Biblica® Open Lao Contemporary Version
ໂຢເອນ 2
ກອງທັບຕັກແຕນ
ຈົ່ງເປົ່າແກໃນຊີໂອນ;
ໃຫ້ສັນຍານເຕືອນທີ່ເທິງພູເຂົາສັກສິດຂອງເຮົາ.
ທຸກຄົນທີ່ອາໄສຢູ່ໃນດິນແດນນີ້ຈົ່ງສັ່ນສະທ້ານ,
ເພາະວັນແຫ່ງພຣະເຈົ້າຢາເວກຳລັງມາເຖິງແລ້ວ.
ວັນນັ້ນໃກ້ເຂົ້າມາແລ້ວ
ເປັນວັນແຫ່ງຄວາມມືດມິດ ແລະ ມືດມົວຫລາຍ,
ເປັນວັນທີ່ມີເມກຄຶ້ມ ແລະ ຄວາມມືດມິດ.
ເໝືອນແສງຕາເວັນຂຶ້ນໃນຍາມເຊົ້າສາດຊ່ອງໄປທົ່ວພູເຂົາ
ກອງທັບຂະໜາດໃຫຍ່ ແລະ ຍິ່ງໃຫຍ່ໄດ້ມາ
ຢ່າງທີ່ບໍ່ເຄີຍມີໃນອະດີດ
ແລະ ຈະບໍ່ມີອີກເລີຍໃນອະນາຄົດ.
ເບື້ອງໜ້າພວກມັນມີໄຟທີ່ເຜົາຜານ
ເບື້ອງຫລັງພວກມັນມີເປວໄຟທີ່ລຸກໄໝ້.
ເບື້ອງໜ້າພວກມັນມີດິນແດນທີ່ງົດງາມເໝືອນກັບສວນເອເດນ,
ເບື້ອງຫລັງພວກມັນເຫລືອແຕ່ຖິ່ນແຫ້ງແລ້ງກັນດານ
ບໍ່ມີສິ່ງໃດທີ່ຈະໜີພົ້ນຈາກພວກມັນໄປໄດ້.
ພວກມັນມີລັກສະນະຄ້າຍຄືກັນກັບຝູງມ້າ
ພວກມັນແລ່ນມາເໝືອນກັບຂະບວນມ້າຮົບ;
ດ້ວຍສຽງດັງເໝືອນກັບລົດຮົບ
ພວກມັນແລ່ນຢູ່ເທິງຍອດພູເຂົາ,
ເໝືອນກັບສຽງໄຟໄໝ້ແຕກ ເຊິ່ງເຜົາໄໝ້ຕໍໄມ້,
ແລະ ເໝືອນກັບກອງທັບໃຫຍ່ທີ່ຍົກທັບຂຶ້ນມາສູ້ຮົບ.
ເມື່ອປະຊາຊາດທັງຫລາຍເຫັນພວກມັນແລ້ວ ກໍທຸກທໍລະມານ;
ໃບໜ້າຂອງທຸກຄົນຕ່າງກໍຈືດໄປ.
ພວກມັນບຸກເຂົ້າມາເໝືອນກັບນັກຮົບ;
ພວກມັນປີນກຳແພງເໝືອນກັບທະຫານ.
ພວກມັນເດີນຂະບວນເຂົ້າມາເປັນແຖວ,
ບໍ່ມີແຕກແຖວເລີຍ.
ພວກມັນບໍ່ບຽດກັນ;
ແຕ່ລະໂຕເດີນຊື່ໄປຂ້າງໜ້າ
ພວກມັນບຸຝ່າເຄື່ອງປ້ອງກັນ
ໂດຍບໍ່ແຕກແຖວ.
ພວກມັນຟ້າວບຸກເຂົ້າເມືອງ;
ພວກມັນແລ່ນໄປຕາມກຳແພງ.
ພວກມັນປີນເຂົ້າໄປໃນເຮືອນຕ່າງໆ.
ພວກມັນເຂົ້າໄປທາງປ່ອງຢ້ຽມຄືກັບຄົນຂີ້ລັກ.
ແຜ່ນດິນໂລກສັ່ນສະເທືອນຕໍ່ໜ້າພວກມັນ,
ຟ້າສະຫວັນກໍສັ່ນສະທ້ານ,
ດວງຕາເວັນ ແລະ ດວງເດືອນກໍມືດ,
ດວງດາວກໍບໍ່ສ່ອງແສງອີກ.
ພຣະເຈົ້າຢາເວໄດ້ເປັ່ງສຽງຮ້ອງດັງກ້ອງ
ຢູ່ທາງໜ້າຂອງກອງທັບຂອງພຣະອົງ;
ກອງກຳລັງຂອງພຣະອົງແມ່ນມີຈຳນວນຫລວງຫລາຍ,
ແລະ ກອງທັບທີ່ເຊື່ອຟັງຄຳສັ່ງຂອງພຣະອົງກໍຍິ່ງໃຫຍ່.
ວັນແຫ່ງພຣະເຈົ້າຢາເວກໍຍິ່ງໃຫຍ່;
ແລະ ມັນເປັນຕາຢ້ານຫລາຍ.
ຜູ້ໃດຈະສາມາດທົນຢູ່ໄດ້?
ຈົ່ງຈີກໃຈຂອງເຈົ້າ
ພຣະເຈົ້າຢາເວປະກາດວ່າ
“ບັດນີ້ ຈົ່ງກັບມາຫາເຮົາຢ່າງສຸດໃຈ
ດ້ວຍການຖືສິນອົດອາຫານ, ຮ້ອງໄຫ້ ແລະ ຄ່ຳຄວນ”.
ຈົ່ງຈີກຫົວໃຈຂອງເຈົ້າ
ແລະ ບໍ່ແມ່ນຈີກເສື້ອຜ້າຂອງເຈົ້າ.
ຈົ່ງກັບຄືນມາຫາພຣະເຈົ້າຢາເວ ພຣະເຈົ້າຂອງເຈົ້າ.
ເພາະພຣະອົງເຕັມລົ້ນດ້ວຍພຣະຄຸນ ແລະ ຄວາມເມດຕາສົງສານ,
ບໍ່ໃຈຮ້າຍງ່າຍ ແລະ ເຕັມລົ້ນດ້ວຍຄວາມຮັກ,
ແລະ ພຣະອົງອົດໃຈບໍ່ສົ່ງໄພພິບັດມາ.
ຜູ້ໃດຈະຮູ້? ພຣະອົງອາດກັບຫັນມາ ແລະ ປ່ຽນໃຈ
ແລະ ປະຄຳອວຍພອນ
ຄືໃຫ້ມີເຄື່ອງຖວາຍພືດຜົນເປັນເມັດ ແລະ ເຄື່ອງດື່ມບູຊາ
ເພື່ອຖວາຍແກ່ພຣະເຈົ້າຢາເວ ພຣະເຈົ້າຂອງເຈົ້າ.
ຈົ່ງເປົ່າແກໃນຊີໂອນ,
ຈົ່ງປະກາດການຖືສິນອົດອາຫານອັນບໍລິສຸດ,
ແລະ ເອີ້ນປະຊຸມອັນບໍລິສຸດສັກສິດ.
ຈົ່ງເຕົ້າໂຮມປະຊາຊົນ,
ຊຳລະທີ່ປະຊຸມໃຫ້ບໍລິສຸດ;
ຈົ່ງນຳຜູ້ອາວຸໂສມາເຕົ້າໂຮມກັນ,
ເຕົ້າໂຮມເດັກນ້ອຍ,
ບັນດາເດັກນ້ອຍເຫລົ່ານັ້ນທີ່ຍັງກິນນົມແມ່.
ໃຫ້ເຈົ້າບ່າວອອກມາຈາກຫ້ອງຂອງຕົນ
ແລະ ໃຫ້ເຈົ້າສາວອອກມາຈາກຫ້ອງຂອງຕົນ.
ໃຫ້ປະໂລຫິດຜູ້ທີ່ຮັບໃຊ້ຢູ່ຕໍ່ໜ້າພຣະເຈົ້າຢາເວ,
ຮ້ອງໄຫ້ຢູ່ລະຫວ່າງລະບຽງວິຫານກັບແທ່ນບູຊາ.
ໃຫ້ພວກເຂົາເວົ້າວ່າ, “ຂ້າແດ່ພຣະເຈົ້າຢາເວ ຂໍໂຜດໄວ້ຊີວິດຂອງຄົນພຣະອົງດ້ວຍ.
ຂໍຢ່າເຮັດໃຫ້ມໍລະດົກຂອງພຣະອົງເປັນທີ່ດູຖູກ.
ເປັນຄຳເຢາະເຢີ້ຍໃນທ່າມກາງປະຊາຊາດທັງຫລາຍ.
ເປັນຫຍັງພວກເຂົາຈຶ່ງເວົ້າກັນວ່າ,
‘ພຣະເຈົ້າຂອງພວກເຂົາຢູ່ໃສ?’ ”
ຄຳຕອບຂອງພຣະເຈົ້າຢາເວ
ແລ້ວພຣະເຈົ້າຢາເວໄດ້ຫຶງຫວງດິນແດນຂອງພຣະອົງ
ແລະ ຈະສົງສານຄົນຂອງພຣະອົງ.
ພຣະເຈົ້າຢາເວໄດ້ຕອບພວກເຂົາ1ວ່າ:
“ເຮົາຈະສົ່ງເມັດພືດ, ເຫລົ້າອະງຸ່ນໃໝ່ ແລະ ນ້ຳມັນໝາກກອກມາໃຫ້
ພຽງພໍທີ່ຈະເຮັດໃຫ້ເຈົ້າອິ່ມໜຳສຳລານ;
ເຮົາຈະບໍ່ເຮັດໃຫ້ເຈົ້າ
ຕົກເປັນເປົ້າຂອງການເຢາະເຢີ້ຍຂອງປະຊາຊາດທັງຫລາຍອີກຕໍ່ໄປ
“ເຮົາຈະຂັບໄລ່ກອງທັບມາແຕ່ພາກເໜືອໃຫ້ໄປໄກຈາກເຈົ້າ,
ເຮົາຈະຍູ້ພວກມັນເຂົ້າໄປໃນແຜ່ນດິນທີ່ແຫ້ງແລ້ງ ແລະ ແຕກແຫງ;
ແຖວດ້ານຕາເວັນອອກຂອງພວກມັນຈະລົງໄປໃນທະເລຕາຍ
ແລະ ແຖວດ້ານຕາເວັນຕົກຂອງພວກມັນຈະລົງໄປໃນທະເລເມດິແຕຣາເນ.
ແລະ ກິ່ນເໝັນຂອງພວກມັນກໍຈະພຸ່ງຂຶ້ນມາ;
ກິ່ນເໝັນຂອງພວກມັນກໍຈະລອຍຂຶ້ນໄປ”.
ພຣະອົງໄດ້ເຮັດສິ່ງທີ່ຍິ່ງໃຫຍ່ຢ່າງແນ່ນອນ!
ແຜ່ນດິນແຫ່ງຢູດາ, ຢ່າຢ້ານເລີຍ;
ຈົ່ງຍິນດີ ແລະ ຊື່ນຊົມຍິນດີ.
ພຣະເຈົ້າໄດ້ເຮັດສິ່ງທີ່ຍິ່ງໃຫຍ່ຢ່າງແນ່ນອນ!
ສັດປ່າທັງຫລາຍ ຢ່າຢ້ານເລີຍ
ເພາະທົ່ງຫຍ້າໃນຖິ່ນແຫ້ງແລ້ງກັນດານຈະກັບມາຂຽວຄືນ.
ຕົ້ນໄມ້ທັງຫລາຍຈະອອກຜົນຂອງມັນ;
ຕົ້ນໝາກເດື່ອ ແລະ ເຄືອອະງຸ່ນຈະອອກຜົນຢ່າງສົມບູນ.
ປະຊາຊົນແຫ່ງຊີໂອນ, ຈົ່ງຍິນດີ,
ຈົ່ງຊື່ນຊົມຍິນດີໃນພຣະເຈົ້າຢາເວ ພຣະເຈົ້າຂອງເຈົ້າ,
ເພາະພຣະອົງໄດ້ໃຫ້ຝົນລະດູໃບໄມ້ຫລົ່ນໃຫ້ແກ່ເຈົ້າ
ເພາະພຣະອົງສັດຊື່.
ພຣະອົງໄດ້ສົ່ງຝົນຕົກຢ່າງອຸດົມສົມບູນມາໃຫ້ເຈົ້າ,
ທັງຝົນລະດູໃບໄມ້ຫລົ່ນ ແລະ ລະດູໃບໄມ້ປົ່ງເໝືອນກັບທີ່ຜ່ານມາ.
ລານຟາດເຂົ້າຈະມີເຂົ້າຈະເຕັມໄປດ້ວຍເຂົ້າ;
ຖັງຈະເຕັມລົ້ນດ້ວຍເຫລົ້າອະງຸ່ນໃໝ່ ແລະ ນ້ຳມັນ.
“ເຮົາຈະຊົດເຊີຍໃຫ້ເຈົ້າສຳລັບຊ່ວງປີທີ່ຕັກແຕນໄດ້ກັດກິນນັ້ນ
ທັງຕັກແຕນໃຫຍ່ ແລະ ຕັກແຕນອ່ອນ,
ຕັກແຕນໂຕອື່ນໆ ແລະ ຝູງຕັກແຕນ
ຄືກອງທັບໃຫຍ່ຂອງເຮົາທີ່ເຮົາໄດ້ສົ່ງມາຍັງເຈົ້າ.
ເຈົ້າຈະມີກິນຢ່າງເຫລືອເຟືອຈົນອີ່ມໜຳສຳລານ
ແລະ ເຈົ້າຈະສັນລະເສີນນາມຂອງພຣະເຈົ້າຢາເວ ພຣະເຈົ້າຂອງເຈົ້າ,
ຜູ້ທີ່ກະທຳການອັດສະຈັນຕ່າງໆເພື່ອເຈົ້າ;
ປະຊາຊົນຂອງເຮົາຈະບໍ່ຕ້ອງອັບອາຍອີກຕໍ່ໄປ.
ແລ້ວເຈົ້າຈະຮູ້ວ່າເຮົາຢູ່ໃນອິດສະຣາເອນ,
ເຮົາຄືພຣະເຈົ້າຢາເວ ພຣະເຈົ້າຂອງເຈົ້າ,
ແລະ ບໍ່ມີພະອື່ນອີກ;
ປະຊາຊົນຂອງເຮົາຈະບໍ່ຕ້ອງອັບອາຍອີກຕໍ່ໄປ.
ວັນຂອງພຣະເຈົ້າຢາເວ
“ແລະ ຕໍ່ມາພາຍຫລັງ,
ເຮົາຈະເທພຣະວິນຍານຂອງເຮົາລົງເທິງທຸກຄົນ.
ລູກຊາຍ ແລະ ລູກສາວຂອງພວກເຈົ້າຈະທຳນວາຍ,
ບັນດາຊາຍເຖົ້າຂອງພວກເຈົ້າຈະຝັນເຫັນ,
ບັນດາຊາຍໜຸ່ມຂອງພວກເຈົ້າຈະເຫັນນິມິດ.
ໃນວັນເຫລົ່ານັ້ນ, ເຮົາຈະເທພຣະວິນຍານຂອງເຮົາ
ລົງມາເທິງຜູ້ຮັບໃຊ້ຂອງເຮົາ, ທັງຊາຍ ແລະ ຍິງ,
ເຮົາຈະສະແດງການອັດສະຈັນໃນຟ້າສະຫວັນ
ແລະ ເທິງແຜ່ນດິນໂລກ,
ຈະມີເລືອດ ແລະ ມີໄຟກັບຄວັນໄຟ.
ດວງຕາເວັນຈະຖືກປ່ຽນເປັນຄວາມມືດ
ແລະ ດວງຈັນຈະກາຍເປັນເລືອດ
ກ່ອນວັນອັນຍິ່ງໃຫຍ່ ແລະ ໜ້າຢ້ານຂອງພຣະເຈົ້າຢາເວຈະມາເຖິງ.
ແລະ ທຸກຄົນທີ່ຮ້ອງ
ອອກນາມຂອງພຣະເຈົ້າຢາເວ ກໍຈະໄດ້ຮັບຄວາມພົ້ນ;
ເພາະເທິງພູເຂົາຊີໂອນ ແລະ ໃນເຢຣູຊາເລັມ
ຈະມີການກອບກູ້ຢູ່ທີ່ນັ້ນ,
ຕາມທີ່ພຣະເຈົ້າຢາເວໄດ້ກ່າວໄວ້,
ແມ່ນແຕ່ໃນທ່າມກາງບັນດາຜູ້ລອດຊີວິດ
ເຊິ່ງພຣະເຈົ້າຢາເວໄດ້ເອີ້ນໄວ້.
Source notes (1)
- Footnote ຫລື ພຣະເຈົ້າຈະຫຶງຫວງ ແລະ ຈະສົງສານ 19 ພຣະເຈົ້າຢາເວຈະຕອບ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.