Biblica® Open Lao Contemporary Version
ເຢເຣມີຢາ 9
ໂອ ຖ້າຫົວຂອງຂ້ານ້ອຍເປັນບໍ່ນ້ຳ
ແລະ ຕາຂອງຂ້ານ້ອຍເປັນນ້ຳພຸແຫ່ງນ້ຳຕາ!
ຂ້ານ້ອຍຈະຮ້ອງໄຫ້ທັງເວັນ ແລະ ຄືນ
ເພື່ອປະຊາຊົນຂອງຂ້ານ້ອຍທີ່ໄດ້ຖືກຂ້າ.
ໂອ ຂ້າພະເຈົ້າຢາກມີບ່ອນໜຶ່ງໃນຖິ່ນແຫ້ງແລ້ງກັນດານ
ເປັນບ່ອນພັກສຳລັບຄົນເດີນທາງ,
ເພື່ອວ່າຂ້ານ້ອບຈະໄດ້ໜີໄປຈາກປະຊາຊົນຂອງຂ້ານ້ອຍ
ແລະ ໄປໄກຈາກພວກເຂົາ;
ເພາະພວກເຂົາທຸກຄົນເປັນຄົນຫລິ້ນຊູ້,
ເປັນປະຊາຊົນທີ່ບໍ່ສັດຊື່.
“ພວກເຂົາຕຽມລິ້ນຂອງຕົນໄວ້
ເໝືອນດັ່ງຄັນທະນູເພື່ອຍິງຄຳຕົວະ;
ມັນບໍ່ແມ່ນຄວາມຈິງ
ທີ່ພວກເຂົາມີໄຊຊະນະ1 ໃນດິນແດນນີ້.
ພວກເຂົາໄປຈາກບາບໜຶ່ງ ແລ້ວກໍໄປຫາບາບອີກອັນໜຶ່ງ;
ພວກເຂົາບໍ່ຍອມຮັບເຮົາ”,
ພຣະເຈົ້າຢາເວປະກາດດັ່ງນີ້.
“ຈົ່ງລະວັງໝູ່ເພື່ອນຂອງພວກເຈົ້າ
ແລະ ຢ່າໄວ້ວາງໃຈຜູ້ໃດໃນຕະກຸນຂອງພວກເຈົ້າ
ເພາະພວກເຂົາທຸກຄົນເປັນຄົນຫລອກລວງ2
ແລະ ໝູ່ເພື່ອນທຸກຄົນເປັນຄົນໃສ່ຮ້າຍປ້າຍສີຄົນອື່ນ.
ໝູ່ຫລອກລວງໝູ່
ແລະ ບໍ່ມີຜູ້ໃດເວົ້າຄວາມຈິງ.
ພວກເຂົາໄດ້ສອນລີ້ນຕົນເອງໃຫ້ເວົ້າຕົວະ;
ພວກເຂົາເຮັດໃຫ້ຕົນເອງອິດເມື່ອຍດ້ວຍການເຮັດບາບ.
ພວກເຈົ້າ3 ອາໄສຢູ່ທ່າມກາງການຫລອກລວງ;
ເພາະການຫລອກລວງຂອງພວກເຂົາ ພວກເຂົາຈຶ່ງບໍ່ຍອມຮັບເຮົາ”,
ພຣະເຈົ້າຢາເວປະກາດດັ່ງນີ້.
ເຫດສະນັ້ນ ພຣະເຈົ້າຢາເວ ຜູ້ມີລິດອໍານາດຍິ່ງໃຫຍ່ກ່າວວ່າ:
“ເບິ່ງແມ, ເຮົາຈະຫລອມ ແລະ ທົດສອບພວກເຂົາ,
ເພາະນອກຈາກນີ້ ເຮົາຈະເຮັດສິ່ງໃດໄດ້ອີກ
ຍ້ອນການບາບຂອງປະຊາຊົນຂອງເຮົາບໍ?
ລິ້ນຂອງພວກເຂົາເປັນລູກທະນູທີ່ເອົາຊີວິດຄົນ;
ຄໍາເວົ້າຂອງພວກເຂົາເຕັມດ້ວຍການຂີ້ຕົວະ.
ດ້ວຍປາກຂອງພວກເຂົາ ພວກເຂົາທຸກຄົນເວົ້າຢ່າງເປັນມິດກັບເພື່ອນບ້ານຂອງພວກຕົນ,
ແຕ່ໃນຈິດໃຈຂອງພວກເຂົາ ພວກເຂົາກໍວາງແຮ້ວໃສ່ເພື່ອນບ້ານ.
ເຮົາຄວນຈະລົງໂທດພວກເຂົາເພາະເລື່ອງນີ້ບໍ?”
ພຣະເຈົ້າຢາເວປະກາດດັ່ງນີ້.
“ເຮົາບໍ່ຄວນຈະແກ້ແຄ້ນໃຫ້ຕົນເອງ
ຕໍ່ຊົນຊາດທີ່ປະພຶດຢ່າງນີ້ບໍ?”
ຂ້ານ້ອຍຈະຮ້ອງໄຫ້ ແລະ ຄ່ຳຄວນໃຫ້ພູເຂົາທັງຫລາຍ
ແລະ ໄປຄ່ຳຄວນກ່ຽວກັບທົ່ງຫຍ້າຕ່າງໆໃນຖິ່ນແຫ້ງແລ້ງກັນດານ.
ພວກມັນໄດ້ຖືກປະຖິ້ມ ແລະ ບໍ່ມີຜູ້ໃດທ່ຽວໄປມາ,
ແລະ ບໍ່ໄດ້ຍິນສຽງຝູງສັດຮ້ອງ.
ຝູງນົກ ແລະ ຝູງສັດທັງໝົດກໍໜີໄປໝົດ.
“ເຮົາຈະເຮັດໃຫ້ເຢຣູຊາເລັມກາຍເປັນຊາກຫັກເພພັງ,
ເປັນບ່ອນຢູ່ຂອງຝູງໝາໄນ
ແລະ ເຮົາຈະເຮັດໃຫ້ເມືອງຕ່າງໆຂອງຢູດາຍເປັນບ່ອນຮົກຮ້າງ
ເພື່ອຈະບໍ່ມີຜູ້ໃດອາໄສຢູ່ທີ່ນັ້ນ”.
ແມ່ນຜູ້ໃດແດ່ທີ່ສະຫລາດພໍທີ່ຈະເຂົ້າໃຈເລື່ອງນີ້? ຜູ້ໃດທີ່ພຣະເຈົ້າຢາເວໄດ້ສັ່ງສອນ ແລະ ສາມາດອະທິບາຍເລື່ອງນີ້ໄດ້? ເປັນຫຍັງດິນແດນຈຶ່ງຖືກທໍາລາຍ ແລະ ຖືກປະຖິ້ມໃຫ້ຮົກຮ້າງເໝືອນດັ່ງທະເລຊາຍທີ່ບໍ່ມີຜູ້ໃດຜ່ານໄປມາ?
ພຣະເຈົ້າຢາເວໄດ້ກ່າວວ່າ, “ເປັນເພາະພວກເຂົາໄດ້ປະຖິ້ມກົດບັນຍັດຂອງເຮົາ, ທີ່ເຮົາໄດ້ຕັ້ງໄວ້ຕໍ່ໜ້າພວກເຂົາ; ພວກເຂົາບໍ່ໄດ້ເຊື່ອຟັງເຮົາ ຫລື ເຮັດຕາມກົດບັນຍັດຂອງເຮົາ. ກົງກັນຂ້າມ, ພວກເຂົາໄດ້ເຮັດຕາມຈິດໃຈອັນດື້ດ້ານຂອງຕົນ; ພວກເຂົາໄດ້ຕິດຕາມພະບາອານດັ່ງທີ່ບັນພະບຸລຸດຂອງພວກເຂົາໄດ້ສອນພວກເຂົາ”. ເຫດສະນັ້ນ ພຣະເຈົ້າຢາເວ ຜູ້ມີລິດອຳນາດຍິ່ງໃຫຍ່, ພຣະເຈົ້າແຫ່ງອິດສະຣາເອນກ່າວວ່າ: “ເບິ່ງແມ, ເຮົາຈະເຮັດໃຫ້ປະຊາຊົນເຫລົ່ານີ້ກິນອາຫານຂົມ ແລະ ດື່ມນ້ຳທີ່ມີພິດ. ເຮົາຈະເຮັດໃຫ້ພວກເຂົາກະຈັດກະຈາຍໄປໃນທ່າມກາງຊົນຊາດຕ່າງໆທີ່ພວກເຂົາ ຫລື ບັນພະບຸລຸດບໍ່ເຄີຍຮູ້ຈັກມາກ່ອນ, ແລະ ເຮົາຈະໄລ່ລ້າພວກເຂົາດ້ວຍດາບຈົນກວ່າເຮົາຈະໄດ້ທຳລາຍພວກເຂົາຈົນໝົດສິ້ນ”.
ພຣະເຈົ້າຢາເວ ຜູ້ມີລິດອຳນາດຍິ່ງໃຫຍ່ກ່າວວ່າ:
“ບັດນີ້ ຈົ່ງພິຈາລະນາເບິ່ງ! ຈົ່ງເອີ້ນເອົາແມ່ຍິງຮ້ອງໄຫ້ຄໍ່າຄວນມາ;
ຈົ່ງສົ່ງພວກແມ່ຍິງທີ່ຊຳນານທີ່ສຸດມາ.
ຈົ່ງໃຫ້ພວກເຂົາຮີບມາໄວໆ
ແລະ ຮ້ອງໄຫ້ຄໍ່າຄວນເພື່ອພວກເຮົາ
ຈົນຕາຂອງພວກເຮົາເຕັມໄປດ້ວຍນໍ້າຕາ
ແລະ ມີນ້ຳໄຫລອອກມາຈາກໜັງຕາຂອງພວກເຮົາ.
ສຽງຮ້ອງໄຫ້ໄດ້ດັງຂຶ້ນມາຈາກຊີໂອນວ່າ:
‘ພວກເຮົາພິນາດຈິບຫາຍແລ້ວ!
ຄວາມອັບອາຍຂອງພວກເຮົາໃຫຍ່ຫລາຍ!
ພວກເຮົາຕ້ອງປະຖິ້ມດິນແດນຂອງພວກເຮົາໄປ
ເພາະເຮືອນຂອງພວກເຮົາຫັກເພພັງໝົດ’ ”.
ບັດນີ້ ພວກແມ່ຍິງ, ຈົ່ງຟັງຖ້ອຍຄຳຂອງພຣະເຈົ້າຢາເວ;
ຈົ່ງເປີດຫູຂອງເຈົ້າອອກຟັງຖ້ອຍຄໍາຈາກປາກຂອງພຣະອົງ.
ຈົ່ງສອນສັ່ງພວກລູກສາວຂອງພວກເຈົ້າໃຫ້ຮູ້ຈັກຮ້ອງໄຫ້ຄໍ່າຄວນຢ່າງໃດ;
ແລະ ຈົ່ງສອນສັ່ງການຄ່ຳຄວນໃຫ້ກັນ.
ຄວາມຕາຍໄດ້ປີນເຂົ້າມາທາງປ່ອງຢ້ຽມຂອງພວກເຮົາ
ແລະ ໄດ້ເຂົ້າໄປໃນປ້ອມປ້ອງກັນຕ່າງໆຂອງພວກເຮົາ;
ມັນໄດ້ເອົາເດັກນ້ອຍອອກໄປຈາກຖະໜົນຫົນທາງ
ແລະ ຄົນໜຸ່ມໄປຈາກເດີ່ນສາທາລະນະ.
ຈົ່ງກ່າວວ່າ, “ພຣະເຈົ້າຢາເວປະກາດດັ່ງນີ້ວ່າ:
“ ‘ຊາກສົບຈະຖືກປະໄວ້ເໝືອນດັ່ງຂີ້ສັດ
ຢູ່ກາງທົ່ງນາ,
ເໝືອນດັ່ງຟ່ອນເຂົ້າທີ່ຖືກຕັດປະໄວ້ທາງຫລັງຄົນເກັບກ່ຽວ,
ໂດຍບໍ່ມີຜູ້ໃດມາເກັບຮວບຮວມພວກມັນໄວ້’ ”.
ພຣະເຈົ້າຢາເວກ່າວວ່າ:
“ຢ່າໃຫ້ຄົນສະຫລາດໂອ້ອວດສະຕິປັນຍາຂອງຕົນ
ຫລື ຢ່າໃຫ້ຄົນແຂງແຮງໂອ້ອວດກຳລັງຂອງຕົນ
ຫລື ຢ່າໃຫ້ຄົນຮັ່ງມີໂອ້ອວດຊັບສົມບັດຂອງຕົນ,
ແຕ່ໃຫ້ຜູ້ທີ່ໂອ້ອວດຈົ່ງໂອ້ອວດເລື່ອງນີ້:
ຄືໃຫ້ພວກເຂົາມີຄວາມເຂົ້າໃຈທີ່ຮູ້ຈັກເຮົາ,
ຮູ້ວ່າເຮົາເປັນພຣະເຈົ້າຢາເວ, ຜູ້ທີ່ສຳແດງຄວາມເມດຕາກະລຸນາ,
ຄວາມຍຸຕິທຳ ແລະ ຄວາມຊອບທຳເທິງແຜ່ນດິນໂລກ,
ເພາະເຮົາປິຕິຍິນດີໃນສິ່ງເຫລົ່ານີ້”,
ພຣະເຈົ້າຢາເວປະກາດດັ່ງນີ້.
ພຣະເຈົ້າຢາເວປະກາດວ່າ, “ວັນນັ້ນຈະມາເຖິງ, ເມື່ອເຮົາຈະລົງໂທດທຸກຄົນທີ່ຮັບພິທີຕັດແຕ່ພຽງຝ່າຍຮ່າງກາຍເທົ່ານັ້ນ ຄື ເອຢິບ, ຢູດາຍ, ເອໂດມ, ອຳໂມນ, ໂມອາບ ແລະ ທຸກຄົນທີ່ອາໄສໃນຖິ່ນແຫ້ງແລ້ງກັນດານຢູ່ບ່ອນຫ່າງໄກ.4 ເພາະຊົນຊາດທັງໝົດເຫລົ່ານີ້ບໍ່ໄດ້ຮັບພິທີຕັດຢ່າງແທ້ຈິງ, ແລະ ແມ່ນແຕ່ຄອບຄົວອິດສະຣາເອນທັງໝົດກໍບໍ່ໄດ້ຮັບພິທີຕັດທາງໃຈ”.
Source notes (4)
- Footnote ຫລື ພວກເຂົາບໍ່ໄດ້ຍືນຍັດຢ່າງກ້າຫານເພື່ອຄວາມຈິງ
- Footnote ຫລື ເປັນຢາໂຄບຜູ້ຫລອກລວງ
- Footnote ຄື ເຢເຣມີຢາ (ໃນພາສາເຮັບເຣີຄຳນີ້ເປັນຄຳຈໍານວນໜ້ອຍ)
- Footnote ຫລື ຖິ່ນແຫ້ງແລ້ງກັນດານ ແລະ ຜູ້ທີ່ນີບຜົມທີ່ໜ້າຜາກຂອງຕົນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.