Biblica® Open Lao Contemporary Version
ໂຢຊວຍ 23
ໂຢຊວຍອຳລາບັນດາຜູ້ນຳ
ຫລັງຈາກນີ້ເປັນເວລາດົນນານ ແລະ ພຣະເຈົ້າຢາເວໃຫ້ອິດສະຣາເອນໄດ້ພັກສະຫງົບຈາກສັດຕູຂອງພວກເຂົາທີ່ຢູ່ອ້ອມຂ້າງຂອງພວກເຂົາ, ເວລານັ້ນໂຢຊວຍກໍເຖົ້າແກ່ຫລາຍແລ້ວ, ເພິ່ນໄດ້ເອີ້ນອິດສະຣາເອນທັງໝົດມາປະຊຸມກັນ, ເຊິ່ງມີບັນດາຜູ້ອາວຸໂສ, ຜູ້ນຳ, ຜູ້ພິພາກສາ ແລະ ເຈົ້າໜ້າທີ່ ແລ້ວເພິ່ນກໍໄດ້ກ່າວກັບຄົນເຫລົ່ານັ້ນວ່າ: “ຂ້າພະເຈົ້າກໍເຖົ້າແກ່ຫລາຍແລ້ວ. ພວກທ່ານເອງກໍໄດ້ເຫັນສິ່ງທີ່ພຣະເຈົ້າຢາເວ ພຣະເຈົ້າຂອງພວກທ່ານໄດ້ເຮັດເພື່ອຊົນຊາດທັງໝົດເຫລົ່ານີ້ເພື່ອພວກທ່ານ; ພຣະເຈົ້າຢາເວ ພຣະເຈົ້າຂອງພວກທ່ານນີ້ແຫລະ ທີ່ໄດ້ຕໍ່ສູ້ກັບສັດຕູເພື່ອພວກທ່ານ. ຈົ່ງຈື່ໄວ້ວ່າຂ້າພະເຈົ້າໄດ້ແບ່ງດິນແດນທັງໝົດຂອງຊົນຊາດຕ່າງໆ ເຊິ່ງຍັງບໍ່ໄດ້ຮົບຊະນະຄືກັບດິນແດນທີ່ຂ້າພະເຈົ້າໄດ້ຮົບຊະນະແລ້ວໃຫ້ແກ່ເຜົ່າຕ່າງໆຂອງພວກທ່ານ ເພື່ອເປັນມໍລະດົກ ຄືດິນແດນທັງໝົດລະຫວ່າງແມ່ນ້ຳຈໍແດນ ແລະ ທະເລເມດີແຕຣາເນໃນດ້ານທິດຕາເວັນຕົກ. ພຣະເຈົ້າຢາເວ ພຣະເຈົ້າຂອງພວກທ່ານ ພຣະອົງເອງຈະຂັບໄລ່ພວກເຂົາອອກໄປເພາະເຫັນແກ່ພວກທ່ານ. ພຣະອົງຈະຂັບໄລ່ພວກເຂົາອອກໄປໃຫ້ພົ້ນຈາກທາງຂອງພວກທ່ານ ແລະ ພວກທ່ານຈະຢຶດຄອງດິນແດນຂອງພວກເຂົາ ຕາມທີ່ພຣະເຈົ້າຢາເວ ພຣະເຈົ້າຂອງພວກທ່ານໄດ້ສັນຍາກັບພວກທ່ານ.
“ຈົ່ງເຂັ້ມແຂງ ແລະ ເອົາໃຈໃສ່ເຊື່ອຟັງທຸກສິ່ງທີ່ໄດ້ຂຽນໄວ້ໃນໜັງສືກົດບັນຍັດຂອງໂມເຊ ໂດຍບໍ່ຫັນໄປທາງຊ້າຍ ຫລື ທາງຂວາ. ຢ່າຄົບຫາກັບຊົນຊາດເຫລົ່ານີ້ທີ່ຍັງເຫລືອຢູ່ໃນທ່າມກາງພວກທ່ານ; ຢ່າເອີ້ນຊື່ພະຂອງພວກເຂົາ ຫລື ສາບານໂດຍອ້າງຊື່ພະທັງຫລາຍຂອງພວກເຂົາ. ພວກທ່ານຕ້ອງບໍ່ຮັບໃຊ້ພະເຫລົ່ານັ້ນ ຫລື ຂາບໄຫວ້ພະເຫລົ່ານັ້ນ. ແຕ່ຈົ່ງຢຶດໝັ້ນໃນພຣະເຈົ້າຢາເວ ພຣະເຈົ້າຂອງພວກທ່ານ ດັ່ງທີ່ພວກທ່ານເຮັດຢູ່ມາຈົນເຖິງປັດຈຸບັນນີ້.
“ພຣະເຈົ້າຢາເວໄດ້ຂັບໄລ່ຊົນຊາດຕ່າງໆທີ່ຍິ່ງໃຫຍ່ ແລະ ເຂັ້ມແຂງອອກໄປຕໍ່ໜ້າພວກທ່ານ ແລະ ບໍ່ມີຜູ້ໃດສາມາດຕ້ານທານພວກທ່ານໄດ້ຈົນມາເຖິງທຸກວັນນີ້. ໜຶ່ງຄົນໃນພວກທ່ານສາມາດໄລ່ໂຈມຕີສັດຕູເປັນພັນ ເພາະພຣະເຈົ້າຢາເວ ພຣະເຈົ້າຂອງພວກທ່ານໄດ້ຕໍ່ສູ້ເພື່ອພວກທ່ານ ຕາມທີ່ພຣະອົງໄດ້ສັນຍາໄວ້. ດັ່ງນັ້ນ ຈົ່ງເອົາໃຈໃສ່ທີ່ຈະຮັກພຣະເຈົ້າຢາເວ ພຣະເຈົ້າຂອງພວກທ່ານ.
“ແຕ່ຖ້າພວກທ່ານຫັນໜີ ແລະ ໄປຜູກມິດກັບຊົນຊາດເຫລົ່ານີ້ທີ່ຍັງຄົງຫລົງເຫລືອຢູ່ໃນທ່າມກາງພວກທ່ານ ຖ້າພວກທ່ານແຕ່ງງານກັບພວກເຂົາ ຫລື ຄົບຫາກັບພວກເຂົາ, ແລ້ວພວກທ່ານກໍຈົ່ງຮູ້ວ່າພຣະເຈົ້າຢາເວ ພຣະເຈົ້າຂອງພວກທ່ານຈະບໍ່ຂັບໄລ່ຊົນຊາດເຫລົ່ານັ້ນອອກໄປໃຫ້ພົ້ນຈາກພວກທ່ານ. ແຕ່ກົງກັນຂ້າມ ພວກເຂົາຈະກາຍເປັນບ້ວງແຮ້ວ ແລະ ກັບດັກລໍ້ພວກທ່ານ, ເປັນໄມ້ແສ້ທີ່ຕີຫລັງຂອງພວກທ່ານ, ເປັນສ້ຽນໜາມທີ່ຢູ່ໃນຕາຂອງພວກທ່ານ ຈົນກວ່າພວກທ່ານຈະພິນາດຈິບຫາຍໄປຈາກດິນແດນອັນອຸດົມສົມບູນນີ້ ເຊິ່ງພຣະເຈົ້າຢາເວ ພຣະເຈົ້າຂອງພວກທ່ານໄດ້ມອບໃຫ້ພວກທ່ານ.
“ອີກບໍ່ດົນ ຂ້າພະເຈົ້າກໍຈະຕາຍໄປເໝືອນຄົນອື່ນໆ. ພວກທ່ານກໍຮູ້ດ້ວຍສຸດຈິດສຸດໃຈແລ້ວວ່າຄຳສັນຍາອັນປະເສີດທີ່ພຣະເຈົ້າຢາເວ ພຣະເຈົ້າຂອງພວກທ່ານໄດ້ໃຫ້ໄວ້ກັບພວກທ່ານນັ້ນ ລ້ວນແຕ່ເປັນຈິງ ບໍ່ມີຂາດຕົກບົກຜ່ອງແມ່ນແຕ່ຂໍ້ດຽວ. ແຕ່ພຣະເຈົ້າຢາເວ ພຣະເຈົ້າຂອງພວກທ່ານໄດ້ໃຫ້ສິ່ງດີງາມທັງໝົດ ເຊິ່ງໄດ້ສັນຍາໄວ້ກັບພວກທ່ານແລ້ວຢ່າງໃດ ພຣະເຈົ້າຢາເວກໍຈະນຳສິ່ງຊົ່ວຮ້າຍທັງຫລາຍທີ່ກ່າວໄວ້ນັ້ນມາຕົກໃສ່ພວກທ່ານຢ່າງນັ້ນ ຈົນກວ່າພຣະອົງຈະທຳລາຍພວກທ່ານໃຫ້ພົ້ນຈາກດິນແດນອັນອຸດົມສົມບູນທີ່ພຣະອົງໄດ້ມອບໃຫ້ແກ່ພວກທ່ານ. ຖ້າພວກທ່ານລະເມີດຄຳໝັ້ນສັນຍາຂອງພຣະເຈົ້າຢາເວ ພຣະເຈົ້າຂອງພວກທ່ານ ເຊິ່ງໄດ້ສັ່ງພວກທ່ານໄວ້, ແລ້ວຫັນໄປຮັບໃຊ້ພະອື່ນ ແລະ ຂາບລົງໄຫວ້ພະເຫລົ່ານັ້ນ, ຄວາມໃຈຮ້າຍຂອງພຣະເຈົ້າຢາເວ ກໍຈະເຜົາໄໝ້ພວກທ່ານ ແລະ ພວກທ່ານກໍຈະພິນາດຈິບຫາຍໄປຈາກດິນແດນອັນອຸດົມສົມບູນທີ່ພຣະອົງໄດ້ມອບໃຫ້ພວກທ່ານນີ້ຢ່າງວ່ອງໄວ”.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.