ່ກ່າວວ່າ:
“ກຳແພງໜາຂອງບາບີໂລນຈະຖືກພັງລົງ
ແລະ ປະຕູສູງຂອງມັນຈະຖືກເຜົາ;
ປະຊາຊາດທັງຫລາຍກໍຈະອິດເມື່ອຍລ້າໆ,
ແຮງງານຂອງຊົນຊາດຕ່າງໆເປັນພຽງເຊື້ອໄຟໃຫ້ແປວໄຟເທົ່ານັ້ນ”.
ນີ້ແມ່ນຂໍ້ຄວາມທີ່ຜູ້ທໍານວາຍເຢເຣມີຢາໄດ້ມອບໃຫ້ເຈົ້າໜ້າທີ່ເບິ່ງແຍງແຂວງເສຣາອີຢາ ລູກຊາຍຂອງເນຣີຢາ, ຫລານຊາຍຂອງມາຣະເຊຢາ, ເມື່ອລາວໄປທີ່ບາບີໂລນກັບກະສັດເຊເດກີຢາແຫ່ງຢູດາຍໃນປີທີສີ່ຂອງການປົກຄອງຂອງເພິ່ນ. ເຢເຣມີຢາໄດ້ຂຽນລົງໃນໜັງສືມ້ວນກ່ຽວກັບເລື່ອງໄພພິບັດທັງໝົດທີ່ຈະເກີດຂຶ້ນກັບບາບີໂລນຄືທຸກສິ່ງທີ່ໄດ້ບັນທຶກກ່ຽວກັບບາບີໂລນ. ເຢເຣມີຢາໄດ້ເວົ້າກັບເສຣາອີຢາວ່າ, “ເມື່ອທ່ານໄປເຖິງບາບີໂລນ, ຈົ່ງອ່ານຂໍ້ຄວາມທັງໝົດນີ້ດ້ວຍສຽງດັງໆ. ແລ້ວຈົ່ງກ່າວວ່າ, ‘ຂ້າແດ່ພຣະເຈົ້າຢາເວ, ພຣະອົງໄດ້ກ່າວໄວ້ວ່າພຣະອົງຈະທຳລາຍບ່ອນນີ້, ເພື່ອວ່າຈະບໍ່ມີທັງຄົນ ແລະ ສັດອາໄສຢູ່ໃນດິນແດນນີ້; ມັນຈະຖືກປະຖິ້ມໃຫ້ຮົກຮ້າງຕະຫລອດໄປ’. ເມື່ອເຈົ້າອ່ານໜັງສືມ້ວນນີ້ຈົບແລ້ວ, ຈົ່ງມັດໜັງສືມ້ວນນີ້ໃສ່ກັບຫີນກ້ອນໜຶ່ງ ແລ້ວໂຍນມັນລົງໃນແມ່ນໍ້າເອີຟຣັດ. ຫລັງຈາກນັ້ນກ່າວວ່າ, ‘ສະນັ້ນ ບາບີໂລນຈະຈົມລົງ ແລະ ຈະບໍ່ຟູຂຶ້ນມາອີກ ເພາະໄພພິບັດທີ່ເຮົາຈະນຳມາສູ່ບາບີໂລນ. ແລະ ປະຊາຊົນຂອງບາບີໂລນຈະລົ້ມຕາຍ’ ”.
ຖ້ອຍຄຳຂອງເຢເຣມີຢາຈົບລົງພຽງເທົ່ານີ້.
Source notes (7)
- Footnote ເລັບຄາມາຍ ເປັນລະຫັດລັບທີ່ໝາຍເຖິງ ຄານເດອາ ເຊິ່ງກໍຄືບາບີໂລນ
- Footnote ຄຳນີ້ໃນພາສາເຮັບເຣີໝາຍເຖິງສິ່ງຂອງ ຫລື ບຸກຄົນທີ່ຖວາຍແດ່ພຣະເຈົ້າຢາເວ ແລ້ວບໍ່ອາດເອົາຄືນມາໄດ້ ມັກຈະຕ້ອງທຳລາຍໃຫ້ໝົດສິ້ນໄປ
- Footnote ຫລື ຄານເດອາ
- Footnote ຫລື ແລະ ດິນແດນຂອງຊາວບາບີໂລນ
- Footnote ຫລື ຄານເດອາ ເຊັ່ນດຽວກັບຂໍ້ 35
- Footnote ຄື ຊາວບາບີໂລນ
- Footnote ເຊຊັກ ເປັນລະຫັດລັບທີ່ໝາຍເຖິງບາບີໂລນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.