Biblica® Open Lao Contemporary Version
ເຢເຣມີຢາ 5
ບໍ່ມີຜູ້ໃດທ່ຽງທຳ
“ຈົ່ງຂຶ້ນໄປ ແລະ ລົງມາຕາມຖະໜົນຫົນທາງຂອງເຢຣູຊາເລັມ,
ຈົ່ງເບິ່ງໄປອ້ອມຮອບ ແລະ ຈົ່ງພິຈາລະນາເບິ່ງ,
ຈົ່ງຄົ້ນຫາຢູ່ຕາມແຈທາງຂອງເມືອງ.
ຖ້າເຈົ້າພົບແມ່ນແຕ່ຄົນດຽວ
ຜູ້ທີ່ປະຕິບັດຢ່າງສັດຊື່ ແລະ ສະແຫວງຫາຄວາມຈິງ,
ເຮົາກໍຈະຍົກໂທດໃຫ້ເມືອງນີ້.
ເຖິງແມ່ນວ່າພວກເຂົາເວົ້າວ່າ, ‘ພຣະເຈົ້າຢາເວມີຊີວິດຢູ່ສັນໃດ’
ພວກເຂົາກໍຍັງກຳລັງສາບານບໍ່ຈິງ”.
ຂ້າແດ່ພຣະເຈົ້າຢາເວ, ຕາຂອງພຣະອົງຊອກຫາຄວາມຈິງບໍ່ແມ່ນບໍ?
ພຣະອົງຂ້ຽນຕີພວກເຂົາ, ແຕ່ພວກເຂົາກໍບໍ່ຮູ້ສຶກເຈັບ;
ພຣະອົງຍ່ອງພວກເຂົາ, ແຕ່ພວກເຂົາກໍບໍ່ຍອມຮັບການຕີສອນ.
ພວກເຂົາເຮັດໃຫ້ໜ້າຂອງຕົນດ້ານຫລາຍກວ່າກ້ອນຫີນ
ແລະ ບໍ່ຍອມກັບໃຈໃໝ່.
ຂ້ານ້ອຍຄິດວ່າ, “ຄົນເຫລົ່ານີ້ເປັນພຽງແຕ່ຄົນທຸກຍາກ;
ພວກເຂົາເປັນຄົນໂງ່ຈ້າຫລາຍ,
ເພາະພວກເຂົາບໍ່ຮູ້ວິຖີທາງຂອງພຣະເຈົ້າຢາເວ,
ບໍ່ຮູ້ຈັກສິ່ງທີ່ພຣະເຈົ້າຂອງພວກເຂົາຕ້ອງການ.
ສະນັ້ນ ຂ້ານ້ອຍຈະໄປຫາບັນດາຜູ້ນຳ
ແລະ ຈະເວົ້າກັບພວກເຂົາ;
ພວກເຂົາຮູ້ຈັກວິຖີທາງຂອງພຣະເຈົ້າຢາເວ,
ຮູ້ຈັກສິ່ງທີ່ພຣະເຈົ້າຂອງພວກເຂົາຕ້ອງການຢ່າງແນ່ນອນ”.
ແຕ່ພວກເຂົາໄດ້ຫັກແອກອອກດ້ວຍການພ້ອມໃຈກັນ
ແລະ ທໍາລາຍເຄື່ອງຜູກມັດຕ່າງໆດ້ວຍ.
ເຫດສະນັ້ນ ໂຕສິງຈາກປ່າຈະມາໂຈມຕີພວກເຂົາ,
ໝາປ່າຈາກທະເລຊາຍຈະທຳລາຍພວກເຂົາ,
ເສືອດາວຈະດັກຈັບຢູ່ໃກ້ເມືອງຕ່າງໆຂອງພວກເຂົາ
ເພື່ອລໍຖ້າຈີກຜູ້ໃດກໍຕາມທີ່ອອກມານັ້ນເປັນຕ່ອນໆ,
ເພາະການກະບົດຂອງພວກເຂົາກໍຮ້າຍແຮງ
ແລະ ການເຮັດບາບຂອງພວກເຂົາມີຢ່າງຫລວງຫລາຍ.
“ເປັນຫຍັງເຮົາຈຶ່ງຄວນຍົກໂທດໃຫ້ພວກເຈົ້າ?
ລູກຫລານຂອງພວກເຈົ້າໄດ້ປະຖິ້ມເຮົາ
ແລະ ສາບານໂດຍນາມຂອງພະຕ່າງໆ, ທີ່ບໍ່ແມ່ນພຣະເຈົ້າ.
ເຮົາໄດ້ຈັດຕຽມທຸກສິ່ງທີ່ຈຳເປັນໃຫ້ພວກເຂົາ,
ແຕ່ພວກເຂົາໄດ້ຫລິ້ນຊູ້
ແລະ ໄດ້ຊຸມນຸມກັນທີ່ເຮືອນພວກຍິງໂສເພນີ.
ພວກເຂົາເປັນດັ່ງມ້າເຖິກທີ່ໄດ້ຮັບການລ້ຽງດູຢ່າງດີ, ມີຕັນຫາຫລາຍ,
ແຕ່ລະຄົນກໍຢາກໄດ້ເມຍຂອງເພື່ອນບ້ານ.
ເຮົາຄວນຈະລົງໂທດພວກເຂົາເພາະເລື່ອງນີ້ບໍ?”
ພຣະເຈົ້າຢາເວປະກາດດັ່ງນີ້.
“ເຮົາຄວນຈະແກ້ແຄ້ນໃຫ້ຕົນເອງ
ຕໍ່ຊົນຊາດທີ່ປະພຶດຢ່າງນີ້ບໍ?
“ຈົ່ງໄປຕາມທາງຍ່າງຂອງສວນອະງຸ່ນຂອງອິດສະຣາເອນ ແລະ ທຳລາຍສວນນັ້ນຖິ້ມ,
ແຕ່ຢ່າທຳລາຍຈົນພວກມັນໝົດສິ້ນ.
ຈົ່ງຕັດກິ່ງຕ່າງໆຈາກເຄືອອະງຸ່ນອອກ,
ເພາະປະຊາຊົນເຫລົ່ານີ້ບໍ່ໄດ້ເປັນຂອງພຣະເຈົ້າຢາເວ.
ປະຊາຊົນອິດສະຣາເອນ ແລະ ປະຊາຊົນຢູດາຍ
ບໍ່ໄດ້ສັດຊື່ຕໍ່ເຮົາຈົນເຖິງທີ່ສຸດ”
ພຣະເຈົ້າຢາເວປະກາດດັ່ງນີ້.
ພວກເຂົາໄດ້ຕົວະກ່ຽວກັບພຣະເຈົ້າຢາເວ;
ພວກເຂົາໄດ້ເວົ້າວ່າ, “ພຣະອົງຈະບໍ່ເຮັດຫຍັງດອກ!
ຈະບໍ່ມີອັນຕະລາຍໃດໆຈະມາຫາພວກເຮົາ;
ພວກເຮົາຈະບໍ່ເຫັນສົງຄາມ ຫລື ການອຶດຢາກອາຫານ.
ບັນດາຜູ້ທໍານວາຍເປັນແຕ່ພຽງລົມເທົ່ານັ້ນ
ບໍ່ມີຖ້ອຍຄຳຂອງພຣະເຈົ້າໃນປາກຂອງພວກເຂົາ;
ດັ່ງນັ້ນ ຂໍໃຫ້ສິ່ງທີ່ພວກເຂົາເວົ້າຕົກໃສ່ພວກເຂົາ”.
ເຫດສະນັ້ນ ພຣະເຈົ້າຢາເວ ພຣະເຈົ້າຜູ້ມີລິດອຳນາດຍິ່ງໃຫຍ່ກ່າວວ່າ:
“ຍ້ອນປະຊາຊົນໄດ້ເວົ້າຖ້ອຍຄໍາເຫລົ່ານີ້,
ເຮົາຈະເຮັດໃຫ້ຖ້ອຍຄຳຂອງເຮົາໃນປາກຂອງເຈົ້ານັ້ນເປັນດັ່ງໄຟ
ແລະ ໃຫ້ປະຊາຊົນເຫລົ່ານີ້ເປັນດັ່ງຟືນທີ່ໄຟຈະເຜົາໄໝ້.
ປະຊາຊົນອິດສະຣາເອນ”, ພຣະເຈົ້າຢາເວປະກາດວ່າ,
“ເຮົາກຳລັງນຳຊົນຊາດທີ່ຢູ່ຫ່າງໄກມາຕໍ່ສູ້ເຈົ້າ
ເປັນຊົນຊາດເກົ່າແກ່ ແລະ ດໍາລົງຢູ່ມາແຕ່ດົນນານ,
ເປັນຊົນຊາດທີ່ພວກເຈົ້າບໍ່ຮູ້ຈັກພາສາ,
ທີ່ເຈົ້າບໍ່ເຂົ້າໃຈຄຳເວົ້າ.
ລູກທະນູຂອງພວກເຂົາເປັນເໝືອນຂຸມຝັງສົບທີ່ເປີດອອກ;
ພວກເຂົາທຸກຄົນເປັນດັ່ງບັນດານັກຮົບທີ່ຍິ່ງໃຫຍ່.
ພວກເຂົາຈະທໍາລາຍຜົນລະປູກ ແລະ ອາຫານຂອງພວກເຈົ້າ,
ຂ້າພວກລູກຊາຍ ແລະ ພວກລູກສາວຂອງພວກເຈົ້າ;
ພວກເຂົາຈະຂ້າຝູງແກະ ແລະ ຝູງສັດຂອງພວກເຈົ້າ,
ທໍາລາຍເຄືອອະງຸ່ນ ແລະ ຕົ້ນໝາກເດື່ອຂອງພວກເຈົ້າ.
ພວກເຂົາຈະໃຊ້ດາບທຳລາຍ
ເມືອງທີ່ມີປ້ອມປ້ອງກັນຕ່າງໆທີ່ເຈົ້າໄວ້ວາງໃຈນັ້ນ”.
ພຣະເຈົ້າຢາເວປະກາດວ່າ, “ເມື່ອເຖິງເວລານັ້ນ, ເຮົາກໍຈະບໍ່ທຳລາຍພວກເຈົ້າຈົນໝົດສິ້ນ. ແລະ ເມື່ອປະຊາຊົນຖາມວ່າ, ‘ເປັນຫຍັງພຣະເຈົ້າຢາເວ ພຣະເຈົ້າຂອງພວກເຮົາຈຶ່ງໄດ້ເຮັດສິ່ງທັງໝົດນີ້ຕໍ່ພວກເຮົາ?’ ເຈົ້າຈະບອກພວກເຂົາວ່າ, ‘ພວກເຈົ້າໄດ້ປະຖິ້ມເຮົາ ແລະ ໄດ້ຮັບໃຊ້ບັນດາພະຕ່າງຊາດໃນດິນແດນຂອງພວກເຈົ້າເອງ, ສະນັ້ນ ບັດນີ້ພວກເຈົ້າຈະຮັບໃຊ້ຄົນຕ່າງຊາດໃນດິນແດນ, ທີ່ບໍ່ແມ່ນຂອງພວກເຈົ້າເອງ’.
“ຈົ່ງປະກາດເລື່ອງນີ້ຕໍ່ເຊື້ອສາຍຂອງຢາໂຄບ
ແລະ ປະກາດມັນຢູ່ໃນຢູດາຍວ່າ:
ຈົ່ງຟັງສິ່ງນີ້, ພວກເຈົ້າຄົນໂງ່ຈ້າ ແລະ ປະຊາຊົນບໍ່ມີຄວາມຄິດ,
ຜູ້ທີ່ມີຕາແຕ່ເບິ່ງບໍ່ເຫັນ,
ຜູ້ທີ່ມີຫູແຕ່ບໍ່ໄດ້ຍິນວ່າ:
ພວກເຈົ້າຄວນຈະຢຳເກງເຮົາບໍ່ແມ່ນບໍ?”
ພຣະເຈົ້າຢາເວປະກາດດັ່ງນີ້.
“ເຈົ້າຄວນຈະສັ່ນສະທ້ານເມື່ອຢູ່ຕໍ່ໜ້າຂອງເຮົາບໍ່ແມ່ນບໍ?
ເຮົາຕັ້ງດິນຊາຍໄວ້ເປັນເຂດແດນສໍາລັບທະເລ,
ເປັນເຄື່ອງກີດກັ້ນຕະຫລອດໄປ, ເຊິ່ງທະເລບໍ່ສາມາດຂ້າມໄປໄດ້.
ຄື້ນທະເລອາດຈະເສາະ, ແຕ່ກໍເອົາຊະນະບໍ່ໄດ້;
ຄື້ນທະເລອາດຈະດັງກ້ອງສະໜັ່ນ ແຕ່ພວກມັນກໍຂ້າມໄປບໍ່ໄດ້.
ແຕ່ປະຊາຊົນເຫລົ່ານີ້ມີໃຈດື້ດ້ານ ແລະ ມີໃຈກະບົດ;
ພວກເຂົາໄດ້ຫັນໜີ ແລະ ໄປຈາກເຮົາແລ້ວ.
ພວກເຂົາບໍ່ໄດ້ບອກກັບຕົນເອງວ່າ,
‘ໃຫ້ພວກເຮົາຢຳເກງພຣະເຈົ້າຢາເວ ພຣະເຈົ້າຂອງພວກເຮົາ,
ຜູ້ທີ່ໂຜດໃຫ້ຝົນໃນລະດູໃບໄມ້ຫລົ່ນ ແລະ ໃນລະດູໃບໄມ້ປົ່ງຕາມລະດູການ,
ຜູ້ທີ່ຮັບປະກັນວ່າພວກເຮົາຈະໄດ້ເກັບກ່ຽວຕາມລະດູຢ່າງແນ່ນອນ’.
ຍ້ອນຄວາມຜິດຂອງພວກເຈົ້າຈຶ່ງເຮັດໃຫ້ສິ່ງເຫລົ່ານີ້ໝົດໄປ;
ບາບທັງຫລາຍຂອງເຈົ້າໄດ້ເຮັດໃຫ້ເຈົ້າຂາດຈາກສິ່ງທີ່ດີ.
“ໃນທ່າມກາງປະຊາຊົນຂອງເຮົາມີຄົນຊົ່ວຮ້າຍ,
ທີ່ຄອຍຖ້າເໝືອນດັ່ງນາຍພານທີ່ວາງບ້ວງແຮ້ວຈັບນົກ
ແລະ ເໝືອນດັ່ງຄົນທີ່ວາງກັບດັກເພື່ອຈັບຄົນ.
ເຮືອນຂອງພວກເຂົາເຕັມໄປດ້ວຍການຫລອກລວງ;
ເໝືອນດັ່ງກົງຂັງນົກທີ່ມີນົກເຕັມຢູ່,
ພວກເຂົາໄດ້ກາຍເປັນຄົນຮັ່ງມີ ແລະ ມີອໍານາດ
ພວກເຂົາຕຸ້ຍພີຂຶ້ນ ແລະ ແຂງແຮງດີ.
ການເຮັດຊົ່ວຂອງພວກເຂົາບໍ່ມີຂອບເຂດຈຳກັດ;
ພວກເຂົາບໍ່ໄດ້ສະແຫວງຫາຄວາມຍຸຕິທໍາ.
ພວກເຂົາບໍ່ຊ່ວຍໃຫ້ລູກກຳພ້າທີ່ມີຄະດີຄວາມ;
ພວກເຂົາບໍ່ໄດ້ປົກປ້ອງຄົນທຸກຍາກໃນຄະດີຄວາມຢ່າງຍຸຕິທໍາ.
ເຮົາຄວນຈະລົງໂທດພວກເຂົາເພາະເລື່ອງນີ້ບໍ?”
ພຣະເຈົ້າຢາເວປະກາດດັ່ງນີ້.
“ເຮົາຄວນຈະແກ້ແຄ້ນໃຫ້ຕົນເອງ
ຕໍ່ຊົນຊາດທີ່ປະພຶດຢ່າງນີ້ບໍ?
“ສິ່ງທີ່ໜ້າຢ້ານ ແລະ ໜ້າຕົກໃຈ
ໄດ້ເກີດຂຶ້ນໃນດິນແດນນີ້ຄື:
ບັນດາຜູ້ທໍານວາຍໄດ້ທໍານວາຍຕົວະ,
ບັນດາປະໂລຫິດປົກຄອງໂດຍສິດອຳນາດຂອງຕົນເອງ,
ແລະ ປະຊາຊົນຂອງເຮົາກໍຮັກວິຖີທາງແບບນີ້.
ແຕ່ພວກເຈົ້າຈະເຮັດສິ່ງໃດໃນບັ້ນປາຍ?
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.