Biblica® Open Lao Contemporary Version
ໂຢຊວຍ 8
ເມືອງອາອີຖືກທຳລາຍ
ແລ້ວພຣະເຈົ້າຢາເວກໍໄດ້ເວົ້າກັບໂຢຊວຍວ່າ, “ຢ່າຢ້ານເລີຍ, ຢ່າໝົດກຳລັງໃຈ. ຈົ່ງນຳກອງທັບທັງໝົດໄປກັບເຈົ້າ ແລະ ຈົ່ງຂຶ້ນໄປແລ້ວໂຈມຕີເມືອງອາອີ. ເພາະເຮົາໄດ້ມອບກະສັດແຫ່ງເມືອງອາອີ, ປະຊາຊົນຂອງລາວ, ເມືອງຂອງລາວ ແລະ ແຜ່ນດິນຂອງລາວໄວ້ໃນມືຂອງເຈົ້າແລ້ວ. ເຈົ້າຈະຕ້ອງເຮັດກັບເມືອງອາອີ ແລະ ກະສັດຂອງເມືອງນີ້ເໝືອນກັບທີ່ເຈົ້າໄດ້ເຮັດກັບເຢຣິໂກ ແລະ ກະສັດຂອງເມືອງນັ້ນ. ເວັ້ນເສຍແຕ່ວ່າເຈົ້າຈະຢຶດເອົາເຄື່ອງຂອງທີ່ປຸ້ນມາ ແລະ ສັດລ້ຽງຂອງພວກເຂົາມາເປັນຂອງຕົນເອງ. ຈົ່ງດັກໂຈມຕີຢູ່ທາງດ້ານຫລັງເມືອງ”.
ດັ່ງນັ້ນ ໂຢຊວຍ ແລະ ກອງທັບທັງໝົດຈຶ່ງໄດ້ເຄື່ອນທັບອອກໄປເພື່ອເຂົ້າໂຈມຕີເມືອງອາອີ. ເພິ່ນໄດ້ເລືອກເອົານັກຮົບຊັ້ນດີຈຳນວນສາມສິບພັນຄົນ ແລະ ສົ່ງພວກເຂົາອອກໄປໃນເວລາກາງຄືນ ພ້ອມດ້ວຍຄຳສັ່ງເຫລົ່ານີ້ຄື: “ຈົ່ງຟັງໃຫ້ດີ. ໃຫ້ພວກເຈົ້າດັກໂຈມຕີຢູ່ທາງດ້ານຫລັງເມືອງ. ຢ່າໄປໄກຈາກບໍລິເວນນັ້ນ. ພວກເຈົ້າທຸກຄົນຕ້ອງຕຽມພ້ອມ. ເຮົາ ແລະ ຄົນອື່ນທັງໝົດທີ່ຢູ່ກັບເຮົາຈະຍົກທັບເຂົ້າໄປຕີເມືອງນັ້ນ ແລະ ເມື່ອຊາວເມືອງອາອີອອກມາຕໍ່ສູ້ພວກເຮົາ ເໝືອນກັບທີ່ພວກເຂົາໄດ້ເຮັດໃນເວລາຜ່ານມາ, ພວກເຮົາຈະຖອຍໜີໄປຈາກພວກເຂົາ. ພວກເຂົາຈະໄລ່ຕາມພວກເຮົາຈົນກວ່າພວກເຮົາຈະລໍ້ພວກເຂົາອອກມາຈາກເມືອງ, ເພາະພວກເຂົາຈະເວົ້າວ່າ, ‘ພວກເຂົາກຳລັງແລ່ນໜີໄປຈາກພວກເຮົາເໝືອນກັບທີ່ພວກເຂົາໄດ້ເຮັດໃນເວລາຜ່ານມາ’. ດັ່ງນັ້ນ ເມື່ອພວກເຮົາຖອຍໜີຈາກພວກເຂົາ, ໃຫ້ພວກເຈົ້າອອກມາຈາກການດັກໂຈມຕີ ແລະ ບຸກເຂົ້າຢຶດເມືອງ. ພຣະເຈົ້າຢາເວ ພຣະເຈົ້າຂອງພວກເຈົ້າຈະມອບເມືອງນີ້ໄວ້ໃນມືຂອງພວກເຈົ້າ. ເມືອພວກເຈົ້າຢຶດເມືອງໄດ້ແລ້ວ, ຈົ່ງຈູດໄຟເຜົາເມືອງນັ້ນ. ຈົ່ງເຮັດຕາມທີ່ພຣະເຈົ້າຢາເວໄດ້ສັ່ງໄວ້. ຈົ່ງປະຕິບັດຕາມຄຳສັ່ງຂອງເຮົາຢ່າງເຄັ່ງຄັດ”.
ໂຢຊວຍຈຶ່ງໄດ້ສົ່ງພວກເຂົາອອກໄປ ແລະ ພວກເຂົາກໍໄດ້ໄປທີ່ບ່ອນດັກໂຈມຕີ ແລະ ດັກຢູ່ລະຫວ່າງເມືອງເບັດເອນກັບເມືອງອາອີ, ໄປທາງດ້ານຕາເວັນຕົກຂອງເມືອງອາອີ ແຕ່ໃນຄືນນັ້ນໂຢຊວຍໄດ້ຄ້າງຄືນຢູ່ກັບປະຊາຊົນ.
ຕອນເຊົ້າມື້ຕໍ່ມາໂຢຊວຍໄດ້ລະດົມທະຫານຂອງເພິ່ນ, ແລ້ວເພິ່ນ ແລະ ບັນດາຜູ້ນຳຂອງອິດສະຣາເອນໄດ້ເດີນຂະບວນອອກໜ້າພວກເຂົາໄປທີ່ເມືອງອາອີ. ກອງກຳລັງທັງໝົດທີ່ຢູ່ກັບໂຢຊວຍໄດ້ຍົກທັບມາ ແລະ ເຂົ້າມາໃກ້ເມືອງ ແລ້ວກໍມາຮອດໜ້າເມືອງ. ພວກເຂົາໄດ້ຕັ້ງຄ້າຍພັກຢູ່ທີ່ທາງດ້ານເໜືອຂອງເມືອງອາອີ, ໂດຍມີຮ່ອມພູຂັ້ນລະຫວ່າງພວກເຂົາກັບເມືອງນັ້ນ. ໂຢຊວຍໄດ້ເອົາທະຫານປະມານຫ້າພັນຄົນໄປ ແລະ ໃຫ້ພວກເຂົາດັກໂຈມຕີຢູ່ລະຫວ່າງເມືອງເບັດເອນກັບເມືອງອາອີ, ຄືທາງດ້ານຕາເວັນຕົກຂອງເມືອງອາອີ. ພວກເຂົາໃຫ້ກຳລັງພົນເຂົ້າປະຈຳທີ່ຂອງຕົນ ໂດຍມີຄ້າຍຫລັກຢູ່ທາງດ້ານເໜືອຂອງເມືອງ ແລະ ບ່ອນດັກໂຈມຕີຢູ່ທາງດ້ານຕາເວັນຕົກຂອງເມືອງ. ຄືນນັ້ນໂຢຊວຍໄດ້ເຂົ້າໄປໃນຮ່ອມພູ.
ເມື່ອກະສັດຂອງເມືອງອາອີເຫັນຢ່າງນີ້ແລ້ວ, ເພິ່ນ ແລະ ຊາວເມືອງທັງໝົດຈຶ່ງໄດ້ຟ້າວອອກມາແຕ່ເຊົ້າໆ ເພື່ອສູ້ຮົບກັບຊາວອິດສະຣາເອນຢູ່ສະຖານທີ່ບ່ອນໜຶ່ງ ເຊິ່ງເບິ່ງເຫັນອາຣາບາ ແຕ່ເພິ່ນບໍ່ຮູ້ວ່າມີກອງກຳລັງ ເຊິ່ງກຳລັງດັກໂຈມຕີຢູ່ທາງດ້ານຫລັງຂອງເມືອງ. ໂຢຊວຍ ແລະ ຊາວອິດສະຣາເອນທັງໝົດຍອມໃຫ້ຕົນເອງຖືກຕ້ອນກັບໄປຕໍ່ໜ້າພວກອາອີ. ແລະ ພວກເຂົາໄດ້ໜີໄປທາງຖິ່ນແຫ້ງແລ້ງກັນດານ. ຊາວອາອີທັງໝົດຖືກສົ່ງໄປໄລ່ຕາມພວກເຂົາ, ແລ້ວພວກເຂົາກໍໄດ້ໄລ່ຕາມໂຢຊວຍ ແລະ ຖືກລໍ້ໃຫ້ອອກໄປຈາກເມືອງ. ບໍ່ມີຜູ້ຊາຍຈັກຄົນທີ່ຍັງເຫລືອຢູ່ໃນເມືອງອາອີ ຫລື ເບັດເອນ ທີ່ບໍ່ໄປໄລ່ຕາມອິດສະຣາເອນ. ພວກເຂົາໄດ້ເປີດເມືອງປະໄວ້ ແລະ ໄປໄລ່ຕາມອິດສະຣາເອນ.
ແລ້ວພຣະເຈົ້າຢາເວໄດ້ເວົ້າກັບໂຢຊວຍວ່າ, “ຈົ່ງຍື່ນຫອກທີ່ຢູ່ໃນມືຂອງເຈົ້າອອກໄປທາງເມືອງອາອີ, ເພາະເຮົາຈະມອບເມືອງນີ້ໄວ້ໃນມືຂອງເຈົ້າ”. ດັ່ງນັ້ນ ໂຢຊວຍຈຶ່ງໄດ້ຍື່ນຫອກທີ່ຢູ່ໃນມືຂອງລາວອອກໄປທາງເມືອງອາອີ. ໃນທັນທີທີ່ລາວເຮັດຢ່າງນີ້, ທະຫານທີ່ດັກຖ້າຢູ່ກໍລຸກອອກມາຈາກບ່ອນຂອງພວກເຂົາຢ່າງວ່ອງໄວ ແລະ ບຸກເຂົ້າໄປໃນເມືອງ. ພວກເຂົາໄດ້ເຂົ້າໄປໃນເມືອງ ແລະ ໄດ້ຢຶດເອົາເມືອງນັ້ນ ແລ້ວກໍຈູດໄຟເຜົາເມືອງຢ່າງວ່ອງໄວ.
ຊາວເມືອງອາອີໄດ້ຫລຽວຫລັງກັບມາເບິ່ງ ແລະ ເຫັນຄວັນໄຟຂອງເມືອງນັ້ນລອຍຂຶ້ນສູ່ທ້ອງຟ້າ. ແຕ່ພວກເຂົາບໍ່ມີໂອກາດທີ່ຈະໜີໄປທາງໃດ; ຊາວອິດສະຣາເອນທີ່ໜີໄປຍັງຖິ່ນແຫ້ງແລ້ງກັນດານກໍຫັນກັບຄືນມາຕໍ່ສູ້ຜູ້ທີ່ໄລ່ຕາມພວກເຂົາ. ເພາະເມື່ອໂຢຊວຍກັບຄົນອິດສະຣາເອນທັງໝົດເຫັນກອງກຳລັງທີ່ດັກໂຈມຕີຢູ່ຢຶດເມືອງໄດ້ ແລະ ມີຄວັນລອຍຂຶ້ນຈາກເມືອງນັ້ນ, ພວກເຂົາກໍຫັນກັບຄືນມາ ແລະ ໂຈມຕີຊາວເມືອງອາອີ. ກອງກຳລັງທີ່ດັກໂຈມຕີຢູ່ກໍອອກມາຈາກເມືອງນັ້ນຕໍ່ສູ້ພວກເຂົາເໝືອນກັນ, ດັ່ງນັ້ນ ຊາວເມືອງອາອີຈຶ່ງຕົກຢູ່ໃນວົງລ້ອມ, ໂດຍມີຊາວອິດສະຣາເອນຢູ່ທັງສອງຂ້າງທາງ ແລະ ຖືກຊາວອິດສະຣາເອນຂ້າຕາຍໝົດ, ເຊິ່ງເຮັດໃຫ້ພວກເຂົາບໍ່ມີຜູ້ລອດຊີວິດ ຫລື ຫລົບໜີໄປໄດ້. ແຕ່ພວກເຂົາໄດ້ຈັບເອົາກະສັດຂອງເມືອງອາອີທັງເປັນ ແລະໄດ້ນຳເອົາກະສັດໄປຫາໂຢຊວຍ.
ເມື່ອຄົນອິດສະຣາເອນໄດ້ຂ້າຊາວອາອີທີ່ຢູ່ໃນທົ່ງນາ ແລະ ຢູ່ໃນຖິ່ນແຫ້ງແລ້ງກັນດານບ່ອນທີ່ພວກເຂົາໄລ່ຕາມສຳເລັດແລ້ວ ແລະ ເມື່ອພວກເຂົາແຕ່ລະຄົນໄດ້ຖືກປະຫານດ້ວຍດາບແລ້ວ, ຊາວອິດສະຣາເອນທັງໝົດກໍກັບຄືນມາທີ່ເມືອງອາອີ ແລະ ຂ້າບັນດາຄົນທີ່ຢູ່ໃນເມືອງນັ້ນ. ໃນວັນນັ້ນມີຜູ້ຊາຍ ແລະ ແມ່ຍິງລົ້ມຕາຍຈຳນວນ 12.000 ຄົນ ຄືຊາວອາອີທັງໝົດ. ເພາະໂຢຊວຍບໍ່ໄດ້ດຶງມືຂອງຕົນທີ່ຍື່ນຫອກອອກໄປນັ້ນກັບຄືນມາຈົນກວ່າລາວໄດ້ທຳລາຍ1ທຸກຄົນທີ່ອາໄສຢູ່ໃນເມືອງອາອີ. ແຕ່ອິດສະຣາເອນໄດ້ຂົນເອົາສັດລ້ຽງ ແລະ ເຄື່ອງຂອງທີ່ປຸ້ນໄດ້ຈາກເມືອງນີ້ມາເປັນຂອງຕົນ ຕາມທີ່ພຣະເຈົ້າຢາເວໄດ້ສັ່ງໂຢຊວຍໄວ້.
ດັ່ງນັ້ນ ໂຢຊວຍຈຶ່ງໄດ້ເຜົາເມືອງອາອີ2 ແລະ ເຮັດໃຫ້ເມືອງນີ້ເປັນກອງຊາກຫັກພັງຢ່າງຖາວອນ, ເປັນບ່ອນຮົກຮ້າງຈົນເຖິງທຸກວັນນີ້. ໂຢຊວຍສຽບສົບຂອງກະສັດເມືອງອາອີໄວ້ເທິງເສົາ ແລະ ປະສົບໄວ້ຢູ່ທີ່ນັ້ນຈົນຮອດຕອນແລງ. ເມື່ອຕາເວັນຕົກດິນ, ໂຢຊວຍໄດ້ສັ່ງພວກເຂົາໃຫ້ເອົາສົບລົງມາຈາກເສົາ ແລະ ໂຍນສົບນັ້ນລົງທີ່ທາງເຂົ້າປະຕູເມືອງ ແລະ ພວກເຂົາຍົກກອງຫີນຂະໜາດໃຫຍ່ທັບສົບນັ້ນໄວ້, ເຊິ່ງຍັງມີຢູ່ຈົນເຖິງທຸກວັນນີ້.
ການຮື້ຟື້ນຄືນໃໝ່ຂອງພັນທະສັນຍາທີ່ພູເຂົາເອບານ
ດັ່ງນັ້ນ ໂຢຊວຍຈຶ່ງໄດ້ສ້າງແທ່ນບູຊາຖວາຍແກ່ພຣະເຈົ້າຢາເວ, ພຣະເຈົ້າແຫ່ງອິດສະຣາເອນຢູ່ທີ່ພູເຂົາເອບານ, ຕາມທີ່ໂມເຊຜູ້ຮັບໃຊ້ຂອງພຣະເຈົ້າຢາເວໄດ້ສັ່ງຊາວອິດສະຣາເອນໄວ້. ໂຢຊວຍໄດ້ສ້າງແທ່ນບູຊາຂຶ້ນຕາມທີ່ມີບັນທຶກໄວ້ໃນໜັງສືກົດບັນຍັດຂອງໂມເຊ ເປັນແທ່ນບູຊາທີ່ເຮັດດ້ວຍຫີນທີ່ຍັງບໍ່ທັນຖືກຕັດ, ເຊິ່ງບໍ່ເຄີຍຖືກເຄື່ອງມືເຫລັກຕັດແຕ່ງມາກ່ອນ. ພວກເຂົາໄດ້ຖວາຍເຄື່ອງເຜົາບູຊາ ແລະ ເຄື່ອງສາມັກຄີທຳບູຊາແກ່ພຣະເຈົ້າຢາເວຢູ່ເທິງແທ່ນບູຊານັ້ນ. ຢູ່ທີ່ນັ້ນ, ຕໍ່ໜ້າປະຊາຊົນອິດສະຣາເອນ, ໂຢຊວຍໄດ້ຂຽນສຳເນົາຂອງກົດບັນຍັດຂອງໂມເຊໄວ້ເທິງຫີນ. ຊາວອິດສະຣາເອນ, ພ້ອມດ້ວຍບັນດາພວກເຖົ້າແກ່, ເຈົ້າໜ້າທີ່ ແລະ ຜູ້ພິພາກສາທຸກຄົນຂອງພວກເຂົາແມ່ນຢືນຢູ່ສອງຟາກຂອງຫີບພັນທະສັນຍາຂອງພຣະເຈົ້າຢາເວ, ຫັນໜ້າເຂົ້າຫາບັນດາປະໂລຫິດຊາວເລວີທີ່ເປັນຜູ້ຫາມຫີບພັນທະສັນຍາ. ທັງຄົນຕ່າງຊາດທີ່ອາໄສຢູ່ທ່າມກາງພວກເຂົາ ແລະ ຄົນທີ່ກຳເນີດຢູ່ທີ່ນັ້ນ. ປະຊາຊົນເຄິ່ງໜຶ່ງແມ່ນຢືນຢູ່ທາງໜ້າພູເຂົາເກຣີຊິມ ແລະ ອີກເຄິ່ງໜຶ່ງແມ່ນຢືນຢູ່ທາງໜ້າພູເຂົາເອບານ, ຕາມທີ່ໂມເຊຜູ້ຮັບໃຊ້ຂອງພຣະເຈົ້າຢາເວໄດ້ສັ່ງໄວ້ເມື່ອເວລາທີ່ລາວໄດ້ສັ່ງໃຫ້ອວຍພອນປະຊາຊົນອິດສະຣາເອນ.
ຫລັງຈາກນັ້ນ, ໂຢຊວຍກໍໄດ້ອ່ານຂໍ້ຄວາມທັງໝົດຂອງກົດບັນຍັດ ຄືຄຳອວຍພອນ ແລະ ຄຳສາບແຊ່ງຕາມທີ່ໄດ້ຂຽນໄວ້ໃນໜັງສືກົດບັນຍັດ. ບໍ່ມີຈັກຄຳທີ່ໂມເຊໄດ້ສັ່ງໄວ້ທີ່ໂຢຊວຍບໍ່ໄດ້ອ່ານຕໍ່ໜ້າຊຸມຊົນຊາວອິດສະຣາເອນທັງໝົດ, ເຊິ່ງຮວມທັງແມ່ຍິງກັບເດັກ ແລະ ຄົນຕ່າງດ້າວທີ່ອາໄສຢູ່ທ່າມກາງພວກເຂົາ.
Source notes (2)
- Footnote ຄຳນີ້ໃນພາສາເຮັບເຣີໝາຍເຖິງສິ່ງຂອງ ຫລື ບຸກຄົນທີ່ຖວາຍແກ່ພຣະເຈົ້າຢາເວ ແລ້ວບໍ່ສາມາດເອີ້ນຄືນໄດ້ ຈະຕ້ອງທຳລາຍໃຫ້ໝົດ
- Footnote ອາອີ ແປວ່າ ຄວາມພິນາດ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.