Biblica® Open Lao Contemporary Version
ໂຢບ 40
ພຣະເຈົ້າຢາເວໄດ້ກ່າວກັບໂຢບວ່າ:
“ຜູ້ທີ່ໂຕ້ຖຽງກັບອົງຜູ້ມີລິດອໍານາດຍິ່ງໃຫຍ່ຈະປ່ຽນແປງພຣະອົງໄດ້ບໍ?
ໃຫ້ຄົນທີ່ກ່າວຫາພຣະເຈົ້າຕອບມາເບິ່ງດຸ!”
ໂຢບໄດ້ຕອບພຣະເຈົ້າຢາເວວ່າ:
“ຂ້ານ້ອຍບໍ່ຄູ່ຄວນ ແລ້ວຂ້ານ້ອຍຈະຕອບພຣະອົງໄດ້ຢ່າງໃດ?
ຂ້ານ້ອຍເອົາມືປິດປາກຂອງຕົນໄວ້
ຂ້ານ້ອຍເວົ້າໄປເທື່ອໜຶ່ງແລ້ວ, ແຕ່ຂ້ານ້ອຍບໍ່ໄດ້ຄຳຕອບ
ຂ້ອຍເວົ້າສອງສາມຄັ້ງແລ້ວ, ແຕ່ຂ້ານ້ອຍຈະບໍ່ເວົ້າອີກ”.
ແລ້ວພຣະເຈົ້າຢາເວກໍໄດ້ເວົ້າກັບໂຢບອອກມາຈາກລົມພະຍຸວ່າ:
“ຈົ່ງຄາດແອວໄວ້ດັ່ງຜູ້ຊາຍ;
ເຮົາຈະຖາມເຈົ້າ,
ແລ້ວເຈົ້າຈົ່ງຕອບເຮົາ.
“ເຈົ້າຈະເຮັດໃຫ້ຄວາມຍຸຕິທຳຂອງເຮົາເສື່ອມເສຍໄປບໍ?
ເຈົ້າຈະກ່າວໂທດເຮົາເພື່ອພິສູດຕົນເອງບໍ?
ເຈົ້າມີແຂນທີ່ແຂງແຮງເໝືອນດັ່ງແຂນຂອງພຣະເຈົ້າບໍ?
ແລະ ເຈົ້າຮ້ອງອອກມາເປັນສຽງຟ້າຮ້ອງເໝືອນດັ່ງພຣະອົງໄດ້ບໍ?
ສະນັ້ນ ຈົ່ງປະດັບຕົວດ້ວຍ ສະຫງ່າລາສີ ແລະ ຄວາມສະຫງ່າງາມ,
ແລະ ນຸ່ງຫົ່ມຕົວດ້ວຍກຽດສັກສີ ແລະ ບາລະມີ.
ຈົ່ງລະບາຍຄວາມໂກດຮ້າຍຂອງເຈົ້າອອກມາເບິ່ງດຸ,
ເບິ່ງທຸກຄົນທີ່ຍິ່ງຈອງຫອງ ແລະ ເຮັດໃຫ້ພວກເຂົາຕົກຕ່ຳລົງມາເບິ່ງດຸ,
ຈົ່ງເບິ່ງທຸກຄົນທີ່ໂອ້ອວດ ແລະ ເຮັດໃຫ້ພວກເຂົາຕ່ຳລົງ,
ຈົ່ງຍ່ອງຄົນຊົ່ວຮ້າຍໃນບ່ອນທີ່ພວກເຂົາຢືນຢູ່ແມ.
ຈົ່ງຝັງພວກເຂົາທຸກຄົນໄວ້ໃນຂີ້ຝຸ່ນດິນນໍາກັນ;
ແລະ ຖົມໜ້າພວກເຂົາໄວ້ໃນຂຸມຝັງສົບ.
ແລ້ວເຮົາເອງຈະຍອມຮັບເຈົ້າ
ວ່າມືຂວາຂອງເຈົ້າຊ່ວຍເຈົ້າເອງໃຫ້ພົ້ນໄດ້.
“ຈົ່ງເບິ່ງເບເຮໂມດ,
ເຊິ່ງເຮົາໄດ້ສ້າງມັນຂຶ້ນມາເໝືອນທີ່ເຮົາສ້າງເຈົ້າ
ມັນກິນຫຍ້າເໝືອນດັ່ງງົວໂຕໜຶ່ງ.
ມີມັນກໍາລັງແຮງຫລາຍຢູ່ທີ່ແອວຂອງມັນ,
ແລະ ມັນມີອໍານາດຫລາຍຢູ່ທີ່ກ້າມທ້ອງຂອງມັນ!
ຫາງຂອງມັນແກວ່ງໄປມາດັ່ງຕົ້ນໄມ້ສີດາ;
ເສັ້ນເອັນຕົ້ນຂາຂອງມັນສານເຂົ້າກັນຢ່າງໜຽວແໜ້ນ.
ກະດູກຂອງມັນເໝືອນດັ່ງທ່ອນທອງສຳລິດ,
ຂາຂອງມັນເໝືອນດັ່ງທ່ອນເຫລັກ.
ມັນຢູ່ໃນອັນດັບທຳອິດຂອງການງານຕ່າງໆທີ່ພຣະເຈົ້າສ້າງ,
ແຕ່ພຣະຜູ້ສ້າງເຂົ້າໃກ້ມັນພ້ອມດ້ວຍດາບຂອງຕົນ.
ເນີນພູກໍຜະລິດອາຫານຂອງມັນ,
ແລະ ສັດປ່າທັງປວງແລ່ນຫລິ້ນຢູ່ໃກ້ໆ.
ມັນນອນລົງກ້ອງກໍບົວ,
ເຊື່ອງຕົນຢູ່ກາງປ່າອໍ້ໃນບຶງ.
ມັນລີ້ຊ້ອນຢູ່ໃຕ້ຮົ່ມບົວ,
ກາງຕົ້ນປໍປາທີ່ຢູ່ຕາມແຄມແມ່ນ້ຳ.
ການປັ່ນປ່ວນຂອງແມ່ນໍ້າບໍ່ໄດ້ເຮັດມັນຕື່ນຕົກໃຈ;
ແມ່ນວ່າແມ່ນ້ຳຈໍແດນລົ້ນຖ້ວມປາກຂອງມັນ, ມັນກໍປອດໄພ;
ຜູ້ໃດສາມາດຈັບມັນໄດ້ຂະນະທີ່ມັນຍັງມືດຕາຢູ່,1
ຫລື ວາງແຮ້ວຈັບມັນ ແລະ ແທງດັງຂອງມັນໄດ້?
Source notes (1)
- Footnote ຫລື ຂ້າງຕານ້ຳ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.