Biblica® Open Lao Contemporary Version
ໂຢຮັນ 1
ພຣະທຳມາບັງເກີດເປັນມະນຸດ
ເມື່ອຕົ້ນເດີມນັ້ນພຣະທຳດຳລົງຢູ່ ແລະ ພຣະທຳຢູ່ກັບພຣະເຈົ້າ, ແລະ ພຣະທຳເປັນພຣະເຈົ້າ. ພຣະອົງຢູ່ກັບພຣະເຈົ້າຕັ້ງແຕ່ຕົ້ນເດີມ. ທຸກສິ່ງຖືກສ້າງຂຶ້ນໂດຍທາງພຣະອົງ, ໃນບັນດາສິ່ງທີ່ຖືກສ້າງຂຶ້ນມານັ້ນ, ບໍ່ມີຈັກສິ່ງທີ່ບໍ່ໄດ້ຖືກສ້າງຂຶ້ນໂດຍທາງພຣະອົງ. ໃນພຣະອົງຄືຊີວິດ ແລະ ຊີວິດນັ້ນເປັນຄວາມສະຫວ່າງຂອງມະນຸດ. ຄວາມສະຫວ່າງສ່ອງເຂົ້າມາໃນຄວາມມືດ ແລະ ຄວາມມືດນັ້ນກໍບໍ່ໄດ້ຊະນະ1ຄວາມສະຫວ່າງ.
ພຣະເຈົ້າໄດ້ໃຊ້ຜູ້ໜຶ່ງມາຊື່ວ່າໂຢຮັນ. ເພິ່ນໄດ້ມາໃນຖານະເປັນພະຍານເພື່ອຢືນຢັນກ່ຽວກັບຄວາມສະຫວ່າງນັ້ນ, ເພື່ອວ່າຄົນທັງປວງຈະໄດ້ເຊື່ອຜ່ານທາງເພິ່ນ. ເພິ່ນເອງບໍ່ແມ່ນຄວາມສະຫວ່າງນັ້ນ, ເພິ່ນໄດ້ມາພຽງແຕ່ເປັນພະຍານຂອງຄວາມສະຫວ່າງນັ້ນ.
ເປັນຄວາມສະຫວ່າງແທ້ທີ່ໃຫ້ຄວາມສະຫວ່າງແກ່ມະນຸດທຸກຄົນທີ່ກຳລັງເຂົ້າມາໃນໂລກ. ພຣະອົງຢູ່ໃນໂລກ ແລະ ເຖິງແມ່ນວ່າໂລກຖືກສ້າງຂຶ້ນໂດຍທາງພຣະອົງ, ແຕ່ໂລກກໍບໍ່ໄດ້ຮູ້ຈັກພຣະອົງ. ພຣະອົງໄດ້ເຂົ້າມາໃນບ່ອນຂອງພຣະອົງ, ແຕ່ຄົນຂອງພຣະອົງເອງບໍ່ຕ້ອນຮັບພຣະອົງ. ແຕ່ສ່ວນບັນດາຜູ້ທີ່ຕ້ອນຮັບພຣະອົງ ຄືຜູ້ທີ່ເຊື່ອໃນນາມຂອງພຣະອົງ, ພຣະອົງກໍໃຫ້ສິດເປັນບຸດຂອງພຣະເຈົ້າ ຄືເປັນລູກທີ່ບໍ່ໄດ້ເກີດຈາກການສືບເຊື້ອສາຍຕາມທຳມະຊາດ2 ຫລື ຄວາມຕ້ອງການຂອງມະນຸດ ຫລື ຈາກຄວາມຕ້ອງການຂອງຜົວ, ແຕ່ເກີດຈາກພຣະເຈົ້າ.
ພຣະທຳໄດ້ມາບັງເກີດເປັນມະນຸດ ແລະ ສະຖິດຢູ່ທ່າມກາງພວກເຮົາທັງຫລາຍ. ພວກເຮົາໄດ້ເຫັນສະຫງ່າລາສີຂອງພຣະອົງ ຄືສະຫງ່າລາສີຂອງພຣະບຸດອົງດຽວ, ຜູ້ທີ່ມາຈາກພຣະບິດາເຈົ້າ, ພຣະອົງຜູ້ເຕັມດ້ວຍພຣະຄຸນ ແລະ ຄວາມຈິງ.
(ໂຢຮັນໄດ້ເປັນພະຍານກ່ຽວກັບພຣະອົງ ເພິ່ນໄດ້ຮ້ອງປະກາດວ່າ, “ຜູ້ນີ້ຄືຜູ້ທີ່ເຮົາໄດ້ເວົ້າເຖິງເມື່ອເຮົາກ່າວວ່າ, ‘ພຣະອົງຜູ້ທີ່ມາພາຍຫລັງເຮົາກໍຍິ່ງໃຫຍ່ກວ່າເຮົາ ເພາະພຣະອົງເປັນຢູ່ກ່ອນເຮົາ’ ”.) ພວກເຮົາທຸກຄົນໄດ້ຮັບພຣະຄຸນຊ້ອນພຣະຄຸນຈາກຄວາມບໍລິບູນຂອງພຣະອົງແລ້ວ. ເພາະກົດບັນຍັດໄດ້ຖືກມອບໃຫ້ຜ່ານທາງໂມເຊ, ສ່ວນພຣະຄຸນ ແລະ ຄວາມຈິງນັ້ນໄດ້ມາໂດຍທາງພຣະເຢຊູຄຣິດເຈົ້າ. ບໍ່ມີຜູ້ໃດໄດ້ເຫັນພຣະເຈົ້າຈັກເທື່ອ, ແຕ່ພຣະບຸດອົງດຽວເທົ່ານັ້ນທີ່ເປັນພຣະເຈົ້າ ແລະ3 ເປັນຜູ້ທີ່ມີຄວາມສຳພັນໃກ້ຊິດທີ່ສຸດກັບພຣະບິດາເຈົ້າ ໄດ້ເປີດເຜີຍພຣະເຈົ້າພວກເຮົາຮູ້ຈັກ.
ໂຢຮັນບັບຕິດສະໂຕປະຕິເສດວ່າຕົນເອງບໍ່ແມ່ນພຣະຄຣິດເຈົ້າ
ນີ້ແມ່ນຄຳພະຍານຂອງໂຢຮັນ ເມື່ອພວກເຈົ້າໜ້າທີ່ຊາວຢິວທີ່ຢູ່ໃນນະຄອນເຢຣູຊາເລັມໄດ້ໃຊ້ບັນດາປະໂລຫິດ ແລະ ພວກເລວີມາຖາມເພິ່ນວ່າທ່ານແມ່ນຜູ້ໃດ. ເພິ່ນກໍບໍ່ໄດ້ປະຕິເສດ ແຕ່ເພິ່ນຍອມຮັບຢ່າງເປີດເຜີຍວ່າ, “ເຮົາບໍ່ແມ່ນພຣະຄຣິດ4”.
ພວກເຂົາຈຶ່ງຖາມເພິ່ນວ່າ, “ຖ້າດັ່ງນັ້ນ ທ່ານແມ່ນຜູ້ໃດ? ທ່ານແມ່ນເອລີຢາບໍ?”
ເພິ່ນຕອບວ່າ, “ເຮົາບໍ່ແມ່ນ”.
ພວກເຂົາຖາມວ່າ, “ທ່ານແມ່ນຜູ້ທຳນວາຍບໍ?”
ເພິ່ນຕອບວ່າ, “ບໍ່ແມ່ນ”.
ໃນທີ່ສຸດພວກເຂົາຈຶ່ງກ່າວວ່າ, “ທ່ານແມ່ນຜູ້ໃດ? ຈົ່ງຕອບພວກເຮົາມາ ເພື່ອພວກເຮົາຈະໄດ້ນໍາເອົາຄຳຕອບໄປບອກບັນດາຜູ້ທີ່ໃຊ້ພວກເຮົາມາ, ທ່ານອ້າງໂຕທ່ານເອງວ່າເປັນຜູ້ໃດ?”
ໂຢຮັນຈຶ່ງຕອບຕາມທີ່ເອຊາຢາຜູ້ທຳນວາຍໄດ້ກ່າວໄວ້ວ່າ, “ເຮົາເປັນສຽງຂອງຜູ້ຮ້ອງໃນຖິ່ນແຫ້ງແລ້ງກັນດານວ່າ, ‘ຈົ່ງເຮັດຫົນທາງສຳລັບອົງພຣະຜູ້ເປັນເຈົ້າໃຫ້ຊື່ໄປ’ ”.5
ພວກຟາຣີຊາຍບາງຄົນທີ່ຖືກໃຊ້ມານັ້ນ ຈຶ່ງຖາມເພິ່ນວ່າ, “ຖ້າທ່ານບໍ່ແມ່ນພຣະຄຣິດເຈົ້າ ບໍ່ແມ່ນເອລີຢາ ຫລື ຜູ້ທຳນວາຍນັ້ນ ເປັນຫຍັງທ່ານຈຶ່ງໃຫ້ຮັບບັບຕິສະມາ?”
ໂຢຮັນຕອບວ່າ, “ເຮົາໃຫ້ບັບຕິສະມາດ້ວຍ6ນ້ຳ ແຕ່ມີຜູ້ໜຶ່ງທີ່ຢືນຢູ່ໃນທ່າມກາງພວກທ່ານທີ່ພວກທ່ານບໍ່ຮູ້ຈັກ. ພຣະອົງເປັນຜູ້ທີ່ຈະມາພາຍຫລັງເຮົາ, ເຮົາບໍ່ສົມຄວນແມ່ນແຕ່ຈະແກ້ສາຍຮັດເກີບຂອງເພິ່ນ”.
ເຫດການທັງໝົດນີ້ເກີດຂຶ້ນທີ່ບ້ານເບັດທານີ ເຊິ່ງຢູ່ອີກຟາກໜຶ່ງຂອງແມ່ນ້ຳຈໍແດນ ບ່ອນທີ່ໂຢຮັນກຳລັງໃຫ້ຮັບບັບຕິສະມາ.
ໂຢຮັນເປັນພະຍານເລື່ອງພຣະເຢຊູເຈົ້າ
ໃນວັນຕໍ່ມາໂຢຮັນໄດ້ເຫັນພຣະເຢຊູເຈົ້າກຳລັງມາຫາຕົນ ແລະ ຈຶ່ງກ່າວວ່າ, “ເບິ່ງແມ! ລູກແກະຂອງພຣະເຈົ້າ ຜູ້ຮັບເອົາບາບຂອງໂລກໄປ! ນີ້ແຫລະຄືຜູ້ທີ່ເຮົາໝາຍເຖິງເມື່ອເຮົາກ່າວວ່າ, ‘ພຣະອົງຜູ້ທີ່ມາພາຍຫລັງເຮົາກໍຍິ່ງໃຫຍ່ກວ່າເຮົາ ເພາະພຣະອົງເປັນຢູ່ກ່ອນເຮົາ’. ເຮົາເອງກໍບໍ່ຮູ້ຈັກພຣະອົງ ແຕ່ເຫດຜົນທີ່ເຮົາມາໃຫ້ບັບຕິສະມາດ້ວຍນ້ຳກໍເພື່ອໃຫ້ພຣະອົງເປັນທີ່ປາກົດແຈ້ງແກ່ປະຊາຊົນອິດສະຣາເອນ”.
ແລ້ວໂຢຮັນກໍເປັນພະຍານດັ່ງນີ້ວ່າ: “ເຮົາໄດ້ເຫັນພຣະວິນຍານບໍລິສຸດເຈົ້າເໝືອນດັ່ງນົກເຂົາລົງມາຈາກສະຫວັນ ແລະ ມາຢູ່ເທິງພຣະອົງ. ແລະ ເຮົາເອງກໍບໍ່ຮູ້ວ່າພຣະອົງເປັນຜູ້ໃດ, ແຕ່ຜູ້ທີ່ໃຊ້ເຮົາມາໃຫ້ບັບຕິສະມາດ້ວຍນ້ຳໄດ້ກ່າວກັບເຮົາໄວ້ວ່າ, ‘ເຈົ້າເຫັນພຣະວິນຍານລົງມາສະຖິດຢູ່ເທິງຜູ້ໃດ ຜູ້ນັ້ນແຫລະເປັນຜູ້ທີ່ຈະໃຫ້ບັບຕິສະມາດ້ວຍພຣະວິນຍານບໍລິສຸດເຈົ້າ’. ເຮົາໄດ້ເຫັນແລ້ວ ແລະ ເຮົາເປັນພະຍານໄດ້ວ່າ ນີ້ຄືຜູ້ທີ່ພຣະເຈົ້າເລືອກໄວ້”.7
ພວກລູກສິດຂອງໂຢຮັນຕິດຕາມພຣະເຢຊູເຈົ້າ
(ມທ 4:18-22; ມຣກ 1:16-20; ລກ 5:2-11)
ວັນຕໍ່ມາ ໂຢຮັນກັບລູກສິດສອງຄົນກໍຢູ່ບ່ອນນັ້ນອີກ. ເມື່ອເພິ່ນເຫັນພຣະເຢຊູເຈົ້າກຳລັງຜ່ານໄປ ເພິ່ນຈຶ່ງກ່າວວ່າ, “ຈົ່ງເບິ່ງລູກແກະຂອງພຣະເຈົ້າ!”
ເມື່ອລູກສິດທັງສອງໄດ້ຍິນເພິ່ນກ່າວຢ່າງນັ້ນ ຈຶ່ງຕິດຕາມພຣະເຢຊູເຈົ້າໄປ. ພຣະເຢຊູເຈົ້າຫລຽວຄືນຫລັງເຫັນພວກເພິ່ນຕິດຕາມມາ ຈຶ່ງຖາມວ່າ, “ພວກທ່ານຕ້ອງການຫຍັງບໍ?”
ພວກເພິ່ນຕອບວ່າ, “ຣັບບີ (ເຊິ່ງແປວ່າອາຈານ) ທ່ານພັກຢູ່ທີ່ໃດ?”
ພຣະອົງຕອບວ່າ, “ເຊີນມາ ແລ້ວພວກທ່ານຈະເຫັນ”.
ພວກເພິ່ນຈຶ່ງໄປ ແລະ ໄດ້ເຫັນບ່ອນທີ່ພຣະອົງພັກຢູ່ ແລະ ພວກເພິ່ນກໍຢູ່ກັບພຣະອົງໃນວັນນັ້ນ ເຊິ່ງເປັນເວລາປະມານບ່າຍສີ່ໂມງ.
ອັນເດອານ້ອງຊາຍຂອງຊີໂມນເປໂຕ ເປັນຜູ້ໜຶ່ງໃນສອງຄົນທີ່ໄດ້ຍິນໂຢຮັນກ່າວ ແລະ ໄດ້ຕິດຕາມພຣະເຢຊູເຈົ້າໄປ. ສິ່ງທຳອິດທີ່ອັນເດອາເຮັດກໍຄືໄປຫາຊີໂມນຜູ້ເປັນອ້າຍ ແລະ ບອກເພິ່ນວ່າ, “ພວກເຮົາໄດ້ພົບພຣະເມຊີອາແລ້ວ” (ຄື ພຣະຄຣິດເຈົ້າ) ແລະ ກໍພາລາວມາຫາພຣະເຢຊູເຈົ້າ.
ພຣະເຢຊູເຈົ້າແນມເບິ່ງລາວ ແລະ ກ່າວວ່າ, “ເຈົ້າຄືຊີໂມນລູກຂອງໂຢຮັນ ແຕ່ເຈົ້າຈະໄດ້ຊື່ວ່າເກຟາ” (ເຊິ່ງແປວ່າ ເປໂຕ8).
ພຣະເຢຊູເຈົ້າເອີ້ນເອົາຟີລິບ ແລະ ນະທານາເອັນ
ວັນຕໍ່ມາ ພຣະເຢຊູເຈົ້າໄດ້ຕັດສິນໃຈທີ່ຈະໄປແຂວງຄາລີເລ, ພຣະອົງໄດ້ພົບຟີລິບ ແລະ ກ່າວກັບລາວວ່າ, “ຈົ່ງຕາມເຮົາມາ”.
ຟີລິບເປັນຄົນມາຈາກເມືອງເບັດຊາອີດາເໝືອນກັນກັບອັນເດອາ ແລະ ເປໂຕ. ຟີລິບໄດ້ພົບນະທານາເອັນ ແລະ ບອກລາວວ່າ, “ພວກເຮົາໄດ້ພົບຜູ້ທີ່ໂມເຊໄດ້ຂຽນໄວ້ໃນໜັງສືກົດບັນຍັດ ແລະ ບັນດາຜູ້ທຳນວາຍກໍໄດ້ຂຽນໄວ້ເໝືອນກັນຄື ພຣະເຢຊູເຈົ້າຊາວນາຊາເຣັດລູກຂອງໂຢເຊັບ”.
ນະທານາເອັນໄດ້ຖາມວ່າ, “ນາຊາເຣັດ! ຈະມີສິ່ງດີອັນໃດມາຈາກທີ່ນັ້ນໄດ້ບໍ?”
ຟີລິບຕອບວ່າ, “ມາເບິ່ງສາ”.
ເມື່ອພຣະເຢຊູເຈົ້າເຫັນນະທານາເອັນເຂົ້າມາຫາກໍກ່າວເຖິງລາວວ່າ, “ຜູ້ນີ້ເປັນຄົນອິດສະຣາເອນແທ້ ໃນໂຕລາວບໍ່ມີກົນອຸບາຍອັນໃດເລີຍ”.
ນະທານາເອັນຖາມວ່າ, “ພຣະອົງຮູ້ຈັກຂ້ານ້ອຍໄດ້ຢ່າງໃດ?”
ພຣະເຢຊູເຈົ້າກ່າວວ່າ, “ເຮົາເຫັນເຈົ້າຂະນະທີ່ເຈົ້າຍັງຢູ່ກ້ອງຕົ້ນໝາກເດື່ອນັ້ນ ກ່ອນທີ່ຟີລິບຈະເອີ້ນເຈົ້າ”.
ນະທານາເອັນຈຶ່ງຮ້ອງວ່າ, “ຣັບບີ ພຣະອົງເປັນພຣະບຸດຂອງພຣະເຈົ້າ, ພຣະອົງເປັນກະສັດຂອງຊາດອິດສະຣາເອນ”.
ພຣະເຢຊູເຈົ້າຕອບວ່າ, “ເຈົ້າເຊື່ອ9ເພາະເຮົາບອກເຈົ້າວ່າເຮົາເຫັນເຈົ້າຢູ່ກ້ອງຕົ້ນໝາກເດື່ອ. ເຈົ້າຈະໄດ້ເຫັນສິ່ງທີ່ຍິ່ງໃຫຍ່ກວ່ານັ້ນອີກ”. ແລ້ວພຣະອົງກ່າວຕໍ່ໄປວ່າ, “ເຮົາບອກພວກເຈົ້າຕາມຄວາມຈິງວ່າ, ພວກເຈົ້າຈະເຫັນສະຫວັນເປີດອອກ ແລະ ບັນດາເທວະດາຂອງພຣະເຈົ້າຂຶ້ນ ແລະ ລົງເທິງ10ບຸດມະນຸດ”.
Source notes (10)
- Footnote ຫລື ເຂົ້າໃຈ
- Footnote ພາສາກຣີກວ່າ ຈາກສາຍເລືອດ
- Footnote ເອກະສານເກົ່າທີ່ຂຽນດ້ວຍມືບາງສະບັບວ່າ ແຕ່ພຣະບຸດອົງດຽວ
- Footnote ຫລື ພຣະເມຊີອາ ທັງຄຳວ່າ “ພຣະຄຣິດ” (ເປັນຄຳໃນພາສາກຣີກ) ແລະ “ພຣະເມຊີອາ” (ເປັນຄຳໃນພາສາເຮັບເຣີ), ແປວ່າ “ຜູ້ທີ່ເຈີມຕັ້ງໄວ້” ເຊັ່ນດຽວກັບຂໍ້ 25
- Footnote ອຊຢ 40:3
- Footnote ຫລື ໃນ ເຊັ່ນດຽວກັບຂໍ້ 31-33
- Footnote ເບິ່ງ ອຊຢ 42:1 ເອກະສານເກົ່າທີ່ຂຽນດ້ວຍມືຫລາຍສະບັບແມ່ນພຣະບຸດຂອງພຣະເຈົ້າ
- Footnote ທັງ ເກຟາ (ຄຳໃນພາສາອາຣາມິກ) ແລະ ເປໂຕ (ຄຳໃນພາສາກຣີກ) ມີຄວາມໝາຍວ່າ ຫີນ
- Footnote ຫລື ເຈົ້າເຊື່ອບໍ?
- Footnote ເບິ່ງ ປຖກ 28:12
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.