Biblica® Open Lao Contemporary Version
ໂຢບ 22
ເອລີຟັດ
ແລ້ວເອລີຟັດຊາວເຕມານໄດ້ຕອບວ່າ:
“ມະນຸດຈະເປັນປະໂຫຍດອັນໃດຕໍ່ພຣະເຈົ້າໄດ້?
ແມ່ນແຕ່ຄົນສະຫລາດກໍຈະເຮັດປະໂຫຍດອັນໃດສຳລັບພຣະອົງໄດ້?
ຖ້າເຈົ້າເປັນຄົນຊອບທຳຈະເຮັດຫຍັງໃຫ້ອົງຜູ້ມີລິດອໍານາດຍິ່ງໃຫຍ່ພໍໃຈໄດ້ແດ່?
ພຣະອົງຈະໄດ້ຮັບປະໂຫຍດອັນໃດຖ້າວິຖີທາງຂອງເຈົ້າບໍ່ມີຕໍາໜິ?
“ເປັນຍ້ອນຄວາມຢຳເກງຂອງເຈົ້າບໍ ພຣະອົງຈຶ່ງຕຳໜິເຈົ້າ
ແລະ ນໍາຂໍ້ກ່າວຫາມາຕໍ່ສູ້ເຈົ້າ?
ບໍ່ແມ່ນຍ້ອນຄວາມຊົ່ວຮ້າຍອັນໃຫຍ່ບໍ?
ບໍ່ແມ່ນຍ້ອນການບາບທີ່ບໍ່ສິ້ນສຸດຂອງເຈົ້າບໍ?
ເຈົ້າໄດ້ຮຽກຮ້ອງເຄື່ອງຄ້ຳປະກັນຈາກພີ່ນ້ອງຂອງເຈົ້າໂດຍບໍ່ມີເຫດຜົນ;
ເຈົ້າໄດ້ຢຶດເອົາເຄື່ອງນຸ່ງຂອງພວກເຂົາຈົນໝົດ, ປ່ອຍໃຫ້ພວກເຂົາເປືອຍກາຍ.
ເຈົ້າບໍ່ໄດ້ໃຫ້ນ້ຳແກ່ຜູ້ທີ່ອິດເມື່ອຍ
ແລະ ບໍ່ແບ່ງປັນອາຫານແກ່ຜູ້ອຶດຢາກ,
ເຖິງແມ່ນວ່າເຈົ້າເປັນຄົນມີອິດທິພົນ, ເປັນເຈົ້າຂອງທີ່ດິນ
ເປັນຄົນທີ່ມີກຽດທີ່ອາໄສໃນບ່ອນນັ້ນ.
ແລະ ເຈົ້າໄດ້ຂັບໄລ່ແມ່ໝ້າຍອອກໄປໂດຍມືເປົ່າ.
ແລະ ຕັດກຳລັງຂອງລູກກຳພ້າ.
ດ້ວຍເຫດນີ້ຈຶ່ງມີບ້ວງແຮ້ວຢູ່ອ້ອມຮອບເຈົ້າ,
ຈຶ່ງມີອັນຕະລາຍເກີດຂຶ້ນທັນທີທີ່ເຮັດໃຫ້ເຈົ້າຢ້ານກົວ,
ດັ່ງນັ້ນ ຄວາມມືດມົນເຮັດໃຫ້ເຈົ້າເບິ່ງບໍ່ເຫັນ,
ແລະ ກະແສນ້ຳຖ້ວມຈຶ່ງພັດໃສ່ເຈົ້າ.
“ພຣະເຈົ້າບໍ່ໄດ້ຢູ່ບ່ອນສູງແຫ່ງຟ້າສະຫວັນບໍ?
ແລະ ຈົ່ງແນມເບິ່ງໝູ່ດາວເບື້ອງເທິງຢູ່ສູງສໍ່າໃດ!
ແຕ່ເຈົ້າກໍເວົ້າວ່າ, ‘ພຣະເຈົ້າຮູ້ຫຍັງແດ່?
ພຣະອົງຈະພິພາກສາຜ່ານຄວາມມືດໜາເຊັ່ນນີ້ໄດ້ບໍ?
ເພາະເມກໜາບັງພຣະອົງໄວ້, ດັ່ງນັ້ນ ພຣະອົງຈຶ່ງບໍ່ເຫັນພວກເຮົາ
ເມື່ອພຣະອົງໄປມາໃນແຜ່ນຟ້າກວ້າງ’.
ເຈົ້າຍັງຈະຍ່າງໄປຕາມທາງເກົ່າ
ທີ່ຄົນຊົ່ວຮ້າຍໄດ້ຢຽບຢ່ຳນັ້ນຢູ່ບໍ?
ພວກເຂົາຕາຍໄປກ່ອນເວລາຂອງພວກເຂົາ,
ຮາກຖານຂອງພວກເຂົາຖືກກວາດລ້າງໄປໂດຍນໍ້າຖ້ວມ.
ພວກເຂົາເວົ້າກັບພຣະເຈົ້າວ່າ ‘ຢ່າມາຫຍຸ້ງກັບພວກເຮົາ!
ອົງຜູ້ມີອໍານາດຍິ່ງໃຫຍ່ຈະເຮັດຫຍັງໃຫ້ກັບພວກເຮົາໄດ້?’
ແຕ່ແມ່ນພຣະເຈົ້າທີ່ເຮັດໃຫ້ເຮືອນຂອງພວກເຂົາເຕັມໄປດ້ວຍສິ່ງຂອງດີໆ,
ສະນັ້ນ ຂ້ອຍຈຶ່ງຢືນຢູ່ຫ່າງຈາກແຜນການຂອງຄົນຊົ່ວຮ້າຍ.
“ບັນດາຄົນຊອບທຳເຫັນຄວາມຈິບຫາຍຂອງພວກເຂົາ ແລະ ກໍຊື່ນຊົມຍິນດີ;
ຜູ້ບໍລິສຸດເຢາະເຢີ້ຍພວກເຂົາໂດຍກ່າວວ່າ,
‘ສັດຕູຂອງພວກເຮົາຈະຖືກທຳລາຍຢ່າງແນ່ນອນ,
ແລະ ໄຟກໍເຜົາຜານຊັບສົມບັດຂອງພວກເຂົາ’.
“ຈົ່ງຍອມຈຳນົນຕໍ່ພຣະເຈົ້າເທາະ ແລະ ຢູ່ຢ່າງສະຫງົບສຸກກັບພຣະອົງ;
ດ້ວຍວິທີນີ້ຄວາມຈະເລີນຮຸ່ງເຮືອງຈະມາເຖິງເຈົ້າ.
ຈົ່ງຍອມຮັບເອົາຄຳສັ່ງສອນຈາກປາກຂອງພຣະອົງ
ແລະ ເກັບຖ້ອຍຄໍາຂອງພຣະອົງໄວ້ໃນຫົວໃຈຂອງເຈົ້າ.
ຖ້າເຈົ້າກັບຄືນມາຫາອົງຜູ້ມີລິດອໍານາດຍິ່ງໃຫຍ່, ເຈົ້າກໍຈະຄືນສູ່ສະພາບດີ:
ຖ້າເຈົ້າກຳຈັດຄວາມຊົ່ວຮ້າຍໃຫ້ຫ່າງໄກຈາກເຕັນຂອງເຈົ້າ
ຖ້າເຈົ້າປະຖິ້ມຄຳຂອງເຈົ້າໄວ້ໃນຂີ້ຝຸ່ນດິນ,
ແລະ ຖິ້ມຄຳແຫ່ງໂອຟີຂອງເຈົ້າລົງໃສ່ໂງ່ນຫີນໃນຮ່ອມພູເລິກ,
ແລ້ວອົງຜູ້ມີລິດອໍານາດຍິ່ງໃຫຍ່ຈະເປັນຄຳຂອງເຈົ້າ,
ເປັນເງິນຊັ້ນດີສໍາລັບເຈົ້າ.
ແນ່ນອນວ່າເຈົ້າຈະຊົມຊື່ນຍິນດີໃນອົງຜູ້ມີລິດອໍານາດຍິ່ງໃຫຍ່
ແລະ ຈະເງີຍໜ້າຂອງເຈົ້າຂຶ້ນຫາພຣະເຈົ້າ.
ເຈົ້າຈະອະທິຖານຕໍ່ພຣະອົງ ແລະ ພຣະອົງຈະຟັງເຈົ້າ,
ແລະ ເຈົ້າຈະເຮັດຕາມຄຳປະຕິຍານຂອງເຈົ້າທີ່ໄດ້ເຮັດໄວ້.
ສິ່ງທີ່ເຈົ້າຕັດສິນໃຈຈະສຳເລັດຜົນ,
ແລະ ແສງສະຫວ່າງຈະສ່ອງໃສ່ທາງຂອງເຈົ້າ.
ເມື່ອມີຄົນຖືກເຮັດໃຫ້ຕົກຕ່ຳລົງ ແລະ ເຈົ້າກໍເວົ້າວ່າ, ‘ຂໍໂຜດຍົກຊູພວກເຂົາຂຶ້ນ!’
ແລ້ວພຣະອົງກໍຈະຊ່ວຍກູ້ຄົນທີ່ຕົກຕໍ່າໃຫ້ພົ້ນ.
ພຣະອົງຈະກອບກູ້ແມ່ນແຕ່ຜູ້ບໍ່ມີຄວາມຜິດ,
ຜູ້ນັ້ນຈະໄດ້ຮັບການຊ່ວຍກູ້ຜ່ານມືທີ່ບໍລິສຸດຂອງເຈົ້າ”.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.