Biblica® Open Lao Contemporary Version
ໂຢບ 30
“ແຕ່ດຽວນີ້ພວກເຂົາເຢາະເຢີ້ຍຂ້ອຍ,
ພວກຜູ້ຊາຍທີ່ໜຸ່ມກວ່າຂ້ອຍ,
ເຊິ່ງພໍ່ຂອງພວກເຂົາກໍຍັງດູຖູກຂ້ອຍ
ບໍ່ໃຫ້ຢູ່ກັບໝາລ້ຽງແກະຂອງຂ້ອຍ.
ມືທີ່ເຕັມໄປດ້ວຍກໍາລັງຂອງພວກເຂົາມີປະໂຫຍດອັນໃດສຳລັບຂ້ອຍ,
ໃນເມື່ອກຳລັງຂອງພວກເຂົາໄດ້ຫາຍໄປຈາກພວກເຂົາແລ້ວ?
ພວກເຂົາຈ່ອຍຜອມເພາະຄວາມອົດຢາກ ແລະ ຄວາມຫິວໂຫຍ,
ພວກເຂົາພະເນຈອນໄປໃນດິນແດນທີ່ແຕກແຫງ
ຄືໃນຖິ່ນແຫ້ງແລ້ງກັນດານທີ່ເປົ່າປ່ຽວໃນຕອນກາງຄືນ.
ພວກເຂົາເກັບສະໝຸນໄພຕາມພຸ່ມໄມ້,
ແລະ ເກັບຮາກຕົ້ນຊາກມາເປັນອາຫານຂອງພວກເຂົາ.1
ພວກເຂົາຖືກຂັບໄລ່ອອກຈາກສັງຄົມມະນຸດ,
ຄົນຮ້ອງໃສ່ພວກເຂົາຄືກັບວ່າພວກເຂົາເປັນພວກໂຈນ.
ພວກເຂົາຖືກບັງຄັບໃຫ້ອາໄສຢູ່ຕາມແມ່ນ້ຳທີ່ແຫ້ງ,
ຕາມຫລືບຫີນ ແລະ ຕາມຫລຸມຢູ່ໃນພື້ນດິນ.
ພວກເຂົາສົ່ງສຽງຮ້ອງຢູ່ກາງພຸ່ມໄມ້
ແລະ ໝູບຢູ່ກ້ອງຕົ້ນໄມ້ໃຫຍ່.
ພວກເຂົາເປັນຄົນຊົ່ວຊ້າ ແລະ ບໍ່ມີຊື່ສຽງ,
ພວກເຂົາຖືກຂັບໄລ່ອອກຈາກແຜ່ນດິນ.
“ແລະ ບັດນີ້ຄົນໜຸ່ມຂອງພວກເຂົາຮ້ອງເພງເຢາະເຢີ້ຍຂ້ອຍ;
ຂ້ອຍຖືກຢຽດຢາມໃນທ່າມກາງພວກເຂົາ.
ພວກເຂົາກຽດຊັງຂ້ອຍ ແລະ ຢືນຢູ່ຫ່າງໆຂ້ອຍ;
ພວກເຂົາຖົ່ມນ້ຳລາຍໃສ່ໜ້າຂ້ອຍຢ່າງບໍ່ລັ່ງເລ.
ບັດນີ້ພຣະເຈົ້າປົດທະນູຂອງຂ້ອຍ ແລະ ເຮັດໃຫ້ຂ້ອຍທຸກທໍລະມານ,
ພວກເຂົາບໍ່ມີຄວາມເກງໃຈຕໍ່ໜ້າຂ້ອຍ.
ຂ້ອຍຖືກພວກເຂົາ2ໂຈມຕີເຂົ້າມາທາງດ້ານຂວາ;
ພວກເຂົາວາງບ້ວງແຮ້ວໃສ່ຕີນຂອງຂ້ອຍ,
ພວກເຂົາສ້າງເຄື່ອງປ້ອງກັນລ້ອມຕໍ່ສູ້ຂ້ອຍ.
ພວກເຂົາມ້າງທາງໜີຂອງຂ້ອຍ;
ພວກເຂົາທໍາລາຍຂ້ອຍໄດ້ສໍາເລັດ.
ພວກເຂົາເວົ້າວ່າ, ‘ບໍ່ມີຜູ້ໃດຊ່ວຍລາວໄດ້ເລີຍ’.3
ພວກເຂົາຍ່າງເຂົ້າໄປຜ່ານຊ່ອງຫວ່າງ;
ພວກເຂົາຍ່າງບຸກເຂົ້າໄປກາງຊາກຫັກເພພັງ.
ຄວາມຢ້ານປົກຄຸມຂ້ອຍ;
ກຽດສັກສີຂອງຂ້ອຍຖືກພັດໄປດັ່ງຖືກລົມພັດ,
ຄວາມປອດໄພຂອງຂ້ອຍຫາຍໄປດັ່ງເມກ.
“ແລະ ບັດນີ້ ຊີວິດຂອງຂ້ອຍຕົກຕ່ຳລົງ;
ວັນອັນທຸກທໍລະມານເກາະຂ້ອຍໄວ້.
ກາງຄືນສຽບແທງກະດູກຂອງຂ້ອຍ;
ຄວາມເຈັບປວດກັດກິນຂ້ອຍຢູ່ບໍ່ເຊົາ.
ໂດຍລິດອຳນາດອັນຍິ່ງໃຫຍ່ຂອງພຣະອົງ ພຣະເຈົ້າກາຍເປັນເຄື່ອງນຸ່ງ;4
ພຣະອົງມັດຂ້ອຍເໝືອນດັ່ງຈັບຄໍເສື້ອຂ້ອຍຂອງໄວ້ຍົກຂຶ້ນ;
ພຣະອົງໂຍນຂ້ອຍລົງໃນຂີ້ຕົມ,
ແລະ ຂ້ອຍກາຍເປັນເໝືອນຂີ້ຝຸ່ນ ແລະ ຂີ້ເຖົ່າ.
“ຂ້າແດ່ພຣະເຈົ້າ, ຂ້ານ້ອຍຮ້ອງຫາພຣະອົງ, ແຕ່ພຣະອົງບໍ່ຕອບ;
ຂ້ານ້ອຍຢືນຂຶ້ນ, ພຣະອົງມີແຕ່ແນມເບິ່ງຂ້ານ້ອຍເທົ່ານັ້ນ.
ພຣະອົງເຮັດກັບຕໍ່ຂ້ານ້ອຍຢ່າງໂຫດຮ້າຍ;
ພຣະອົງໂຈມຕີຂ້ານ້ອຍດ້ວຍມືອັນມີລິດຂອງພຣະອົງ.
ພຣະອົງຍົກຂ້ານ້ອຍຂຶ້ນ ແລະ ໃຫ້ລົມພັດຂ້ານ້ອຍໄປ;
ພຣະອົງໂຍນຂ້ານ້ອຍເຂົ້າໄປໃນພະຍຸ.
ຂ້ານ້ອຍຮູ້ວ່າພຣະອົງຈະນຳຂ້ານ້ອຍລົງໄປສູ່ຄວາມຕາຍ,
ໄປສູ່ບ່ອນທີ່ກຳນົດໄວ້ສຳລັບທຸກສິ່ງທີ່ມີຊີວິດ.
“ແນ່ນອນ ບໍ່ມີຜູ້ໃດຍື່ນມືເຂົ້າມາຊ່ວຍຄົນທີ່ແຕກສະຫລາຍ
ເມື່ອລາວຮ້ອງຂໍຄວາມຊ່ວຍເຫລືອໃນຍາມທີ່ລາວທຸກຍາກລຳບາກ.
ຂ້ອຍບໍ່ໄດ້ຮ້ອງໄຫ້ເພື່ອຄົນທີ່ຢູ່ໃນຄວາມຍາກລໍາບາກບໍ?
ຈິດວິນຍານຂອງຂ້ອຍບໍ່ໄດ້ໂສກເສົ້າເພື່ອຄົນທຸກຍາກບໍ?
ແຕ່ເມື່ອຂ້ອຍຄາດຫວັງສິ່ງທີ່ດີ, ສິ່ງທີ່ຊົ່ວຮ້າຍກໍເກີດຂຶ້ນ;
ເມື່ອຂ້ອຍຊອກຫາຄວາມສະຫວ່າງຄວາມມືດມົນກໍເຂົ້າມາ.
ຈິດໃຈຂອງຂ້ອຍປັ່ນປ່ວນຢູ່ພາຍໃນບໍ່ຢຸດເຊົາ;
ຂ້ອຍປະເຊີນໜ້າກັບວັນແຫ່ງຄວາມທຸກທໍລະມານ.
ຜິວຂ້ອຍດໍາຄ້ຳ, ແຕ່ບໍ່ແມ່ນເພາະແສງແດດ;
ຂ້ອຍຢືນຂຶ້ນໃນບ່ອນຊຸມນຸມ ແລະ ຮ້ອງຂໍຄວາມຊ່ວຍເຫລືອ.
ຂ້ອຍກາຍເປັນອ້າຍນ້ອງກັບຝູງໝາໄນ,
ແລະ ເປັນໝູ່ເພື່ອນກັບນົກເຄົ້າ.
ຜິວໜັງຂອງຂ້ອຍດຳໄໝ້ ແລະ ລອກອອກ;
ຮ່າງກາຍຂອງຂ້ອຍຮ້ອນດ້ວຍໄຂ້.
ສຽງພິນຂອງຂ້ອຍກໍກາຍເປັນສຽງຄວນຄາງ,
ແລະ ສຽງປີ່ຂອງຂ້ອຍກາຍເປັນສຽງຮ້ອງໄຫ້.
Source notes (4)
- Footnote ຫລື ເຊື້ອເພີງ
- Footnote ຫລື ເຜົ່ານັ້ນ ໃນພາສາເຮັບເຣີຄຳນີ້ມີຄວາມຫມາຍບໍ່ຊັດເຈນ
- Footnote ຫລື ແລະ ທຳລາຍລ້າງຂ້າ ໂດຍບໍ່ຕ້ອງມີຜູ້ໃດຊ່ວຍພວກພວກເຂົາ
- Footnote ພາສາເຮັບເຣີ ສະບັບ ເຊັບຕູອາຈິນ ອຳນາດ ພຣະອົງດຶງເຄື່ອງນຸ່ງຂອງຂ້ອຍອອກ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.