Biblica® Open Lao Contemporary Version
ໂຢບ 18
ບິນດາດ
ແລ້ວບິນດາດຊາວຊູອາໄດ້ຕອບວ່າ:
“ເມື່ອໃດເຈົ້າຈະເຊົາເວົ້າແບບນີ້?
ຈົ່ງມີເຫດຜົນແດ່, ເພື່ອພວກເຮົາຈະສາມາດລົມກັນໄດ້.
ເປັນຫຍັງພວກເຮົາເປັນຖືວ່າຕົນເປັນດັ່ງງົວ
ແລະ ເປັນດັ່ງຄົນໂງ່ໃນສາຍຕາຂອງເຈົ້າ?
ເຈົ້າເອງທີ່ຈີກຕົນເອງອອກເປັນຕ່ອນໆດ້ວຍຄວາມໃຈຮ້າຍຂອງຕົນເອງ,
ແຜ່ນດິນໂລກຖືກປະຖິ້ມເພື່ອເຫັນແກ່ເຈົ້າບໍ?
ຫລື ຕ້ອງໃຫ້ກ້ອນຫີນເຄື່ອນຍ້າຍອອກໄປຈາກບ່ອນຂອງມັນບໍ?
“ຕະກຽງຂອງຄົນຊົ່ວຮ້າຍຈະຖືກມອດ;
ແປວໄຟຂອງລາວຈະເຊົາລຸກໄໝ້.
ແສງສະຫວ່າງໃນເຕັນຂອງລາວກໍຈະມືດ;
ຕະກຽງຢູ່ທາງຂ້າງລາວກໍດັບໄປ.
ບາດກ້າວທີ່ໜັກແໜ້ນຂອງລາວກໍອ່ອນລົງ;
ແຜນການຂອງລາວເອງເຮັດໃຫ້ລາວລົ້ມລົງ.
ຕີນຂອງລາວຍູ້ລາວເຂົ້າໄປໃສ່ຕາໜ່າງ;
ລາວພະເນຈອນໄປຕິດກັບດັກ.
ກັບດັກຈະງັບສົ້ນຕີນຂອງລາວໄວ້;
ບ້ວງແຮ້ວຮັດລາວໄວ້ແໜ້ນໆ.
ບ້ວງແຮ້ວໄດ້ຖືກຫ້າງໄວ້ດັກຈັບລາວຢູ່ເທິງພື້ນດິນ;
ມີກັບດັກທີ່ວາງໄວ້ຕາມທາງຂອງລາວ.
ຄວາມຢ້ານກົວໂຈມຕີລາວຢູ່ທຸກດ້ານ
ແລະ ຄອຍຖ້າທຳຮ້າຍທຸກບາດກ້າວຂອງລາວ.
ຄວາມພິນາດຈ້ອງຈະທໍາຮ້າຍລາວ;
ໄພພິບັດກໍຕຽມພ້ອມແລ້ວສໍາລັບລາວເມື່ອລາວລົ້ມລົງ.
ມັນກັດກິນຜິວໜັງບາງສ່ວນຂອງລາວ;
ຄວາມຕາຍເລີ່ມທໍາລາຍແຂນຂາຂອງລາວ.
ລາວຖືກລາກອອກມາຈາກເຕັນ ບ່ອນທີ່ປອດໄພຂອງລາວ
ແລະ ຖືກນໍາໄປຫາກະສັດແຫ່ງຄວາມຢ້ານກົວ.
ໄຟຢູ່ໃນ1ເຕັນຂອງລາວ;
ລຸກໄໝ້ໄຟກະຈາຍໄປທົ່ວບ່ອນທີ່ລາວພັກຢູ່.
ຮາກຂອງລາວຢູ່ດ້ານລຸ່ມກໍຫ່ຽວແຫ້ງໄປ
ແລະ ກິ່ງກ້ານຂອງລາວຢູ່ດ້ານເທິງກໍແຫ້ງ.
ອະນຸສອນຂອງລາວພິນາດຈິບຫາຍໄປຈາກແຜ່ນດິນໂລກ;
ລາວບໍ່ມີຊື່ຢູ່ເທິງແຜ່ນດິນ.
ລາວຖືກຂັບໄລ່ອອກຈາກຄວາມສະຫວ່າງໄປສູ່ຄວາມມືດມົນ
ແລະ ຖືກຂັບໄລ່ອອກໄປຈາກໂລກ.
ລາວບໍ່ມີລູກຫລານ ຫລື ເຊື້ອສາຍທ່າມກາງປະຊາຊົນຂອງລາວ,
ແລະ ບໍ່ມີຜູ້ໃດລອດຊີວິດໃນດິນແດນທີ່ລາວອາໄສຢູ່.
ປະຊາຊົນຢູ່ທາງທິດຕາເວັນຕົກກໍຕົກຕະລຶງໃນຊະຕາກຳຂອງລາວ;
ຄົນຢູ່ທາງທິດຕາເວັນອອກກໍຕົກໃຈຢ້ານ.
ແມ່ນແລ້ວ ສິ່ງເຫລົ່ານີ້ເກີດຂຶ້ນຢູ່ໃນບ່ອນທີ່ຄົນຊົ່ວອາໄສຢູ່;
ນີ້ຄືສິ່ງທີ່ເກີດຂຶ້ນໃນບ່ອນຂອງຄົນທີ່ບໍ່ຮູ້ຈັກພຣະເຈົ້າ”.
Source notes (1)
- Footnote ຫລື ພວກເຂົາບໍ່ມີສິ່ງໃດເຫລືອຢູ່ເລີຍໃນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.