Biblica® Open Lao Contemporary Version
ໂຢບ 16
ໂຢບ
ແລ້ວໂຢບໄດ້ຕອບວ່າ:
“ຂ້ອຍໄດ້ຍິນເລື່ອງແບບນີ້ມາຫລາຍແລ້ວ;
ພວກເຈົ້າທຸກຄົນເປັນນັກໜູນໃຈທີ່ໃຊ້ການບໍ່ໄດ້!
ຄໍາເວົ້າອັນຍືດຍາວຂອງພວກເຈົ້າຈະບໍ່ຈົບຈັກເທື່ອບໍ?
ອັນໃດທີ່ເຮັດໃຫ້ພວກເຈົ້າຍັງໂຕ້ຖຽງກັນຢູ່?
ຂ້ອຍກໍເວົ້າຄືກັນກັບພວກເຈົ້າໄດ້,
ຖ້າພວກເຈົ້າຕົກຢູ່ໃນສະພາບດຽວກັບຂ້ອຍ;
ຂ້ອຍກໍສາມາດເວົ້າຢ່າງອ່ອນຫວານກັບພວກເຈົ້າ
ແລະ ແກວ່ງຫົວຂອງຂ້ອຍເຢີ້ຍພວກເຈົ້າໄດ້.
ແຕ່ປາກຂອງຂ້ອຍຈະເວົ້າໃຫ້ກຳລັງໃຈພວກເຈົ້າ;
ຄໍາເລົ້າໂລມຈາກປາກຂອງຂ້ອຍຈະນໍາຄວາມຜ່ອນຄາຍມາໃຫ້ເຈົ້າ.
“ແຕ່ຖ້າຂ້ອຍຈະເວົ້າອອກໄປ, ຄວາມເຈັບປວດຂອງຂ້ອຍກໍບໍ່ໄດ້ບັນເທົາລົງ;
ແລະ ຖ້າຂ້ອຍມິດງຽບຢູ່, ມັນກໍບໍ່ໄດ້ຫາຍໄປ.
ຂ້າແດ່ພຣະເຈົ້າ, ແນ່ນອນ, ພຣະອົງເຮັດໃຫ້ຂ້ານ້ອຍອ່ອນແຮງ;
ພຣະອົງທໍາລາຍຄອບຄົວທັງໝົດຂອງຂ້ານ້ອຍ.
ພຣະອົງໄດ້ຈັບຂ້ານ້ອຍມັດ ແລະ ມັນກໍກາຍເປັນພະຍານອັນໜຶ່ງ;
ຮ່າງກາຍທີ່ຈ່ອຍຜອມຂອງຂ້ານ້ອຍໄດ້ລຸກຂຶ້ນ ແລະ ເປັນພະຍານຕໍ່ສູ້ຂ້ານ້ອຍ.
ພຣະເຈົ້າໂຈມຕີຂ້ອຍ ແລະ ຈີກຂ້ອຍດ້ວຍຄວາມໃຈຮ້າຍຂອງພຣະອົງ
ແລະ ພຣະອົງກັດແຂ້ວໃສ່ຂ້ອຍ;
ຄູ່ຕໍ່ສູ້ຂອງຂ້ອຍຈ້ອງເບິ່ງຂ້ອຍດ້ວຍສາຍຕາອາຄາດ.
ຄົນອ້າປາກເຢາະເຢີ້ຍຂ້ອຍ;
ພວກເຂົາຕົບແກ້ມຂ້ອຍດ້ວຍການດູຖູກ
ແລະ ຮວ່ມຫົວກັນຕໍ່ສູ້ຂ້ອຍ.
ພຣະເຈົ້າໄດ້ມອບຂ້ອຍໄວ້ກັບຄົນທີ່ບໍ່ນັບຖືພຣະເຈົ້າ
ແລະ ໂຍນຂ້ອຍໄວ້ໃນກໍາມືຂອງຄົນຊົ່ວ.
ທຸກສິ່ງທີ່ຢູ່ກັບຂ້ອຍກໍສະຫງົບສຸກດີ, ແຕ່ພຣະອົງໄດ້ທຸບຂ້ອຍ;
ພຣະອົງຈັບຄໍຂ້ອຍ ແລະ ຟາດຂ້ອຍໃຫ້ແຕກໝຸ່ນ.
ພຣະອົງເຮັດໃຫ້ຂ້ອຍເປັນເປົ້າຂອງພຣະອົງ;
ນັກທະນູຂອງພຣະອົງລ້ອມຂ້ອຍໄວ້.
ພຣະອົງເຈາະໝາກໄຂ່ຫລັງໂດຍບໍ່ມີຄວາມເມດຕາ
ແລະ ນ້ຳບີຂອງຂ້ອຍກໍຍ້ອຍລົງພື້ນດິນ.
ພຣະອົງລະເບີດໃສ່ຂ້ອຍຊໍ້າແລ້ວຊໍ້າອີກ;
ພຣະອົງແລ່ນເຂົ້າໃສ່ຂ້ອຍເໝືອນດັ່ງນັກຮົບ.
“ຂ້ອຍໄດ້ຫຍິບຜ້າກະສອບເຂົ້າຕິດກັບຜິວໜັງຂອງຂ້ອຍ
ແລະ ຝັງຄິ້ວຂອງຂ້ອຍໄວ້ໃນຂີ້ຝຸ່ນດິນ.
ໜ້າຂອງຂ້ອຍກໍແດງເພາະການຮ້ອງໄຫ້.
ເປົ້າຕາຂອງຂ້ອຍຊໍ້າດຳເປັນວົງ;
ແຕ່ມືຂອງຂ້ອຍນັ້ນກໍສະອາດປາດສະຈາກຄວາມຮຸນແຮງ
ແລະ ຄຳອະທິຖານຂອງຂ້ອຍກໍບໍລິສຸດ.
“ແຜ່ນດິນໂລກເອີຍ, ຢ່າປົກປິດເລືອດຂອງຂ້ອຍໄວ້;
ຢ່າໃຫ້ສຽງຮ້ອງໄຫ້ຂອງຂ້ອຍມິດງຽບຢູ່!
ບັດນີ້ ແມ່ນແຕ່ພະຍານຂອງຂ້ອຍຢູ່ໃນຟ້າສະຫວັນ;
ຜູ້ຊ່ວຍຂອງຂ້ອຍກໍຢູ່ເບື້ອງເທິງ.
ຜູ້ອ້ອນວອນແທນຂ້ອຍກໍເປັນໝູ່ເພື່ອນຂອງຂ້ອຍ1
ຂະນະທີ່ຕາຂອງຂ້ອຍຫລັ່ງນ້ຳຕາຕໍ່ພຣະເຈົ້າ;
ຜູ້ຕາງໜ້າຂອງມະນຸດ ລາວອ້ອນວອນຂໍພຣະເຈົ້າ
ດັ່ງຜູ້ໜຶ່ງອ້ອນວອນຂໍແທນໝູ່ເພື່ອນ.
“ອີກບໍ່ເທົ່າໃດປີກໍຈະຜ່ານພົ້ນໄປ
ກ່ອນທີ່ຂ້ອຍຈະຍ່າງໄປຕາມທາງທີ່ບໍ່ມີວັນກັບຄືນມາອີກ.
Source notes (1)
- Footnote ຫລື ເພື່ອນຂອງຂ້າປະຕິບັດຕໍ່ຂ້າຢ່າງເຍີ້ຍຫຍັນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.