Biblica® Open Lao Contemporary Version
ພວກຜູ້ປົກຄອງ 5
ບົດເພງຂອງເດໂບຣາ
ໃນມື້ນັ້ນ ນາງເດໂບຣາ ແລະ ບາຣັກລູກຊາຍຂອງອາບີໂນອາມຮ້ອງເພງບົດນີ້ວ່າ:
“ຈົ່ງສັນລະເສີນພຣະເຈົ້າຢາເວ!
ເມື່ອເຈົ້ານາຍໃນອິດສະຣາເອນນຳໜ້າ,
ເມື່ອປະຊາຊົນເຕັມໃຈອຸທິດຕົນເອງ
“ຈົ່ງຟັງສິ່ງນີ້, ບັນດາກະສັດ! ບັນດາຜູ້ປົກຄອງ!
ຂ້ອຍຈະຮ້ອງເພງສັນລະເສີນຖວາຍແດ່1ພຣະເຈົ້າຢາເວ;
ຂ້ອຍຈະສັນລະເສີນພຣະເຈົ້າຢາເວ ພຣະເຈົ້າແຫ່ງອິດສະຣາເອນ.
“ຂ້າແດ່ພຣະເຈົ້າຢາເວ ເມື່ອພຣະອົງອອກມາຈາກເສອີ,
ເມື່ອພຣະອົງຍ່າງຈາກດິນແດນເອໂດມ,
ໂລກກໍສັ່ນສະເທືອນ ທ້ອງຟ້າຖອກເທ,
ເມກເທຝົນລົງມາ.
ບັນດາພູເຂົາກໍຫວັ່ນໄຫວຢູ່ຕໍ່ໜ້າພຣະເຈົ້າຢາເວ
ແມ່ນແຕ່ພູເຂົາຊີນາຍກໍສັ່ນສະເທືອນຕໍ່ໜ້າພຣະເຈົ້າຢາເວ, ພຣະເຈົ້າແຫ່ງອິດສະຣາເອນ.
“ໃນສະໄໝຂອງຊຳຄາລູກຊາຍຂອງອານາດ,
ໃນສະໄໝຂອງຢາເອນຖະໜົນຫົນທາງຖືກປະຖິ້ມໄວ້;
ຜູ້ສັນຈອນໄປມາໃຊ້ເສັ້ນທາງຄົດລ້ຽວ.
ຊາວບ້ານ2 ໃນອິດສະຣາເອນກໍຈະບໍ່ຕໍ່ສູ້ກັນ;
ພວກເຂົາຢຸດຈົນເຖິງຂ້ອຍ3 ເດໂບຣາຂຶ້ນມາ
ຈົນເຖິງຂ້ອຍຂຶ້ນມາ, ເປັນດັ່ງແມ່ຄົນໜຶ່ງໃນອິດສະຣາເອນ.
ພຣະເຈົ້າເລືອກພວກຜູ້ນໍາໃໝ່
ເມື່ອສົງຄາມກໍມາຮອດປະຕູເມືອງ,
ແຕ່ບໍ່ມີໂລ່ ຫລື ຫອກໃຫ້ເຫັນເລີຍ
ທ່າມກາງທະຫານສີ່ສິບພັນຄົນໃນອິດສະຣາເອນ.
ຈິດໃຈຂອງຂ້ອຍຢູ່ນໍາບັນດາເຈົ້ານາຍຂອງອິດສະຣາເອນ,
ທັງຢູ່ນໍາບັນດາອາສາສະໝັກທີ່ເຕັມໃຈຢູ່ນໍາປະຊາຊົນ.
ຈົ່ງສັນລະເສີນພຣະເຈົ້າຢາເວ!
“ທ່ານຜູ້ຂີ່ລໍຂາວ
ນັ່ງຢູ່ເທິງຜ້າປູອານ,
ແລະ ທ່ານຜູ້ຍ່າງຕາມຫົນທາງ,
ຈົ່ງຟັງ ສຽງຂອງພວກນັກຮ້ອງ4 ທີ່ບໍ່ນ້ຳ.
ພວກເຂົາເລົ່າເຖິງໄຊຊະນະຂອງພຣະເຈົ້າຢາເວ,
ໄຊຊະນະຂອງຊາວບ້ານຂອງພຣະອົງ5ໃນອິດສະຣາເອນ.
“ແລ້ວປະຊາຊົນຂອງພຣະເຈົ້າຢາເວ
ລົງມາທີ່ປະຕູເມືອງ.
‘ຈົ່ງຕື່ນຂຶ້ນ, ຈົ່ງຕື່ນຂຶ້ນ, ເດໂບຣາ!
ຈົ່ງຕື່ນຂຶ້ນ, ຈົ່ງຕື່ນຂຶ້ນ, ເປັ່ງສຽງຮ້ອງເພງ!
ລຸກຂຶ້ນ, ບາຣັກ!
ລູກຊາຍຂອງອາບີໂນອາມ, ຈົ່ງເອົາຊະເລີຍຂອງເຈົ້າໄປ’.
“ບັນດາຄົນຊັ້ນສູງຜູ້ທີ່ເຫລືອຢູ່ກໍລົງມາ;
ປະຊາຊົນຂອງພຣະເຈົ້າຢາເວກໍລົງມາຫາຂ້ອຍຕໍ່ສູ້ຜູ້ຍິ່ງໃຫຍ່.
ບາງຄົນມາຈາກເອຟຣາອິມ ເຊິ່ງຮາກເຫງົ້າໃນອາມາເຫລັກ;
ເບັນຢາມິນຢູ່ກັບປະຊາຊົນຜູ້ທີ່ຕິດຕາມເຈົ້າ.
ບັນດາຜູ້ບັນຊາການລົງມາຈາກມາກີ
ຜູ້ຖືໄມ້ຄ້ອນເຖົ້າຂອງຜູ້ບັນຊາການກອງທັບມາຈາກເຊບູໂລນ.
ເຈົ້ານາຍແຫ່ງອິດຊາຄາຢູ່ກັບເດໂບຣາ;
ອິຊາຄາຢູ່ກັບບາຣັກ,
ສົ່ງໄປທີ່ຮ່ອມພູພາຍໃຕ້ຄໍາສັ່ງຂອງລາວ.
ຢູ່ໃນເຂດແດນຂອງຣູເບັນ
ກໍພາກັນຄິດຢ່າງໜັກ.
ເປັນຫຍັງເຈົ້າຈຶ່ງອາໄສຢູ່ທ່າມກາງຄອກແກະ6
ເພື່ອຟັງສຽງຜິວປາກເອີ້ນຝູງແກະບໍ?
ແຕ່ໃນເຂດແດນຂອງຣູເບັນ
ພາກັນຄິດຢ່າງໜັກ.
ກີເລອາດຢູ່ຟາກແມ່ນ້ຳຈໍແດນພຸ້ນ.
ແລະ ດານເປັນຫຍັງຍັງຢູ່ຂ້າງເຮືອ?
ອາເຊຍັງຢູ່ເທິງຊາຍຝັ່ງ
ແລະ ອາໄສຢູ່ຕາມຊາຍຝັ່ງທະເລຂອງຕົນ.
ປະຊາຊົນຂອງເຊບູໂລນສ່ຽງຊີວິດຂອງພວກເຂົາ;
ເນັບທາລີກໍເຮັດເຊັ່ນດຽວກັນໃນສະໜາມຮົບ.
“ບັນດາກະສັດມາຕໍ່ສູ້ກັນ,
ບັນດາກະສັດແຫ່ງການາອານໄດ້ສູ້ຕໍ່ກັນ.
ທີ່ຕາອານັກ, ໃກ້ກັບນໍ້າຫ້ວຍເມກິດໂດ,
ພວກເຂົາບໍ່ໄດ້ປຸ້ນເອົາເງິນໃດໆເລີຍ.
ເທິງທ້ອງຟ້າ ດວງດາວທັງຫລາຍໄດ້ຕໍ່ສູ້ກັນ,
ເທິງວົງໂຄຈອນມາຕໍ່ສູ້ສີເສຣາ.
ແມ່ນ້ຳກີໂຊນກວາດລ້າງພວກເຂົາອອກໄປ,
ແມ່ນ້ຳກີໂຊນຄື ແມ່ນ້ຳທີ່ເກົ່າແກ່.
ຈິດວິນຍານຂອງຂ້ານ້ອຍ, ຈົ່ງບຸກໜ້າໄປ; ຈົ່ງເຂັ້ມແຂງ!
ແລະ ສຽງມ້າແລ່ນກໍດັງສະໜັ່ນ,
ກີບຕີນຂອງມັນກໍໄປແລ່ນໄປຢ່າງເຂັ້ມແຂງ.
ເທວະດາຂອງພຣະເຈົ້າຢາເວກໍກ່າວ ‘ສາບແຊ່ງເມຣົດ
ສາບແຊ່ງຊາວເມືອງນັ້ນຢ່າງຂົມຂື່ນ,
ເພາະພວກເຂົາບໍ່ໄດ້ມາຊ່ວຍພຣະເຈົ້າຢາເວ,
ຊ່ວຍພຣະເຈົ້າຢາເວຕໍ່ສູ້ຜູ້ຍິ່ງໃຫຍ່’.
“ຍິງທີ່ໄດ້ຮັບພຣະພອນຫລາຍທີ່ສຸດຄື ນາງຢາເອນ,
ເມຍຂອງເຮເບຊາວເກນິດ,
ຍິງທີ່ໄດ້ຮັບພຣະພອນຫລາຍທີ່ສຸດທີ່ອາໄສຢູ່ໃນຜ້າເຕັນ.
ລາວຂໍນ້ຳ ແລ້ວນາງກໍໃຫ້ນ້ຳນົມແກ່ລາວ,
ນາງນຳນົມຂຸ້ນໃສ່ຖ້ວຍທີ່ງົດງາມທີ່ໃຊ້ສໍາລັບເຈົ້ານາຍມາໃຫ້ລາວ.
ນາງຢື້ຈັບຫລັກສຽບຜ້າເຕັນ,
ມືຂວາຂອງນາງນາງຖືຄ້ອນຕີຂອງຊ່າງໄມ້.
ນາງຕີສີເສຣາ ເຂົ້າທີ່ກະໂຫລກຫົວຂອງລາວ,
ນາງຕອກຫລັກສຽບຜ້າເຕັນທະລຸກະໂຫລກຫົວຂອງລາວຈົນຊອດ.
ລາວຈົມລົງທີ່ຕີນຂອງນາງ
ລາວລົ້ມລົງບ່ອນທີ່ລາວນອນຢູ່.
ລາວລົ້ມລົງ, ລາວຈົມລົງທີ່ຕີນຂອງນາງ
ລາວລົ້ມລົງຕາຍຢູ່ໃນທີ່ນັ້ນ.
“ແມ່ຂອງສີເສຣາກໍເຝົ້າເບິ່ງທາງປ່ອງຢ້ຽມອອກມາ
ທາງຫລັງຕະໜ່າງນາງກໍສົ່ງສຽງຮ້ອງໄຫ້ວ່າ,
‘ເປັນຫຍັງລົດຮົບຂອງລາວຈຶ່ງກັບມາຊ້າ?
ເປັນຫຍັງລໍ້ຂອງລົດຮົບຂອງລາວຈຶ່ງແລ່ນຊ້າ?’
ພວກແມ່ຍິງທີ່ສະຫລາດໃນບັນດາສະຕີຂອງນາງກໍຕອບນາງ;
ແທ້ຈິງແລ້ວ ນາງຍັງເວົ້າຕໍ່ຕົນເອງວ່າ
‘ພວກເຂົາຍັງຫາບໍ່ພົບ ແລະ ກໍາລັງແບ່ງປັນສິ່ງຂອງທີ່ທ້ອນໂຮມມາໄດ້
ມີຍິງຄົນໜຶ່ງຫລືສອງຄົນຕໍ່ຊາຍໜຶ່ງ,
ສີເສຣາປຸ້ນໄດ້ເສື້ອຜ້າສີສັນງົດງາມ,
ເສື້ອຜ້າສີສັນງົດງາມທີ່ແສ່ວລວດລາຍ,
ມີຜ້າພັນຄໍທີ່ແສ່ວລວດລາຍສຳລັບຂ້ອຍ
ທັງໝົດນີ້ເປັນຂອງທີ່ປຸ້ນມາ’
“ຂ້າແດ່ພຣະເຈົ້າຢາເວ! ຂໍໃຫ້ສັດຕູທັງໝົດຂອງພຣະອົງຈິບຫາຍໄປ
ແຕ່ຂໍໃຫ້ທຸກຄົນຜູ້ທີ່ຮັກພຣະອົງເປັນເໝືອນດັ່ງດວງຕາເວັນ
ເມື່ອມັນຂຶ້ນມາຢ່າງແຮງກ້າ”.
ແລ້ວແຜ່ນດິນກໍໄດ້ສະຫງົບສຸກເປັນເວລາສີ່ສິບປີ.
Source notes (6)
- Footnote ຫລື ຂອງ
- Footnote ຫລື ນັກຮົບ
- Footnote ຫລື ທ່ານ
- Footnote ຫລື ນັກທະນູ ໃນພາສາເຮັບເຣີຄຳນີ້ມີຄວາມຫມາຍບໍ່ຊັດເຈນ
- Footnote ຫລື ຊາວບ້ານ
- Footnote ຫລື ຖົງສຳພາລະ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.