Biblica® Open Lao Contemporary Version
ໂຢເອນ 3
ຊົນຊາດທັງຫລາຍຖືກພິພາກສາ
“ເມື່ອເຖິງວັນເຫລົ່ານັ້ນ ແລະ ເວລານັ້ນ,
ເມື່ອເຮົາຟື້ນຟູຄວາມຈະເລີນຮຸ່ງເຮືອງຂອງຢູດາ ແລະ ເຢຣູຊາເລັມນັ້ນ,
ເຮົາຈະເຕົ້າໂຮມທຸກຊົນຊາດ
ແລະ ນຳພວກເຂົາລົງມາທີ່ຮ່ອມພູເຢໂຮຊາຟັດ.1
ເຮົາຈະດຳເນີນຄະດີພວກເຂົາຢູ່ທີ່ນັ້ນ
ເລື່ອງທີ່ປະຊາຊົນອິດສະຣາເອນຂອງເຮົາໄດ້ເຮັດຕໍ່ມໍລະດົກຂອງເຮົາ,
ເພາະພວກເຂົາໄດ້ເຮັດໃຫ້ປະຊາຊົນຂອງເຮົາແຕກກະຈັດກະຈາຍໄປໃນທ່າມກາງຊົນຊາດຕ່າງໆ
ແລະ ແບ່ງດິນແດນຂອງເຮົາ.
ພວກເຂົາໄດ້ຈັບສະຫລາກແບ່ງປະຊາຊົນຂອງເຮົາ.
ແລະ ເອົາເດັກນ້ອຍຜູ້ຊາຍໄປແລກປ່ຽນກັບຍິງໂສເພນີມາ;
ພວກເຂົາໄດ້ຂາຍເດັກນ້ອຍຜູ້ຍິງເພື່ອຈະໄດ້ເຫລົ້າອະງຸ່ນມາດື່ມ.
“ຕີເຣ ແລະ ຊີໂດນກັບດິນແດນຟີລິດສະຕິນທັງໝົດ ເຈົ້າມີສິ່ງໃດຕໍ່ສູ້ເຮົາ? ເຈົ້າກຳລັງແກ້ແຄ້ນເຮົາໃນສິ່ງທີ່ເຮົາໄດ້ເຮັດນັ້ນບໍ? ຖ້າເຈົ້າແກ້ແຄ້ນເຮົາ, ເຮົາກໍຈະໃຫ້ສິ່ງທີ່ເຈົ້າໄດ້ເຮັດໄວ້ຕົກຖືກເຈົ້າເອງຢ່າງໄວວາ ແລະ ທັນທີທັນໃດ. ເພາະເຈົ້າໄດ້ຢຶດເອົາເງິນ ແລະ ຄຳຂອງເຮົາກັບຊັບສົມບັດອັນລ້ຳຄ່າຂອງເຮົາໄປໄວ້ທີ່ວິຫານຕ່າງໆຂອງເຈົ້າ.2 ເຈົ້າໄດ້ຂາຍຊາວຢູດາ ແລະ ຊາວເຢຣູຊາເລັມໃຫ້ແກ່ຊາວກຣີກ ເພື່ອເຈົ້າຈະໄດ້ສົ່ງພວກເຂົາໄປໃຫ້ໄກຈາກບ້ານເກີດເມືອງນອນຂອງພວກເຂົາ.
“ເບິ່ງແມ, ເຮົາຈະກະຕຸ້ນພວກເຂົາໃຫ້ອອກມາຈາກສະຖານທີ່ຕ່າງໆ ທີ່ເຈົ້າໄດ້ຂາຍພວກເຂົາໃຫ້ ແລະ ເຮົາກໍຈະໃຫ້ສິ່ງທີ່ເຈົ້າໄດ້ເຮັດໄວ້ນັ້ນຕົກຖືກເຈົ້າເອງ. ເຮົາຈະຂາຍບັນດາລູກຊາຍ ແລະ ລູກສາວຂອງເຈົ້າໃຫ້ແກ່ຊາວຢູດາ. ແລ້ວຊາວຢູດາຈະຂາຍພວກເຂົາໃຫ້ຊາວເຊບາ, ເຊິ່ງເປັນຊົນຊາດໜຶ່ງທີ່ຢູ່ໄກ”. ພຣະເຈົ້າໄດ້ກ່າວດັ່ງນັ້ນ.
ຈົ່ງປະກາດໃນທ່າມກາງຊົນຊາດທັງຫລາຍວ່າ:
ຈົ່ງຕຽມພ້ອມສຳລັບສູ້ຮົບ!
ຈົ່ງປຸກລະດົມບັນດານັກຮົບ!
ໃຫ້ບັນດານັກຕໍ່ສູ້ທຸກຄົນເຂົ້າມາໃກ້ ແລະ ບຸກໂຈມຕີ.
ຈົ່ງຕີໝາກກະສົບໄຖຂອງເຈົ້າໃຫ້ເປັນດາບ
ແລະ ຕີກ່ຽວຂອງເຈົ້າໃຫ້ເປັນຫອກ.
ໃຫ້ຄົນທີ່ອ່ອນແອເວົ້າວ່າ,
“ຂ້ອຍເຂັ້ມແຂງ!”
ຈົ່ງມາໄວໆ, ຊົນຊາດທັງຫລາຍຈາກທຸກທີ່ທຸກບ່ອນ,
ແລະ ມາປະຊຸມກັນຢູ່ທີ່ນັ້ນ.
ຂ້າແດ່ພຣະເຈົ້າຢາເວ! ຂໍໂຜດສົ່ງນັກຮົບຂອງພຣະອົງລົງມາ!
“ຈົ່ງກະຕຸ້ນປະຊາຊາດທັງຫລາຍ
ໃຫ້ບຸກໜ້າມາທີ່ຮ່ອມພູເຢໂຮຊາຟັດ,
ເພາະເຮົາຈະນັ່ງຢູ່ທີ່ນັ້ນ
ເພື່ອຕັດສິນປະຊາຊາດທັງໝົດທຸກດ້ານ.
ຈົ່ງແກວ່ງກ່ຽວໄປ,
ເພາະເຂົ້າກໍສຸກພ້ອມໃຫ້ກ່ຽວແລ້ວ.
ຈົ່ງມາ, ມາຢຽບໝາກອະງຸ່ນ,
ເພາະອ່າງຢຽບໝາກອະງຸ່ນກໍເຕັມແລ້ວ
ແລະ ອ່າງເກັບນັ້ນມີເຫລົ້າອະງຸ່ນເຕັມຈົນລົ້ນ
ຄວາມຊົ່ວຮ້າຍຂອງພວກເຂົາກໍມີຫລວງຫລາຍ!”
ມີຄົນຈຳນວນຫລວງຫລາຍ
ຢູ່ໃນຮ່ອມພູແຫ່ງການພິພາກສາ!
ເພາະວັນແຫ່ງພຣະເຈົ້າຢາເວແມ່ນໃກ້ເຂົ້າມາແລ້ວ
ໃນຮ່ອມພູແຫ່ງການພິພາກສາ.
ຕາເວັນ ແລະ ເດືອນຈະມືດມິດໄປ
ແລະ ດາວຈະບໍ່ສ່ອງແສງ.
ພຣະເຈົ້າຢາເວຈະເປັ່ງສຽງອອກມາຈາກຊີໂອນ
ແລະ ເປັ່ງສຽງຟ້າຮ້ອງອອກມາຈາກເຢຣູຊາເລັມ;
ແຜ່ນດິນໂລກ ແລະ ຟ້າສະຫວັນຈະສັ່ນສະທ້ານ.
ແຕ່ພຣະເຈົ້າຢາເວຈະເປັນບ່ອນລີ້ໄພສຳລັບປະຊາຊົນຂອງພຣະອົງ,
ເປັນທີ່ໝັ້ນສຳລັບປະຊາຊົນອິດສະຣາເອນ.
ພອນສຳລັບປະຊາຊົນຂອງພຣະເຈົ້າ
“ແລ້ວນັ້ນເຈົ້າກໍຈະຮູ້ວ່າ, ເຮົາຜູ້ເປັນພຣະເຈົ້າຢາເວ ພຣະເຈົ້າຂອງພວກເຈົ້າ.
ສະຖິດຢູ່ໃນຊີໂອນ, ພູເຂົາສັກສິດຂອງເຮົາ.
ເຢຣູຊາເລັມຈະບໍລິສຸດສັກສິດ;
ຄົນຕ່າງຊາດຈະບໍ່ມາທຳລາຍເຢຣູຊາເລັມອີກ.
“ໃນວັນນັ້ນຈະມີນ້ຳອະງຸ່ນໃໝ່ຍ້ອຍຈາກພູເຂົາ
ແລະ ມີນ້ຳນົມໄຫລມາຈາກໂນນພູ;
ຫ້ວຍນ້ຳທັງຫລາຍຂອງຢູດາຈະມີນ້ຳນອງ.
ນ້ຳພຸຈະໄຫລອອກມາຈາກວິຫານຂອງພຣະເຈົ້າຢາເວ
ໃຫ້ຄວາມຊຸ່ມຊື່ນແກ່ຮ່ອມພູຕົ້ນກະຖິນ.3
ແຕ່ເອຢິບຈະຮົກຮ້າງ,
ເອໂດມກາຍເປັນຖິ່ນແຫ້ງແລ້ງກັນດານ,
ເພາະຄວາມໂຫດຮ້າຍທີ່ໄດ້ເຮັດໄວ້ກັບຊາວຢູດາ,
ພວກເຂົາໄດ້ເຮັດໃຫ້ຜູ້ບໍລິສຸດຕ້ອງຫລັ່ງເລືອດໃນດິນແດນນັ້ນ.
ຢູດາ ແລະ ເຢຣູຊາເລັມຈະມີຄົນອາໄສຢູ່
ຕະຫລອດໄປທຸກຊົ່ວອາຍຸ.
ຄວາມຜິດທີ່ພວກເຂົາເຮັດໃຫ້ເລືອດຕົກທີ່ເຮົາບໍ່ໄດ້ອະໄພໃຫ້ນັ້ນ
ເຮົາຈະໃຫ້ອະໄພ”.
ພຣະເຈົ້າຢາເວສະຖິດຢູ່ໃນຊີໂອນ!
Source notes (3)
- Footnote ເຢໂຮຊາຟັດ ແປວ່າພຣະເຈົ້າຢາເວພິພາກສາ ຄືກັນກັບຂໍ້ 12
- Footnote ຫລື ວັງ
- Footnote ຫລື ຮ່ອມພູຊິດຕີມ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.