Biblica® Open Lao Contemporary Version
ໂຢບ 39
“ເຈົ້າຮູ້ບໍວ່າແບ້ທີ່ເທິງພູເຂົາເກີດລູກເມື່ອໃດ?
ເຈົ້າເຝົ້າເບິ່ງກວາງແມ່ເກີດລູກບໍ?
ເຈົ້ານັບເດືອນຈົນກວ່າພວກມັນເກີດລູກບໍ?
ເຈົ້າຮູ້ຈັກເວລາທີ່ພວກມັນຈະເກີດລູກບໍ?
ພວກມັນໝອບໂຕລົງ ແລະ ກໍເກີດລູກອ່ອນ;
ການເຈັບທ້ອງເກີດລູກຂອງພວກມັນໄດ້ສິ້ນສຸດລົງ.
ລູກອ່ອນຂອງພວກມັນໃຫຍ່ຂຶ້ນ ແລະ ແຂງແຮງດີຢູ່ໃນປ່າ;
ພວກມັນກໍໜີໄປ ແລະ ບໍ່ກັບຄືນມາອີກ.
“ຜູ້ໃດປ່ອຍລໍປ່າໃຫ້ເປັນອິດສະຫລະ?
ຜູ້ໃດແກ້ເຊືອກທີ່ຜູກມັນໄວ້?
ເຮົາໄດ້ໃຫ້ບ່ອນຫ່າງໄກເປັນບ້ານຂອງມັນ,
ແລະ ໃຫ້ທົ່ງພຽງທີ່ມີດິນເຄັມເປັນບ່ອນອາໄສຂອງມັນ.
ມັນຫົວຂວັນຄວາມວຸ້ນວາຍໃນຕົວເມືອງ;
ມັນບໍ່ໄດ້ຍິນສຽງຮ້ອງຂອງຜູ້ຂັບຂີ່.
ມັນໄປຕາມເນີນພູເປັນທົ່ງຫຍ້າຂອງມັນ
ແລະ ມັນຊອກຫາພືດທີ່ເປັນສີຂຽວທຸກຊະນິດ.
“ງົວປ່າຈະຍອມຮັບໃຊ້ເຈົ້າບໍ?
ມັນຈະອາໄສຢູ່ຄອກຂອງເຈົ້າໃນຍາມກາງຄືນບໍ?
ເຈົ້າສາມາດຈັບງົວປ່າມາເພື່ອລາກໄຖໄດ້ບໍ?
ມັນຈະຍອມໄຖທົ່ງນາຕາມເຈົ້າຫລືບໍ່?
ເຈົ້າຈະເພິ່ງພາກຳລັງມະຫາສານຂອງມັນບໍ?
ເຈົ້າຈະມອບວຽກໜັກໃຫ້ມັນເຮັດໄດ້ບໍ?
ເຈົ້າຈະໄວ້ວາງໃຈໃຫ້ມັນລາກເມັດເຂົ້າຂອງເຈົ້າ
ແລະ ນໍາມັນມາທີ່ລານຟາດເຂົ້າຂອງເຈົ້າຫລືບໍ່?
“ປີກຂອງນົກກະຈອກເທດພືອອກຢ່າງຊື່ນຊົມຍິນດີ,
ແຕ່ປີກຂອງມັນບໍ່ສາມາດທຽບປຽບ
ກັບປີກ ແລະ ຂົນຂອງນົກກະສາດຳໄດ້.
ມັນວາງໄຂ່ຂອງມັນຢູ່ເທິງພື້ນດິນ
ແລະ ປ່ອຍໃຫ້ໄຂ່ຂອງມັນອຸ່ນຢູ່ໃນດິນຊາຍ,
ໂດຍບໍ່ສົນໃຈວ່າໄຂ່ມັນອາດຈະຖືກຢຽບແຕກ,
ຫລື ສັດປ່າຈະມາຢຽບໄຂ່ຂອງມັນ.
ມັນເຮັດກັບລູກອ່ອນຢ່າງໂຫດຮ້າຍເໝືອນກັບວ່າພວກມັນບໍ່ແມ່ນລູກຂອງຕົນ;
ມັນບໍ່ສົນໃຈວ່າເຫື່ອແຮງຂອງມັນເສຍໄປລ້າໆ,
ເພາະພຣະເຈົ້າບໍ່ໄດ້ໃຫ້ສະຕິປັນຍາແກ່ມັນ
ຫລື ໃຫ້ຄວາມຮູ້ສຶກດີໆແກ່ມັນ.
ແຕ່ເມື່ອມັນພືປີກອອກແລ່ນໄປ,
ມັນຫົວຂວັນໃສ່ມ້າ ແລະ ຄົນທີ່ຂີ່ມ້າ.
“ເຈົ້າໃຫ້ກຳລັງແກ່ມ້າ
ແລະ ໃຫ້ຂົນຍາວທີ່ປົກຄໍຂອງມັນບໍ?
ເຈົ້າເຮັດໃຫ້ມັນກະໂດດເຕັ້ນເໝືອນດັ່ງຕັກແຕນບໍ
ສຽງຫາຍໃຈຂອງມັນບໍ່ເປັນຕາໜ້າຢ້ານບໍ?
ໂບກຕີນຂອງມັນຄວັດພື້ນດິນ, ມັນຊື່ນຊົມຍິນດີໃນກຳລັງຂອງມັນ,
ແລະ ແລ່ນເຂົ້າໄປໃນເດີນຕໍ່ສູ້.
ມັນຫົວຂວັນໃສ່ຄວາມຢ້ານ, ເພາະມັນບໍ່ຢ້ານກົວສິ່ງໃດ;
ມັນບໍ່ແລ່ນໜີຈາກຄົມດາບ.
ລູກທະນູພຸ່ງມາທາງດ້ານຂ້າງ,
ພ້ອມກັບຫອກ ແລະ ແສງທີ່ສ່ອງປະກາຍມາບໆ.
ມັນຄວັດຂີ້ດິນຢ່າງບໍ່ຢຸດບໍ່ເຊົາ;
ເມື່ອສຽງແກດັງຂຶ້ນ ມັນຢືນຢູ່ເສີຍໆບໍ່ໄດ້.
ເມື່ອໄດ້ຍິນສຽງແກມັນກໍຮ້ອງຂຶ້ນ!
ມັນໄດ້ກິ່ນການສູ້ຮົບກັນຈາກບ່ອນໄກ,
ຄືສຽງຮ້ອງຂອງຜູ້ບັນຊາການ ແລະ ສຽງຮ້ອງສູ້ຮົບ.
“ແຫລວບິນຂຶ້ນໄປດ້ວຍປັນຍາຂອງເຈົ້າບໍ
ແລະ ພືປີກຂອງມັນບິນອອກໄປທາງໃຕ້?
ນົກອິນຊີບິນຂຶ້ນໄປໃນທ້ອງຟ້າ ແລະ ສ້າງຮັງຂອງມັນຢູ່ເທິງບ່ອນສູງ
ຕາມຄຳສັ່ງຂອງເຈົ້າບໍ?
ມັນອາໄສຢູ່ເທິງໜ້າຜາ ແລະ ພັກຢູ່ທີ່ນັ້ນໃນຍາມກາງຄືນ;
ຜາສູງເປັນບ່ອນກຳບັງອັນແຂງແກ່ນຂອງມັນ.
ຈາກທີ່ນັ້ນມັນຊອກຫາອາຫານ;
ຕາຂອງມັນເບິ່ງເຫັນເຫຍື່ອຈາກທີ່ໄກ.
ລູກນ້ອຍຂອງມັນດູດກິນເລືອດ,
ແລະ ມີຄົນຖືກຂ້າຢູ່ບ່ອນໃດ ມັນກໍຢູ່ທີ່ນັ້ນ”.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.