Biblica® Open Lao Contemporary Version
ໂຢບ 19
ໂຢບ
ແລ້ວໂຢບໄດ້ຕອບວ່າ:
“ພວກເຈົ້າຈະທໍລະມານຂ້ອຍໄປອີກດົນປານໃດ?
ແລະ ຈະຍ່ອງຂ້ອຍດ້ວຍຄໍາເວົ້າໄປອີກດົນປານໃດ?
ບັດນີ້ ພວກເຈົ້າຕຳໜິຂ້ອຍເຖິງສິບຄັ້ງແລ້ວ;
ພວກເຈົ້າໂຈມຕີຂ້ອຍໂດຍບໍ່ມີຄວາມລະອາຍໃຈ.
ຖ້າມັນເປັນຄວາມຈິງທີ່ຂ້ອຍໄດ້ຫລົງຜິດໄປ,
ຄວາມຜິດພາດກໍຍັງກ່ຽວຂ້ອງກັບຂ້ອຍຄົນດຽວ.
ທີ່ຈິງແລ້ວ ຖ້າພວກເຈົ້າຈະຍົກຕົນເອງຂຶ້ນເໜືອຂ້ອຍ
ແລະ ໃຊ້ຄວາມລະອາຍຂອງຂ້ອຍມາຕໍ່ສູ້ຂ້ອຍ,
ແລ້ວກໍຈົ່ງຮູ້ວ່າພຣະເຈົ້າໄດ້ເຮັດຜິດຕໍ່ຂ້ອຍ
ແລະ ຫວ່ານແຫຂອງພຣະອົງລ້ອມຂ້ອຍໄວ້.
“ເຖິງແມ່ນວ່າຂ້ອຍກ່າວຟ້ອງເຖິງ, ‘ຄວາມຮຸນແຮງ!’ ແຕ່ຂ້ອຍບໍ່ໄດ້ຮັບການຕອບກັບແຕ່ຢ່າງໃດ;
ແມ່ນວ່າຂ້ອຍຮ້ອງຂໍຄວາມຊ່ວຍເຫລືອ, ແຕ່ກໍບໍ່ໄດ້ຮັບຄວາມຍຸຕິທຳ.
ພຣະອົງໄດ້ກີດກັ້ນຫົນທາງຂອງຂ້ອຍໄວ້ ຂ້ອຍຈຶ່ງຜ່ານໄປບໍ່ໄດ້;
ພຣະອົງຄຸມທາງຂອງຂ້ອຍໄວ້ໃນຄວາມມືດ.
ພຣະເຈົ້າໄດ້ເອົາກຽດຊື່ສຽງຂອງຂ້ອຍໄປ
ແລະ ຖອດມົງກຸດຈາກຫົວຂອງຂ້ອຍ.
ພຣະອົງທຳລາຍຂ້ອຍຢູ່ທຸກດ້ານຈົນຂ້ອຍພິນາດໄປ;
ພຣະອົງຖອນຮາກຄວາມຫວັງຂອງຂ້ອຍເໝືອນດັ່ງຖອນຕົ້ນໄມ້.
ຄວາມໃຈຮ້າຍຂອງພຣະອົງເຜົາຜານຂ້ອຍ;
ພຣະອົງຖືວ່າຂ້ອຍເປັນສັດຕູຂອງພຣະອົງ.
ກອງກຳລັງຂອງພຣະອົງບຸກເຂົ້າມາ;
ພວກເຂົາສ້າງເຄື່ອງປິດລ້ອມຕໍ່ສູ້ຂ້ອຍ ແລະ ຕັ້ງຄ້າຍອ້ອມເຕັນຂອງຂ້ອຍໄວ້.
“ພຣະອົງເຮັດໃຫ້ຄອບຄົວຂອງຂ້ອຍຫ່າງເຫີນຈາກຂ້ອຍ;
ຄົນສະໜິດໃກ້ຊິດຂອງຂ້ອຍກໍໜີຫ່າງຈາກຂ້ອຍໄປ.
ຍາດຕິພີ່ນ້ອງຂອງຂ້ອຍກໍຈາກໄປ;
ໝູ່ເພື່ອນສະໜິດຂອງຂ້ອຍກໍໄດ້ລືມຂ້ອຍ.
ບັນດາແຂກ ແລະ ພວກຄົນຮັບໃຊ້ຍິງຂອງຂ້ອຍກໍຖືວ່າຂ້ອຍເປັນຄົນຕ່າງດ້າວ;
ພວກເຂົາເບິ່ງຂ້ອຍເປັນດັ່ງຄົນແປກໜ້າ.
ຂ້ອຍເອີ້ນຄົນຮັບໃຊ້ຂອງຂ້ອຍ, ແຕ່ລາວບໍ່ຂານຕອບ,
ແມ່ນວ່າຂ້ອຍຮ້ອງຂໍໃຫ້ລາວຊ່ວຍດ້ວຍຕົນເອງກໍຕາມ.
ເມຍຂອງຂ້ອຍກໍກຽດຊັງລົມຫາຍໃຈຂອງຂ້ອຍ;
ຄອບຄົວຂອງຂ້ອຍເອງກໍລັງກຽດຂ້ອຍ.
ແມ່ນແຕ່ເດັກນ້ອຍກໍດູໜິ່ນຂ້ອຍ;
ເມື່ອຂ້ອຍປາກົດຕົວ, ພວກເຂົາກໍຫົວເຢາະເຢີ້ຍຂ້ອຍ.
ໝູ່ເພື່ອນສະໜິດທຸກຄົນພາກັນລັງກຽດຂ້ອຍ;
ບັນດາຜູ້ທີ່ຂ້ອຍຮັກໄດ້ກາຍເປັນສັດຕູກັບຂ້ອຍ.
ຂ້ອຍບໍ່ເຫລືອຍັງມີແຕ່ຜິວໜັງ ແລະ ກະດູກ;
ມີພຽງແຕ່ເງືອກຂອງຂ້ອຍເທົ່ານັ້ນທີ່ລອດຊີວິດມາໄດ້.
“ໝູ່ເພື່ອນເອີຍ, ສົງສານຂ້ອຍແດ່, ສົງສານຂ້ອຍແດ່,
ເພາະມືຂອງພຣະເຈົ້າໄດ້ໂຈມຕີຂ້ອຍແລ້ວ.
ເປັນຫຍັງພວກເຈົ້າຈຶ່ງຕ້ອງໄລ່ລ້າຂ້ອຍດັ່ງພຣະເຈົ້າໄດ້ເຮັດ?
ພວກເຈົ້າຈະລອກເນື້ອໜັງຂອງຂ້ອຍຍັງບໍ່ພໍຈັກເທື່ອບໍ?
“ໂອ້, ຄໍາເວົ້າຂອງຂ້ອຍໄດ້ຖືກບັນທຶກໄວ້,
ຄໍາເວົ້າເຫລົ່ານັ້ນໄດ້ຂຽນໃສ່ໃນໜັງສືມ້ວນ,
ໃຊ້ເຄື່ອງມືເຫລັກຈາລຶກໄວ້ເທິງແຜ່ນກົ່ວ,
ຫລື ສະຫລັກລົງເທິງສີລາໃຫ້ຄົງຢູ່ຕະຫລອດໄປ!
ຂ້ອຍຮູ້ວ່າຜູ້ໄຖ່1ຂອງຂ້ອຍມີຊີວິດຢູ່,
ແລະ ຮູ້ວ່າໃນທີ່ສຸດພຣະອົງຈະຢືນຢູ່ເທິງແຜ່ນດິນໂລກ.2
ແລະ ຫລັງຈາກທີ່ຜິວໜັງຂອງຂ້ອຍໄດ້ຖືກທຳລາຍໄປ,
ແຕ່3ໃນ4ຮ່າງກາຍນີ້ຂອງຂ້ອຍ ຂ້ອຍຈະເຫັນພຣະເຈົ້າ;
ຂ້ອຍເອງຈະໄດ້ເຫັນພຣະອົງ
ດ້ວຍຕາຂອງຂ້ອຍເອງ ແລະ ບໍ່ແມ່ນຄົນອື່ນ.
ຈິດໃຈຂອງຂ້ອຍກໍໂຫຍຫາຢູ່ພາຍໃນຂ້ອຍ!
“ຖ້າພວກເຈົ້າເວົ້າວ່າ, ‘ພວກເຮົາຈະຈັດການລາວຢ່າງໃດ,
ເນື່ອງຈາກຕົ້ນຕໍຂອງຄວາມເດືອດຮ້ອນຢູ່ທີ່ລາວ,5’
ພວກເຈົ້າຄວນຈະຢ້ານດາບຂອງຕົນເອງ;
ເພາະຄວາມໂກດຮ້າຍຈະລົງໂທດເຈົ້າດ້ວຍດາບ,
ແລ້ວພວກເຈົ້າຈະຮູ້ວ່າການພິພາກສານັ້ນມີຈິງ6”.
Source notes (6)
- Footnote ຫລື ຜູ້ປົກປ້ອງ
- Footnote ຫລື ເທິງຂຸມຝັງສົບຂອງຂ້ອຍ
- Footnote ຫລື ແລະ ຫລັງຈາກຂ້າຕື່ນຂຶ້ນ ແມ່ນຮ່າງກາຍນີ້ໄດ້ຖືກທຳລາຍໄປ ແລ້ວ
- Footnote ຫລື ຖືກທຳລາຍໄປ ປາດສະຈາກ
- Footnote ຫລື ຂ້າ
- Footnote ຫລື ດາບ ເພື່ອທີ່ເຈົ້າຈະມາຮູ້ຈັກອົງຜູ້ມີລິດອຳນາດຍິ່ງໃຫຍ່
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.