Biblica® Open Lao Contemporary Version
ໂຢນາ 4
ໂຢນາໃຈຮ້າຍທີ່ພຣະເຈົ້າຢາເວເມດຕາ
ແຕ່ສໍາລັບໂຢນາແລ້ວ ນີ້ແມ່ນສິ່ງທີ່ຜິດຫລາຍ ແລະ ລາວຈຶ່ງໃຈຮ້າຍ. ລາວໄດ້ອະທິຖານຕໍ່ພຣະເຈົ້າຢາເວວ່າ, “ຂ້າແດ່ພຣະເຈົ້າຢາເວ, ຂ້ານ້ອຍໄດ້ບອກຕັ້ງແຕ່ຂ້ານ້ອຍຍັງຢູ່ເຮືອນແລ້ວບໍ່ແມ່ນບໍວ່າມັນຈະເປັນຢ່າງນີ້? ເພາະເຫດນີ້ແຫລະ ຂ້ານ້ອຍຈຶ່ງໄດ້ຟ້າວໜີໄປເມືອງຕາກຊິດ. ຂ້ານ້ອຍຮູ້ວ່າພຣະອົງເປັນພຣະເຈົ້າຜູ້ເຕັມດ້ວຍພຣະຄຸນ ແລະ ຄວາມເມດຕາສົງສານ, ຊ້າໃນການຮ້າຍ ແລະ ເຕັມດ້ວຍຄວາມຮັກ, ເປັນພຣະເຈົ້າຜູ້ທີ່ອົດກັ້ນໄວ້ບໍ່ລົງໂທດ. ຂ້າແດ່ພຣະເຈົ້າຢາເວ, ບັດນີ້ ຂໍເອົາຊີວິດຂອງຂ້ານ້ອຍໄປ, ເພາະຂ້ານ້ອຍຕາຍໄປກໍດີກວ່າມີຊີວິດຢູ່”.
ແຕ່ພຣະເຈົ້າຢາເວໄດ້ຕອບວ່າ, “ເຈົ້າມີສິດຫຍັງທີ່ຈະໃຈຮ້າຍ?”
ໂຢນາໄດ້ອອກໄປ ແລະ ນັ່ງຢູ່ບ່ອນໜຶ່ງທາງຕາເວັນອອກຂອງເມືອງ. ລາວໄດ້ສ້າງຕູບຫລັງໜຶ່ງຂຶ້ນຢູ່ທີ່ນັ້ນ, ນັ່ງຢູ່ໃນຮົ່ມຂອງຕູບນັ້ນ ແລະ ລໍຖ້າເບິ່ງເຫດການທີ່ຈະເກີດຂຶ້ນກັບເມືອງນີເນເວ. ແລ້ວພຣະເຈົ້າຢາເວ ພຣະເຈົ້າກໍໃຫ້ມີຕົ້ນໄມ້ໃບດົກຕົ້ນໜຶ່ງງອກຂຶ້ນສູງເໜືອໂຢນາ ເພື່ອເປັນຮົມໃຫ້ຫົວຂອງລາວ ເພື່ອບັນເທົາຄວາມຮ້ອນໃຈຂອງລາວ ແລະ ໂຢນາກໍດີໃຈຫລາຍທີ່ມີຕົ້ນໄມ້ນີ້. ແຕ່ໃນຕອນເຊົ້າຂອງມື້ຕໍ່ມາ ພຣະເຈົ້າໄດ້ໃຫ້ມີໜອນ, ເຊິ່ງກັດກິນຕົ້ນໄມ້ນັ້ນຈົນມັນຫ່ຽວແຫ້ງໄປ. ເມື່ອຕາເວັນຂຶ້ນ, ພຣະເຈົ້າໄດ້ໃຫ້ລົມຕາເວັນອອກອັນຮ້ອນກ້າພັດມາ ແລະ ຕາເວັນກໍສ່ອງແສງກ້າຢູ່ເໜືອຫົວຂອງໂຢນາ ຈົນລາວເກືອບເປັນລົມ. ລາວຢາກຕາຍ ແລະ ໄດ້ເວົ້າວ່າ, “ຖ້າຂ້ານ້ອຍຕາຍໄປກໍຄົງດີກວ່າມີຊີວິດຢູ່”.
ແຕ່ພຣະເຈົ້າໄດ້ກັບໂຢນາວ່າ, “ເຈົ້າມີສິດຫຍັງທີ່ຈະໃຈຮ້າຍເລື່ອງຕົ້ນໄມ້ນັ້ນ?”
ໂຢນາໄດ້ຕອບວ່າ, “ຂ້ານ້ອຍມີສິດ ແລະ ຂ້ານ້ອຍກໍໃຈຮ້າຍຫລາຍຈົນຂ້ານ້ອຍຢາກຕາຍ”.
ແຕ່ພຣະເຈົ້າຢາເວໄດ້ເວົ້າວ່າ, “ເຈົ້າເສຍດາຍຕົ້ນໄມ້ນີ້ ທັງທີ່ເຈົ້າບໍ່ໄດ້ປູກ ຫລື ເບິ່ງແຍງມັນໃຫ້ໃຫຍ່. ມັນງອກຂຶ້ນໃນເວລາຂ້າມຄືນ ແລະ ຕາຍໄປໃນເວລາຂ້າມຄືນ. ແລ້ວນີເນເວເມືອງໃຫຍ່ທີ່ມີຄົນຫລາຍກວ່າ 120.000 ຄົນ ເຊິ່ງບໍ່ຮູ້ຫຍັງເລີຍວ່າອັນໃດແມ່ນມືຊ້າຍອັນໃດແມ່ນມືຂວາ ແລະ ຍັງມີສັດລ້ຽງອີກຈຳນວນຫລວງຫລາຍ ບໍ່ສົມຄວນທີ່ເຮົາຈະຫ່ວງໃຍເມືອງນີ້ບໍ?”
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.