Biblica® Open Lao Contemporary Version
ພວກຜູ້ປົກຄອງ 16
ແຊມຊັນກັບເດລິລາ
ມື້ໜຶ່ງແຊມຊັນໄປທີ່ກາຊາ, ເຊິ່ງລາວໄດ້ພົບຍິງໂສເພນີຄົນໜຶ່ງຢູ່ທີ່ນັ້ນ. ລາວຈຶ່ງໄປນອນກັບນາງ. ເມື່ອຊາວເມືອງກາຊາໄດ້ຍິນວ່າ, “ແຊມຊັນຢູ່ທີ່ນີ້!” ດັ່ງນັ້ນ ພວກເຂົາຈຶ່ງລ້ອມບ່ອນນັ້ນໄວ້ ແລະ ລໍຖ້າລາວຢູ່ທີ່ປະຕູເມືອງຕະຫລອດຄືນ. ພວກເຂົາບໍ່ໄດ້ໄປໃສໃນຊວ່ງຕອນກາງຄືນ ແລະ ເວົ້າວ່າ, “ໃນຕອນເຊົ້າໆ ພວກເຮົາຈະຂ້າລາວຖິ້ມ”.
ແຕ່ແຊມຊັນນອນຢູ່ທີ່ນັ້ນຈົນຮອດທ່ຽງຄືນເທົ່ານັ້ນ. ແລ້ວລາວລຸກຂຶ້ນໄປດຶງເອົາປະຕູເມືອງພ້ອມທັງບານປະຕູທັງສອງຂ້າງ, ທີ່ມີທັງບານ ແລະ ຂອບປະຕູກໍລຸດອອກທັງໝົດ. ລາວແບກປະຕູໃສ່ບາຂຶ້ນໄປເທິງຍອດພູທີ່ປິ່ນໜ້າມາທາງເຮັບໂຣນ.
ບໍ່ດົນຕໍ່ມາແຊມຊັນຮັກຍິງຄົນໜຶ່ງຊື່ເດລີລາ, ເຊິ່ງອາໄສຢູ່ໃນຮ່ອມພູໂສເຣັກ. ພວກຜູ້ປົກຄອງຂອງຊາວຟີລິດສະຕິນໄປພົບຍິງນັ້ນ ແລະ ບອກນາງວ່າ, “ເຈົ້າຈົ່ງລໍ້ຖາມຄວາມລັບຂອງແຊມຊັນວ່າ ກຳລັງອັນມະຫາສານຂອງລາວມາຈາກໃສ ແລະ ພວກເຮົາຈະເຮັດຢ່າງໃດຈຶ່ງຈະສາມາດມັດລາວໄວ້ໄດ້ ແລະ ຈັບກຸມລາວໄວ້ໄດ້. ແລ້ວພວກເຮົາແຕ່ລະຄົນຈະເອົາເງິນໃຫ້ເຈົ້າໜຶ່ງພັນໜຶ່ງຮ້ອຍຫລຽນເຊເຄວ”.
ດັ່ງນັ້ນ ເດລີລາຈຶ່ງກ່າວກັບແຊມຊັນວ່າ, “ໂຜດບອກຂ້ອຍໃຫ້ຮູ້ຄວາມລັບທີ່ເຮັດໃຫ້ເຈົ້າມີກຳລັງອັນມະຫາສານແດ່ ແລະ ເຮັດຢ່າງໃດຈຶ່ງຈະມັດເຈົ້າໄວ້ໄດ້ ແລະ ຈັບໂຕເຈົ້າໄວ້ໄດ້ແນວໃດ”.
ແຊມຊັນຕອບນາງວ່າ “ຖ້າຜູ້ໃດມັດຂ້ອຍດ້ວຍເຊືອກສາຍທະນູໃໝ່ໆເຈັດເສັ້ນທີ່ຍັງບໍ່ແຫ້ງ, ຂ້ອຍກໍຈະກາຍເປັນຄົນບໍ່ມີແຮງເໝືອນດັ່ງຜູ້ຊາຍຄົນອື່ນໆ”.
ສະນັ້ນ ພວກຜູ້ປົກຄອງຂອງຊາວຟີລິດສະຕິນຈຶ່ງເອົາເຊືອກສາຍທະນູໃໝ່ໆເຈັດເສັ້ນທີ່ຍັງບໍ່ແຫ້ງມາໃຫ້ນາງ ແລະ ນາງກໍເອົາເຊືອກສາຍທະນູມັດແຊມຊັນໄວ້. ພ້ອມທັງໃຫ້ພວກຜູ້ຊາຍລີ້ຢູ່ໃນຫ້ອງຂອງນາງ ແລ້ວນາງກໍຮ້ອງໃສ່ລາວວ່າ “ແຊມຊັນ ພວກຟີລິດສະຕິນມາຈັບເຈົ້າແລ້ວ!” ແຕ່ແຊມຊັນກໍຟຶດເຊືອກສາຍທະນູຂາດໄດ້ຢ່າງງ່າຍດາຍເໝືອນເຊືອກທີ່ຖືກໄຟລົນ. ດັ່ງນັ້ນ ຄວາມລັບກ່ຽວກັບກຳລັງຂອງລາວຈຶ່ງຍັງບໍ່ໄດ້ຖືກເປີດເຜີຍ.
ແລ້ວເດລີລາກ່າວກັບແຊມຊັນວ່າ, “ເຈົ້າຫລອກລວງຂ້ອຍ; ເຈົ້າໄດ້ຕົວະຂ້ອຍ. ໂຜດບອກຂ້ອຍມາດຽວນີ້ວ່າ ຂ້ອຍຈະມັດເຈົ້າໄວ້ໄດ້ແນວໃດ”.
ແຊມຊັນກ່າວວ່າ, “ຖ້າຜູ້ໃດໃຊ້ເຊືອກໃໝ່ທີ່ບໍ່ເຄີຍໃຊ້ກ່ອນມາມັດຂ້ອຍຢ່າງແໜ້ນໜາ ຂ້ອຍກໍຈະກາຍເປັນຄົນບໍ່ມີແຮງເໝືອນດັ່ງຜູ້ຊາຍຄົນອື່ນໆ”.
ດັ່ງນັ້ນ ເດລີລາຈຶ່ງເອົາເຊືອກໃໝ່ມາ ແລະ ມັດລາວໄວ້ ແລ້ວພວກຜູ້ຊາຍລີ້ຢູ່ໃນຫ້ອງ, ເດລີລາຮ້ອງໃສ່ລາວວ່າ, “ແຊມຊັນ ພວກຟີລິດສະຕິນມາຈັບເຈົ້າແລ້ວ!” ແຕ່ລາວກໍຟຶດເຊືອກຂາດອອກຈາກແຂນເໝືອນດັ່ງເສັ້ນດ້າຍ.
ແລ້ວເດລີລາເວົ້າຕໍ່ແຊມຊັນວ່າ, “ຈົນເຖິງດຽວນີ້ເຈົ້າຍັງຫລອກລວງຂ້ອຍ ແລະ ໄດ້ຕົວະຂ້ອຍ. ໂຜດບອກຂ້ອຍແດ່ວ່າ ຈະມັດເຈົ້າໄວ້ໄດ້ແນວໃດ”.
ແຊມຊັນຕອບວ່າ, “ຖ້າເຈົ້າເປຍເສັ້ນຜົມຂອງຂ້ອຍເປັນເຈັດປອຍເຂົ້າໄປຕໍ່າໃສ່ຫູກ ແລ້ວປັກດ້ວຍເຄືອຫູກ, ຂ້ອຍກໍຈະກາຍເປັນຄົນບໍ່ມີແຮງເໝືອນດັ່ງຜູ້ຊາຍຄົນອື່ນໆ”. ສະນັ້ນ ໃນຂະນະທີ່ແຊມຊັນກໍາລັງນອນຫລັບຢູ່ນັ້ນ, ເດລີລາກໍເປຍຜົມຂອງລາວເປັນເຈັດຝອຍ, ເອົາໄປຕໍ່າໃສ່ຫູກ ແລ້ວປັກດ້ວຍເຄືອຫູກ.
ນາງຮ້ອງບອກລາວອີກວ່າ, “ແຊມຊັນ ພວກຟີລິດສະຕິນມາຈັບເຈົ້າແລ້ວ!” ແຊມຊັນກໍລຸກຂຶ້ນ ແລ້ວດຶງເຂັມມຸດອອກ ແລະ ດຶງເຄື່ອງຕ່ຳຫູກຈົນຫັກພັງ.
ແລ້ວເດລີລາເວົ້າຕໍ່ລາວວ່າ, “ເຈົ້າເວົ້າໄດ້ແນວໃດວ່າ ‘ເຈົ້າຮັກຂ້ອຍ’ ໃນເມື່ອເຈົ້າບໍ່ໄວ້ວາງໃຈຂ້ອຍເລີຍ? ຄັ້ງນີ້ເປັນເທື່ອທີສາມແລ້ວ ເຈົ້າທີ່ໄດ້ຫລອກລວງຂ້ອຍ ແລະ ເຈົ້າກໍຍັງບໍ່ເຖິງຄວາມລັບກ່ຽວກັບກໍາລັງອັນມະສານຂອງເຈົ້າ”. ນາງຖາມສໍ້ກັບລາວທຸກມື້ຈົນເຮັດໃຫ້ລາວເກີດຄວາມເບື່ອເກີນທີ່ຈະອົດທົນໄດ້.
ສະນັ້ນ ລາວຈຶ່ງບອກນາງທຸກຢ່າງວ່າ, “ຂ້ອຍບໍ່ເຄີຍຕັດຜົມຈັກເທື່ອ ເພາະຂ້ອຍເປັນຄົນນາຊີຣີທີ່ໄດ້ອຸທິດຕົນແກ່ພຣະເຈົ້າມາຕັ້ງແຕ່ເກີດ. ຖ້າຂ້ອຍຕັດຜົມຖິ້ມເມື່ອໃດ, ກຳລັງຂອງຂ້ອຍກໍຈະໝົດໄປ ແລ້ວຂ້ອຍບໍ່ມີແຮງເໝືອນດັ່ງຜູ້ຊາຍຄົນອື່ນໆ”.
ເມື່ອເດລີລາເຫັນວ່າ ລາວໄດ້ບອກນາງທຸກສິ່ງແກ່ນາງແລ້ວ, ຈຶ່ງສົ່ງຂ່າວໄປຫາເຖິງພວກຜູ້ປົກຄອງຂອງຊາວຟີລິດສະຕິນວ່າ, “ຂໍໂຜດກັບມາອີກເທື່ອໜຶ່ງ; ເພາະລາວໄດ້ບອກທຸກສິ່ງທຸກຢ່າງແກ່ຂ້ອຍແລ້ວ”. ດັ່ງນັ້ນ ພວກຜູ້ປົກຄອງຂອງຊາວຟີລິດສະຕິນຈຶ່ງກັບມາ ພ້ອມທັງຖືເງິນມານຳ. ເດລີລາໃຫ້ແຊມຊັນນອນໝູນຕັກນາງ ແລ້ວນາງໄດ້ເອີ້ນໃຫ້ຄົນມາຕັດຜົມເຈັດປອຍຂອງລາວອອກ ແລະ ກໍາລັງຂອງລາວກໍລົດລົງ. ແລ້ວກຳລັງຂອງລາວກໍໝົດໄປ.
ແລ້ວນາງຮ້ອງຂຶ້ນວ່າ, “ແຊມຊັນ ພວກຟີລິດສະຕິນມາຈັບໂຕເຈົ້າແລ້ວ!”
ລາວກໍຕື່ນຂຶ້ນ ແລະ ຄິດວ່າ, “ເຮົາຈະໄປໄດ້ເໝືອນດັ່ງແຕ່ກ່ອນ” ແຕ່ລາວບໍ່ຮູ້ວ່າພຣະເຈົ້າຢາເວໄດ້ປະຖິ້ມລາວໄປເສຍແລ້ວ.
ຈາກນັ້ນຊາວຟີລິດສະຕິນກໍໄດ້ຈັບລາວ ເຈາະແກ່ນຕາຂອງລາວອອກ ແລະ ນຳເອົາລາວໄປທີ່ກາຊາ. ເຊິ່ງມັດລາວໄວ້ດ້ວຍໂຊ້ທີ່ເປັນທອງສຳລິດ, ພວກເຂົາໃຫ້ລາວໂມ້ແປ້ງຢູ່ໃນຄຸກ. ແຕ່ບໍ່ດົນຜົມຂອງລາວທີ່ຖືກແຖກໍເລີ່ມປົ່ງຂຶ້ນມາອີກ.
ການຕາຍຂອງແຊມຊັນ
ພວກຜູ້ປົກຄອງຊາວຟີລິດສະຕິນໄດ້ມາຊຸມນຸມກັນເພື່ອຖວາຍເຄື່ອງບູຊາຄັ້ງຍິ່ງໃຫຍ່ແກ່ພະດາໂກນຂອງພວກເຂົາ ແລະ ໄດ້ສະເຫລີມສະຫລອງໂດຍຮ້ອງວ່າ, “ພະຂອງພວກເຮົາໄດ້ມອບແຊມຊັນສັດຕູຂອງພວກເຮົາໄວ້ໃນມືຂອງພວກເຮົາແລ້ວ”.
ເມື່ອປະຊາຊົນເຫັນແຊມຊັນ ພວກເຂົາກໍຮ້ອງສັນລະເສີນພະຂອງຕົນວ່າ,
“ພະຂອງພວກເຮົາໄດ້ມອບສັດຕູຂອງພວກເຮົາ,
ໄວ້ໃນມືຂອງພວກເຮົາແລ້ວ,
ຜູ້ທີ່ໄດ້ທໍາລາຍດິນແດນຂອງພວກເຮົາ
ແລະ ຂ້າພວກເຮົາຕາຍຢ່າງຫລວງຫລາຍ”.
ໃນຂະນະທີ່ພວກເຂົາກຳລັງມ່ວນຊື່ນຢູ່ນັ້ນ, ພວກເຂົາກໍຮ້ອງຂຶ້ນວ່າ, “ເອົາແຊມຊັນອອກມາເຮັດຕະຫລົກໃຫ້ພວກເຮົາເບິ່ງແດ່” ດັ່ງນັ້ນ ພວກເຂົາຈຶ່ງເອີ້ນໃຫ້ນໍາເອົາແຊມຊັນອອກມາຈາກຄຸກ, ແລ້ວກໍໃຫ້ລາວສະແດງໃຫ້ພວກເຂົາເບິ່ງ.
ເມື່ອພວກເຂົາເອົາລາວອອກມາຢືນຢູ່ທ່າມກາງເສົາຫລາຍຕົ້ນ, ແຊມຊັນບອກຄົນຮັບໃຊ້ທີ່ຈູງແຂນຕົນມາວ່າ “ພາຂ້ອຍໄປບ່ອນທີ່ມີເສົາຄໍ້າວິຫານ ເພື່ອວ່າຂ້ອຍຈະໄດ້ອີງເສົາເຫລົ່ານັ້ນ” ໃນຂະນະນັ້ນຢູ່ໃນວິຫານເຕັມໄປດ້ວຍຝູງຊົນທັງພວກຜູ້ຊາຍ ແລະ ພວກຜູ້ຍິງ, ພວກຜູ້ປົກຄອງຂອງຊາວຟີລິດສະຕິນທັງໝົດກໍຢູ່ທີ່ນັ້ນ ແລະ ຢູ່ເທິງດາດຟ້າກໍມີຜູ້ຊາຍ ແລະ ຜູ້ຍິງປະມານສາມພັນຄົນກໍາລັງເບິ່ງແຊມຊັນສະແດງຢູ່. ແລ້ວແຊມຊັນກໍພາວັນນາອະທິຖານຕໍ່ພຣະເຈົ້າຢາເວວ່າ “ຂ້າແດ່ພຣະເຈົ້າຢາເວ, ອົງອະທິປະໄຕ, ຂໍໂຜດລະນຶກເຖິງຂ້ານ້ອຍດ້ວຍ. ຂ້າແດ່ພຣະເຈົ້າໂຜດປະທານກຳລັງແກ່ຂ້ານ້ອຍອີກຄັ້ງໜຶ່ງ ແລະ ໃຫ້ຂ້ານ້ອຍໄດ້ແກ້ແຄ້ນຊາວຟີລິດສະຕິນທີ່ໄດ້ເຈາະແກ່ນຕາທັງສອງເບື້ອງຂອງຂ້ານ້ອຍອອກ”. ແລ້ວແຊມຊັນກໍຍັບເຂົ້າໄປໃກ້ເສົາກາງສອງຕົ້ນກາງວິຫານ. ເຊິ່ງເປັນເສົາໃຊ້ຄໍ້າວິຫານ, ມືຂວາຊຸກເສົາຂ້າງໜຶ່ງ ມືຊ້າຍຊຸກເສົາອີກຂ້າງໜຶ່ງ, ແລ້ວຮວບຮວມກຳລັງດັນເສົາ, ແຊມຊັນເວົ້າວ່າ, “ຂ້ານ້ອຍຂໍຕາຍພ້ອມກັບພວກຟີລິດສະຕິນ!” ແລ້ວລາວກໍດັນເສົາສຸດກໍາລັງຂອງລາວ, ວິຫານກໍພັງລົງມາທັບພວກຜູ້ປົກຄອງຂອງຊາວຟີລິດສະຕິນ ແລະ ປະຊາຊົນທັງໝົດທີ່ຢູ່ໃນນັ້ນ. ເຫດສະນັ້ນ ເມື່ອລາວໄດ້ຕາຍໄປ, ລາວໄດ້ຂ້າພວກເຂົາເປັນຈໍານວນຫລາຍກວ່າໃນຂະນະທີ່ລາວຍັງມີຊີວິດຢູ່.
ແລ້ວຍາດຕິພີ່ນ້ອງ ແລະ ຄອບຄົວຂອງພໍ່ລາວກໍລົງໄປເອົາສົບຂອງລາວ. ພວກເຂົາເອົາສົບຂອງລາວກັບໄປ ແລະ ເອົາໄປຝັງໄວ້ຢູ່ໃນບ່ອນຝັງສົບຂອງມາໂນອາພໍ່ຂອງລາວທີ່ຢູ່ລະຫວ່າງເມືອງໂຊຣາ ແລະ ເມືອງເອຊະຕາໂອນ. ແຊມຊັນໄດ້ປົກຄອງ1 ອິດສະຣາເອນເປັນເວລາຊາວປີ.
Source notes (1)
- Footnote ຫລື ພວກຜູ້ປົກຄອງ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.