Biblica® Open Lao Contemporary Version
ໂຢບ 13
“ຕາຂອງຂ້ອຍໄດ້ເຫັນສິ່ງທັງໝົດນີ້,
ຫູຂອງຂ້ອຍໄດ້ຍິນ ແລະ ເຂົ້າໃຈແລ້ວ.
ສິ່ງທີ່ເຈົ້າຮູ້, ຂ້ອຍກໍຮູ້ເໝືອນກັນ;
ຂ້ອຍບໍ່ໄດ້ຕໍ່າຕ້ອຍກວ່າພວກເຈົ້າເລີຍ.
ແຕ່ຂ້ອຍຢາກຈະກ່າວກັບອົງຜູ້ມີລິດອຳນາດຍິ່ງໃຫຍ່
ແລະ ຢາກຈະໂຕ້ແຍ້ງຄະດີຂອງຂ້ອຍກັບພຣະເຈົ້າ.
ແມ່ນວ່າພວກເຈົ້າເອົາຄວາມຕົວະທາໃສ່ຂ້ອຍ;
ພວກເຈົ້າເປັນໝໍທີ່ບໍ່ໄດ້ເລື່ອງ!
ຖ້າພວກເຈົ້າພຽງແຕ່ມິດງຽບຢູ່!
ສໍາລັບພວກເຈົ້າກໍຖືວ່າເປັນຄົນມີປັນຍາ.
ບັດນີ້ຈົ່ງຟັງຄຳໂຕ້ແຍ້ງຂອງຂ້ອຍ;
ຈົ່ງຟັງຄຳອ້ອນວອນຈາກປາກຂອງຂ້ອຍ.
ພວກເຈົ້າຈະເວົ້າຊົ່ວແທນພຣະເຈົ້າໄດ້ບໍ?
ພວກເຈົ້າຈະເວົ້າຫລອກລວງເພື່ອພຣະອົງບໍ?
ພວກເຈົ້າຈະສະແດງຄວາມລໍາອຽງກັບພຣະອົງບໍ?
ພວກເຈົ້າຈະສູ້ຄະດີແທນພຣະເຈົ້າບໍ?
ຖ້າພຣະອົງກວດສອບພວກເຈົ້າ ຜົນຈະອອກມາດີຫລືບໍ່?
ພວກເຈົ້າຈະຫລອກລວງພຣະເຈົ້າເໝືອນດັ່ງພວກເຈົ້າຫລອກລວງມະນຸດໄດ້ບໍ?
ພຣະອົງຈະຕຳໜິພວກເຈົ້າຢ່າງແນ່ນອນ
ຖ້າພວກເຈົ້າສະແດງຄວາມລຳອຽງຢ່າງລັບໆ.
ຄວາມສະຫງ່າງາມຂອງພຣະອົງຈະບໍ່ເຮັດໃຫ້ພວກເຈົ້າຢ້ານກົວບໍ່?
ຄວາມໜ້າຢ້ານຂອງພຣະອົງຈະບໍ່ຕົກໃສ່ພວກເຈົ້າບໍ?
ຄໍາສຸພາສິດຂອງພວກເຈົ້າກໍມີຄ່າເທົ່າຂີ້ເຖົ່າໄຟ;
ຄຳແກ້ຕົວຂອງພວກເຈົ້າເປັນດັ່ງດິນໜຽວ.
“ຈົ່ງມິດງຽບ ແລະ ປ່ອຍໃຫ້ຂ້ອຍເວົ້າ;
ສິ່ງໃດຈະເກີດຂຶ້ນກັບຂ້ອຍກໍໃຫ້ມັນເກີດ.
ເປັນຫຍັງຂ້ອຍຈຶ່ງເອົາຕົນເອງໄປສ່ຽງຊີວິດ
ແລະ ກຳຊີວິດຂອງຕົນເອງໄວ້ໃນມື?
ເຖິງແມ່ນວ່າພຣະອົງຂ້າຂ້ອຍ, ແຕ່ຂ້ອຍກໍຈະຫວັງໃນພຣະອົງ;
ແນ່ນອນ ຂ້ອຍຈະ1ສູ້ຄະດີຂອງຂ້ອຍຕໍ່ໜ້າພຣະອົງ.
ແທ້ຈິງແລ້ວ, ສິ່ງນີ້ຈະກາຍເປັນການຊ່ວຍກູ້ຂ້ອຍໃຫ້ພົ້ນ,
ເພາະບໍ່ມີຄົນທີ່ບໍ່ນັບຖືພຣະເຈົ້າຄົນໃດກ້າຢູ່ຕໍ່ໜ້າພຣະອົງ!
ຂໍໃຫ້ຕັ້ງໃຈຟັງສິ່ງທີ່ຂ້ອຍເວົ້າ;
ໃຫ້ຄໍາເວົ້າຂອງຂ້ອຍດັງຢູ່ໃນຫູຂອງພວກເຈົ້າ.
ບັດນີ້ ຂ້ອຍພ້ອມແລ້ວທີ່ຈະສູ້ຄະດີ,
ຂ້ອຍຮູ້ວ່າຂ້ອຍຈະໄດ້ຮັບການພິສູດວ່າບໍ່ມີຄວາມຜິດ.
ຜູ້ໃດຈະນໍາຂໍ້ກ່າວຫາມາຕໍ່ສູ້ຂ້ອຍ?
ຖ້າມີ, ຂ້ອຍຈະມິດງຽບຢູ່ ແລະ ຍອມຕາຍ.
“ຂ້າແດ່ພຣະເຈົ້າ, ຂໍໃຫ້ສອງສິ່ງນີ້ແກ່ຂ້ານ້ອຍ,
ແລ້ວຂ້ານ້ອຍຈະບໍ່ເຊື່ອງຊ້ອນຕົນເອງຈາກພຣະອົງຄື:
ຂໍຍົກມືຂອງພຣະອົງອອກໄປຈາກຂ້ານ້ອຍ,
ແລະ ຢຸດຂົ່ມຂູ່ຂ້ານ້ອຍດ້ວຍຄວາມອັນໜ້າຢ້ານຂອງພຣະອົງ.
ແລ້ວເອີ້ນຂ້ານ້ອຍ ແລະ ຂ້ານ້ອຍຈະຕອບ.
ຫລື ຂໍໃຫ້ຂ້ານ້ອຍເວົ້າ, ແລ້ວພຣະອົງຈະຕອບຂ້ານ້ອຍ.
ຂ້ານ້ອຍມີຄວາມຜິດ ແລະ ຂ້ານ້ອຍໄດ້ເຮັດບາບຫລາຍເທົ່າໃດ?
ຂໍໂຜດສະແດງໃຫ້ຂ້ານ້ອຍເຫັນເຖິງການກະທໍາຜິດ ແລະ ບາບຂອງຂ້ານ້ອຍ.
ເປັນຫຍັງພຣະອົງຈຶ່ງເຊື່ອງໜ້າຂອງພຣະອົງໄວ້?
ແລະ ຈຶ່ງຖືວ່າຂ້ານ້ອຍເປັນສັດຕູຂອງພຣະອົງ?
ພຣະອົງຈະທໍລະມານໃບໄມ້ທີ່ຖືກລົມພັດປິວໄປບໍ?
ພຣະອົງຈະໄລ່ຕາມເຟືອງແຫ້ງບໍ?
ເພາະພຣະອົງຂຽນການກະທໍາຜິດຂອງຂ້ານ້ອຍລົງຕໍ່ສູ້ຂ້ານ້ອຍ
ແລະ ເຮັດໃຫ້ຂ້ອຍໄດ້ຮັບຜົນບາບຕັ້ງແຕ່ໄວໜຸ່ມຂອງຂ້ານ້ອຍ.
ພຣະອົງໃສ່ຂື່ຢູ່ຕີນຂອງຂ້ານ້ອຍໄວ້;
ພຣະອົງເຝົ້າເບິ່ງທາງທັງໝົດຂອງຂ້ານ້ອຍຢ່າງໃກ້ຊິດ
ໂດຍໃສ່ເຄື່ອງໝາຍໄວ້ທີ່ສົ້ນໜ່ອງຂອງຂ້ານ້ອຍ.
“ດັ່ງນັ້ນ ມະນຸດຈຶ່ງຊຸດໂຊມໄປດັ່ງສິ່ງທີ່ເປື່ອຍເນົ່າ,
ດັ່ງເຄື່ອງນຸ່ງທີ່ຖືກມອດກັດກິນ.
Source notes (1)
- Footnote ຫລື ແນ່ທີດຽວພຣະອົງຈະປະຫານຂ້າ ຂ້າບໍ່ມີຫວັງໃດໆ ແຕ່ຂ້າຈະຍັງຄົງ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.