Biblica® Open Lao Contemporary Version
ໂຢຊວຍ 16
ດິນແດນຂອງເຜົ່າເອຟຣາອິມ ແລະ ມານາເຊ
ດິນແດນທີ່ເປັນສ່ວນຂອງເຜົ່າໂຢເຊັບແມ່ນເລີ່ມຈາກຈໍແດນ, ເຊິ່ງຢູ່ທາງທິດຕາເວັນອອກຂອງບໍ່ນ້ຳພຸແຫ່ງເຢຣິໂກ1 ແລະ ຜ່ານຖິ່ນແຫ້ງແລ້ງກັນດານເຂົ້າສູ່ແຖບພູເຂົາແຫ່ງເບັດເອນ. ຈາກເບັດເອນ (ຄືລູເສ)2 ຂ້າມໄປສູ່ເຂດແດນຂອງຊາວອາກກິດທີ່ຢູ່ໃນອາຕາໂຣດ, ລົງມາທາງທິດຕາເວັນຕົກຈົນເຖິງເຂດແດນຂອງຊາວຢາຟະເລດ ໄກໄປຈົນເຖິງດ້ານລຸ່ມຂອງເບັດໂຮໂຣນ ແລະ ໄປຈົນເຖິງເກເຊ ແລ້ວສຸດທີ່ທະເລເມດີແຕຣາເນ.
ດັ່ງນັ້ນ ເຜົ່າມານາເຊ ແລະ ເອຟຣາອິມ ທີ່ເປັນເຊື້ອສາຍຂອງໂຢເຊັບກໍໄດ້ຮັບກຳມະສິດຂອງຕົນຕາມນັ້ນ.
ດິນແດນຂອງເອຟຣາອິມ ທີ່ໄດ້ແບ່ງຕາມແຕ່ລະຕະກຸນ ມີດັ່ງນີ້:
ຊາຍແດນດ້ານທິດຕາເວັນອອກຂອງພວກເຂົາແມ່ນເລີ່ມຈາກອາຕາໂຣດອັດດາ ໄປຈົນເຖິງເບັດໂຮໂຣນເທິງ ແລະ ຕໍ່ເນື່ອງໄປເຖິງທະເລເມດີແຕຣາເນ. ຈາກມິກເມທັດທາງພາກເໜືອ ຊາຍແດນໄດ້ລ້ຽວໄປທາງທິດຕາເວັນອອກ ແລ້ວອອກສູ່ຕາອານາດຊີໂລ, ກາຍຢາໂນອາໄປທາງດ້ານທິດຕາເວັນອອກ. ແລ້ວຊາຍແດນນັ້ນກໍລົງໄປຈາກຢາໂນອາໄປຫາອາຕາໂຣດ ແລະ ນາອາຣາ ຈົນໄປຮອດເມືອງເຢຣິໂກ ແລະ ກໍສິ້ນສຸດລົງທີ່ແມ່ນ້ຳຈໍແດນ. ຈາກຊາຍແດນຂອງຕັບປູອາມາທາງທິດຕາເວັນຕົກໄປຫາຫ້ວຍນ້ຳກະນາ ແລະ ສິ້ນສຸດຢູ່ທີ່ທະເລເມດີແຕຣາເນ. ນີ້ແມ່ນກຳມະສິດຂອງເຜົ່າເອຟຣາອິມ ຕາມແຕ່ລະຕະກຸນ.
ແລະ ຍັງລວມທັງເມືອງຕ່າງໆ ແລະ ໝູ່ບ້ານຕ່າງໆຂອງພວກເຂົາທີ່ຢູ່ໃນເຂດຂອງເຜົ່າມານາເຊທີ່ໄດ້ແຍກໄວ້ໃຫ້ຊາວເອຟຣາອິມອີກດ້ວຍ.
ພວກເຂົາບໍ່ໄດ້ຂັບໄລ່ຊາວການາອານທີ່ອາໄສຢູ່ໃນເກເຊອອກໄປ; ຊາວການາອານຈຶ່ງຍັງອາໄສຢູ່ໃນທ່າມກາງຄົນເອຟຣາອິມ ແຕ່ໄດ້ຖືກເກນໄປເປັນຂ້າທາດແຮງງານມາຈົນເຖິງທຸກວັນນີ້.
Source notes (2)
- Footnote ອາດຈະເປັນຊື່ບູຮານຂອງແມ່ນ້ຳຈໍແດນ
- Footnote ພາສາເຮັບເຣີວ່າ ເບັດເອນໄປເຖິງລູເສ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.