Biblica® Open Lao Contemporary Version
ໂຢບ 33
“ແຕ່ບັດນີ້, ໂຢບເອີຍ, ຈົ່ງຕັ້ງໃຈຟັງຖ້ອຍຄໍາຂອງຂ້ອຍໃຫ້ດີ;
ຈົ່ງເອົາໃຈໃສ່ທຸກສິ່ງທີ່ຂ້ອຍຈະເວົ້າ.
ຂ້ອຍພ້ອມແລ້ວທີ່ຈະເປີດປາກເວົ້າ;
ຄຳເວົ້າຂອງຂ້ອຍກໍລໍຖ້າຢູ່ທີ່ປາຍລິ້ນຂອງຂ້ອຍແລ້ວ.
ຄຳເວົ້າຂອງຂ້ອຍມາຈາກໃຈທີ່ທ່ຽງທຳ;
ຮີບສົບຂອງຂ້ອຍເວົ້າໃນສິ່ງທີ່ຂ້ອຍຮູ້ຢ່າງຈິງໃຈ.
ພຣະວິນຍານຂອງພຣະເຈົ້າໄດ້ສ້າງຂ້ອຍຂຶ້ນມາ;
ລົມຫາຍໃຈຂອງອົງຜູ້ມີລິດອໍານາດຍິ່ງໃຫຍ່ໃຫ້ຊີວິດແກ່ຂ້ອຍ.
ສະນັ້ນ ຈົ່ງຕອບຂ້ອຍມາ, ຖ້າເຈົ້າຕອບໄດ້;
ຈົ່ງລຸກຂຶ້ນ ແລະ ໂຕ້ແຍ້ງເລື່ອງຂອງເຈົ້າຕໍ່ໜ້າຂ້ອຍ.
ຂ້ອຍກໍເປັນຄືກັນກັບເຈົ້າທີ່ຢູ່ຕໍ່ໜ້າພຣະເຈົ້າ;
ຂ້ອຍກໍເປັນປ່ຽງດິນໜຽວເຊັ່ນກັນ.
ເຈົ້າບໍ່ຕ້ອງຢ້ານຂ້ອຍ,
ຫລື ຢ້ານວ່າຂ້ອຍຈະຫລິ້ນງານເຈົ້າໜັກ.
“ແຕ່ເຈົ້າໄດ້ເວົ້າໃຫ້ຂ້ອຍໄດ້ຍິນ
ຂ້ອຍໄດ້ຍິນທຸກຄຳທີ່ເຈົ້າເວົ້ານັ້ນ
‘ຂ້ອຍບໍລິສຸດ, ຂ້ອຍບໍ່ໄດ້ເຮັດອັນໃດຜິດ;
ຂ້ອຍເປັນຄົນສະອາດ ແລະ ປາດສະຈາກບາບ.
ເຖິງປານນັ້ນພຣະເຈົ້າກໍພົບຄວາມຜິດຢູ່ໃນຂ້ອຍ;
ພຣະອົງຖືວ່າຂ້ອຍເປັນສັດຕູຂອງພຣະອົງ.
ພຣະອົງມັດຂາຂອງຂ້ອຍດ້ວຍໂສ້;
ພຣະອົງເຝົ້າເບິ່ງທຸກຫົນທາງຂອງຂ້ອຍ’.
“ແຕ່ຂ້ອຍຂໍບອກວ່າ ເຈົ້າຜິດໃນຂໍ້ນີ້,
ເພາະພຣະເຈົ້າຍິ່ງໃຫຍ່ກວ່າມະນຸດໃດໆທັງນັ້ນ.
ເປັນຫຍັງເຈົ້າຈຶ່ງຈົ່ມຕໍ່ພຣະອົງ
ວ່າພຣະອົງບໍ່ຕອບຄໍາເວົ້າຂອງຄົນໃດທັງນັ້ນ?1
ເພາະແມ່ນວ່າພຣະເຈົ້າເວົ້າດ້ວຍວິທີໃດວິທີໜຶ່ງ, ວິທີອື່ນອີກກໍຕາມ
ກໍບໍ່ມີຜູ້ໃດສາມາດຮັບຮູ້ໄດ້.
ໃນຄວາມຝັນ, ໃນນິມິດໃນຕອນກາງຄືນ,
ເມື່ອຄົນນອນຫລັບສະໜິດ
ຂະນະທີ່ພວກເຂົາເຊືອບຫລັບຢູ່ເທິງບ່ອນນອນຂອງຕົນ,
ພຣະອົງອາດຈະເວົ້າໃສ່ຫູຂອງພວກເຂົາ
ແລະ ກ່າວຕັກເຕືອນພວກເຂົາດ້ວຍຄວາມຢ້ານ,
ເພື່ອປ່ຽນພວກເຂົາບໍ່ໃຫ້ເຮັດຜິດ
ແລະ ບໍ່ໃຫ້ຍິ່ງຈອງຫອງ,
ເພື່ອປົກປ້ອງພວກເຂົາຈາກເຫວເລິກ,2
ເພື່ອບໍ່ໃຫ້ຊີວິດຂອງພວກເຂົາພິນາດຈິບຫາຍຈາກຄົມດາບ.3
“ຫລື ບາງຄົນຖືກຕີສອນໂດຍໃຫ້ພວກເຂົານອນຢູ່ເທິງຕຽງດ້ວຍຄວາມເຈັບປວດ
ໃຫ້ພວກເຂົາເຈັບປວດໃນກະດູກຢູ່ເລື້ອຍໆ,
ເຮັດໃຫ້ຮ່າງກາຍຂອງພວກເຂົາເບື່ອອາຫານ.
ແລະ ຈິດໃຈຂອງພວກເຂົາບໍ່ມັກອາຫານອັນແຊບທີ່ສຸດ.
ຮ່າງກາຍຂອງພວກເຂົາຈ່ອຍຜອມ,
ຈົນເຫັນແຕ່ໜັງຫຸ້ມກະດູກຂອງພວກເຂົາ.
ພວກເຂົາເຂົ້າໄປໃກ້ເຫວເລິກ,4
ແລະ ຊີວິດຂອງພວກເຂົາເຂົ້າໃກ້ບັນດາເທວະດາແຫ່ງຄວາມຕາຍ.5
“ແຕ່ຖ້າມີເທວະດາຕົນໜຶ່ງຢູ່ທາງຂ້າງພວກເຂົາ
ຄືເທວະດາຕົນໜຶ່ງໃນພັນຢູ່ຄຽງຂ້າງພວກເຂົາ,
ຖືກສົ່ງມາບອກພວກເຂົາໃຫ້ເປັນຄົນທ່ຽງທໍາ,
ແລະ ລາວກໍເມດຕາຄົນນັ້ນ ແລະ ເວົ້າກັບພຣະເຈົ້າວ່າ,
‘ຂໍໂຜດໄວ້ຊີວິດພວກເຂົາບໍ່ໃຫ້ລົງໄປທີ່ເຫວເລິກ;6
ຂ້ານ້ອຍໄດ້ພົບຄ່າໄຖ່ສຳລັບພວກເຂົາແລ້ວ’
ຂໍໃຫ້ເນື້ອໜັງຂອງພວກເຂົາຈະກັບຟື້ນຄືນສູ່ສະພາບດີເໝືອນດັ່ງເນື້ອໜັງຂອງເດັກນ້ອຍ
ຂໍໃຫ້ກຳລັງວັງຊາຂອງພວກເຂົາໃນໄວໜຸ່ມຄືນມາອີກ
ຈາກນັ້ນ ຄົນນັ້ນກໍສາມາດອະທິຖານຕໍ່ພຣະເຈົ້າ ແລະ ໄດ້ຮັບຄວາມພໍໃຈຈາກພຣະອົງ,
ພວກເຂົາຈະເຫັນໜ້າພຣະເຈົ້າ ແລະ ໂຫ່ຮ້ອງດ້ວຍຄວາມຊື່ນຊົມຍິນດີ;
ພຣະອົງຈະໃຫ້ພວກເຂົາຄືນສູ່ສະພາບດີ.
ແລະ ພວກເຂົາຈະໄປຫາຄົນອື່ນ ແລະ ບອກວ່າ,
‘ຂ້ອຍໄດ້ເຮັດບາບ, ແລະ ໄດ້ບິດເບືອນຄວາມຖືກຕ້ອງ,
ແຕ່ຂ້ອຍກໍບໍ່ໄດ້ຮັບສິ່ງທີ່ຂ້ອຍສົມຄວນຈະໄດ້ຮັບ.
ພຣະເຈົ້າໄດ້ຊ່ວຍຂ້ອຍໄວ້ຈາກການລົງໄປສູ່ເຫວເລິກ,
ແລະ ຂ້ອຍຈະມີຊີວິດຢູ່ຊື່ນຊົມຄວາມສະຫວ່າງແຫ່ງຊີວິດ’.
“ພຣະເຈົ້າເຮັດສິ່ງເຫລົ່ານີ້ຕໍ່ມະນຸດ
ເຖິງສອງຄັ້ງ ຫລື ເຖິງສາມຄັ້ງ
ເພື່ອຊ່ວຍກູ້ພວກເຂົາຈາກເຫວເລິກ,
ໃຫ້ຄວາມສະຫວ່າງແຫ່ງຊີວິດອາດຈະສ່ອງໃສ່ພວກເຂົາ.
“ໂຢບເອີຍ, ຈົ່ງຕັ້ງໃຈຟັງ ແລະ ຈົ່ງຟັງຂ້ອຍສາ;
ຈົ່ງມິດງຽບຢູ່ ແລະ ຂ້ອຍຈະເວົ້າ.
ຖ້າເຈົ້າມີສິ່ງໃດຢາກຈະເວົ້າ, ຈົ່ງຕອບຂ້ອຍ;
ຈົ່ງເວົ້າອອກມາ, ເພາະຂ້ອຍຢາກພິສູດເຈົ້າ.
ແຕ່ຖ້າບໍ່ມີ, ກໍຈົ່ງຟັງຂ້ອຍ;
ຂໍຈົ່ງມິດງຽບຢູ່ ແລະ ຂ້ອຍຈະສອນປັນຍາແກ່ເຈົ້າ”.
Source notes (6)
- Footnote ຫລື ວ່າພຣະອົງບໍ່ອະທິບາຍການກະທຳໃດໆຂອງພຣະອົງ
- Footnote ຫລື ແດນຄົນຕາຍ ຫລື ສົງວົນພວກເຂົາໄວ້ຈາກຂຸມຝັງສົບ ເຊັ່ນດຽວກັບຂໍ້ 28 ແລະ 28 ແລະ 30
- Footnote ຫລື ຈາກການຂ້າມແມ່ນ້ຳນັ້ນ
- Footnote ຫລື ພວກເຂົາສຽດໃກ້ຂຸມຝັງສົບ
- Footnote ຫລື ເຂົ້າໃກ້ຄົນຕາຍ
- Footnote ຫລື ຂຸມຝັງສົບ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.