Biblica® Open Lao Contemporary Version
ໂຢຮັນ 3:16
Verse 16 is marked below, with the whole chapter around it. Read from the start
ພຣະເຢຊູເຈົ້າສອນນີໂກເດມ
ມີຟາຣີຊາຍຄົນໜຶ່ງຊື່ນີໂກເດມ, ເປັນສະມາຊິກສະພາການປົກຄອງຂອງຢິວ, ລາວໄດ້ມາຫາພຣະເຢຊູເຈົ້າໃນເວລາກາງຄືນ ແລະ ເວົ້າວ່າ, “ຣັບບີ ພວກເຮົາຮູ້ຢູ່ວ່າທ່ານເປັນຄູສອນຜູ້ມາຈາກພຣະເຈົ້າ. ເພາະບໍ່ມີຜູ້ໃດສາມາດສະແດງໝາຍສຳຄັນທີ່ທ່ານເຮັດຢູ່ນັ້ນ ຖ້າພຣະເຈົ້າບໍ່ໄດ້ສະຖິດຢູ່ນໍາຜູ້ນັ້ນ”.
ພຣະເຢຊູເຈົ້າຕອບວ່າ, “ເຮົາບອກເຈົ້າຕາມຄວາມຈິງວ່າ, ບໍ່ມີຜູ້ໃດສາມາດເຫັນອານາຈັກຂອງພຣະເຈົ້າໄດ້ ຖ້າພວກເຂົາບໍ່ບັງເກີດໃໝ່1”.
ນີໂກເດມຖາມວ່າ, “ຄົນຈະເກີດໃໝ່ໄດ້ຢ່າງໃດເມື່ອພວກເຂົາເຖົ້າແກ່ແລ້ວ? ແນ່ນອນ ພວກເຂົາບໍ່ສາມາດເຂົ້າໄປໃນທ້ອງແມ່ເປັນເທື່ອທີສອງເພື່ອເກີດອອກມາໃໝ່ໄດ້!”
ພຣະເຢຊູເຈົ້າຕອບວ່າ, “ເຮົາບອກເຈົ້າຕາມຄວາມຈິງວ່າ, ຖ້າຜູ້ໃດບໍ່ເກີດຈາກນ້ຳ ແລະ ຈາກພຣະວິນຍານ ຜູ້ນັ້ນຈະເຂົ້າໄປໃນອານາຈັກຂອງພຣະເຈົ້າບໍ່ໄດ້. ຜູ້ທີ່ເກີດຈາກເນື້ອໜັງກໍເປັນເນື້ອໜັງ ແລະ ຜູ້ທີ່ເກີດຈາກພຣະວິນຍານ2ກໍເປັນວິນຍານ. ຢ່າປະຫລາດໃຈທີ່ເຮົາບອກເຈົ້າວ່າ, ເຈົ້າ3ຈໍາເປັນຕ້ອງບັງເກີດໃໝ່. ລົມຢາກພັດໄປທິດໃດມັນກໍພັດໄປທິດນັ້ນ, ເຈົ້າໄດ້ຍິນສຽງຂອງລົມ, ແຕ່ເຈົ້າບໍ່ຮູ້ວ່າລົມພັດມາຈາກໃສ ຫລື ພັດໄປທິດໃດ, ທຸກຄົນທີ່ເກີດຈາກພຣະວິນຍານກໍເປັນດັ່ງນີ້ແຫລະ”.
ນີໂກເດມຖາມວ່າ, “ສິ່ງນີ້ຈະເປັນໄປໄດ້ຢ່າງໃດ?”
ພຣະເຢຊູເຈົ້າຕອບວ່າ, “ເຈົ້າເປັນອາຈານຂອງຄົນອິດສະຣາເອນ ແລ້ວເຈົ້າຍັງບໍ່ເຂົ້າໃຈສິ່ງເຫລົ່ານີ້ບໍ? ເຮົາບອກເຈົ້າຕາມຄວາມຈິງວ່າ, ພວກເຮົາເວົ້າໃນສິ່ງທີ່ພວກເຮົາຮູ້ ແລະ ພວກເຮົາເປັນພະຍານເຖິງສິ່ງທີ່ພວກເຮົາໄດ້ເຫັນ, ແຕ່ເຖິງປານນັ້ນ ພວກເຈົ້າກໍຍັງບໍ່ຍອມຮັບເອົາຄຳພະຍານຂອງພວກເຮົາ. ເຮົາໄດ້ເວົ້າກັບເຈົ້າເຖິງສິ່ງໃນໂລກນີ້ ແລະ ເຈົ້າບໍ່ເຊື່ອ ແລ້ວຖ້າເຮົາເວົ້າເຖິງສິ່ງໃນສະຫວັນເຈົ້າຈະເຊື່ອໄດ້ຢ່າງໃດ? ບໍ່ມີຜູ້ໃດເຄີຍຂຶ້ນໄປສະຫວັນເວັ້ນແຕ່ຜູ້ທີ່ມາຈາກສະຫວັນຄື ບຸດມະນຸດ.4 ໂມເຊຍົກງູຂຶ້ນໃນຖິ່ນແຫ້ງແລ້ງກັນດານຢ່າງໃດ, ບຸດມະນຸດກໍຕ້ອງຖືກຍົກຂຶ້ນ5ຢ່າງນັ້ນ, ເພື່ອວ່າທຸກຄົນທີ່ເຊື່ອໃນພຣະອົງຈະມີຊີວິດນິລັນດອນ”.6
ເພາະພຣະເຈົ້າຮັກໂລກຈົນໄດ້ມອບພຣະບຸດອົງດຽວຂອງພຣະອົງ ເພື່ອທຸກຄົນທີ່ເຊື່ອໃນພຣະບຸດນັ້ນຈະບໍ່ຈິບຫາຍ ແຕ່ມີຊີວິດອັນຕະຫລອດໄປເປັນນິດ. ເພາະວ່າພຣະເຈົ້າບໍ່ໄດ້ໃຊ້ພຣະບຸດຂອງພຣະອົງເຂົ້າມາໃນໂລກເພື່ອຕັດສິນລົງໂທດໂລກ ແຕ່ເພື່ອຊ່ວຍໂລກໃຫ້ລອດພົ້ນໂດຍທາງພຣະບຸດນັ້ນ. ຜູ້ໃດທີ່ເຊື່ອໃນພຣະອົງກໍບໍ່ຖືກພິພາກສາ ແຕ່ຜູ້ໃດທີ່ບໍ່ເຊື່ອກໍຖືກພິພາກສາຢູ່ແລ້ວ ເພາະພວກເຂົາບໍ່ເຊື່ອໃນນາມຂອງພຣະບຸດອົງດຽວຂອງພຣະເຈົ້າ. ຄຳຕັດສິນເປັນດັ່ງນີ້ຄື ຄວາມສະຫວ່າງໄດ້ເຂົ້າມາໃນໂລກ, ແຕ່ມະນຸດຮັກຄວາມມືດແທນທີ່ຈະຮັກຄວາມສະຫວ່າງ ເພາະການກະທຳຂອງພວກເຂົາຊົ່ວຮ້າຍ. ທຸກຄົນທີ່ເຮັດຊົ່ວກໍກຽດຊັງຄວາມສະຫວ່າງ ແລະ ຈະບໍ່ເຂົ້າມາໃນຄວາມສະຫວ່າງເພາະຢ້ານວ່າການກະທຳຂອງຕົນຈະຖືກເປີດເຜີຍ. ແຕ່ຜູ້ໃດກໍຕາມທີ່ມີຊີວິດຢູ່ໂດຍຄວາມຈິງ ກໍຈະມາສູ່ຄວາມສະຫວ່າງ ເພື່ອໃຫ້ເຫັນຈະແຈ້ງວ່າສິ່ງທີ່ພວກເຂົາເຮັດນັ້ນ ໄດ້ເຮັດໄປໂດຍເພິ່ງພາພຣະເຈົ້າ.
ໂຢຮັນຜູ້ໃຫ້ບັບຕິສະມາເປັນພະຍານເລື່ອງພຣະເຢຊູເຈົ້າອີກ
ຫລັງຈາກນັ້ນ ພຣະເຢຊູເຈົ້າ ແລະ ພວກສາວົກຂອງພຣະອົງກໍໄດ້ອອກໄປຍັງເຂດຊົນນະບົດຂອງແຂວງຢູດາຍ, ຢູ່ທີ່ນັ້ນພຣະອົງໃຊ້ເວລາຢູ່ກັບພວກເຂົາ ແລະ ໃຫ້ບັບຕິສະມາ. ໂຢຮັນກໍກຳລັງໃຫ້ບັບຕິສະມາຢູ່ເໝືອນກັນທີ່ບ້ານໄອນົນໃກ້ບ້ານຊາລິມ, ເພາະທີ່ນັ້ນມີນ້ຳຫລາຍ ແລະ ປະຊາຊົນໄດ້ພາກັນມາຫາໂຢຮັນ ແລະ ຮັບບັບຕິສະມາ. (ນີ້ແມ່ນກ່ອນໂຢຮັນຖືກຂັງຄຸກ.) ເກີດການໂຕ້ຖຽງກັນຂຶ້ນລະຫວ່າງລູກສິດບາງຄົນຂອງໂຢຮັນກັບຊາວຢິວຄົນໜຶ່ງ7ກ່ຽວກັບເລື່ອງພິທີຊຳລະ. ພວກເຂົາຈຶ່ງມາຫາໂຢຮັນ ແລະ ເວົ້າກັບເພິ່ນວ່າ, “ອາຈານເອີຍ, ເບິ່ງແມ ຊາຍຄົນນັ້ນເຄີຍຢູ່ກັບທ່ານທີ່ອີກຟາກໜຶ່ງຂອງແມ່ນ້ຳຈໍແດນ ຄືຜູ້ທີ່ທ່ານເປັນພະຍານເຖິງນັ້ນ, ເພິ່ນກຳລັງໃຫ້ບັບຕິສະມາຢູ່ ແລະ ທຸກຄົນກໍກຳລັງໄປຫາເພິ່ນ”.
ໂຢຮັນຕອບວ່າ, “ມະນຸດສາມາດຮັບພຽງແຕ່ສິ່ງທີ່ມອບໃຫ້ພວກເຂົາຈາກສະຫວັນເທົ່ານັ້ນ. ພວກເຈົ້າເອງກໍເປັນພະຍານໄດ້ເຖິງຄຳເວົ້າຂອງເຮົາທີ່ວ່າ, ‘ເຮົາບໍ່ແມ່ນພຣະເມຊີອາ8ແຕ່ເປັນຜູ້ທີ່ຖືກໃຊ້ມາກ່ອນໜ້າພຣະອົງ’. ເຈົ້າສາວກໍເປັນຂອງເຈົ້າບ່າວ. ເພື່ອນຂອງເຈົ້າບ່າວກໍຄອຍຖ້າຟັງເຈົ້າບ່າວຢູ່ ແລະ ເຕັມໄປດ້ວຍຄວາມຊື່ນຊົມຍິນດີເມື່ອໄດ້ຍິນສຽງຂອງເຈົ້າບ່າວ. ເຮົາກໍມີຄວາມຊື່ນຊົມຍິນດີຢ່າງນັ້ນ ແລະ ບັດນີ້ຄວາມຊື່ນຊົມຍິນດີນັ້ນກໍຄົບຖ້ວນແລ້ວ. ພຣະອົງຈະຕ້ອງໃຫຍ່ຂຶ້ນ ແຕ່ເຮົາຈະຕ້ອງນ້ອຍລົງ”.
ຜູ້ທີ່ມາຈາກເບື້ອງເທິງນັ້ນກໍຢູ່ເໜືອກວ່າທຸກສິ່ງ, ຜູ້ທີ່ມາຈາກໂລກກໍເປັນຂອງໂລກ ແລະ ເວົ້າຢ່າງຄົນທີ່ມາຈາກໂລກ. ພຣະອົງຜູ້ທີ່ມາຈາກສະຫວັນກໍຢູ່ເໜືອທຸກສິ່ງ. ພຣະອົງເປັນພະຍານເຖິງສິ່ງທີ່ພຣະອົງໄດ້ເຫັນ ແລະ ໄດ້ຍິນ, ແຕ່ບໍ່ມີຜູ້ໃດຍອມຮັບຄຳພະຍານຂອງພຣະອົງ. ແຕ່ຜູ້ທີ່ຍອມຮັບຄຳພະຍານນັ້ນກໍຢືນຢັນວ່າພຣະເຈົ້າເປັນຈິງ. ເພາະຜູ້ທີ່ພຣະເຈົ້າໃຊ້ມາກໍຈະກ່າວພຣະຄຳຂອງພຣະເຈົ້າ, ເພາະວ່າພຣະເຈົ້າ9ມອບພຣະວິນຍານໃຫ້ໂດຍບໍ່ຈຳກັດ. ພຣະບິດາຮັກພຣະບຸດ ແລະ ມອບທຸກສິ່ງໄວ້ໃນມືຂອງພຣະບຸດ. ຜູ້ໃດທີ່ເຊື່ອໃນພຣະບຸດກໍມີຊີວິດນິລັນດອນ, ແຕ່ຜູ້ໃດທີ່ບໍ່ຍອມຮັບພຣະບຸດກໍຈະບໍ່ໄດ້ຊີວິດນິລັນດອນ, ເພາະຄວາມໂກດຮ້າຍຂອງພຣະເຈົ້າຍັງຢູ່ກັບພວກເຂົາ.10
Source notes (10)
- Footnote ຫລື ເກີດຈາກເບື້ອງເທິງ ເຊັ່ນດຽວກັບຂໍ້ 7
- Footnote ຫລື ແຕ່ວິນຍານ
- Footnote ພາສາກຣີກວ່າ ພວກເຈົ້າ
- Footnote ເອກະສານເກົ່າທີ່ຂຽນດ້ວຍມືບາງສະບັບວ່າ ບຸດມະນຸດຜູ້ສະຖິດໃນສະຫວັນ
- Footnote ໃນພາສາກຣີກຄຳວ່າ ຍົກຂຶ້ນ ອາດໝາຍຄວາມວ່າ ຍົກຍ້ອງ
- Footnote ຫລື ຜູ້ທີ່ເຊື່ອຈະມີຊີວິດນິລັນດອນໃນພຣະອົງ
- Footnote ເອກະສານເກົ່າທີ່ຂຽນດ້ວຍມືບາງສະບັບວ່າ ຊາວຢິວກຸ່ມໜຶ່ງ
- Footnote ຫລື ພຣະຄຣິດເຈົ້າ
- Footnote ພາສາກຣີກວ່າ ພຣະອົງ
- Footnote ຜູ້ແປບາງຄົນໃສ່ເຄື່ອງໝາຍວົງຍືມປິດທີ່ຂໍ້ 30
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.