Biblica® Open Lao Contemporary Version
ໂຢບ 12
ໂຢບ
ໂຢບໄດ້ຕອບວ່າ:
“ບໍ່ສົງໄສເລີຍວ່າເຈົ້າເປັນຄົນດຽວທີ່ສໍາຄັນ,
ແລະ ສະຕິປັນຍາຈະຕາຍໄປກັບເຈົ້າ!
ແຕ່ຂ້ອຍກໍມີຄວາມຄິດຄືກັນກັບເຈົ້າ;
ຂ້ອຍບໍ່ຕໍ່າຕ້ອຍກວ່າເຈົ້າ.
ຜູ້ໃດແດ່ທີ່ບໍ່ຮູ້ໃນສິ່ງທີ່ເຈົ້າເວົ້າມາທັງໝົດ?
“ຂ້ອຍໄດ້ກາຍເປັນຄົນທີ່ໝູ່ເພື່ອນເຢາະເຢີ້ຍ,
ແມ່ນວ່າຂ້ອຍຮ້ອງຫາພຣະເຈົ້າ ແລະ ພຣະອົງກໍໄດ້ຕອບ
ຂ້ອຍເປັນພຽງແຕ່ຄົນທີ່ຖືກເຢາະເຢີ້ຍ, ແຕ່ກໍເປັນຄົນຊອບທຳ ແລະ ບໍ່ມີຕຳໜິ!
ຄົນທີ່ຢູ່ຢ່າງສະບາຍກໍດູໝິ່ນຄວາມໂຊກຮ້າຍ
ເປັນຊາຕາກຳຂອງຄົນທີ່ກຳລັງມື່ນລົ້ມ.
ເຕັນຂອງພວກໂຈນກໍຢູ່ຢ່າງສະຫງົບສຸກ,
ແລະ ຄົນທີ່ຍົວະພຣະເຈົ້າໃຫ້ໃຈຮ້າຍກໍຢູ່ຢ່າງປອດໄພ
ພຣະເຈົ້າໄດ້ໃຫ້ສິ່ງທີ່ນັ້ນຢູ່ໃນມືພຣະອົງ.1
“ແຕ່ຖາມສັດທັງຫລາຍເບິ່ງ ແລະ ພວກມັນຈະສອນເຈົ້າ,
ຫລື ຖາມນົກໃນທ້ອງຟ້າເບິ່ງ, ແລະ ມັນຈະບອກເຈົ້າ;
ຫລື ເວົ້າກັບແຜ່ນດິນໂລກ, ແລ້ວມັນຈະສອນເຈົ້າ.
ຫລື ໃຫ້ປາໃນທະເລແຈ້ງເຈົ້າຮູ້.
ທີ່ທັງໝົດເຫລົ່ານີ້ບໍ່ຮູ້
ເຖິງສິ່ງທີ່ມືຂອງພຣະເຈົ້າຢາເວໄດ້ເຮັດສິ່ງນີ້?
ທຸກສັບພະສິ່ງທີ່ມີຊີວິດຢູ່ໃນມືຂອງພຣະອົງ
ແລະ ລວມທັງລົມຫາຍໃຈຂອງມວນມະນຸດທັງໝົດ.
ຄຳເວົ້າຊີມໃສ່ຫູໄດ້ສັນໃດ
ກໍເປັນດັ່ງລິ້ນຊີມລົດອາຫານບໍ່ແມ່ນບໍ?
ສະຕິປັນຍາພົບໄດ້ໃນຄົນອາວຸໂສບໍ່ແມ່ນບໍ?
ຊີວິດທີ່ຍືນຍາວກໍນຳຄວາມເຂົ້າໃຈມາໃຫ້ບໍ່ແມ່ນບໍ?
“ແຕ່ສະຕິປັນຍາ ແລະ ອຳນາດເປັນຂອງພຣະເຈົ້າ;
ຄຳປຶກສາ ແລະ ຄວາມເຂົ້າໃຈກໍເປັນຂອງພຣະອົງ.
ສິ່ງທີ່ພຣະອົງທຳລາຍລົງແລ້ວ ກໍບໍ່ສາມາດສ້າງຂຶ້ນມາໃໝ່ໄດ້;
ຄົນທີ່ພຣະອົງກັກຂັງໄວ້ ກໍບໍ່ສາມາດປົດປ່ອຍໄດ້.
ຖ້າພຣະອົງກັກນ້ຳໄວ້, ຄວາມແຫ້ງແລ້ງກໍເກີດຂຶ້ນ;
ຖ້າພຣະອົງປ່ອຍມັນອອກມາ, ມັນກໍທຳລາຍແຜ່ນດິນ.
ກຳລັງ ແລະ ຄວາມເຂົ້າໃຈອັນເລິກເຊິ່ງເປັນຂອງພຣະອົງ;
ທັງຄົນທີ່ຫລອກລວງ ແລະ ຄົນທີ່ຖືກຫລອກລວງເປັນຂອງພຣະອົງ.
ພຣະອົງເຮັດໃຫ້ຜູ້ປົກຄອງອອກໄປຢ່າງເປືອຍກາຍ
ແລະ ເຮັດໃຫ້ຜູ້ພິພາກສາເປັນຄົນໂງ່.
ພຣະອົງປົດໂສ້ທີ່ຜູກມັດບັນດາກະສັດໄວ້
ແລະ ເອົາຜ້າມັດແອວຂອງກະສັດເຫລົ່ານັ້ນ.
ພຣະອົງເຮັດໃຫ້ບັນດາປະໂລຫິດອອກໄປຢ່າງເປືອຍກາຍ
ແລະ ໂຄ່ນລົ້ມບັນດາຂ້າລາຊະການທີ່ຕັ້ງໝັ້ນຄົງແຕ່ດົນນານລົງ.
ພຣະອົງປິດປາກຂອງຜູ້ໃຫ້ຄຳປຶກສາທີ່ໜ້າເຊື່ອຖືໄດ້
ແລະ ເອົາຄວາມສາມາດໃນຕັດສິນໃຈຂອງບັນດາຜູ້ອາວຸໂສອອກໄປ.
ພຣະອົງເທການດູຖູກໃສ່ພວກຂຸນນາງ
ແລະ ປົດອາວຸດຂອງຜູ້ທີ່ມີອໍານາດ.
ພຣະອົງເປີດເຜີຍຄວາມເລິກລັບຂອງຄວາມມືດ
ແລະ ນຳຄວາມມືດມົນມາສູ່ຄວາມສະຫວ່າງ.
ພຣະອົງເຮັດໃຫ້ບັນດາຊົນຊາດທີ່ຍິ່ງໃຫຍ່ ແລະ ທຳລາຍພວກເຂົາ;
ພຣະອົງຂະຫຍາຍບັນດາຊົນຊາດໃຫ້ໃຫຍ່ຂຶ້ນ ແລະ ເຮັດໃຫ້ພວກເຂົາແຕກກະຈັດກະຈາຍໄປ.
ພຣະອົງຖອນບັນດາຜູ້ນຳຂອງແຜ່ນດິນໂລກໄປດ້ວຍເຫດຜົນຂອງພວກເຂົາ;
ພຣະອົງເຮັດໃຫ້ພວກເຂົາພະເນຈອນຢູ່ໃນທີ່ຮົກຮ້າງບໍ່ມີຫົນທາງ.
ພວກເຂົາງົມທາວຢູ່ໃນຄວາມມືດ ໂດຍບໍ່ມີແສງສະຫວ່າງ;
ພຣະອົງເຮັດໃຫ້ພວກເຂົາຍ່າງໂຊເຊດັ່ງຄົນເມົາ.
Source notes (1)
- Footnote ຫລື ປອດໄພ ໃນສິ່ງທີ່ພຣະຫັດຂອງພຣະເຈົ້ານຳມາໃຫ້ພວກພວກເຂົາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.