Biblica® Open Lao Contemporary Version
ໂຢບ 20
ໂຊພາ
ແລ້ວໂຊພາຊາວນາອາມາໄດ້ຕອບວ່າ:
“ຄວາມລໍາບາກໃຈຂອງຂ້ອຍເຮັດໃຫ້ຂ້ອຍຕ້ອງຮີບຕອບ
ເພາະຂ້ອຍຖືກລົບກວນຫລາຍ.
ຂ້ອຍໄດ້ຍິນຄຳຕິຕຽນທີ່ເຮັດໃຫ້ຂ້ອຍເສຍກຽດ,
ແລະ ຄວາມເຂົ້າໃຈຂອງຂ້ອຍດົນໃຈໃຫ້ຂ້ອຍຕອບ.
“ແນ່ນອນ ເຈົ້າຮູ້ວ່າມັນເປັນມາແນວໃດຕັ້ງແຕ່ສະໄໜເດີມນັ້ນ,
ຕັ້ງແຕ່ມະນຸດ1ຖືກວາງໄວ້ເທິງຢູ່ແຜ່ນດິນໂລກ,
ຄືຄວາມສະໜຸກຂອງຄົນຊົ່ວຮ້າຍນັ້ນສັ້ນ,
ຄວາມຊື່ນຊົມຍິນດີຂອງຄົນທີ່ບໍ່ນັບຖືພຣະເຈົ້ານັ້ນຄົງຢູ່ພຽງແຕ່ຊົ່ວຄາວ.
ແມ່ນວ່າຄວາມໂອ້ອວດຂອງລາວຈະຂຶ້ນໄປເຖິງຟ້າສະຫວັນ
ແລະ ຫົວຂອງລາວຈຸເມກ,
ລາວຈະພິນາດຈິບຫາຍຕະຫລອດໄປດັ່ງອາຈົມຂອງລາວເອງ;
ຜູ້ທີ່ເຄີຍເຫັນລາວຈະເວົ້າວ່າ, ‘ລາວໄປໃສແລ້ວ?’
ລາວຫາຍໄປເໝືອນດັ່ງຄວາມຝັນ, ບໍ່ມີຜູ້ໃດພົບເຫັນອີກ,
ລາວຖືກກຳຈັດໄປດັ່ງນິມິດໃນຕອນກາງຄືນ.
ຕາທີ່ໄດ້ເຫັນລາວຈະບໍ່ເຫັນລາວອີກ;
ບ່ອນຢູ່ຂອງລາວຈະບໍ່ເຫັນລາວອີກ.
ລູກຫລານຂອງລາວຈະຕ້ອງຊົດໃຊ້ໃຫ້ຄົນທຸກຍາກ;
ມືຂອງລາວເອງຕ້ອງຄືນຊັບສົມບັດຂອງຕົນ.
ກຳລັງແຫ່ງໄວໜຸ່ມທີ່ເຕັມຢູ່ໃນກະດູກຂອງລາວ
ຈະນອນລົງກັບລາວໃນຂີ້ຝຸ່ນດິນ.
“ແມ່ນແຕ່ຄວາມຊົ່ວຮ້າຍກໍຫວານຢູ່ໃນປາກຂອງລາວ
ແລະ ລາວເຊື່ອງມັນໄວ້ກ້ອງລີ້ນຂອງລາວ,
ແມ່ນວ່າລາວອົດທົນບໍ່ໄດ້ທີ່ຈະປ່ອຍມັນໄປ
ແລະ ມັນຍັງຢູ່ໃນປາກຂອງລາວ,
ແຕ່ອາຫານຂອງລາວຈະບູດສົ້ມໃນທ້ອງຂອງລາວ;
ມັນກາຍເປັນເໝືອນພິດຂອງງູໃນໂຕລາວ.
ລາວຈະຄາຍຊັບສົມບັດທີ່ລາວກືນລົງໄປອອກມາ;
ພຣະເຈົ້າຈະເຮັດໃຫ້ທ້ອງຂອງລາວຮາກມັນອອກມາ.
ລາວຈະດູດພິດຂອງງູພິດ;
ແລະ ແຂ້ວຂອງມັນຈະຂ້າລາວ.
ລາວຈະບໍ່ໄດ້ຊິມນ້ຳເຜິ້ງ ແລະ ນ້ຳນົມ,
ທີ່ໄຫລເໝືອນແມ່ນ້ຳລຳທານ,
ລາວຕ້ອງສົ່ງຄືນສິ່ງທີ່ເຮັດມາດ້ວຍຄວາມລຳບາກທີ່ລາວຍັງບໍ່ໄດ້ກິນ;
ລາວຈະບໍ່ໄດ້ຊື່ນຊົມຜົນກຳໄລໃດໆຈາກການຄ້າຂອງລາວ.
ເພາະລາວໄດ້ກົດຂີ່ຄົນທຸກຍາກ ແລະ ປ່ອຍໃຫ້ພວກເຂົາຂັດສົນ;
ລາວໄດ້ຢຶດເຮືອນທີ່ລາວບໍ່ໄດ້ປຸກສ້າງ.
“ແນ່ນອນ ລາວຈະບໍ່ວັນພໍຈາກຄວາມໂລບຂອງລາວຈັກເທື່ອ;
ລາວບໍ່ສາມາດຊ່ວຍຊີວິດຂອງຕົນເອງໄດ້ໂດຍຊັບສົມບັດຂອງລາວ.
ບໍ່ມີອັນໃດເຫລືອໃຫ້ລາວກືນກິນອີກ;
ຄວາມຮັ່ງມີຂອງລາວຈະບໍ່ໝັ້ນຄົງ.
ໃນຂະນະທີ່ລາວມີທຸກສິ່ງ, ຄວາມທຸກລຳບາກຈະປົກຄຸມລາວ;
ຄວາມລໍາບາກຢ່າງຫລວງຫລາຍຈະຕົກໃສ່ລາວ.
ເມື່ອລາວໄດ້ກິນຈົນເຕັມທ້ອງ,
ພຣະເຈົ້າຈະລະບາຍຄວາມໂກດຮ້າຍເຜົາຜານລາວ
ແລະ ສົ່ງຫ່າຝົນລົງມາໃສ່ລາວ.
ແມ່ນວ່າລາວຈະຫລົບໜີໄປຈາກອາວຸດເຫລັກ,
ລູກທະນູທອງສຳລິດຈະແທງລາວ.
ລາວຈະດຶງລູກທະນູອອກຈາກຫລັງ,
ດຶງປາຍລູກທະນູອັນແຫລມຄົມອອກຈາກຕັບຂອງລາວ.
ຄວາມຢ້ານກົວຈະເກີດຂຶ້ນກັບລາວ;
ຊັບສົມບັດຂອງລາວກໍຈະຫາຍໄປໃນຄວາມມືດ.
ໄຟບໍ່ມີວັນມອດຈະເຜົາຜານລາວ
ແລະ ທຳລາຍທຸກສິ່ງທີ່ເຫລືອຢູ່ໃນເຕັນຂອງລາວ
ຟ້າສະຫວັນຈະເປີດເຜີຍຄວາມຜິດຂອງລາວ;
ແຜ່ນດິນໂລກຈະລຸກຂຶ້ນຕໍ່ສູ້ລາວ.
ນໍ້າຖ້ວມຈະພັດເອົາເຮືອນຂອງລາວໄປ,
ນໍ້າໄຫລຖ້ວມແຮງ2ໃນວັນແຫ່ງຄວາມໂກດຮ້າຍຂອງພຣະເຈົ້າ.
ນີ້ຄືຊະຕາກຳທີ່ພຣະເຈົ້າກຳນົດໄວ້ໃຫ້ຄົນຊົ່ວຮ້າຍ,
ເຊິ່ງເປັນມໍລະດົກທີ່ພຣະເຈົ້າໄດ້ມອບໃຫ້ພວກເຂົາ”.
Source notes (2)
- Footnote ຫລື ອາດາມ
- Footnote ຫລື ນ້ຳຖ້ວມຈະພັດພາເຮືອນຂອງພວກເຂົາໄປ ນ້ຳແຮງໃນມື້ແຫ່ງພຣະພິໂລດຂອງພຣະເຈົ້າ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.