Biblica® Open Lao Contemporary Version
ໂຢບ 10
“ຂ້ອຍກຽດຊັງຊີວິດຂອງຂ້ອຍແທ້ໆ;
ເຫດສະນັ້ນ ຂ້ອຍຈະຈົ່ມຕາມລໍາພັງໃຈຂອງຕົນ.
ແລະ ຈະລະບາຍຄວາມຂົມຂື່ນໃນວິນຍານຂອງຂ້ອຍອອກມາ.
ຂ້ອຍເວົ້າຕໍ່ພຣະເຈົ້າວ່າ: ຂໍຢ່າເປີດເຜີຍຄວາມຜິດຂອງຂ້ານ້ອຍ,
ແຕ່ຂໍບອກສິ່ງທີ່ພຣະອົງໄດ້ກ່າວຫາຕໍ່ຂ້ານ້ອຍ.
ພຣະອົງພໍໃຈບໍທີ່ບີບບັງຄັບຂ້ານ້ອຍ,
ແລະ ບໍ່ສົນໃຈຜູ້ທີ່ພຣະອົງສ້າງຂຶ້ນດ້ວຍມືຂອງພຣະອົງ,
ຂະນະທີ່ພຣະອົງຍິ້ມໃຫ້ແຜນການຂອງຄົນຊົ່ວຮ້າຍ?
ພຣະອົງມີຕາແບບຕາຂອງມະນຸດບໍ?
ພຣະອົງເບິ່ງແບບມະນຸດເບິ່ງບໍ?
ວັນເວລາຂອງພຣະອົງເໝືອນດັ່ງວັນເວລາຂອງມະນຸດບໍ
ປີຂອງພຣະອົງເໝືອນດັ່ງປີຂອງມະນຸດບໍ?
ພຣະອົງຈຶ່ງຕ້ອງຄົ້ນຫາຄວາມຜິດຂອງຂ້ານ້ອຍ
ແລະ ສືບຫາບາບຂອງຂ້ານ້ອຍ
ທັງທີ່ພຣະອົງຮູ້ວ່າຂ້ານ້ອຍບໍ່ມີຄວາມຜິດ
ແລະ ບໍ່ມີຜູ້ໃດສາມາດຊ່ວຍຂ້ານ້ອຍຈາກມືຂອງພຣະອົງໄດ້?
“ມືຂອງພຣະອົງໄດ້ຫລໍ່ຫລອມ ແລະ ໄດ້ປັ້ນຂ້ານ້ອຍຂຶ້ນມາ.
ບັດນີ້ ພຣະອົງຈະມາທຳລາຍຂ້ານ້ອຍບໍ?
ຂໍລະນຶກວ່າພຣະອົງໄດ້ປັ້ນຂ້ານ້ອຍເໝືອນດັ່ງປັ້ນດິນໜຽວ.
ບັດນີ້ ພຣະອົງຈະເຮັດໃຫ້ຂ້ານ້ອຍໄປເປັນຂີ້ຝຸ່ນດິນອີກບໍ?
ພຣະອົງບໍ່ໄດ້ເທຂ້ານ້ອຍດັ່ງເທນ້ຳນົມບໍ
ແລະ ເຮັດໃຫ້ຂ້ານ້ອຍເໝືອນດັ່ງເນີຍແຂງບໍ?
ພຣະອົງຫຸ້ມຫໍ່ຂ້ານ້ອຍດ້ວຍກ້ອນຊີ້ນ ແລະ ຜິວໜັງ
ແລະ ຖັກຮ້ອຍຂ້ານ້ອຍເຂົ້າກັນດ້ວຍກະດູກ ແລະ ເສັ້ນເອັນບໍ່ແມ່ນບໍ?
ພຣະອົງໄດ້ໃຫ້ຊີວິດ ແລະ ໄດ້ສະແດງຄວາມກະລຸນາແກ່ຂ້ານ້ອຍ,
ແລະ ໃນການຈັດຕຽມຂອງພຣະອົງໄດ້ເຝົ້າຮັກສາຈິດວິນຍານຂອງຂ້ານ້ອຍ.
“ແຕ່ນີ້ແມ່ນສິ່ງທີ່ພຣະອົງເຊື່ອງຊ້ອນໄວ້ໃນຫົວໃຈຂອງພຣະອົງ,
ແລະ ຂ້ານ້ອຍຮູ້ວ່າສິ່ງນີ້ຢູ່ໃນຄວາມຄິດຂອງພຣະອົງຄື:
ຖ້າຂ້ານ້ອຍໄດ້ເຮັດບາບ, ພຣະອົງຈະເຝົ້າເບິ່ງຂ້ານ້ອຍຢູ່
ແລະ ຈະບໍ່ປ່ອຍໃຫ້ຂ້ານ້ອຍໜີໄປໄດ້ໂດຍບໍ່ໄດ້ຮັບໂທດ.
ຖ້າຂ້ານ້ອຍມີຄວາມຜິດ, ວິບັດກໍເກີດຂຶ້ນກັບຂ້ານ້ອຍ!
ເຖິງແມ່ນວ່າຂ້ານ້ອຍບໍ່ມີຄວາມຜິດ, ຂ້ານ້ອຍກໍບໍ່ສາມາດໂງຫົວຂອງຕົນຂຶ້ນມາໄດ້,
ເພາະຂ້ານ້ອຍຮູ້ສຶກອັບອາຍຢ່າງຍິ່ງ
ແລະ ຈົມຢູ່ໃນ1ຄວາມທຸກທໍລະມານຂອງຂ້ານ້ອຍ.
ຖ້າຂ້ານ້ອຍໂງຫົວຂຶ້ນສູງໆ, ພຣະອົງກໍເຂົ້າຫາເໝືອນດັ່ງໂຕສິງ
ແລະ ສະແດງລິດອຳນາດອັນໜ້າຢ້ານຂອງພຣະອົງຕໍ່ຂ້ານ້ອຍອີກ.
ພຣະອົງເອົາພະຍານໃໝ່ມາກ່າວຫາຂ້ານ້ອຍ
ແລະ ເພີ່ມຄວາມໃຈຮ້າຍຂອງພຣະອົງທີ່ມີຕໍ່ຂ້ານ້ອຍຫລາຍຂຶ້ນ;
ກອງກຳລັງຂອງພຣະອົງບຸກເຂົ້າໃສ່ຂ້ານ້ອຍຊ້ຳແລ້ວຊ້ຳອີກ.
“ແລ້ວເປັນຫຍັງພຣະອົງໄດ້ນຳຂ້ານ້ອຍອອກມາຈາກທ້ອງຂອງແມ່?
ຂ້ານ້ອຍຢາກຈະຕາຍກ່ອນທີ່ຈະມີຜູ້ໃດເຫັນຂ້ອຍ.
ຖ້າຂ້ານ້ອຍບໍ່ເຄີຍເກີດມາເປັນໂຕເປັນຕົນ,
ຫລື ໄດ້ອອກຈາກທ້ອງແມ່ໄປສູ່ຂຸມຝັງສົບ!
ຊີວິດສັ້ນໆຂອງຂ້ານ້ອຍໃກ້ຈະຈົບລົງແລ້ວບໍ່ແມ່ນບໍ?
ຂໍຫັນໄປຈາກຂ້ານ້ອຍ ເພື່ອຂ້ານ້ອຍອາດຈະມີເວລາຊື່ນໃຈຈັກໜ້ອຍໜຶ່ງ
ກ່ອນທີ່ຂ້ານ້ອຍຈະໄປສູ່ບ່ອນທີ່ບໍ່ໄດ້ກັບຄືນມາອີກ,
ສູ່ດິນແດນແຫ່ງຄວາມໂສກເສົ້າ ແລະ ຄວາມມືດຕຶບ,2
ສູ່ດິນແດນແຫ່ງຄວາມມືດມິດ,
ດິນແດນທີ່ມີຄວາມມືດມົນ ແລະ ຄວາມວຸ້ນວາຍ,
ບ່ອນທີ່ແມ່ນແຕ່ຄວາມສະຫວ່າງກໍເປັນດັ່ງຄວາມມືດ”.
Source notes (2)
- Footnote ຫລື ແລະ ຕະໜັກເຖິງ
- Footnote ຫລື ແລະ ເງົາແຫ່ງຄວາມຕາຍ ເຊັ່ນດຽວກັບຂໍ້ 22
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.