Biblica® Open Lao Contemporary Version

ໂຢບ 15

ເອລີຟັດ

ເອລີຟັດຊາວເຕມານໄດ້ຕອບວ່າ:

“ຄົນສະຫລາດຈະຕອບແບບບໍ່ຄິດຊັ້ນບໍ

ຫລື ໃຫ້ລົມຕາເວັນອອກທີ່ຮ້ອນເອົ້າພັດເຂົ້າເຕັມທ້ອງຂອງພວກເຂົາບໍ?

ພວກເຂົາຈະໂຕ້ແຍ້ງດ້ວຍຖ້ອຍຄຳທີ່ໄຮ້ປະໂຫຍດ,

ດ້ວຍຄໍາເວົ້າທີ່ບໍ່ມີຄຸນຄ່າບໍ?

ແຕ່ເຈົ້າໄດ້ທຳລາຍແມ່ນແຕ່ຄວາມຢຳເກງພຣະເຈົ້າ

ແລະ ກີດກັນການອຸທິດຕົນຕໍ່ພຣະເຈົ້າກໍຕາມ.

ບາບຂອງເຈົ້າຍົວະໃຫ້ປາກຂອງເຈົ້າເວົ້າ;

ເຈົ້າຮັບເອົາລິ້ນຂອງຄົນມີເລ້ຫລ່ຽມ.

ປາກຂອງເຈົ້າເອງທີ່ກ່າວໂທດເຈົ້າ, ບໍ່ແມ່ນປາກຂອງຂ້ອຍ;

ຮີມສົບຂອງເຈົ້າເອງເປັນພະຍານຕໍ່ສູ້ເຈົ້າ.

“ເຈົ້າເປັນມະນຸດຄົນທຳອິດທີ່ເກີດມາບໍ?

ເຈົ້າເກີດກ່ອນທີ່ເນີນພູຈະຖືກສ້າງຂຶ້ນບໍ?

ເຈົ້ານັ່ງຟັງຢູ່ໃນສະພາຂອງພຣະເຈົ້າບໍ?

ເຈົ້າຜູກຂາດສະຕິປັນຍາໄວ້ຄົນດຽວບໍ?

ມີສິ່ງໃດທີ່ເຈົ້າຮູ້ພວກເຮົາບໍ່ຮູ້ແດ່?

ມີຄວາມເຂົ້າໃຈອັນເລິກເຊິ່ງອັນໃດທີ່ພວກເຮົາບໍ່ເຂົ້າໃຈແດ່?

ຄົນຜົມຫງອກ ແລະ ຜູ້ອາວຸໂສກໍເຂົ້າຂ້າງພວກເຮົາ,

ຄົນເຫລົ່ານັ້ນເຖົ້າກວ່າພໍ່ຂອງເຈົ້າອີກ.

ຄຳເລົ້າໂລມໃຈຈາກພຣະເຈົ້າບໍ່ພຽງພໍສຳລັບເຈົ້າບໍ?

ຖ້ອຍຄຳອ່ອນໂຍນບໍ່ພຽງພໍສໍາລັບເຈົ້າບໍ?

ເປັນຫຍັງຈິດໃຈຂອງເຈົ້າຈຶ່ງພາເຈົ້າຫລົງໄປ,

ແລະ ເປັນຫຍັງຕາຂອງເຈົ້າຈຶ່ງລຸກເປັນໄຟ,

ທີ່ເຈົ້າຈຶ່ງລະບາຍຄວາມໂມໂຫຮ້າຍຂອງເຈົ້າຕໍ່ພຣະເຈົ້າ

ແລະ ເວົ້າຄໍາເວົ້າແບບນັ້ນອອກມາຈາກປາກຂອງເຈົ້າ?

“ມະນຸດເປັນຫຍັງທີ່ພວກເຂົາຈະບໍລິສຸດໄດ້,

ຫລື ຄົນໃດທີ່ເກີດມາຈາກຜູ້ຍິງທີ່ຈະເປັນຄົນຊອບທຳໄດ້?

ຖ້າພຣະເຈົ້າບໍ່ໄວ້ວາງໃຈໃນບັນດາເທວະດາຂອງພຣະອົງ,

ແມ່ນແຕ່ຟ້າສະຫວັນກໍບໍ່ບໍລິສຸດໃນສາຍຕາຂອງພຣະອົງ,

ມະນຸດກໍຊົ່ວຮ້າຍ ແລະ ເສື່ອມຊາມລົງຫລາຍກວ່ານັ້ນຈັກເທົ່າໃດ,

ຜູ້ທີ່ດື່ມຄວາມຊົ່ວຮ້າຍດັ່ງດື່ມນ້ຳ!

“ຈົ່ງຟັງຂ້ອຍ ແລະ ຂ້ອຍຈະອະທິບາຍໃຫ້ເຈົ້າຟັງ;

ໃຫ້ຂ້ອຍບອກເຈົ້າເຖິງສິ່ງທີ່ຂ້ອຍໄດ້ເຫັນມາ,

ສິ່ງທີ່ຄົນສະຫລາດໄດ້ບອກໄວ້,

ບໍ່ປິດບັງສິ່ງໃດໆທີ່ໄດ້ຮັບຈາກບັນພະບຸລຸດຂອງພວກເຂົາ

(ຜູ້ໄດ້ຮັບມອບດິນແດນແຕ່ຜູ້ດຽວ

ເມື່ອບໍ່ມີຄົນຕ່າງດ້າວຍ້າຍມາຢູ່ທ່າມກາງພວກເຂົາ):

ຄົນຊົ່ວຮ້າຍທຸກທໍລະມານຕະຫລອດຊີວິດຂອງລາວ,

ຄົນທີ່ໂຫດຮ້າຍທົນທຸກຕະຫລອດຊົ່ວຊີວິດຂອງລາວ.

ສຽງອັນໜ້າຢ້ານດັງກ້ອງຢູ່ໃນຫູຂອງລາວ;

ເມື່ອທຸກຢ່າງເບິ່ງຄືສະຫງົບສຸກດີ, ພວກໂຈນກໍໂຈມຕີລາວ.

ລາວໝົດຫວັງທີ່ຈະໜີໃຫ້ພົ້ນຈາກອານາຈັກແຫ່ງຄວາມມືດ;

ລາວຖືກໝາຍຫົວໄວ້ເພື່ອຂ້າ.

ລາວເລາະໄປຊອກຫາອາຫານເໝືອນດັ່ງໂຕແຮ້ງ;1

ລາວຮູ້ວ່າວັນແຫ່ງຄວາມມືດມົນກໍຢູ່ພຽງປາຍນິ້ວມື.

ຄວາມທຸກໃຈ ແລະ ຄວາມເຈັບປວດເຮັດໃຫ້ລາວຢ້ານກົວ;

ຄວາມເດືອດຮ້ອນຖ້ວມລາວເໝືອນດັ່ງກະສັດບຸກເຂົ້າໂຈມຕີ,

ເພາະລາວຍົກກຳປັ້ນຂອງຕົນໃສ່ພຣະເຈົ້າ

ແລະ ອວດຕົນເອງຕໍ່ອົງຜູ້ມີລິດອໍານາດຍິ່ງໃຫຍ່,

ລາວຖືໂລ່ໜາ ແລະ ແຂງແກ່ນຕໍ່ສູ້ພຣະອົງ

ໂດຍການກ່າວທ້າທາຍຕໍ່ພຣະອົງ.

“ເຖິງແມ່ນວ່າໜ້າຂອງລາວກໍເຕັມໄປດ້ວຍໄຂມັນ

ແລະ ແອວຂອງລາວອວບເຕັມດ້ວຍເນື້ອໜັງ,

ລາວຈະອາໄສໃນເມືອງທີ່ຮົກຮ້າງເພພັງ

ແລະ ເຮືອນບ່ອນທີ່ບໍ່ມີຜູ້ໃດອາໄສຢູ່,

ເຮືອນທີ່ເປັນຊາກຫັກເພພັງ.

ລາວຈະບໍ່ຮັ່ງມີອີກຕໍ່ໄປ ແລະ ຊັບສົມບັດຂອງລາວຈະບໍ່ຄົງຢູ່,

ແລະ ການປົກຄອງຂອງລາວຈະບໍ່ຂະຫຍາຍໄປທົ່ວແຜ່ນດິນ.

ລາວຈະໜີບໍ່ພົ້ນຄວາມມືດມົນ;

ແປວໄຟເຮັດໃຫ້ໜໍ່ຂອງລາວຫ່ຽວແຫ້ງໄປ,

ລົມຈາກຂອງພຣະເຈົ້າຈະພັດລາວປິວໄປ.

ຢ່າໃຫ້ລາວຫລອກລວງຕົນເອງໂດຍໄວ້ວາງໃຈສິ່ງທີ່ໄຮ້ຄ່າ,

ເພາະລາວຈະບໍ່ໄດ້ອັນໃດຕອບແທນ.

ລາວຈະຫ່ຽວແຫ້ງໄປກ່ອນວັນເວລາຂອງລາວ,

ແລະ ກິ່ງກ້ານຂອງລາວຈະບໍ່ເຕີບໂຕ.

ລາວຈະເປັນເໝືອນເຄືອອະງຸ່ນທີ່ໝາກຂອງມັນຫລົ່ນຕັ້ງແຕ່ຍັງດິບ,

ດັ່ງຕົ້ນໝາກກອກທີ່ດອກຂອງມັນຫລົ່ນເມື່ອຫາກໍບານ.

ເພາະກຸ່ມຄົນທີ່ບໍ່ເຊື່ອຖືພຣະເຈົ້ານັ້ນຈະເປັນໝັນ,

ແລະ ໄຟຈະເຜົາຜານເຕັນຂອງຜູ້ທີ່ຮັກສິນບົນ.

ພວກເຂົາຖືພາຄວາມເດືອດຮ້ອນ ແລະ ເກີດຄວາມຊົ່ວອອກມາ;

ທ້ອງຂອງພວກເຂົາມີແຕ່ການຫລອກລວງ”.

Source notes (1)

Footnote ຫລື ເລ້ເຫລ້ອນຊອກຫາອາຫານ

Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.