Biblica® Open Lao Contemporary Version
ໂຢບ 6
ໂຢບ
ແລ້ວໂຢບໄດ້ຕອບວ່າ:
“ຖ້າເອົາຄວາມເຈັບປວດຂອງຂ້ອຍມາຊັ່ງ
ແລະ ເອົາຄວາມທຸກຍາກທັງໝົດຂອງຂ້ອຍວາງເທິງຊິງໄດ້!
ແນ່ນອນວ່າມັນຈະໜັກຫລາຍກວ່າເມັດດິນຊາຍໃນທະເລ
ຈຶ່ງບໍ່ແປກໃຈເລີຍທີ່ຄໍາເວົ້າຂອງຂ້ອຍໄດ້ອອກໄປຢ່າງໃຈຮ້ອນ.
ລູກທະນູຂອງອົງຜູ້ມີລິດອໍານາດຍິ່ງໃຫຍ່ຢູ່ໃນຂ້ອຍ,
ຈິດວິນຍານຂອງຂ້ອຍດື່ມພິດຂອງມັນ;
ຄວາມຢ້ານຈາກພຣະເຈົ້າກໍມາເຂົ້າມາໂຈມຕີຂ້ອຍ.
ລໍປ່າຮ້ອງຂຶ້ນເມື່ອມີຫຍ້າກິນບໍ
ຫລື ງົວຈະສົ່ງສຽງເມື່ອມັນມີອາຫານກິນບໍ?
ຈະກິນອາຫານທີ່ຈືດໂດຍບໍ່ໃສ່ເກືອບໍ,
ນ້ຳລ້ຽງຂອງຕົ້ນແມໂລຈະມີລົດຊາດຫຍັງ1?
ຂ້ອຍບໍ່ຍອມແຕະຕ້ອງອາຫານແບບນັ້ນດອກ;
ອາຫານເຫລົ່ານັ້ນເຮັດໃຫ້ຂ້ອຍເຈັບປ່ວຍ.
“ໂອ, ຂໍໃຫ້ຂ້ອຍໄດ້ຕາມຄຳຮ້ອງຂໍຂອງຂ້ອຍ,
ຂໍພຣະເຈົ້າໃຫ້ຕາມສິ່ງທີ່ຂ້ອຍຫວັງ,
ຂໍໃຫ້ພຣະເຈົ້າເຕັມໃຈທີ່ຈະຍ່ອງຂ້ອຍ,
ພຣະອົງຈະປ່ອຍມື ແລະ ຕັດຂາດຂ້ອຍ!
ຢ່າງໜ້ອຍຂ້ອຍກໍຍັງສະບາຍໃຈ
ແລະ ຍິນດີເຖິງວ່າຈະເຈັບປວດຫລາຍ
ທີ່ວ່າຂ້ອຍບໍ່ໄດ້ປະຕິເສດຖ້ອຍຄຳຂອງອົງບໍລິສຸດ.
“ຂ້ອຍມີກຳລັງຫຍັງເຫລືອ ທີ່ຈະໃຫ້ຂ້ອຍຍັງຫວັງຢູ່?
ຂ້ອຍຄາດຫວັງອັນໃດ, ຂ້ອຍຈຶ່ງຄວນຈະອົດທົນຢູ່?
ຂ້ອຍມີກໍາລັງແຂງແກ່ນດັ່ງຫີນບໍ?
ຮ່າງກາຍຂອງຂ້ອຍເປັນທອງສຳລິດບໍ?
ຂ້ອຍມີກຳລັງທີ່ຈະຊ່ວຍເຫລືອຕົວເອງໄດ້ບໍ,
ໃນເມື່ອຄວາມສຳເລັດໜີໄປຈາກຂ້ອຍແລ້ວ?
“ມີຜູ້ໃດບໍ່ຢາກໄດ້ຄວາມເມດຕາຈາກໝູ່ເພື່ອນ.
ເຖິງແມ່ນວ່າລາວບໍ່ຢໍາເກງພຣະເຈົ້າອົງມີລິດອໍານາດຍິ່ງໃຫຍ່.
ແຕ່ອ້າຍນ້ອງຂອງຂ້ອຍກໍເພິ່ງພາບໍ່ໄດ້ເລີຍ, ດັ່ງສາຍນ້ຳທີ່ໄຫລໆຢຸດໆ,
ເໝືອນດັ່ງແມ່ນ້ຳທີ່ໄຫລລົ້ນ
ເມື່ອນໍ້າຂຸ່ນດຳທີ່ລະລາຍມາຈາກນໍ້າແຂງ
ແລະ ຫິມະທີ່ລະລາຍກໍໄຫລຖ້ວມລົ້ນ,
ແຕ່ມັນກໍຢຸດໄຫລໃນລະດູຮ້ອນ,
ແລະ ເມື່ອອາກາດຮ້ອນເອົ້າກໍເຮັດໃຫ້ຫ້ວຍຮ່ອງແຫ້ງແລ້ງ.
ຂະບວນຄົນທີ່ເດີນທາງຫັນອອກຈາກເສັ້ນທາງຂອງຕົນ;
ພວກເຂົາເຂົ້າໄປໃນດິນແດນກັນດານ ແລະ ກໍພິນາດຈິບຫາຍ.
ຂະບວນຄົນທີ່ເດີນທາງຈາກເຕມາກໍຊອກຫານໍ້າ,
ການເດີນທາງຂອງພວກພໍ່ຄ້າຈາກເຊບາກໍຊອກຫານ້ຳຢ່າງມີຄວາມຫວັງ.
ພວກເຂົາກໍທຸກໃຈ, ເພາະພວກເຂົາໝັ້ນໃຈຫລາຍ;
ພວກເຂົາມາຮອດທີ່ນັ້ນ, ແຕ່ພັດຕ້ອງຜິດຫວັງ.
ບັດນີ້ ພວກເຈົ້າກໍໄດ້ຖືກພິສູດໃຫ້ເຫັນແລ້ວວ່າບໍ່ໄດ້ຮັບຄວາມຊ່ວຍອັນໃດ;
ພວກເຈົ້າເຫັນສິ່ງທີ່ໜ້າລັງກຽດ ແລະ ກໍຢ້ານກົວ.
ຂ້ອຍເຄີຍບອກວ່າ, ‘ຂໍບາງສິ່ງບາງຢ່າງໃຫ້ຂ້ອຍແດ່,
ຂໍໄຖ່ຂ້ອຍດ້ວຍຊັບສົມບັດຂອງພວກເຈົ້າແດ່,
ຂໍປົດປ່ອຍຂ້ອຍຈາກມືຂອງສັດຕູ,
ຂໍກອບກູ້ຂ້ອຍຈາກມືຂອງຄົນໂຫດຮ້າຍແດ່?’
“ຂໍຈົ່ງສັ່ງສອນຂ້ອຍ, ແລ້ວຂ້ອຍຈະມິດງຽບຢູ່;
ຂໍໂຜດສະແດງໃຫ້ຂ້ອຍເຫັນວ່າຂ້ອຍຜິດບ່ອນໃດ.
ຄຳເວົ້າທີ່ຊື່ສັດຄືເຮັດໃຫ້ເຈັບປວດແທ້!
ແຕ່ຄຳໂຕ້ແຍ້ງຂອງພວກເຈົ້າພິສູດອັນໃດໄດ້?
ພວກເຈົ້າຕັ້ງໃຈຈະແກ້ໄຂສິ່ງທີ່ຂ້ອຍໄດ້ເວົ້າ,
ແລະ ເຮັດຕໍ່ຄໍາເວົ້າທີ່ໝົດຫວັງຂອງຂ້ອຍເປັນດັ່ງສາຍລົມບໍ?
ພວກເຈົ້າຈະຈັບສະຫລາກເພື່ອເລືອກລູກກຳພ້າ
ແລະ ຕົກລົງລາຄາຂາຍໝູ່ເພື່ອນຂອງພວກເຈົ້າ.
“ແຕ່ບັດນີ້ ຂໍເມດຕາແນມເບິ່ງຂ້ອຍແດ່.
ຂ້ອຍຈະເວົ້າຕົວະພວກເຈົ້າຢູ່ໜ້າບໍ?
ຂໍຜ່ອນຜັນ, ຢ່າເປັນຄົນອະຍຸຕິທຳເລີຍ;
ຂໍໃຫ້ພິຈາລະນາເບິ່ງ, ເພາະຄວາມສັດຊື່ຂອງຂ້ອຍເປັນເດີມພັນ.
ມີຄວາມຊົ່ວອັນໃດຢູ່ປາກຂອງຂ້ອຍຫລືບໍ່?
ປາກຂອງຂ້ອຍໄຈ້ແຍກຄວາມຊົ່ວໄດ້ບໍ?
Source notes (1)
- Footnote ໃນພາສາເຮັບເຣີປະໂຫຍກນີ້ມີຄວາມໝາຍບໍ່ຊັດເຈນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.