Biblica® Open Lao Contemporary Version

ໂຢບ 31

“ຂ້ອຍໄດ້ເຮັດຄຳໝັ້ນສັນຍາກັບຕາຂອງຕົນເອງວ່າ

ຈະບໍ່ເບິ່ງຍິງສາວດ້ວຍໃຈຕັນຫາ.

ເພາະອັນໃດຄືສິ່ງທີ່ພຣະເຈົ້າຈາກເບື້ອງເທິງກຳນົດໃຫ້ພວກເຮົາ?

ອັນໃດຄືມໍລະດົກຂອງພວກເຮົາຈາກອົງຜູ້ມີລິດອໍານາດຍິ່ງໃຫຍ່ທີ່ຢູ່ເບື້ອງເທິງ?

ມັນກໍຄືຄວາມພິນາດສຳລັບຄົນຊົ່ວ,

ແລະ ໄພພິບັດສຳລັບພວກທີ່ເຮັດຜິດບໍ່ແມ່ນບໍ?

ພຣະອົງບໍ່ໄດ້ເບິ່ງຫົນທາງຂອງຂ້ອຍ

ແລະ ນັບທຸກບາດກ້າວຂອງຂ້ອຍບໍ?

“ຖ້າຂ້ອຍໄດ້ດຳເນີນຊີວິດໃນຄວາມຜິດ

ຫລື ຕີນຂອງຂ້ອຍຟ້າວແລ່ນໄປສູ່ການຫລອກລວງ

ຂໍພຣະເຈົ້າຊັ່ງຂ້ອຍດ້ວຍຕາຊິງທີ່ສັດຊື່

ແລະ ພຣະອົງຈະຮູ້ວ່າຂ້ອຍບໍ່ມີທີ່ຕຳໜິ

ຖ້າບາດກ້າວຂອງຂ້ອຍໄດ້ຫັນໄປຈາກທາງເດີນ,

ຖ້າຕາຂອງຂ້ອຍພາຈິດໃຈຂອງຕົນມົວເມົາ,

ຫລື ຖ້າມືຂອງຂ້ອຍມີມົນທິນ,

ກໍຂໍໃຫ້ຄົນອື່ນກິນສິ່ງທີ່ຂ້ອຍໄດ້ຫວ່ານ,

ແລະ ຂໍໃຫ້ພືດຜົນຂອງຂ້ອຍຖືກຖອນຮາກ.

“ຖ້າຈິດໃຈຂອງຂ້ອຍໄດ້ຖືກຜູ້ຍິງລໍ້ລວງໄປ,

ຫລື ຖ້າຂ້ອຍຈອບສ່ອງຢູ່ທີ່ປະຕູເພື່ອນບ້ານຂອງຂ້ອຍ,

ກໍຂໍໃຫ້ເມຍຂອງຂ້ອຍໄປໂມ້ແປ້ງໃຫ້ຊາຍຄົນອື່ນ,

ແລະ ຂໍໃຫ້ຊາຍຄົນອື່ນຫລັບນອນກັບນາງ.

ເພາະນັ້ນເປັນຄວາມຊົ່ວຮ້າຍ,

ເປັນບາບທີ່ຕ້ອງຖືກລົງໂທດ.

ມັນເປັນໄຟທີ່ເຜົາຜານໄປສູ່ຄວາມພິນາດ,

ມັນຈະຖອນຮາກສິ່ງທີ່ຂ້ອຍປູກໄວ້.

“ຖ້າຂ້ອຍບໍ່ໃຫ້ຄວາມຍຸຕິທຳແກ່ຄົນຮັບໃຊ້ຂອງຂ້ອຍຄົນໃດ,

ບໍ່ວ່າຊາຍ ຫລື ຍິງ,

ເມື່ອນັ້ນພວກເຂົາກໍມີເລື່ອງມາຕໍ່ສູ້ຂ້ອຍ,

ຂ້ອຍຈະເຮັດຢ່າງໃດເມື່ອຂ້ອຍປະເຊີນໜ້າກັບພຣະເຈົ້າ?

ຂ້ອຍຈະຕອບຢ່າງໃດເມື່ອພຣະອົງເອີ້ນໃຫ້ມາລາຍງານ?

ພຣະເຈົ້າຜູ້ສ້າງຂ້ອຍໄວ້ໃນມົດລູກກໍສ້າງພວກເຂົາດ້ວຍບໍ່ແມ່ນບໍ?

ພຣະເຈົ້າອົງດຽວກັນນີ້ໄດ້ສ້າງພວກເຮົາທັງສອງໃນທ້ອງແມ່ຂອງພວກເຮົາບໍ່ແມ່ນບໍ?

“ຖ້າຂ້ອຍໄດ້ປະຕິເສດຄວາມຕ້ອງການຂອງຄົນທຸກຍາກ

ຫລື ປ່ອຍໃຫ້ຕາຂອງແມ່ໝ້າຍຄ່ອຍໆຫລັບໄປ,

ຖ້າຂ້ອຍເກັບອາຫານໄວ້ໃຫ້ກັບຕົວເອງ,

ບໍ່ຍອມແບ່ງປັນມັນແກ່ລູກກຳພ້າ

ທີ່ຈິງແລ້ວ ຕັ້ງແຕ່ຂ້ອຍຍັງໜຸ່ມນັ້ນ ຂ້ອຍກໍລ້ຽງດູລູກກຳພ້າດັ່ງເປັນພໍ່ຄົນໜຶ່ງ,

ແລະ ຕັ້ງແຕ່ຂ້ອຍເກີດມາກໍນຳທາງໃຫ້ແມ່ໝ້າຍ

ຖ້າຂ້ອຍໄດ້ເຫັນຄົນໃດກຳລັງໜາວໃກ້ຈະຕາຍເພາະບໍ່ມີເຄື່ອງນຸ່ງ,

ຫລື ເຫັນຄົນຂັດສົນບໍ່ມີເຄື່ອງນຸ່ງຫົ່ມ,

ແລ້ວຈິດໃຈຂອງພວກເຂົາບໍ່ໄດ້ອວຍພອນຂ້ອຍ

ເພາະພວກເຂົາອົບອຸ່ນດ້ວຍຂົນແກະຈາກແກະຂອງຂ້ອຍ,

ຖ້າມືຂອງຂ້ອຍໄດ້ຍົກຂຶ້ນທໍາຮ້າຍລູກກຳພ້າ,

ໂດຍຮູ້ວ່າຂ້ອຍມີອິດທິພົນໃນສານ,

ກໍຂໍໃຫ້ແຂນຂອງຂ້ອຍຫລຸດອອກຈາກບ່າ,

ຂໍໃຫ້ມັນຫັກອອກຈາກຂໍ້ຕໍ່,

ເພາະຂ້ອຍຢ້ານກົວການທໍາລາຍຈາກພຣະເຈົ້າ,

ແລະ ເພາະຂ້ອຍຢຳເກງສະຫງ່າລາສີຂອງພຣະອົງ.

ຂ້ອຍຈຶ່ງບໍ່ກ້າເຮັດສິ່ງເຊັ່ນນີ້ໄດ້.

“ຖ້າຂ້ອຍໄດ້ໄວ້ວາງໃຈໃນຄໍາ

ຫລື ເວົ້າກັບຄຳບໍລິສຸດວ່າ, ‘ເຈົ້າເປັນຄວາມປອດໄພຂອງຂ້ອຍ’,

ຖ້າຂ້ອຍຊື່ນຊົມຍິນດີໃນຄວາມຮັ່ງມີອັນມະຫາສານຂອງຂ້ອຍ,

ໃນຊັບສົມບັດທີ່ມືຂອງຂ້ອຍຫາມາໄດ້,

ຖ້າຂ້ອຍເບິ່ງດວງຕາເວັນສ່ອງແສງສະຫວ່າງ

ຫລື ດວງເດືອນທີ່ເຄື່ອນຍ້າຍຢ່າງສະຫງ່າງາມ,

ຈິດໃຈຂອງຂ້ອຍຖືກລໍ້ລວງຢ່າງລັບໆ

ແລະ ຂ້ອຍໄດ້ຈູບມືໃຫ້ຄວາມເຄົາລົບແກ່ສິ່ງເຫລົ່ານັ້ນ,

ສິ່ງເຫລົ່ານີ້ກໍຈະເປັນບາບທີ່ສົມຄວນແກ່ການລົງໂທດ,

ເພາະຂ້ອຍບໍ່ສັດຊື່ຕໍ່ພຣະເຈົ້າທີ່ຢູ່ເບື້ອງເທິງ.

“ຖ້າຂ້ອຍຊົມຊື່ນຍິນດີໃນເຄາະຮ້າຍຂອງສັດຕູ

ຫລື ຍິນດີໃນຄວາມທຸກຮ້ອນທີ່ເກີດຂຶ້ນກັບລາວ

ຂ້ອຍບໍ່ເຄີຍຍອມໃຫ້ປາກຂອງຂ້ອຍເຮັດບາບ

ໂດຍສາບແຊ່ງຊີວິດຂອງພວກເຂົາໃຫ້ມີອັນເປັນໄປ

ຖ້າຄົນໃນຄົວເຮືອນຂອງຂ້ອຍບໍ່ເຄີຍເວົ້າວ່າ,

‘ຜູ້ໃດແດ່ບໍ່ໄດ້ກິນຊີ້ນທີ່ໂຢບເອົາມາຈົນອິ່ມ?’

ແຕ່ບໍ່ມີຄົນແປກໜ້າຈັກຄົນນອນຄ້າງຄືນຢູ່ຕາມຖະໜົນ,

ເພາະປະຕູເຮືອນຂອງຂ້ອຍເປີດຕ້ອນຮັບຜູ້ເດີນທາງຢູ່ສະເໝີ

ຖ້າຂ້ອຍປົກປິດບາບໄວ້ດັ່ງທີ່ຄົນໄດ້ປະຕິບັດ,1

ໂດຍເຊື່ອງຄວາມຜິດຂອງຂ້ອຍໄວ້ໃນຈິດໃຈ

ເພາະຂ້ອຍຢ້ານຝູງຊົນ

ແລະ ຢ້ານຖືກດູຖູກຈາກຕະກຸນຕ່າງໆ

ຂ້ອຍກໍມິດງຽບຢູ່ ແລະ ຈະບໍ່ອອກໄປທາງນອກເຮືອນ

(“ຂ້ອຍຢາກໃຫ້ມີບາງຄົນຟັງຂ້ອຍ!

ບັດນີ້ ຂ້ອຍຂໍລົງຊື່ແກ້ຂໍ້ກ່າວຫາຂອງຂ້ອຍ ຂໍອົງຜູ້ມີລິດອໍານາດຍິ່ງໃຫຍ່ຕອບຂ້ອຍ;

ຂໍໃຫ້ຜູ້ກ່າວຫາຂ້ອຍຂຽນຄໍາກ່າວຫາອອກມາເປັນລາຍລັກອັກສອນ;

ແນ່ນອນ ຂ້ອຍຈະແບກຄຳກ່າວຫານັ້ນໄວ້ເທິງບ່າຂອງຂ້ອຍ,

ຂ້ອຍຈະສວມມັນໄວ້ເໝືອນດັ່ງມົງກຸດ.

ຂ້ອຍຈະເລົ່າໃຫ້ພຣະອົງຟັງທຸກບາດກ້າວຂອງຂ້ອຍ;

ຂ້ອຍຈະບອກເລື່ອງນັ້ນໃຫ້ພຣະອົງຟັງດັ່ງເຂົ້າພົບຜູ້ປົກຄອງຄົນໜຶ່ງ).

“ຖ້າແຜ່ນດິນຂອງຂ້ອຍຮ້ອງກ່າວໂທດຂ້ອຍ

ແລະ ທຸກຮອຍໄຖປຽກຊຸ່ມດ້ວຍນ້ຳຕາ,

ຖ້າຂ້ອຍກິນຜົນຂອງມັນໂດຍບໍ່ຈ່າຍເງິນ

ຫລື ທໍາລາຍຈິດໃຈຂອງຜູ້ທີ່ເຊົ່າ,

ກໍຂໍໃຫ້ກົກໜາມງອກຂຶ້ນແທນເຂົ້າຫວີດ

ແລະ ສັດຕູພືດງອກແທນເຂົ້າບາເລ”

ຄໍາເວົ້າຂອງໂຢບຈົບລົງບ່ອນນີ້.

Source notes (1)

Footnote ຫລື ເໝືອນທີ່ອາດາມໄດ້ປະຕິບັດ

Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.