Biblica® Open Lao Contemporary Version
ໂຢບ 3
ຄຳເວົ້າຂອງໂຢບ
ຕໍ່ມາ, ໂຢບອ້າປາກຂອງຕົນ ແລະ ສາບແຊ່ງມື້ທີ່ຕົນເກີດມາ. ໂຢບເວົ້າວ່າ:
“ຂໍໃຫ້ວັນທີ່ຂ້ານ້ອຍເກີດມານັ້ນພິນາດໄປ,
ແລະ ຄືນທີ່ພວກເຂົາເວົ້າກັນວ່າ ‘ເດັກຊາຍຄົນໜຶ່ງເກີດມາ ຈົ່ງຈິບຫາຍໄປສາ!’
ຂໍໃຫ້ວັນນັ້ນກັບກາຍເປັນຄວາມມືດ;
ຂໍພຣະເຈົ້າເບື້ອງເທິງຢ່າສົນໃຈກັບວັນນັ້ນ;
ຂໍຢ່າໃຫ້ມີແສງສະຫວ່າງສ່ອງໃນວັນນັ້ນ;
ຂໍໃຫ້ຄວາມໂສກເສົ້າ ແລະ ຄວາມມືດມິດ1ປົກຄຸມມັນໄວ້;
ຂໍໃຫ້ເມກປົກຄຸມມັນ.
ຂໍໃຫ້ຄວາມມືດບັງແສງສະຫວ່າງຂອງວັນນັ້ນ.
ໃນຄືນນັ້ນ ຂໍໃຫ້ຄວາມມືດຕຶບປົກຄຸມກາງຄືນທີ່ຂ້ານ້ອຍໄດ້ເກີດມານັ້ນ;
ຂໍໃຫ້ຢ່ານັບວັນນັ້ນທ່າມກາງວັນຕ່າງໆຂອງປີ
ຫລື ຢ່ານັບມັນເຂົ້າໃນເດືອນໃດໆອີກເລີຍ.
ຂໍໃຫ້ຄືນນັ້ນເປັນໝັນ;
ຢ່າໃຫ້ໄດ້ຍິນສຽງໂຫ່ຮ້ອງຍິນດີ.
ຂໍໃຫ້ບັນດາຄົນທີ່ສາບແຊ່ງຈົ່ງສາບແຊ່ງວັນນັ້ນ,2
ຜູ້ທີ່ພ້ອມຈະປຸກເອີ້ນເລວີອາທັນ3ຂຶ້ນມາ.
ຂໍໃຫ້ດາວອາລຸນໃນເຊົ້ານັ້ນດັບແສງໄປ;
ຂໍໃຫ້ມັນລໍຖ້າແສງສະຫວ່າງໂດຍບໍ່ມີປະໂຫຍດ
ແລະ ບໍ່ເຫັນແສງຕາເວັນຂຶ້ນທໍາອິດ,
ເພາະມັນບໍ່ໄດ້ປິດປາກມົດລູກໃສ່ຂ້ານ້ອຍ
ເພື່ອເຊື່ອງຄວາມເດືອດຮ້ອນຈາກຕາຂອງຂ້ານ້ອຍ.
“ເປັນຫຍັງຂ້ານ້ອຍຈຶ່ງບໍ່ຕາຍຕັ້ງແຕ່ເກີດມາ,
ແລະ ຕາຍໄປຂະນະທີ່ຂ້ອຍອອກມາຈາກທ້ອງ?
ເປັນຫຍັງຈຶ່ງມີຕັກທີ່ຮອງຮັບຂ້ານ້ອຍໄວ້
ແລະ ມີເອິກທີ່ລ້ຽງດູຂ້ານ້ອຍ?
ບັດນີ້ຂ້ານ້ອຍຈະນອນລົງຢ່າງສະຫງົບ;
ຂ້ານ້ອຍຈະນອນຫລັບ ແລະ ພັກຜ່ອນຢູ່
ກັບບັນດາກະສັດ ແລະ ຜູ້ນໍາຂອງໂລກ,
ຜູ້ສ້າງສະຖານທີ່ສຳລັບຕົນ ເຊິ່ງບັດນີ້ຫັກພັງ,
ກັບບັນດາເຈົ້ານາຍທີ່ມີຄໍາ,
ຄືຜູ້ທີ່ເຕີມເຕັມເຮືອນຂອງພວກເຂົາດ້ວຍເງິນ.
ຫລື ເປັນຫຍັງຂ້ານ້ອຍຈຶ່ງບໍ່ຖືກເຊື່ອງໄວ້ໃນດິນເໝືອນເດັກນ້ອຍທີ່ຫາເກີດແລ້ວກໍຕາຍໄປ,
ເປັນດັ່ງເດັກນ້ອຍທີ່ບໍ່ເຄີຍເຫັນແສງສະຫວ່າງໃນຕອນກາງເວັນ?
ຢູ່ທີ່ນັ້ນຄົນຊົ່ວຮ້າຍຢຸດວຸ້ນວາຍ,
ແລະ ຄົນທີ່ອິດເມື່ອຍໄດ້ພັກສະຫງົບ.
ຊະເລີຍຢູ່ຢ່າງສະບາຍ;
ພວກເຂົາບໍ່ໄດ້ຍິນສຽງຮ້ອງໃສ່ຈາກເຈົ້ານາຍອີກ.
ຜູ້ຕໍ່າຕ້ອຍທີ່ສຸດ ແລະ ຜູ້ໃຫຍ່ທີ່ສຸດກໍຢູ່ທີ່ນັ້ນ,
ແລະ ພວກຂ້າທາດກໍເປັນອິດສະຫລະຈາກເຈົ້ານາຍຂອງຕົນ.
“ເປັນຫຍັງຈຶ່ງຍັງໃຫ້ແສງສະຫວ່າງແກ່ຜູ້ທີ່ທຸກລຳບາກ,
ແລະ ໃຫ້ຊີວິດແກ່ຜູ້ທີ່ມີຈິດວິນຍານທີ່ຂົມຂື່ນ,
ໃຫ້ຜູ້ທີ່ຫິວກະຫາຍຫາຄວາມຕາຍແຕ່ບໍ່ພົບ,
ຜູ້ທີ່ຊອກຫາມັນຫລາຍກວ່າຊອກຫາຂຸມຊັບທີ່ຖືກເຊື່ອງໄວ້,
ຜູ້ເຕັມໄປດ້ວຍຄວາມຍິນດີ
ແລະ ຊື່ນຊົມຍິນດີເມື່ອພວກເຂົາໄດ້ໄປເຖິງຂຸມຝັງສົບ?
ເປັນຫຍັງຈຶ່ງໃຫ້ຊີວິດກັບຄົນໜຶ່ງ
ທີ່ທາງຂອງລາວຖືກເຊື່ອງໄວ້,
ຜູ້ທີ່ພຣະເຈົ້າໄດ້ລ້ອມທາງເອົາໄວ້?
ເພາະການຖອນຫາຍໃຈໄດ້ກາຍເປັນອາຫານປະຈໍາວັນຂອງຂ້ານ້ອຍ;
ສຽງຄວນຄາງຂອງຂ້ານ້ອຍອອກມາເໝືອນນ້ຳ,
ສິ່ງທີ່ຂ້ານ້ອຍຢ້ານໄດ້ມາເຖິງຂ້ານ້ອຍ;
ສິ່ງທີ່ຂ້ານ້ອຍຢ້ານກົວຫລາຍໄດ້ເກີດຂຶ້ນກັບຂ້ານ້ອຍ;
ຂ້ານ້ອຍບໍ່ມີສັນຕິສຸກ, ບໍ່ມີຄວາມສະຫງົບ;
ຂ້ານ້ອຍບໍ່ໄດ້ພັກຜ່ອນ, ມີແຕ່ຄວາມວຸ້ນວາຍເທົ່ານັ້ນ”.
Source notes (3)
- Footnote ຫລື ແລະ ເງົາແຫ່ງຄວາມຕາຍ
- Footnote ຫລື ສາບແຊ່ງທະເລ
- Footnote ຄື ສັດທະເລຂະໜາດໃຫຍ່
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.