Biblica® Open Lao Contemporary Version
ໂຢບ 5
“ຖ້າເຈົ້າຈະສົ່ງສຽງເອີ້ນ, ແຕ່ຜູ້ໃດຈະຕອບເຈົ້າ?
ເຈົ້າຈະຫັນໜ້າໄປຫາອົງບໍລິສຸດອົງໃດ?
ຄວາມຄຽດແຄ້ນຂ້າຄົນໂງ່,
ແລະ ຄວາມອິດສາຂ້າຄົນຮູ້ໜ້ອຍ.
ຂ້ອຍເອງເຄີຍເຫັນຄົນໂງ່ວາງຮາກຖານ,
ແຕ່ທັນໃດນັ້ນເຮືອນຂອງລາວກໍຖືກສາບແຊ່ງ.
ລູກຫລານຂອງລາວຢູ່ຢ່າງບໍ່ມີຄວາມປອດໄພ,
ແລະ ຖືກບີບບັງຄັບໃນສານໂດຍບໍ່ມີຜູ້ໃດປົກປ້ອງ.
ຄວາມອຶດຫິວກໍກິນຜົນເກັບກ່ຽວຂອງລາວໝົດ,
ແມ່ນແຕ່ສິ່ງທີ່ຢູ່ໃນຟຸ່ມໜາມກໍເອົາໄປ,
ແລະ ຄວາມກະຫາຍກໍຫອບເອົາຊັບສົມບັດຂອງລາວໄປ.
ເພາະຄວາມລໍາບາກບໍ່ໄດ້ເກີດຂຶ້ນມາຈາກດິນ
ຫລື ຄວາມເດືອດຮ້ອນບໍ່ໄດ້ງອກຂຶ້ນມາຈາກພື້ນດິນ.
ແຕ່ຄົນເກີດມາເພື່ອຄວາມເດືອດຮ້ອນ
ດັ່ງປະກາຍໄຟພຸ່ງຂຶ້ນສູ່ທ້ອງຟ້າ.
“ແຕ່ຖ້າຂ້ອຍເປັນເຈົ້າ, ຂ້ອຍຈະອ້ອນວອນຕໍ່ພຣະເຈົ້າ;
ຂ້ອຍຈະວາງຄະດີຄວາມຂອງຂ້ອຍໄວ້ຕໍ່ໜ້າພຣະອົງ.
ພຣະອົງສໍາແດງການອັດສະຈັນທີ່ບໍ່ສາມາດເຂົ້າໃຈໄດ້,
ການອັດສະຈັນທີ່ບໍ່ສາມາດນັບໄດ້.
ພຣະອົງໃຫ້ຝົນຕົກລົງມາໃສ່ແຜ່ນດິນໂລກ;
ພຣະອົງສົ່ງນ້ຳລົງມາສູ່ເຂດຊົນນະບົດ.
ພຣະອົງໄດ້ຕັ້ງຜູ້ທີ່ຕ່ຳຕ້ອຍໄວ້ເທິງບ່ອນສູງ,
ແລະ ຜູ້ທີ່ໄວ້ທຸກຖືກຍົກຂຶ້ນໄວ້ບ່ອນປອດໄພ.
ພຣະອົງໄດ້ຂັດຂວາງແຜນການຂອງຄົນມີເລ້ຫລ່ຽມ,
ເພື່ອວຽກງານຂອງພວກເຂົາຈະບໍ່ສຳເລັດ.
ພຣະອົງຈັບຄົນສະຫລາດດ້ວຍເລ້ຫລ່ຽມຂອງພວກເຂົາເອງ,
ແລະ ແຜນການຂອງຄົນເຈົ້າເລ້ກໍຖືກກວາດລ້າງອອກໄປ.
ໃນຄວາມມືດມົນມາເໜືອພວກເຂົາໃນຍາມກາງເວັນ;
ໃນຕອນກາງເວັນພວກເຂົາກໍງົມທາວດັ່ງຢູ່ໃນຍາມກາງຄືນ.
ພຣະເຈົ້າຊ່ວຍຜູ້ທີ່ຂັດສົນຈາກຄໍາເວົ້າທີ່ສຽບແທງຂອງພວກເຂົາ;
ພຣະອົງຊ່ວຍກູ້ພວກເຂົາໃຫ້ພົ້ນຈາກມືຂອງຜູ້ທີ່ມີອໍານາດ.
ດັ່ງນັ້ນ ຄົນທຸກຍາກຈຶ່ງມີຄວາມຫວັງ,
ແລະ ຄວາມອະຍຸຕິທຳກໍມິດງຽບຢູ່.
“ຄວາມສຸກເປັນຜູ້ທີ່ພຣະເຈົ້າຕັກເຕືອນ;
ສະນັ້ນ ຢ່າດູໜິ່ນການຕີສອນຂອງອົງຜູ້ມີລິດອໍານາດຍິ່ງໃຫຍ່.
ເພາະພຣະອົງເຮັດໃຫ້ເກີດບາດແຜ, ແຕ່ພຣະອົງກໍພັນບາດແຜໃຫ້;
ພຣະອົງເຮັດໃຫ້ບາດເຈັບ, ແຕ່ກໍປິ່ນປົວຮັກສາໃຫ້ຫາຍ.
ພຣະອົງຈະກອບກູ້ເຈົ້າຈາກໄພພິບັດຫົກຄັ້ງ;
ຄັ້ງທີເຈັດຈະບໍ່ມີໄພອັນຕະລາຍໃດຈະແຕະຕ້ອງເຈົ້າໄດ້.
ພຣະອົງຈະຊ່ວຍເຈົ້າໃຫ້ພົ້ນຈາກຄວາມຕາຍໃນຍາມມີຄວາມອຶດຢາກອາຫານ,
ແລະ ຈາກດາບໃນຍາມທີ່ມີການສູ້ຮົບ.
ເຈົ້າຈະໄດ້ຮັບການປົກປ້ອງຈາກຄຳນິນທາ,
ແລະ ບໍ່ຕ້ອງຢ້ານກົວເມື່ອຄວາມພິນາດມາເຖິງ.
ເຈົ້າຈະຫົວຂວັນໃສ່ຄວາມພິນາດ ແລະ ຄວາມອຶດຢາກອາຫານ,
ແລະ ບໍ່ຕ້ອງຢ້ານກົວສັດປ່າຕ່າງໆ.
ເພາະເຈົ້າຈະມີຄໍາສັນຍາກັບກ້ອນຫີນໃນທົ່ງນາ,
ແລະ ສັດປ່າຈະຢູ່ຢ່າງສະຫງົບສຸກກັບເຈົ້າ.
ເຈົ້າຈະຮູ້ວ່າເຕັນຂອງເຈົ້າປອດໄພ;
ເຈົ້າຈະກວດເບິ່ງຊັບສົມບັດຂອງເຈົ້າ ແລະ ກໍບໍ່ພົບວ່າມີອັນໃດຂາດຫາຍ.
ເຈົ້າຈະໄດ້ຮູ້ວ່າລູກຫລານຂອງເຈົ້າຈະມີຢ່າງຫລວງຫລາຍ,
ແລະ ເຊື້ອສາຍຂອງເຈົ້າເປັນເໝືອນຫຍ້າເທິງແຜ່ນດິນໂລກ.
ເຈົ້າຈະມາເຖິງຂຸມຝັງສົບເວລາທີ່ຍັງແຂງແຮງ,
ດັ່ງຟ່ອນເຂົ້າທີ່ເກັບກ່ຽວຕາມລະດູການ.
“ພວກເຮົາໄດ້ກວດສອບສິ່ງນີ້ ແລະ ກໍພົບວ່າເປັນຄວາມຈິງ.
ສະນັ້ນ ຈົ່ງຟັງ ແລະ ນຳເອົາມັນໄປປະຕິບັດກັບໂຕເຈົ້າເອງ”.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.