Biblica® Open Lao Contemporary Version
ໂຢບ 17
“ຈິດວິນຍານຂອງຂ້ອຍແຕກສະຫລາຍ,
ວັນເວລາຂອງຂ້ອຍກໍສັ້ນເຂົ້າ,
ຂຸມຝັງສົບລໍຖ້າຂ້ອຍຢູ່.
ແນ່ນອນ ພວກຄົນທີ່ມັກເຢາະເຢີ້ຍກໍຢູ່ອ້ອມຂ້າງຂ້ອຍ;
ຕາຂອງຂ້ອຍຈ້ອງເບິ່ງຄວາມອາຄາດຂອງພວກເຂົາ.
“ຂ້າແດ່ພຣະເຈົ້າ, ໂຜດໃຫ້ຂ້ານ້ອຍຕາມຄຳປະຕິຍານທີ່ພຣະອົງໄດ້ໃຫ້ໄວ້.
ຜູ້ໃດຈະໃຫ້ຄວາມປອດໄພແກ່ຂ້ານ້ອຍ?
ພຣະອົງໄດ້ປິດຄວາມຄິດຂອງພວກເຂົາໄວ້ຈາກຄວາມເຂົ້າໃຈ;
ເຫດສະນັ້ນ ພຣະອົງຈະບໍ່ປ່ອຍໃຫ້ພວກເຂົາມີໄຊຊະນະ.
ຖ້າຄົນໃດກ່າວຫາໝູ່ເພື່ອນຂອງຕົນເພາະເຫັນແກ່ຄ່າຈ້າງ,
ຕາຂອງລູກຫລານຂອງພວກເຂົາຈະມືດມົວໄປ.
“ພຣະເຈົ້າເຮັດໃຫ້ຂ້ອຍເປັນທີ່ຢຽດຢາມຂອງທຸກຄົນ,
ຄົນໜຶ່ງທີ່ຖົ່ມນ້ຳລາຍໃສ່ໜ້າຂ້ອຍ.
ຕາຂອງຂ້ອຍໄດ້ມືດມົວໄປດ້ວຍຄວາມໂສກເສົ້າ;
ທຸກສ່ວນໃນຮ່າງກາຍຂອງຂ້ອຍເປັນພຽງເງົາ.
ຄົນທ່ຽງທຳກໍຕົກໃຈໃນເລື່ອງນີ້;
ຜູ້ບໍລິສຸດຖືກປຸກຂຶ້ນໃຫ້ຕໍ່ຕ້ານຄົນບໍ່ນັບຖືພຣະເຈົ້າ.
ເຖິງຢ່າງໃດກໍຕາມ, ຄົນຊອບທຳຈະຢຶດໝັ້ນຢູ່ໃນວິຖີທາງຂອງຕົນ,
ແລະ ຜູ້ທີ່ມືສະອາດຈະເຂັ້ມແຂງຂຶ້ນ.
“ພວກເຈົ້າທຸກຄົນ, ຈົ່ງມາລອງເບິ່ງອີກ!
ຂ້ອຍບໍ່ພົບຄົນມີປັນຍາແມ່ນແຕ່ຄົນດຽວຢູ່ໃນທ່າມກາງພວກເຈົ້າ.
ວັນເວລາຂອງຂ້ອຍໄດ້ຜ່ານພົ້ນໄປ, ແຜນການຕ່າງໆຂອງຂ້ອຍພັງທະລາຍໝົດ.
ຄວາມປາຖະໜາໃນຈິດໃຈຂອງຂ້ອຍກໍສູນສິ້ນໄປ
ພວກເຂົາປ່ຽນກາງຄືນເປັນກາງເວັນ;
ແລະ ໃນຄວາມມືດ ພວກເຂົາເວົ້າວ່າ ‘ຄວາມສະຫວ່າງມາໃກ້ແລ້ວ’.
ຖ້າມີບ້ານຫລັງດຽວທີ່ຂ້ອຍຫວັງກໍເປັນຂຸມຝັງສົບ,
ຖ້າຂ້ອຍກາງບ່ອນນອນຂອງຂ້ອຍຢູ່ໃນຄວາມມືດ,
ຖ້າຂ້ອຍເອີ້ນຄວາມເນົ່າເປື່ອຍວ່າ ‘ເຈົ້າເປັນພໍ່ຂອງຂ້ອຍ’,
ແລະ ເອີ້ນໜອນວ່າ ‘ແມ່ຂອງຂ້ອຍ’ ຫລື ‘ເອື້ອຍຂອງຂ້ອຍ’,
ເມື່ອນັ້ນຄວາມຫວັງຂອງຂ້ອຍຢູ່ໃສ?
ມີຜູ້ໃດແດ່ທີ່ເບິ່ງເຫັນຄວາມຫວັງສໍາລັບຂ້ອຍ?
ມັນຈະລົງສູ່ປະຕູແຫ່ງຄວາມຕາຍບໍ?
ພວກເຮົາຈະລົງໄປໃນຂີ້ຝຸ່ນດິນນໍາກັນບໍ?”
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.