Biblica® Open Lao Contemporary Version
ເຢເຣມີຢາ 10
ພຣະເຈົ້າກັບຮູບເຄົາລົບ
(ຢມຢ 51:15-19)
ປະຊາຊົນອິດສະຣາເອນ, ຈົ່ງຟັງສິ່ງທີ່ພຣະເຈົ້າຢາເວກ່າວກັບພວກເຈົ້າ. ພຣະເຈົ້າຢາເວກ່າວວ່າ:
“ຢ່າຮຽນເອົາວິຖີທາງຕ່າງໆຂອງຊົນຊາດທັງຫລາຍ
ຫລື ຢ່າຕົກໃຈຢ້ານຈາກໝາຍສຳຄັນຕ່າງໆໃນຟ້າສະຫວັນ,
ດັ່ງທີ່ຊົນຊາດທັງຫລາຍໄດ້ຢ້ານກົວສິ່ງເຫລົ່ານັ້ນ.
ເພາະການປະຕິບັດຂອງຊົນຊາດຕ່າງໆນັ້ນບໍ່ມີປະໂຫຍດຫຍັງ;
ພວກເຂົາຕັດຕົ້ນໄມ້ຕົ້ນໜຶ່ງມາຈາກປ່າ,
ແລ້ວໃຫ້ຊ່າງໄມ້ທີ່ຊໍານານແກະສະຫລັກໄມ້ດ້ວຍສີ່ວຂອງຕົນ.
ພວກເຂົາຕົກແຕ່ງມັນດ້ວຍເງິນ ແລະ ຄໍາ;
ພວກເຂົາໃຊ້ຄ້ອນຕີ ແລະ ຕະປູຕອກມັນໃຫ້ຕິດກັນ.
ເພື່ອວ່າມັນຈະບໍ່ແກວ່ງໄປມາ.
ຮູບເຄົາລົບເຫລົ່ານັ້ນເປັນເໝືອນຫຸ່ນໄລ່ກາໃນສວນໝາກແຕງ,
ຮູບເຄົາລົບຂອງພວກເຂົາເວົ້າບໍ່ໄດ້;
ພວກເຂົາຈະຕ້ອງຫາມມັນໄປ
ເພາະພວກມັນຍ່າງບໍ່ໄດ້.
ຢ່າຢ້ານກົວຮູບເຄົາລົບເຫລົ່ານີ້ເລີຍ;
ເພາະພວກມັນເຮັດອັນຕະລາຍຫຍັງບໍ່ໄດ້
ຫລື ພວກມັນເຮັດຄວາມດີອັນໃດໄດ້”.
ຂ້າແດ່ພຣະເຈົ້າຢາເວ, ບໍ່ມີຜູ້ໃດເປັນເໝືອນພຣະອົງ;
ພຣະອົງຍິ່ງໃຫຍ່ ແລະ ນາມຂອງພຣະອົງກໍມີລິດອຳນາດອັນຍິ່ງໃຫຍ່.
ຂ້າແດ່ກະສັດແຫ່ງຊົນຊາດທັງຫລາຍ,
ຜູ້ໃດແດ່ບໍ່ຄວນຢຳເກງພຣະອົງ?
ພຣະອົງສົມຄວນໄດ້ຮັບກຽດ.
ໃນທ່າມກາງບັນດາຜູ້ນໍານັກປາດທັງໝົດຂອງຊົນຊາດຕ່າງໆ
ແລະ ໃນອານາຈັກທັງໝົດຂອງພວກເຂົາ
ບໍ່ມີຜູ້ໃດເປັນເໝືອນພຣະອົງ.
ພວກເຂົາລ້ວນແຕ່ບໍ່ຮູ້ຈັກຄິດ ແລະ ໂງ່ຈ້າທັງນັ້ນ;
ພວກເຂົາຖືກສອນໂດຍພວກຮູບເຄົາລົບທີ່ເປັນໄມ້ອັນໄຮ້ຄ່າ.
ພວກເຂົາເອົາເງິນທີ່ໄດ້ຕີແລ້ວຈາກເມືອງຕາກຊິດ
ແລະ ຄຳມາຈາກເມືອງອູຟາດ.
ສິ່ງທີ່ຊ່າງໄມ້ ແລະ ຊ່າງຄໍາໄດ້ເຮັດຂຶ້ນ
ແລ້ວກໍໄດ້ນຸ່ງເຄື່ອງໃຫ້ຮູບເຄົາລົບດ້ວຍສີຟ້າ ແລະ ສີມ່ວງ
ຮູບເຄົາລົບທັງໝົດນັ້ນເຮັດຂຶ້ນໂດຍພວກນາຍຊ່າງທີ່ຊຳນິຊຳນານ.
ແຕ່ພຣະເຈົ້າຢາເວເປັນພຣະເຈົ້າທ່ຽງແທ້;
ພຣະອົງເປັນພຣະເຈົ້າຜູ້ມີຊີວິດຢູ່, ເປັນກະສັດຕະຫລອດໄປເປັນນິດ.
ເມື່ອພຣະອົງໃຈຮ້າຍ, ແຜ່ນດິນໂລກກໍສັ່ນສະທ້ານ;
ຊົນຊາດທັງຫລາຍບໍ່ສາມາດອົດທົນຕໍ່ຄວາມໂກດຮ້າຍຂອງພຣະອົງໄດ້.
“ຈົ່ງບອກພວກເຂົາດັ່ງນີ້ວ່າ: ‘ບັນດາພະເຫລົ່ານີ້ບໍ່ໄດ້ເປັນສ້າງຟ້າສະຫວັນ ແລະ ແຜ່ນດິນໂລກ, ບັນດາພະເຫລົ່ານັ້ນຈະພິນາດຈິບຫາຍໄປຈາກແຜ່ນດິນໂລກ ແລະ ຈາກໃຕ້ຟ້າສະຫວັນ’ ”1.
ແຕ່ພຣະເຈົ້າໄດ້ສ້າງແຜ່ນດິນໂລກໂດຍລິດອໍານາດຂອງພຣະອົງ;
ພຣະອົງໄດ້ຕັ້ງໂລກໂດຍສະຕິປັນຍາຂອງພຣະອົງ
ແລະ ກາງຟ້າສະຫວັນອອກໂດຍຄວາມເຂົ້າໃຈຂອງພຣະອົງ.
ເມື່ອພຣະອົງເປັ່ງສຽງຮ້ອງ, ນ້ຳໃນຟ້າສະຫວັນກໍຮ້ອງດັງກຶກກ້ອງ;
ພຣະອົງເຮັດໃຫ້ເມກລອຍຂຶ້ນຈາກສຸດປາຍແຜ່ນດິນໂລກ.
ພຣະອົງສົ່ງຟ້າແມບມາພ້ອມກັບສາຍຝົນ
ແລະ ນຳເອົາລົມພັດມາຈາກຄັງຂອງພຣະອົງ.
ທຸກຄົນກໍບໍ່ຮູ້ຈັກຄິດ ແລະ ຂາດຄວາມຮູ້;
ຊ່າງຄໍາທຸກຄົນກໍອັບອາຍຂາຍໜ້າເພາະຮູບເຄົາລົບຂອງຕົນ.
ບັນດາພະທີ່ລາວໄດ້ເຮັດຂຶ້ນກໍເປັນການຫລອກຫລວງ;
ພວກມັນບໍ່ໄດ້ມີລົມຫາຍໃຈ.
ພວກມັນບໍ່ມີຄຸນຄ່າຫຍັງ, ເປັນວັດຖຸທີ່ໜ້າເຢາະເຢີ້ຍ;
ເມື່ອການພິພາກສາຂອງພວກມັນມາເຖິງ, ພວກມັນກໍຈະພິນາດ.
ແຕ່ພຣະອົງຜູ້ທີ່ເປັນຂອງຢາໂຄບບໍ່ຄືກັນກັບພະເຫລົ່ານີ້,
ເພາະພຣະອົງເປັນພຣະຜູ້ສ້າງສັບພະທຸກສິ່ງ,
ລວມທັງອິດສະຣາເອນຄື ປະຊາຊົນທີ່ເປັນກຳມະສິດຂອງພຣະອົງ
ນາມຂອງພຣະອົງແມ່ນພຣະເຈົ້າຢາເວ ຜູ້ມີລິດອຳນາດຍິ່ງໃຫຍ່.
ການທໍາລາຍກໍາລັງມາ
ປະຊາຊົນທີ່ຖືກປິດລ້ອມໄວ້,
ຈົ່ງເກັບເຄື່ອງຂອງພວກເຈົ້າເພື່ອໜີອອກໄປຈາກດິນແດນນັ້ນ.
ເພາະພຣະເຈົ້າຢາເວກ່າວດັ່ງນີ້ວ່າ:
“ໃນເວລານີ້ ເຮົາຈະໂຍນ
ບັນດາຜູ້ທີ່ອາໄສຢູ່ໃນດິນແດນນີ້ອອກໄປ;
ເຮົາຈະນຳຄວາມທຸກລຳບາກມາສູ່ພວກເຂົາ
ເພື່ອວ່າພວກເຂົາຈະຖືກຈັບໄປ”.
ວິບັດແກ່ຂ້ານ້ອຍຍ້ອນການບາດເຈັບຂອງຂ້ານ້ອຍ!
ບາດແຜຂອງຂ້ານ້ອຍກໍປິ່ນປົວບໍ່ຫາຍດີ!
ແຕ່ຂ້ານ້ອຍກໍໄດ້ບອກຕົນເອງວ່າ,
“ນີ້ແມ່ນການເຈັບປ່ວຍຂອງຂ້ານ້ອຍ, ແລະ ຂ້ານ້ອຍຕ້ອງອົດທົນເອົາ”.
ເຕັນຂອງຂ້ານ້ອຍໄດ້ຖືກທຳລາຍ;
ເຊືອກຄຶງເຕັນທັງໝົດກໍຂາດ.
ພວກລູກຂອງຂ້ານ້ອຍໄປຈາກຂ້ານ້ອຍໝົດ ແລະ ບໍ່ມີຜູ້ໃດເຫລືອຢູ່;
ບັດນີ້ ບໍ່ມີຈັກຄົນເຫລືອເພື່ອກາງເຕັນຂອງຂ້ານ້ອຍ
ຫລື ສ້າງບ່ອນກຳບັງຂອງຂ້ານ້ອຍ.
ຄົນລ້ຽງແກະກໍບໍ່ຮູ້ຈັກຄິດ
ແລະ ບໍ່ໄດ້ຖາມພຣະເຈົ້າຢາເວ;
ດັ່ງນັ້ນ ພວກເຂົາຈຶ່ງບໍ່ຈະເລີນຂຶ້ນ
ແລະ ຝູງແກະທັງໝົດຂອງພວກເຂົາກໍໄດ້ກະຈັດກະຈາຍໄປ.
ຈົ່ງຟັງ! ມີລາຍງານກໍາລັງມາວ່າ
ມີສຽງຄວາມວຸ້ນວາຍຢ່າງໃຫຍ່ມາຈາກດິນແດນທາງທິດເໜືອ!
ມັນຈະເຮັດໃຫ້ເມືອງຕ່າງໆຂອງຢູດາຍຖືກປະຖິ້ມໃຫ້ຮົກຮ້າງ,
ເປັນບ່ອນຢູ່ຂອງຝູງໝາໄນ.
ຄຳອະທິຖານຂອງເຢເຣມີຢາ
ຂ້າແດ່ພຣະເຈົ້າຢາເວ, ຂ້ານ້ອຍຮູ້ວ່າມະນຸດບໍ່ໄດ້ເປັນເຈົ້າຂອງຊີວິດຂອງຕົນເອງ;
ບໍ່ແມ່ນພວກເຂົາທີ່ກໍານົດບາດກ້າວຂອງຕົນ.
ຂ້າແດ່ພຣະເຈົ້າຢາເວ, ຂໍຕີສອນຂ້ານ້ອຍ, ແຕ່ຂໍໃຫ້ຢູ່ໃນຄວາມເໝາະສົມ
ບໍ່ແມ່ນດ້ວຍຄວາມໃຈຮ້າຍຂອງພຣະອົງ,
ບໍ່ດັ່ງນັ້ນ ພຣະອົງຈະເຮັດໃຫ້ຂ້ານ້ອຍຕົກຕໍ່າລົງຈົນບໍ່ມີຫຍັງ.
ຂໍລະບາຍຄວາມໂກດຮ້າຍຂອງພຣະອົງໃສ່ຊົນຊາດທັງຫລາຍ
ທີ່ບໍ່ຍອມຮັບພຣະອົງ,
ໃສ່ປະຊາຊົນທັງຫລາຍທີ່ບໍ່ຍອມຮ້ອງອອກນາມຂອງພຣະອົງ.
ເພາະພວກເຂົາໄດ້ໂຈມຕີຢາໂຄບ;
ພວກເຂົາທໍາລາຍລາວຈົນໝົດສິ້ນ
ແລະ ໄດ້ທຳລາຍບ້ານເກີດຂອງລາວ.
Source notes (1)
- Footnote ພະຄຳພີຂໍ້ນີ້ເປັນພາສາອານເມກ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.