Biblica® Open Lao Contemporary Version
ເຢເຣມີຢາ 49
ຖ້ອຍຄໍາກ່ຽວກັບອຳໂມນ
ຖ້ອຍຄໍາຂອງພຣະເຈົ້າຢາເວກ່ຽວກັບຊາວອຳໂມນວ່າ:
ພຣະເຈົ້າຢາເວກ່າວວ່າ:
“ອິດສະຣາເອນບໍ່ມີລູກຊາຍບໍ?
ອິດສະຣາເອນບໍ່ມີຜູ້ສືບເຊື້ອສາຍບໍ?
ເປັນຫຍັງພະໂມເຫລັກ1ໄດ້ເຂົ້າຢຶດຄອງກາດ?
ເປັນຫຍັງປະຊາຊົນຂອງລາວຈຶ່ງອາໄສໃນເມືອງຕ່າງໆຂອງກາດ?
ແຕ່ເວລານັ້ນຈະມາເຖິງ” ພຣະເຈົ້າຢາເວປະກາດດັ່ງນີ້ວ່າ,
“ເມື່ອເຮົາຈະສົ່ງສຽງໂຫ່ຮ້ອງ
ຕໍ່ສູ້ຣັບບາຂອງຊາວອຳໂມນ;
ມັນຈະກາຍເປັນຊາກຫັກເພພັງ,
ແລະ ໝູ່ບ້ານຕ່າງໆທີ່ຢູ່ອ້ອມຂ້າງຈະຖືກເຜົາ;
ແລ້ວອິດສະຣາເອນຈະຂັບໄລ່
ບັນດາຄົນທີ່ໄດ້ຂັບໄລ່ຕົນອອກໄປ”,
ພຣະເຈົ້າຢາເວກ່າວດັ່ງນີ້.
“ເຮັດຊະໂບນ, ຈົ່ງຮ້ອງໄຫ້, ເພາະອາອີໄດ້ຖືກທຳລາຍແລ້ວ!
ປະຊາຊົນຣັບບາ, ຈົ່ງຮ້ອງໄຫ້!
ຈົ່ງນຸ່ງຜ້າກະສອບເຂົ້າ ແລະ ໄວ້ທຸກ;
ຈົ່ງຮີບແລ່ນໄປບ່ອນນີ້ ແລະ ບ່ອນນັ້ນພາຍໃນກຳແພງ,
ເພາະພະໂມເຫລັກຈະໄປເປັນຊະເລີຍ,
ພ້ອມທັງບັນດາປະໂລຫິດ ແລະ ບັນດາຂ້າລາຊະການຂອງຕົນ.
ເປັນຫຍັງເຈົ້າຈຶ່ງໂອ້ອວດເຖິງບັນດາເນີນພູຂອງເຈົ້າ,
ໂອ້ອວດເຖິງບັນດາເນີນພູອັນອຸດົມສົມບູນຂອງເຈົ້າ?
ລູກສາວອໍາໂມນທີ່ບໍ່ສັດຊື່,
ເຈົ້າໄວ້ວາງໃຈໃນຊັບສົມບັດຂອງເຈົ້າ ແລະ ເວົ້າວ່າ,
‘ຜູ້ໃດຈະໂຈມຕີຂ້ອຍ?’
ເຮົາຈະນຳຄວາມຢ້ານມາສູ່ເຈົ້າ
ຈາກທຸກປະເທດທີ່ຢູ່ອ້ອມເຈົ້າ”,
ອົງພຣະຜູ້ເປັນເຈົ້າ, ພຣະເຈົ້າຢາເວຜູ້ມີລິດອຳນາດຍິ່ງໃຫຍ່ປະກາດວ່າ,
“ພວກເຈົ້າທຸກຄົນຈະຖືກຂັບໄລ່ອອກໄປ,
ແລະ ບໍ່ມີຜູ້ໃດຈະເຕົ້າໂຮມບັນດາຜູ້ລີ້ໄພ,
“ແຕ່ຕໍ່ມາພາຍຫລັງ, ເຮົາຈະຟື້ນຟູຊາວອຳໂມນໃຫ້ກັບສູ່ສະພາບດີ”,
ພຣະເຈົ້າຢາເວປະກາດດັ່ງນີ້.
ຖ້ອຍຄໍາຂອງພຣະເຈົ້າຢາເວກ່ຽວກັບເອໂດມ
(ອບຢ 1-6)
ຖ້ອຍຄໍາຂອງພຣະເຈົ້າຢາເວກ່ຽວກັບເອໂດມ,
ພຣະເຈົ້າຢາເວ ຜູ້ມີລິດອໍານາດຍິ່ງໃຫຍ່ກ່າວວ່າ:
“ໃນເຕມານບໍ່ມີສະຕິປັນຍາອີກຕໍ່ໄປແລ້ວບໍ?
ຄຳປຶກສາໄດ້ສູນຫາຍໄປຈາກຄົນສະຫລາດແລ້ວບໍ?
ສະຕິປັນຍາຂອງພວກເຂົາໄດ້ເນົ່າເປື່ອຍໄປແລ້ວບໍ?
ບັນດາຜູ້ທີ່ອາໄສຢູ່ໃນເດດານ,
ຈົ່ງຫັນໜີໄປ, ຈົ່ງລີ້ຢູ່ໃນຖ້ຳເລິກ,
ເພາະເຮົາຈະນຳໄພພິບັດມາສູ່ເອຊາວ
ໃນເວລາທີ່ເຮົາລົງໂທດລາວ.
ຖ້າຄົນເກັບໝາກອະງຸ່ນມາຫາເຈົ້າ,
ພວກເຂົາຈະບໍ່ປະໝາກອະງຸ່ນໄວ້ແດ່ບໍ?
ຖ້າຄົນຂີ້ລັກໄດ້ມາໃນເວລາກາງຄືນ,
ພວກເຂົາຈະບໍ່ລັກເທົ່າທີ່ພວກເຂົາຕ້ອງການບໍ?
ແຕ່ເຮົາຈະກວາດລ້າງເອຊາວຈົນໝົດກ້ຽງ;
ເຮົາຈະເປີດເຜີຍບ່ອນລີ້ຂອງລາວ
ເພື່ອລາວຈະບໍ່ສາມາດຫລົບລີ້ໄດ້.
ພວກທະຫານທີ່ຖືອາວຸດຂອງລາວກໍຖືກທໍາລາຍ,
ພວກພັນທະມິດ ແລະ ເພື່ອນບ້ານຂອງລາວຈະຖືກທໍາລາຍດ້ວຍ,
ສະນັ້ນ ຈະບໍ່ມີຜູ້ໃດເວົ້າວ່າ,
ຈົ່ງປະລູກກຳພ້າຂອງເຈົ້າໄວ້, ເຮົາຈະໃຫ້ພວກເຂົາມີຊີວິດຢູ່.
ບັນດາແມ່ໝ້າຍຂອງເຈົ້າກໍເພິ່ງພາເຮົາໄດ້”.
ພຣະເຈົ້າຢາເວກ່າວວ່າ: “ຖ້າຜູ້ທີ່ບໍ່ສົມຄວນຮັບໂທດກໍຕ້ອງດື່ມຈາກຖ້ວຍຂອງການລົງໂທດ, ເປັນຫຍັງເຈົ້າຈະໜີພົ້ນຈາກການລົງໂທດໄປໄດ້? ເຈົ້າຈະໜີບໍ່ພົ້ນຈາກການລົງໂທດ, ແຕ່ເຈົ້າກໍຈະຕ້ອງດື່ມມັນ”. ພຣະເຈົ້າຢາເວປະກາດວ່າ “ເຮົາສັນຍາໂດຍນາມເຮົາເອງວ່າ, ໂບຊະຣາຈະກາຍເປັນຊາກຫັກເພພັງ ແລະ ຖືກສາບແຊ່ງ, ເປັນເປົ້າຂອງຄວາມໜ້າຢ້ານ ແລະ ການດູຖູກ; ເມືອງທັງໝົດຂອງໂບຊະຣາຈະເປັນຊາກຫັກເພພັງຕະຫລອດໄປ”.
ຂ້າພະເຈົ້າໄດ້ຍິນຖ້ອຍຄໍາຈາກພຣະເຈົ້າຢາເວວ່າ,
ມີທູດຜູ້ໜຶ່ງຖືກສົ່ງໄປຫາຊົນຊາດຕ່າງໆເພື່ອແຈ້ງວ່າ,
“ຈົ່ງຮວບຮວມກຳລັງຂອງເຈົ້າໄປບຸກໂຈມຕີເມືອງເຫລົ່ານັ້ນ!
ຈົ່ງລຸກຂຶ້ນອອກໄປສູ້ຮົບ!”
“ບັດນີ້ ເຮົາຈະເຮັດໃຫ້ເຈົ້າເປັນຜູ້ຕ່ຳຕ້ອຍໃນທ່າມກາງປະຊາຊາດທັງຫລາຍ,
ເຈົ້າຈະຖືກດູຖູກຈາກມວນມະນຸດ.
ຄວາມໜ້າຢ້ານທີ່ເຈົ້າຄິດ
ແລະ ຄວາມຈອງຫອງຢູ່ໃນໃຈຂອງເຈົ້າໄດ້ຫລອກລວງເຈົ້າ,
ຜູ້ທີ່ອາໄສຢູ່ໃນຫລືບຫີນ,
ຄືຜູ້ທີ່ປົກຄອງເນີນພູສູງ.
ເຖິງແມ່ນວ່າເຈົ້າຈະສ້າງຮັງໄວ້ຢູ່ບ່ອນສູງເໝືອນດັ່ງຮັງຂອງນົກອິນຊີ,
ເຮົາກໍຈະນຳເຈົ້າລົງມາຈາກທີ່ນັ້ນ”,
ພຣະເຈົ້າຢາເວປະກາດດັ່ງນີ້.
“ເອໂດມຈະກາຍເປັນເປົ້າຂອງຄວາມໜ້າຢ້ານ;
ທຸກຄົນທີ່ຜ່ານໄປມາຕົກໃຈ ແລະ ຈະເວົ້າເຢາະເຢີ້ຍ
ຍ້ອນບາດແຜທັງໝົດຂອງມັນ”.
ພຣະເຈົ້າຢາເວກ່າວວ່າ,
“ເໝືອນດັ່ງໂຊໂດມ ແລະ ໂກໂມຣາທີ່ໄດ້ຖືກໂຄ່ນລົ້ມ,
ພ້ອມທັງເມືອງຕ່າງໆທີ່ຢູ່ອ້ອມພວກເຂົາ,
ເພື່ອວ່າຈະບໍ່ມີຜູ້ໃດອາໄສຢູ່ທີ່ນັ້ນ;
ບໍ່ມີຄົນໃດຈະຢູ່ໃນເມືອງຕ່າງໆນັ້ນ.
“ເໝືອນດັ່ງສິງອອກຈາກປ່າດົງຂອງຈໍແດນ
ມາທີ່ທົ່ງຫຍ້າອັນອຸດົມສົມບູນ,
ເຮົາຈະຂັບໄລ່ເອໂດມອອກຈາກດິນແດນຂອງມັນໄປໃນຊົ່ວພິບຕາ.
ຜູ້ໃດຄືຜູ້ທີ່ເຮົາເລືອກໄວ້ທີ່ເຮົາຈະແຕ່ງຕັ້ງເພື່ອສິ່ງນີ້?
ຜູ້ໃດທີ່ເປັນເໝືອນເຮົາ ແລະ ຜູ້ໃດຈະທ້າທາຍເຮົາໄດ້?
ແລະ ຄົນລ້ຽງແກະຄົນໃດສາມາດຢືນຕໍ່ສູ້ເຮົາໄດ້?”
ເຫດສະນັ້ນ, ຈົ່ງຟັງແຜນການທີ່ພຣະເຈົ້າຢາເວໄດ້ເຮັດຕໍ່ສູ້ເອໂດມ,
ສິ່ງທີ່ພຣະອົງໄດ້ຕັ້ງໃຈໄວ້ຕໍ່ສູ້ບັນດາຄົນທີ່ອາໄສຢູ່ໃນເຕມານວ່າ:
ລູກອ່ອນຂອງຝູງແກະຈະຖືກລາກໄປ;
ທົ່ງຫຍ້າຂອງພວກເຂົາຈະຕົກໃຈກັບຊະຕາກໍາຂອງພວກເຂົາ.
ເມື່ອໄດ້ຍິນສຽງເອໂດມລົ້ມລົງແຜ່ນດິນໂລກຈະສັ່ນສະທ້ານ;
ສຽງຮ້ອງຂອງພວກເຂົາຈະດັງໄປຈົນເຖິງທະເລແດງ.2
ເບິ່ງແມ! ນົກອິນຊີໂຕໜຶ່ງຈະບິນຂຶ້ນ ແລະ ຈະລົງມາໂຈມຕີ,
ໂດຍການພືປີກຂອງມັນອອກປົກຄຸມໂບຊະຣາ.
ໃນວັນນັ້ນຈິດໃຈຂອງພວກນັກຮົບເອໂດມ
ຈະເປັນເໝືອນຈິດໃຈຂອງແມ່ຍິງທີ່ກຳລັງເກີດລູກ.
ຖ້ອຍຄໍາຂອງພຣະເຈົ້າຢາເວກ່ຽວກັບດາມັສກັດ
ຖ້ອຍຄໍາຂອງພຣະເຈົ້າຢາເວກ່ຽວກັບດາມັສກັດ:
“ຮາມັດ ແລະ ອັກປັດທໍ້ຖອຍໃຈ,
ເພາະພວກເຂົາໄດ້ຍິນຂ່າວບໍ່ດີ.
ພວກເຂົາຈຶ່ງທໍ້ຖອຍໃຈ
ລໍາບາກໃຈເໝືອນດັ່ງ3ທະເລປັ່ນປ່ວນ.
ດາມັສກັດກໍອ່ອນກໍາລັງ,
ນາງໄດ້ຫັນໜີໄປ
ແລະ ຄວາມຕົກໃຈປົກຄຸມຈິດໃຈຂອງນາງ;
ຄວາມທໍລະມານ ແລະ ຄວາມເຈັບປວດໄດ້ລ້ອມນາງໄວ້,
ຄວາມເຈັບປວດເໝືອນດັ່ງແມ່ຍິງທີ່ກຳລັງເກີດລູກ.
ເປັນຫຍັງນະຄອນທີ່ມີກຽດຈຶ່ງຖືກປະຖິ້ມ,
ຄືເມືອງທີ່ເຮົາປິຕິຍິນດີ,
ຄົນໜຸ່ມຂອງເມືອງນັ້ນຈະລົ້ມລົງຕາມຖະໜົນຫົນທາງຢ່າງແນ່ນອນ;
ທະຫານທຸກຄົນຈະຖືກເຮັດໃຫ້ມິດງຽບໃນວັນນັ້ນ”,
ພຣະເຈົ້າຢາເວ ຜູ້ມີລິດອຳນາດຍິ່ງໃຫຍ່ປະກາດດັ່ງນີ້.
“ເຮົາຈະຈູດໄຟເຜົາກຳແພງທັງຫລາຍຂອງດາມັສກັດ;
ມັນຈະເຜົາຜານປ້ອມປ້ອງກັນຕ່າງໆຂອງເບັນຮາດາດ”.
ຖ້ອຍຄໍາຂອງພຣະເຈົ້າຢາເວກ່ຽວກັບເກດາ ແລະ ຮາໂຊ
ຖ້ອຍຄໍາຂອງພຣະເຈົ້າຢາເວກ່ຽວກັບເກດາ ແລະ ອານາຈັກຕ່າງໆຂອງຮາໂຊ, ເຊິ່ງກະສັດເນບູກາດເນັດຊາແຫ່ງບາບີໂລນໄດ້ໂຈມຕີມີດັ່ງນີ້:
ພຣະເຈົ້າຢາເວກ່າວວ່າ:
“ຈົ່ງລຸກຂຶ້ນ ແລະ ບຸກໂຈມຕີເກດາ
ແລະ ທຳລາຍປະຊາຊົນທາງທິດຕາເວັນອອກ.
ເຕັນ ແລະ ຝູງສັດຂອງພວກເຂົາຈະຖືກຢຶດໄປ;
ຕູບຂອງພວກເຂົາຈະຖືກນໍາອອກໄປ
ພ້ອມທັງສິ່ງຂອງທັງໝົດ ແລະ ຝູງອູດຂອງພວກເຂົາ.
ປະຊາຊົນຈະຮ້ອງບອກພວກເຂົາວ່າ,
‘ມີຄວາມຢ້ານຢູ່ທຸກດ້ານ!’
“ຈົ່ງຮີບໜີໄປໄວໆ!
ບັນດາຄົນທີ່ອາໄສຢູ່ຮາໂຊ, ຈົ່ງໄປອາໄສຢູ່ໃນຖ້ຳເລິກ”,
ພຣະເຈົ້າຢາເວປະກາດດັ່ງນີ້.
“ກະສັດເນບູກາດເນັດຊາແຫ່ງບາບີໂລນໄດ້ວາງແຜນຮ້າຍຕໍ່ສູ້ເຈົ້າ;
ລາວໄດ້ຄິດແຜນການຕໍ່ສູ້ເຈົ້າ”.
ພຣະເຈົ້າຢາເວປະກາດວ່າ,
“ຈົ່ງລຸກຂຶ້ນ ແລະ ໂຈມຕີຊົນຊາດໜຶ່ງຢ່າງງ່າຍໆ,
ເຊິ່ງພວກເຂົາອາໄສຢູ່ຢ່າງໝັ້ນໃຈ”,
“ເປັນຊົນຊາດໜຶ່ງທີ່ບໍ່ມີປະຕູເມືອງ ຫລື ບໍ່ມີໄລປະຕູ;
ປະຊາຊົນຂອງຊົນຊາດນີ້ອາໄສຢູ່ຫ່າງໄກຈາກໄພອັນຕະລາຍ.
ຝູງອູດຂອງພວກເຂົາຈະຖືກປຸ້ນ,
ແລະ ຝູງສັດໃຫຍ່ຂອງພວກເຂົາຈະເປັນສິ່ງຂອງປຸ້ນມາຈາກສົງຄາມ.
ເຮົາຈະກະຈັດກະຈາຍ4ຄົນທີ່ຢູ່ບ່ອນຫ່າງໄກໄປກັບສາຍລົມ
ແລະ ຈະນຳໄພພິບັດມາສູ່ພວກເຂົາຈາກທຸກດ້ານ”,
ພຣະເຈົ້າຢາເວປະກາດດັ່ງນີ້.
“ຮາໂຊຈະກາຍເປັນຮັງຂອງຝູງໝາໄນ
ເປັນບ່ອນຮົກຮ້າງຕະຫລອດໄປ.
ບໍ່ມີຜູ້ໃດຈະອາໄສຢູ່ທີ່ນັ້ນ;
ບໍ່ມີປະຊາຊົນຢູ່ໃນເມືອງນັ້ນ”.
ຖ້ອຍຄໍາຂອງພຣະເຈົ້າຢາເວກ່ຽວກັບເອລາມ
ຖ້ອຍຄໍາຂອງພຣະເຈົ້າຢາເວໄດ້ມາເຖິງຜູ້ທຳນວາຍເຢເຣມີຢາກ່ຽວກັບເອລາມ, ໃນຕອນຕົ້ນຂອງການປົກຄອງຂອງເຊເດກີຢາກະສັດແຫ່ງຢູດາຍວ່າ:
ພຣະເຈົ້າຢາເວ ຜູ້ມີລິດອໍານາດຍິ່ງໃຫຍ່ກ່າວວ່າ:
“ເບິ່ງແມ, ເຮົາຈະຫັກຄັນທະນູຂອງເອລາມ,
ເຊິ່ງເປັນກຳລັງຫລັກຂອງພວກເຂົາ.
ເຮົາຈະນຳລົມທັງສີ່ທິດຕໍ່ສູ້ເອລາມ
ຈາກສີ່ມູມຂອງຟ້າສະຫວັນ;
ເຮົາຈະເຮັດໃຫ້ພວກເຂົາກະຈັດກະຈາຍໄປຕາມລົມທັງສີ່ທິດ,
ແລະ ຈະບໍ່ມີຊົນຊາດໃດຢູ່ທີ່ນັ້ນ
ບ່ອນທີ່ຊະເລີຍຂອງເອລາມບໍ່ໄດ້ໄປ.
ເຮົາຈະເຮັດໃຫ້ເອລາມທຳລາຍໄປຕໍ່ໜ້າບັນດາສັດຕູຂອງພວກເຂົາ,
ຕໍ່ໜ້າບັນດາຄົນທີ່ຕ້ອງການຂ້າພວກເຂົາ;
ເຮົາຈະນຳໄພພິບັດມາສູ່ພວກເຂົາ,
ດ້ວຍຄວາມໃຈຮ້າຍອັນຮຸນແຮງຂອງເຮົາ”,
ພຣະເຈົ້າຢາເວປະກາດດັ່ງນີ້.
“ເຮົາຈະໄລ່ຕາມພວກເຂົາດ້ວຍດາບ
ຈົນກວ່າເຮົາໄດ້ເຮັດໃຫ້ພວກເຂົາມາເຖິງຈຸດຈົບ.
ເຮົາຈະຕັ້ງບັນລັງຂອງເຮົາໄວ້ໃນເອລາມ
ແລະ ທຳລາຍກະສັດກັບພວກຂ້າລາຊະການຂອງເອລາມ”,
ພຣະເຈົ້າຢາເວປະກາດດັ່ງນີ້.
“ແຕ່ໃນວັນຂ້າງໜ້າ
ເຮົາຈະຟື້ນຟູໃຫ້ເອລາມກັບສູ່ສະພາບດີ”,
ພຣະເຈົ້າຢາເວປະກາດດັ່ງນີ້.
Source notes (4)
- Footnote ຫລື ກະສັດຂອງພວກເຂົາ ພາສາເຮັບເຣີວ່າ ມັນຄາມ ເຊັ່ນດຽວກັບຂໍ້ 3
- Footnote ຄື ທະເລຕົ້ນອໍ້
- Footnote ພາສາເຮັບເຣີວ່າ ເທິງ ຫລື ແຄມ
- Footnote ຫລື ຄົນທີ່ນີບຜົມໄວ້ທີ່ໜ້າຜາກ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.