Biblica® Open Lao Contemporary Version
ເຢເຣມີຢາ 6
ເຢຣູຊາເລັມຖືກປິດລ້ອມ
“ຈົ່ງໜີໄປຫາບ່ອນປອດໄພ, ປະຊາຊົນເບັນຢາມິນ!
ຈົ່ງໜີໄປຈາກເຢຣູຊາເລັມ!
ຈົ່ງເປົ່າແກຂຶ້ນໃນເມືອງເຕກົວ!
ຈົ່ງສົ່ງສັນຍານຂຶ້ນເໜືອເມືອງເບັດຮັກເກເຣັມ!
ເພາະໄພພິບັດເກີດຂຶ້ນມາຈາກທາງທິດເໜືອ,
ເປັນການທໍາລາຍອັນໜ້າຢ້ານ.
ເຮົາຈະທຳລາຍລູກສາວແຫ່ງຊີໂອນ,1
ທີ່ງາມຫລາຍ ແລະ ອ່ອນຫວານຫລາຍ.
ຄົນລ້ຽງແກະພ້ອມທັງຝູງແກະຂອງພວກເຂົາຈະມາຕໍ່ສູ້ນາງ;
ພວກເຂົາຈະກາງເຕັນຂອງຕົນອ້ອມເມືອງ,
ແຕ່ລະຄົນກໍເບິ່ງແຍງຝູງສັດຂອງຕົນ”.
“ຈົ່ງຕຽມເຮັດເສິກຕໍ່ສູ້ຊີໂອນ!
ຈົ່ງລຸກຂຶ້ນ, ໃຫ້ພວກເຮົາໂຈມຕີໃນຕອນທ່ຽງ!
ແຕ່ມັນຊ້າໄປແລ້ວ, ຕາເວັນກໍາລັງຈະຕົກດິນ,
ແລະ ເງົາຂອງຍາມແລງຈະຢູ່ອີກດົນ.
ສະນັ້ນ ຈົ່ງລຸກຂຶ້ນ, ໃຫ້ພວກເຮົາໂຈມຕີໃນຕອນກາງຄືນ
ແລະ ທຳລາຍປ້ອມປ້ອງກັນຕ່າງໆຂອງເມືອງທັງຫລາຍ!”
ພຣະເຈົ້າຢາເວຜູ້ມີລິດອຳນາດຍິ່ງໃຫຍ່ກ່າວວ່າ:
“ຈົ່ງຕັດຕົ້ນໄມ້ລົງ
ແລະ ຄູນດິນຂຶ້ນຕໍ່ສູ້ເຢຣູຊາເລັມ.
ເມືອງນີ້ຈະຕ້ອງຖືກລົງໂທດ;
ເປັນເມືອງທີ່ເຕັມໄປດ້ວຍການກົດຂີ່.
ເໝືອນດັ່ງນໍ້າສ້າງປ່ອຍນ້ຳຂອງມັນໃຫ້ໄຫລອອກມາ,
ເຢຣູຊາເລັມກໍປ່ອຍຄວາມຊົ່ວຮ້າຍຂອງຕົນອອກມາ,
ຄວາມຮຸນແຮງ ແລະ ການທຳລາຍດັງຂຶ້ນໃນເມືອງນີ້
ການເຈັບປ່ວຍ ແລະ ບາດແຜຂອງນາງມີຢູ່ຕໍ່ໜ້າເຮົາສະເໝີ.
ເຢຣູຊາເລັມ, ຈົ່ງຮັບເອົາການຕັກເຕືອນ,
ບໍ່ດັ່ງນັ້ນ ເຮົາຈະຫັນໜີໄປຈາກເຈົ້າ
ແລະ ເຮັດໃຫ້ດິນແດນຂອງເຈົ້າຮົກຮ້າງ
ຈົນບໍ່ມີຜູ້ໃດອາໄສຢູ່ໃນດິນແດນນີ້ໄດ້”.
ພຣະເຈົ້າຢາເວ ຜູ້ມີລິດອຳນາດຍິ່ງໃຫຍ່ກ່າວວ່າ:
“ໃຫ້ພວກເຂົາຮວບຮວມອິດສະຣາເອນທີ່ເຫລືອຢູ່
ເໝືອນດັ່ງເກັບໝາກອະງຸ່ນຈົນໝົດກ້ຽງ;
ໃຊ້ມືຂອງເຈົ້າກວດເບິ່ງເຄືອອະງຸ່ນອີກ,
ດັ່ງຄົນທີ່ກໍາລັງຮວບຮວມໝາກອະງຸ່ນ”.
ຂ້ານ້ອຍຈະເວົ້າ ແລະ ຕັກເຕືອນຜູ້ໃດໄດ້?
ຜູ້ໃດຈະຟັງຂ້ານ້ອຍ?
ຫູຂອງພວກເຂົາປິດໄວ້ຢູ່2
ສະນັ້ນ ພວກເຂົາຈຶ່ງບໍ່ໄດ້ຍິນ.
ຖ້ອຍຄຳຂອງພຣະເຈົ້າຢາເວເປັນທີ່ໜ້າກຽດຊັງສໍາລັບພວກເຂົາ;
ພວກເຂົາບໍ່ພົບຄວາມພໍໃຈໃນຖ້ອຍຄໍານັ້ນ.
ແຕ່ຂ້ານ້ອຍກໍເຕັມໄປດ້ວຍຄວາມໂກດຮ້າຍຂອງພຣະເຈົ້າຢາເວ,
ແລະ ຂ້ານ້ອຍກໍອົດທົນກັບມັນບໍ່ໄດ້.
“ຈົ່ງລະບາຍຄວາມໂກດຮ້າຍຂອງເຮົາອອກໃສ່ເດັກນ້ອຍຕາມຖະໜົນຫົນທາງ
ແລະ ໃສ່ຄົນໜຸ່ມທີ່ຊຸມນຸມກັນຢູ່;
ທັງຜົວ ແລະ ເມຍກໍຈະຖືກຈັບໄປ,
ແລະ ຜູ້ເຖົ້າ, ບັນດາຄົນເຫລົ່ານັ້ນທີ່ລ່ວງພົ້ນໄປ.
ເຮືອນຂອງພວກເຂົາຈະເປັນຂອງຄົນອື່ນ,
ພ້ອມທັງທົ່ງນາ ແລະ ເມຍຂອງພວກເຂົາດ້ວຍ,
ເມື່ອເຮົາຈະຢຽດມືຂອງເຮົາອອກ
ຕໍ່ສູ້ບັນດາຜູ້ທີ່ອາໄສຢູ່ໃນແຜ່ນດິນນີ້,”
ພຣະເຈົ້າຢາເວປະກາດດັ່ງນີ້.
“ຕັ້ງແຕ່ຜູ້ຕໍ່າຕ້ອຍທີ່ສຸດຈົນເຖິງຜູ້ໃຫຍ່ທີ່ສຸດ,
ທຸກຄົນກໍໂລບມາກເພື່ອຢາກໄດ້ຜົນກໍາໄລ;
ບັນດາຜູ້ທໍານວາຍ ແລະ ບັນດາປະໂລຫິດກໍເໝືອນກັນ
ທຸກຄົນກໍໄດ້ຫລອກລວງ.
ພວກເຂົາເຮັດບາດແຜໃຫ້ປະຊາຊົນຂອງເຮົາ
ເໝືອນວ່າມັນບໍ່ຮ້າຍແຮງເທົ່າໃດ.
ພວກເຂົາເວົ້າວ່າ, ‘ສັນຕິສຸກ ສັນຕິສຸກ’
ທັງທີ່ບໍ່ມີສັນຕິສຸກ.
ພວກເຂົາອັບອາຍໃນການປະພຶດອັນໜ້າລັງກຽດຂອງພວກເຂົາບໍ?
ບໍ່, ພວກເຂົາບໍ່ໄດ້ມີຄວາມລະອາຍຈັກໜ້ອຍ;
ພວກເຂົາບໍ່ຮູ້ວ່າໜ້າແດງນັ້ນເປັນຢ່າງໃດ.
ດັ່ງນັ້ນ ພວກເຂົາຈະລົ້ມລົງໃນທ່າມກາງຄົນທີ່ໄດ້ລົ້ມລົງ;
ພວກເຂົາຈະຕົກຕ່ຳລົງເມື່ອເຮົາລົງໂທດພວກເຂົາ”,
ພຣະເຈົ້າຢາເວກ່າວດັ່ງນີ້.
ພຣະເຈົ້າຢາເວກ່າວວ່າ:
“ຈົ່ງຢືນຢູ່ທີ່ທາງສີ່ແຍກ ແລະ ຈົ່ງເບິ່ງແມ;
ຈົ່ງຖາມເຖິງເສັ້ນທາງດັ້ງເດີມ,
ຈົ່ງຖາມຫາເສັ້ນທາງດີຢູ່ໃສ ແລະ ຈົ່ງຍ່າງໄປຕາມທາງນັ້ນ,
ແລະ ເຈົ້າຈະພົບການພັກຜ່ອນສຳລັບຈິດໃຈຂອງເຈົ້າ.
ແຕ່ເຈົ້າໄດ້ເວົ້າວ່າ, ‘ພວກເຮົາຈະບໍ່ຍ່າງໄປຕາມທາງນັ້ນ’.
ເຮົາໄດ້ແຕ່ງຕັ້ງຄົນເຝົ້າຍາມພວກເຈົ້າໄວ້ ແລະ ໄດ້ເວົ້າວ່າ,
‘ຈົ່ງຟັງສຽງແກ!’
ແຕ່ພວກເຈົ້າໄດ້ເວົ້າວ່າ ‘ພວກເຮົາຈະບໍ່ຟັງ’.
ເຫດສະນັ້ນຈົ່ງຟັງ, ຊົນຊາດທັງຫລາຍ;
ພວກເຈົ້າຜູ້ທີ່ເປັນພະຍານ,
ຈົ່ງສັງເກດເບິ່ງສິ່ງທີ່ຈະເກີດຂຶ້ນກັບພວກເຂົາ.
ແຜ່ນດິນໂລກ, ຈົ່ງຟັງ:
ເຮົາກຳລັງນຳໄພພິບັດມາສູ່ປະຊາຊົນນີ້,
ເຊິ່ງເປັນຜົນມາຈາກແຜນການຊົ່ວຮ້າຍຂອງພວກເຂົາ,
ເພາະພວກເຂົາບໍ່ໄດ້ຟັງຖ້ອຍຄຳຂອງເຮົາ
ແລະ ໄດ້ປະຖິ້ມກົດບັນຍັດຂອງເຮົາ.
ເຮົາສົນໃຈອັນໃດກ່ຽວກັບເຄື່ອງຫອມຈາກເຊບາ
ຫລື ເຄື່ອງເທດຫອມຈາກດິນແດນຫ່າງໄກບໍ?
ການເຜົາເຄື່ອງຖວາຍບູຊາຂອງເຈົ້າບໍ່ເປັນທີ່ຍອມຮັບ;
ເຄື່ອງບູຊາຂອງເຈົ້າບໍ່ໄດ້ເຮັດໃຫ້ເຮົາພໍໃຈ”.
ເຫດສະນັ້ນ ພຣະເຈົ້າຢາເວກ່າວວ່າ:
“ເຮົາຈະວາງສິ່ງກີດຂວາງໄວ້ຕໍ່ໜ້າປະຊາຊົນນີ້.
ທັງພໍ່ແມ່ ແລະ ລູກຈະສະດຸດລົ້ມລົງຄືກັນ;
ເພື່ອນບ້ານ ແລະ ມິດສະຫາຍກໍຈະຈິບຫາຍ”.
ພຣະເຈົ້າຢາເວກ່າວວ່າ:
“ເບິ່ງແມ, ກອງທັບໜຶ່ງກໍາລັງມາ
ຈາກດິນແດນທາງທິດເໜືອ;
ຊົນຊາດຍິ່ງໃຫຍ່ກຳລັງເກີດຄວາມປັ່ນປ່ວນ
ຈາກສຸດປາຍແຜ່ນດິນໂລກ.
ພວກເຂົາຖືທະນູ ແລະ ຫອກ;
ພວກເຂົາໂຫດຮ້າຍ ແລະ ບໍ່ມີຄວາມເມດຕາ.
ພວກເຂົາຂີ່ມ້າຂອງຕົນສຽງດັງເໝືອນດັ່ງ
ສຽງທະເລຄຶກຄະນອງ;
ພວກເຂົາມາເໝືອນດັ່ງທະຫານຕັ້ງແຖວສູ້ຮົບ
ເພື່ອໂຈມຕີເຈົ້າ, ລູກສາວແຫ່ງຊີໂອນ”.
ພວກເຮົາໄດ້ຍິນຂ່າວຊ່າລືກ່ຽວກັບພວກເຂົາ,
ແລະ ມືຂອງພວກເຮົາກໍອ່ອນເພຍລົງ.
ຄວາມທຸກໃຈກໍໄດ້ປົກຄຸມພວກເຮົາ,
ເຈັບປວດເໝືອນດັ່ງແມ່ຍິງທີ່ກຳລັງເກີດລູກ.
ຢ່າອອກໄປທົ່ງນາ
ຫລື ຍ່າງໄປຕາມຖະໜົນຫົນທາງ,
ເພາະສັດຕູຖືດາບຢູ່,
ແລະ ບໍ່ວ່າຈະໄປທາງໃດກໍມີຄວາມຢ້ານຢູ່ທຸກດ້ານ.
ປະຊາຊົນຂອງເຮົາ, ຈົ່ງນຸ່ງຜ້າກະສອບເຂົ້າ
ແລະ ກິ້ງເກືອກຢູ່ໃນກອງຂີ້ເຖົ່າໄຟ;
ຈົ່ງໄວ້ທຸກດ້ວຍຄວາມຂົມຂື່ນ
ເໝືອນກັບວ່າລູກຊາຍຄົນດຽວໄດ້ຕາຍໄປ,
ເພາະຜູ້ທຳລາຍຈະມາໂຈມຕີ
ພວກເຮົາໃນທັນທີທັນໃດ.
“ເຮົາໄດ້ເຮັດໃຫ້ເຈົ້າເປັນນັກກວດສອບໂລຫະ
ແລະ ປະຊາຊົນຂອງເຮົາເປັນແຮ່ທາດ,
ເພື່ອເຈົ້າຈະສັງເກດເບິ່ງ
ແລະ ທົດສອບວິຖີທາງຕ່າງໆຂອງພວກເຂົາ.
ພວກເຂົາທຸກຄົນເປັນຄົນກະບົດດື້ດ້ານ,
ທີ່ທຽວໄປຫານິນທາຄົນ.
ພວກເຂົາເປັນດັ່ງທອງສຳລິດ ແລະ ເຫລັກ;
ພວກເຂົາທຸກຄົນກໍປະພຶດຊົ່ວ.
ເປັນເໝືອນເຄື່ອງເປົ່າລົມຢ່າງແຮງ
ເພື່ອເຜົາກົວໃຫ້ໝົດໄປດ້ວຍໄຟ,
ແຕ່ການຫລໍ່ຫລອມກໍບໍ່ມີປະໂຫຍດຫຍັງ;
ຄົນຊົ່ວຮ້າຍບໍ່ໄດ້ຖືກກຳຈັດອອກໄປ.
ພວກເຂົາຈະຖືກເອີ້ນວ່າ ‘ເງິນທີ່ຖືກປະຖິ້ມ’,
ເພາະພຣະເຈົ້າຢາເວໄດ້ປະຖິ້ມພວກເຂົາແລ້ວ”.
Source notes (2)
- Footnote ຄື ຊາວເຢຣູຊາເລັມ ເຊັ່ນດຽວກັບຂໍ້ 23
- Footnote ພາສາເຮັບເຣີວ່າ ບໍ່ໄດ້ເຮັດພິທີຕັດ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.