Biblica® Open Lao Contemporary Version
ໂຢບ 42
ໂຢບ
ແລ້ວໂຢບໄດ້ຕອບຕໍ່ພຣະເຈົ້າຢາເວວ່າ:
“ຂ້ານ້ອຍຮູ້ວ່າພຣະອົງຊົງກະທຳທຸກສິ່ງໄດ້;
ບໍ່ມີອັນໃດຂັດຂວາງຄວາມປະສົງຂອງພຣະອົງໄດ້.
ພຣະອົງຖາມວ່າ, ‘ຜູ້ໃດທີ່ປິດບັງແຜນການຂອງເຮົາໄວ້ໂດຍປາດສະຈາກຄວາມຮູ້?’
ແນ່ນອນ ຂ້ານ້ອຍໄດ້ເວົ້າສິ່ງທີ່ຂ້ອຍບໍ່ເຂົ້າໃຈ,
ສິ່ງທີ່ອັດສະຈັນເກີນກວ່າຂ້ອຍຈະຮູ້ໄດ້.
“ພຣະອົງໄດ້ກ່າວວ່າ, ‘ບັດນີ້ ຈົ່ງຟັງ ແລະ ເຮົາຈະເວົ້າ;
ເຮົາຈະຖາມ,
ແລ້ວເຈົ້າຈົ່ງຕອບເຮົາ’.
ຫູຂອງຂ້ານ້ອຍເຄີຍໄດ້ຍິນເຖິງເລື່ອງຂອງພຣະອົງມາກ່ອນ
ແຕ່ບັດນີ້ຕາຂອງຂ້ານ້ອຍໄດ້ເຫັນພຣະອົງແລ້ວ.
ເຫດສະນັ້ນ ຂ້ານ້ອຍຈຶ່ງດູຖູກຕົນເອງ
ແລະ ສຳນຶກຜິດໃນ1ຂີ້ຝຸ່ນດິນ ແລະ ຂີ້ເຖົ່າ”
ບົດສົ່ງທ້າຍ
ຫລັງຈາກພຣະເຈົ້າຢາເວໄດ້ກ່າວສິ່ງເຫລົ່ານີ້ກັບໂຢບແລ້ວ, ພຣະອົງກໍກ່າວກັບເອລີຟັດຊາວເຕມານວ່າ, “ເຮົາໃຈຮ້າຍໃຫ້ເຈົ້າກັບໝູ່ເພື່ອນອີກສອງຄົນຂອງເຈົ້າ, ເພາະເຈົ້າບໍ່ໄດ້ເວົ້າຄວາມຈິງກ່ຽວກັບເຮົາເໝືອນດັ່ງໂຢບຜູ້ຮັບໃຊ້ຂອງເຮົາ. ບັດນີ້ ຈົ່ງນຳງົວເຖິງເຈັດໂຕ ແລະ ແກະເຖິງເຈັດໂຕໄປຫາໂຢບຜູ້ຮັບໃຊ້ຂອງເຮົາ ແລະ ຖວາຍເຄື່ອງເຜົາບູຊາສຳລັບພວກເຈົ້າເອງ. ແລ້ວໂຢບຜູ້ຮັບໃຊ້ຂອງເຮົາຈະອະທິຖານເພື່ອພວກເຈົ້າ, ແລະ ເຮົາຈະຮັບຄຳອະທິຖານຂອງລາວ ແລະ ບໍ່ລົງໂທດພວກເຈົ້າຕາມຄວາມໂງ່ຂອງພວກເຈົ້າ. ພວກເຈົ້າບໍ່ໄດ້ເວົ້າຄວາມຈິງກ່ຽວກັບເຮົາເໝືອນດັ່ງໂຢບຜູ້ຮັບໃຊ້ຂອງເຮົາ”. ສະນັ້ນ ເອລີຟັດຊາວເຕມານ, ບິນດາດຊາວຊູອາ ແລະ ໂຊພາຊາວນາອາມາຈຶ່ງເຮັດຕາມທີ່ພຣະເຈົ້າຢາເວໄດ້ບອກພວກເຂົາ ແລະ ພຣະເຈົ້າຢາເວໄດ້ຮັບຄຳອະທິຖານຂອງໂຢບ.
ຫລັງຈາກທີ່ໂຢບອະທິຖານເພື່ອໝູ່ເພື່ອນຂອງລາວແລ້ວ, ພຣະເຈົ້າຢາເວໄດ້ເຮັດໃຫ້ເພິ່ນຈະເລີນຮຸ່ງເຮືອງຂຶ້ນອີກ ແລະ ໃຫ້ເພິ່ນມີຫລາຍກວ່າເກົ່າເປັນສອງເທົ່າທີ່ເພິ່ນເຄີຍມີມາກ່ອນ. ແລ້ວພວກອ້າຍນ້ອງທັງໝົດ ແລະ ທຸກຄົນທີ່ຮູ້ຈັກກັນມາກ່ອນກໍພາກັນມາ ແລະ ກິນລ້ຽງສະຫລອງກັບເພິ່ນຢູ່ໃນເຮືອນຂອງໂຢບ. ພວກເຂົາເລົ້າໂລມໃຈ ແລະ ປອບໃຈເພິ່ນກ່ຽວກັບຄວາມທຸກລຳບາກທັງໝົດທີ່ພຣະເຈົ້າຢາເວໄດ້ນຳມາສູ່ເພິ່ນ, ແຕ່ລະຄົນໄດ້ເອົາເງິນໜຶ່ງແຜ່ນ2 ແລະ ແຫວນຄຳໜຶ່ງວົງມາມອບໃຫ້ເພິ່ນ,
ພຣະເຈົ້າຢາເວໄດ້ອວຍພອນຊີວິດໃນບັ້ນປາຍຂອງໂຢບຫລາຍຂຶ້ນກວ່າຕອນຕົ້ນ. ເພິ່ນມີແກະ 14.000 ໂຕ, ອູດ 6.000 ໂຕ, ງົວຜູ້ 1.000 ຄູ່ ແລະ ລໍ 1.000 ໂຕ. ແລະ ເພິ່ນກໍຍັງມີລູກຊາຍເຈັດຄົນ ແລະ ລູກສາວສາມຄົນ. ລູກສາວຄົນທຳອິດຂອງເພິ່ນຊື່ເຢມີມາ, ຄົນທີສອງຊື່ເກຊີຢາ ແລະ ຄົນທີສາມຊື່ເກເຣັນຮັບປຸກ. ຕະຫລອດທົ່ວດິນແດນນັ້ນບໍ່ມີຍິງສາວຄົນໃດງາມເທົ່າບັນດາລູກສາວຂອງໂຢບ, ເພິ່ນໄດ້ແບ່ງມໍລະດົກໃຫ້ແກ່ພວກນາງເໝືອນດັ່ງທີ່ໃຫ້ກັບພວກອ້າຍຂອງພວກເຂົາ.
ຫລັງຈາກນັ້ນ ໂຢບມີຊີວິດຢູ່ອີກ 140 ປີ; ເພິ່ນໄດ້ເຫັນຫລານເຫລັນເຖິງສີ່ລຸ້ນ. ແລ້ວໂຢບກໍໄດ້ຕາຍໄປ, ເມື່ອເພິ່ນເຖົ້າແກ່ຫລາຍແລ້ວ ແລະ ມີອາຍຸຍືນຍາວ.
Source notes (2)
- Footnote ຫລື ແລະ ເລີກສົງສານຕົນເອງ ອອກຈາກ
- Footnote ພາສາເຮັບເຣີວ່າ 1 ເຄສິທາ ເຄສິທາເປັນໜ່ວຍເງິນຕາທີ່ບໍ່ຮູ້ນ້ຳໜັກ ຫລື ມູນຄ່າ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.