Biblica® Open Lao Contemporary Version
ໂຢຊວຍ 1
ໂຢຊວຍຖືກແຕ່ງຕັ້ງໃຫ້ເປັນຜູ້ນຳ
ຫລັງຈາກທີ່ໂມເຊຜູ້ຮັບໃຊ້ຂອງພຣະເຈົ້າຢາເວໄດ້ຕາຍໄປແລ້ວ, ພຣະເຈົ້າຢາເວກໍໄດ້ເວົ້າກັບໂຢຊວຍລູກຊາຍຂອງນູນ, ຜູ້ຊ່ວຍຂອງໂມເຊວ່າ: “ໂມເຊຜູ້ຮັບໃຊ້ຂອງເຮົາໄດ້ຕາຍແລ້ວ, ຕໍ່ຈາກນີ້ໄປ, ເຈົ້າກັບປະຊາຊົນເຫລົ່ານີ້ທັງໝົດ, ຈົ່ງຕຽມພ້ອມທີ່ຈະຂ້າມແມ່ນ້ຳຈໍແດນເຂົ້າສູ່ດິນແດນທີ່ເຮົາກຳລັງຈະມອບໃຫ້ແກ່ພວກເຂົາ ກໍຄືຊາວອິດສະຣາເອນ. ເຮົາຈະມອບໃຫ້ເຈົ້າທຸກບ່ອນທີ່ເຈົ້າຍ່າງຢຽບໄປ, ຕາມທີ່ເຮົາໄດ້ສັນຍາໄວ້ກັບໂມເຊ. ເຂດແດນຂອງເຈົ້າຈະຂະຫຍາຍຈາກຖິ່ນແຫ້ງແລ້ງກັນດານອອກໄປເຖິງເລບານອນ ແລະ ຈາກແມ່ນ້ຳໃຫຍ່ຄືແມ່ນ້ຳເອີຟຣັດລວມທັງດິນແດນຂອງຊາວຮິດຕີທັງໝົດເຖິງທະເລເມດີແຕຣາເນທາງທິດຕາເວັນຕົກ. ບໍ່ມີຜູ້ໃດຈະສາມາດຢືນຕົວຕໍ່ສູ້ເຈົ້າໄດ້ຕະຫລອດຊີວິດຂອງເຈົ້າ. ເພາະເຮົາຈະຢູ່ກັບເຈົ້າເໝືອນທີ່ເຮົາຢູ່ກັບໂມເຊ; ເຮົາຈະບໍ່ໜີຈາກເຈົ້າ ຫລື ບໍ່ປະຖິ້ມເຈົ້າຈັກເທື່ອ. ຈົ່ງເຂັ້ມແຂງ ແລະ ກ້າຫານ, ເພາະເຈົ້າຈະນຳພາປະຊາຊົນເຫລົ່ານີ້ເຂົ້າໄປຄອບຄອງດິນແດນທີ່ເຮົາປະຕິຍານໄວ້ກັບບັນພະບຸລຸດຂອງພວກເຂົາວ່າຈະມອບໃຫ້ພວກເຂົາ.
“ຈົ່ງເຂັ້ມແຂງ ແລະ ກ້າຫານຂຶ້ນ. ຈົ່ງເອົາໃຈໃສ່ເຊື່ອຟັງກົດບັນຍັດທັງໝົດທີ່ໂມເຊຜູ້ຮັບໃຊ້ຂອງເຮົາໄດ້ມອບໃຫ້ເຈົ້າ; ຢ່າຫັນໜີຈາກກົດບັນຍັດໄປທາງຂວາ ຫລື ໄປທາງຊ້າຍ, ເພື່ອວ່າເຈົ້າຈະປະສົບຄວາມສຳເລັດໃນທຸກບ່ອນທີ່ເຈົ້າໄປ. ຈົ່ງຮັກສາໜັງສືກົດບັນຍັດນີ້ໄວ້ໃສ່ປາກຂອງເຈົ້າສະເໝີ, ຈົ່ງຕຶກຕອງໜັງສືກົດບັນຍັດທັງກາງເວັນ ແລະ ກາງຄືນ, ເພື່ອວ່າເຈົ້າຈະເອົາໃຈໃສ່ປະຕິບັດຕາມທຸກສິ່ງທີ່ຂຽນໄວ້ຢູ່ໃນນັ້ນ. ແລ້ວເຈົ້າຈະປະສົບຄວາມຈະເລີນຮຸ່ງເຮືອງ ແລະ ຜົນສຳເລັດ. ເຮົາໄດ້ສັ່ງເຈົ້າແລ້ວບໍ່ແມ່ນບໍ? ຈົ່ງເຂັ້ມແຂງ ແລະ ກ້າຫານ. ຢ່າຢ້ານເລີຍ; ຢ່າທໍ້ໃຈ, ເພາະພຣະເຈົ້າຢາເວ ພຣະເຈົ້າຂອງເຈົ້າຈະຢູ່ກັບເຈົ້າທຸກບ່ອນທີ່ເຈົ້າໄປ”.
ດັ່ງນັ້ນ ໂຢຊວຍຈຶ່ງໄດ້ສັ່ງບັນດາເຈົ້າໜ້າທີ່ຂອງປະຊາຊົນວ່າ: “ຈົ່ງໄປທົ່ວຄ້າຍພັກ ແລະ ບອກປະຊາຊົນວ່າ, ‘ຈົ່ງຕຽມສະບຽງອາຫານໃຫ້ພ້ອມ. ຈາກນີ້ໄປສາມວັນ ພວກເຈົ້າຈະຂ້າມແມ່ນ້ຳຈໍແດນທີ່ນີ້ເພື່ອເຂົ້າໄປທາງໃນ ແລະ ຢຶດຄອງດິນແດນທີ່ພຣະເຈົ້າຢາເວ ພຣະເຈົ້າຂອງພວກເຈົ້າກຳລັງຈະມອບໃຫ້ເປັນກຳມະສິດຂອງພວກເຈົ້າ’ ”.
ແຕ່ໂຢຊວຍໄດ້ເວົ້າກັບເຜົ່າຣູເບັນ, ເຜົ່າກາດ ແລະ ເຜົ່າມານາເຊເຄິ່ງເຜົ່າວ່າ, “ຈົ່ງຈົດຈຳຄຳສັ່ງທີ່ໂມເຊຜູ້ຮັບໃຊ້ຂອງພຣະເຈົ້າຢາເວໄດ້ມອບໃຫ້ແກ່ພວກເຈົ້າຫລັງຈາກທີ່ພຣະອົງໄດ້ກ່າວວ່າ, ‘ພຣະເຈົ້າຢາເວ ພຣະເຈົ້າຂອງພວກເຈົ້າຈະໃຫ້ພວກເຈົ້າພັກຜ່ອນໂດຍການມອບດິນແດນນີ້ໃຫ້ແກ່ພວກເຈົ້າ’. ບັນດາເມຍຂອງພວກເຈົ້າ, ລູກຫລານ ແລະ ສັດລ້ຽງຂອງພວກເຈົ້າຈະພັກຢູ່ໃນດິນແດນທີ່ໂມເຊໄດ້ມອບໃຫ້ແກ່ພວກເຈົ້າທາງທິດຕາເວັນອອກຂອງແມ່ນ້ຳຈໍແດນ, ແຕ່ນັກຮົບທັງໝົດຂອງພວກເຈົ້າ, ຕ້ອງຕຽມພ້ອມເພື່ອການສູ້ຮົບ, ຕ້ອງຂ້າມແມ່ນ້ຳຈໍແດນໄປກ່ອນພີ່ນ້ອງອິດສະຣາເອນຂອງພວກເຈົ້າ. ພວກເຈົ້າຈະຕ້ອງຊ່ວຍພວກເຂົາ ຈົນກວ່າພຣະເຈົ້າຢາເວໃຫ້ພວກເຂົາໄດ້ພັກຜ່ອນ, ເໝືອນກັບທີ່ພຣະອົງໄດ້ເຮັດກັບພວກເຈົ້າ ແລະ ຈົນກວ່າພວກເຂົາໄດ້ຄອບຄອງດິນແດນທີ່ພຣະເຈົ້າຢາເວ ພຣະເຈົ້າຂອງພວກເຈົ້າກຳລັງຈະມອບໃຫ້ແກ່ພວກເຂົານັ້ນດ້ວຍ. ຫລັງຈາກນັ້ນ, ພວກເຈົ້າຈຶ່ງກັບໄປ ແລະ ຄອບຄອງດິນແດນຂອງພວກເຈົ້າ, ເຊິ່ງໂມເຊຜູ້ຮັບໃຊ້ຂອງພຣະເຈົ້າຢາເວໄດ້ມອບໃຫ້ແກ່ພວກເຈົ້າຢູ່ທາງທິດຕາເວັນອອກຂອງແມ່ນ້ຳຈໍແດນໄປຫາທາງເບື້ອງຕາເວັນຂຶ້ນ”.
ແລ້ວພວກເຂົາຈຶ່ງຕອບໂຢຊວຍວ່າ, “ພວກເຮົາຈະເຮັດທຸກສິ່ງຕາມທີ່ທ່ານສັ່ງ ແລະ ພວກເຮົາຈະໄປທຸກບ່ອນທີ່ທ່ານສົ່ງພວກເຮົາໄປ. ພວກເຮົາໄດ້ເຊື່ອຟັງໂມເຊທຸກປະການຢ່າງໃດ, ພວກເຮົາກໍຈະເຊື່ອຟັງທ່ານຢ່າງນັ້ນ. ຂໍແຕ່ໃຫ້ພຣະເຈົ້າຢາເວ ພຣະເຈົ້າຂອງທ່ານຢູ່ກັບທ່ານເໝືອນດັ່ງພຣະອົງຢູ່ກັບໂມເຊ. ຜູ້ໃດກໍຕາມທີ່ຂັດຂືນຄຳເວົ້າຂອງທ່ານ ແລະ ບໍ່ເຊື່ອຟັງຄຳເວົ້າຂອງທ່ານ, ບໍ່ວ່າທ່ານຈະສັ່ງພວກເຂົາອັນໃດ, ຜູ້ນັ້ນຈະຕ້ອງມີໂທດເຖິງຕາຍ. ຂໍພຽງແຕ່ໃຫ້ທ່ານເຂັ້ມແຂງ ແລະ ກ້າຫານ!”
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.