Biblica® Open Lao Contemporary Version
ໂຢບ 9
ໂຢບ
ໂຢບຈຶ່ງໄດ້ຕອບວ່າ:
“ແທ້ຈິງແລ້ວ, ຂ້ອຍຮູ້ແລ້ວວ່ານີ້ຄືຄວາມຈິງ.
ແຕ່ມະນຸດຈະພິສູດຄວາມບໍລິສຸດຂອງຕົນຕໍ່ໜ້າພຣະເຈົ້າໄດ້ຢ່າງໃດ?
ເຖິງແມ່ນວ່າພວກເຂົາຢາກຈະໂຕ້ແຍ້ງກັບພຣະອົງກໍຕາມ,
ພວກເຂົາກໍບໍ່ສາມາດຕອບພຣະອົງໄດ້ແມ່ນແຕ່ຄັ້ງດຽວຈາກພັນຄັ້ງ.
ເພາະສະຕິປັນຍາຂອງພຣະເຈົ້າກໍເລິກເຊິ່ງ ແລະ ລິດອຳນາດຂອງພຣະອົງກໍກວ້າງໃຫຍ່.
ຜູ້ໃດຈະຕໍ່ຕ້ານພຣະອົງ ແລະ ໜີລອດອອກມາໂດຍບໍ່ໄດ້ຮັບອັນຕະລາຍ?
ພຣະອົງເຄື່ອນພູເຂົາໂດຍທີ່ມັນບໍ່ຮູ້ໂຕ
ແລະ ຄວໍ້າມັນດ້ວຍຄວາມໃຈຮ້າຍຂອງພຣະອົງ.
ພຣະອົງສັ່ນແຜ່ນດິນໂລກອອກຈາກບ່ອນຂອງມັນ
ແລະ ເຮັດໃຫ້ເສົາຄໍ້າຂອງມັນສັ່ນສະເທືອນ.
ພຣະອົງກ່າວກັບດວງຕາເວັນ ແລະ ມັນກໍບໍ່ສ່ອງແສງ;
ພຣະອົງປິດແສງຂອງດວງດາວບໍ່ໃຫ້ສ່ອງແສງແຈ້ງ.
ພຣະອົງແຕ່ຜູ້ດຽວທີ່ຄຶງຟ້າສະຫວັນອອກ
ແລະ ຢຽບຢໍ່າເໜືອຄື້ນທະເລ.
ພຣະອົງເປັນພຣະຜູ້ສ້າງດາວໝີ ແລະ ດາວໄຖ,
ດາວໄກ່ນ້ອຍ ແລະ ໝູ່ດວງດາວທາງທິດໃຕ້.
ພຣະອົງສໍາແດງສິ່ງທີ່ແປກປະຫລາດທີ່ບໍ່ສາມາດຢັ່ງຮູ້,
ການອັດສະຈັນທີ່ບໍ່ສາມາດນັບໄດ້.
ເມື່ອພຣະອົງຍ່າງຜ່ານຂ້ອຍໄປ, ຂ້ອຍບໍ່ສາມາດເບິ່ງເຫັນພຣະອົງໄດ້;
ເມື່ອພຣະອົງຜ່ານໄປ, ຂ້ອຍບໍ່ສາມາດສັງເກດເຫັນພຣະອົງໄດ້.
ເມື່ອພຣະອົງເອົາໄປ, ຜູ້ໃດຈະຢຸດຢັ້ງພຣະອົງໄດ້?
ຜູ້ໃດຈະຖາມພຣະອົງວ່າ, ‘ພຣະອົງກໍາລັງເຮັດຫຍັງ?’
ພຣະເຈົ້າບໍ່ໄດ້ຢັບຢັ້ງຄວາມໃຈຮ້າຍຂອງພຣະອົງ;
ແມ່ນແຕ່ໝູ່ເພື່ອນຂອງລາຫັບກໍຢູ່ໃຕ້ຕີນຂອງພຣະອົງ.
“ແລ້ວຂ້ອຍຈະໂຕ້ແຍ້ງກັບພຣະເຈົ້າໄດ້ຢ່າງໃດ?
ຂ້ອຍຈະຊອກຫາຄຳໃດມາໂຕ້ຖຽງກັບພຣະອົງ?
ເຖິງແມ່ນວ່າຂ້ອຍບໍ່ມີຄວາມຜິດ, ຂ້ອຍກໍບໍ່ສາມາດຕອບພຣະອົງໄດ້;
ຂ້ານ້ອຍໄດ້ແຕ່ອ້ອນວອນຂໍຄວາມເມດຕາຈາກຜູ້ພິພາກສາຂອງຂ້ານ້ອຍ.
ເຖິງແມ່ນວ່າຂ້ອຍຮ້ອງຫາພຣະອົງແລະ ພຣະອົງກໍຕອບ,
ຂ້ອຍບໍ່ເຊື່ອວ່າພຣະອົງຈະຮັບຟັງຂ້ອຍ.
ພຣະອົງຈະຍ່ອງຂ້ອຍດ້ວຍລົມພະຍຸ.
ແລະ ເພີ່ມບາດແຜຂອງຂ້ອຍໂດຍບໍ່ມີເຫດຜົນ.
ພຣະອົງຈະບໍ່ຍອມໃຫ້ຂ້ອຍຫາຍໃຈ
ແຕ່ເຮັດໃຫ້ຂ້ອຍເຕັມໄປດ້ວຍຄວາມທຸກທໍລະມານ.
ຖ້າເປັນເລື່ອງກໍາລັງ, ພຣະອົງກໍຍິ່ງໃຫຍ່ແທ້ໆ!
ແລະ ຖ້າເປັນເລື່ອງຄວາມຍຸຕິທຳ, ຜູ້ໃດຈະທ້າທາຍພຣະອົງໄດ້?1
ເຖິງແມ່ນວ່າຂ້ອຍບໍ່ມີຄວາມຜິດ, ປາກຂອງຂ້ອຍກໍປະນາມຕົນເອງ;
ຖ້າຂ້ອຍບໍ່ມີຕໍາໜິ, ປາກຂອງຂ້ອຍກໍຈະປະກາດວ່າຂ້ອຍມີຄວາມຜິດ.
“ເຖິງແມ່ນວ່າຂ້ອຍບໍ່ມີທີ່ຕຳໜິ,
ຂ້ອຍບໍ່ມີຄວາມກັງວົນກັບຕົນເອງ;
ຂ້ອຍດູຖູກຊີວິດຂອງຂ້ອຍຕົນເອງ.
ມັນກໍຄືກັນທັງໝົດ; ສະນັ້ນ ຂ້ອຍຈຶ່ງເວົ້າວ່າ,
‘ພຣະອົງທຳລາຍທັງຄົນບໍ່ມີຕໍາໜິ ແລະ ຄົນຊົ່ວຮ້າຍ’.
ເມື່ອການລົງໂທດນຳຄວາມຕາຍມາໂດຍທັນທີ,
ພຣະອົງເຢາະເຢີ້ຍຄວາມສິ້ນຫວັງຂອງຜູ້ທີ່ບໍ່ມີຄວາມຜິດ.
ເມື່ອແຜ່ນດິນຕົກຢູ່ໃນມືຂອງຄົນຊົ່ວ,
ພຣະອົງປິດຕາຂອງບັນດາຜູ້ພິພາກສາໃຫ້ມືດບອດ.
ຖ້າບໍ່ແມ່ນພຣະອົງ, ແລ້ວຈະແມ່ນຜູ້ໃດ?
“ວັນເວລາຂອງຂ້ານ້ອຍຜ່ານໄປໄວກວ່ານັກແລ່ນ;
ມັນລ່ວງພົ້ນໄປໂດຍບໍ່ມີຄວາມຊື່ນຊົມຍິນດີເລີຍ.
ມັນແລ່ນໄປດັ່ງເຮືອທີ່ເຮັດດ້ວຍຕົ້ນອໍ້,
ດັ່ງນົກອິນຊີບິນເຈີດລົງໃສ່ເຫຍື່ອຂອງມັນ.
ຖ້າຂ້ອຍເວົ້າວ່າ, ‘ຂ້ອຍຈະລືມຄວາມເຈັບປວດຂອງຕົນ,
ຂ້ອຍຈະປ່ຽນສີໜ້າຂອງຕົນ ແລະ ຍິ້ມແຍ້ມແຈ່ມໃສ’,
ແຕ່ຂ້ອຍກໍຍັງຢ້ານຄວາມທຸກຍາກລໍາບາກທັງໝົດຂອງຂ້ອຍ,
ເພາະຂ້ອຍຮູ້ວ່າພຣະອົງຈະບໍ່ຖືວ່າຂ້ອຍມີຄວາມຜິດ.
ເນື່ອງຈາກຂ້ອຍຖືກຕັດສິນວ່າມີຄວາມຜິດແລ້ວ,
ເປັນຫຍັງຂ້ານ້ອຍຈະດິ້ນລົນໂດຍບໍ່ມີປະໂຫຍດ?
ເຖິງແມ່ນວ່າຂ້ອຍໄດ້ຊຳລະລ້າງຕົນດ້ວຍສະບູ2
ແລະ ລ້າງມືຂອງຕົນດ້ວຍສະບູຝຸ່ນ,
ພຣະອົງຈະໂຍນຂ້ອຍລົງໃນຂຸມຂີ້ຕົມ
ແມ່ນແຕ່ເຄື່ອງນຸ່ງຂອງຂ້ອຍກໍຈະລັງກຽດຂ້ອຍ.
“ພຣະອົງບໍ່ແມ່ນມະນຸດເໝືອນດັ່ງຂ້ອຍທີ່ຂ້ອຍຈະຕອບພຣະອົງໄດ້,
ທີ່ພວກເຮົາຈະປະເຊີນໜ້າກັນຢູ່ໃນສານໄດ້.
ຖ້າມີບາງຄົນໄກ່ເກ່ຍລະຫວ່າງພວກເຮົາ,
ມີບາງຄົນນໍາພວກເຮົາມາເພື່ອປະເຊີນໜ້າກັນ,
ຄົນທີ່ເກັບໄມ້ແສ້ຂອງພຣະເຈົ້າອອກໄປຈາກຂ້ອຍ,
ເພື່ອວ່າຂ້ອຍຈະເຊົາຢ້ານກົວການລົງໂທດຂອງພຣະອົງ.
ແລ້ວຂ້ອຍຈະເວົ້າອອກມາໂດຍບໍ່ຢ້ານກົວພຣະອົງ,
ແຕ່ຂະນະນີ້ມັນຢູ່ກັບຂ້ອຍແລ້ວ, ຂ້ອຍເຮັດແບບນັ້ນບໍ່ໄດ້.
Source notes (2)
- Footnote ພາສາເຮັບເຣີວ່າ ຜູ້ໃດຈະຮຽກຂ້າມາໃຫ້ການໄດ້ ?
- Footnote ຫລື ດ້ວຍຫິມະ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.