Biblica® Open Lao Contemporary Version
ເຢເຣມີຢາ 40
ເຢເຣມີຢາເປັນອິດສະຫລະ
ຖ້ອຍຄຳຂອງພຣະເຈົ້າຢາເວໄດ້ມາເຖິງເຢເຣມີຢາຫລັງຈາກທີ່ເນບູຊາຣາດານ ຜູ້ບັນຊາການທະຫານເຝົ້າຍາມໄດ້ປ່ອຍລາວຢູ່ທີ່ຣາມາ. ລາວໄດ້ເຫັນເຢເຣມີຢາຖືກລ່າມໂສ້ໄວ້ຢູ່ໃນທ່າມກາງປະຊາຊົນທັງໝົດທີ່ຖືກຈັບຈາກເຢຣູຊາເລັມ ແລະ ຢູດາຍທີ່ກຳລັງຈະນໍາໄປເປັນຊະເລີຍທີ່ບາບີໂລນ. ເມື່ອຜູ້ບັນຊາການທະຫານເຝົ້າຍາມໄດ້ພົບເຢເຣມີຢາ, ລາວກໍເວົ້າກັບເຢເຣມີຢາວ່າ, “ພຣະເຈົ້າຢາເວ ພຣະເຈົ້າຂອງເຈົ້າເປັນຜູ້ກໍານົດໃຫ້ໄພພິບັດນີ້ເກີດຂຶ້ນໃນດິນແດນນີ້. ແລະ ບັດນີ້ ພຣະເຈົ້າຢາເວກໍໄດ້ເຮັດໃຫ້ເກີດຂຶ້ນແລ້ວ; ພຣະອົງໄດ້ກະທໍາຕາມທີ່ພຣະອົງໄດ້ກ່າວໄວ້. ເຫດການທັງໝົດທີ່ໄດ້ເກີດຂຶ້ນນີ້ເພາະປະຊາຊົນຂອງເຈົ້າເຮັດບາບຕໍ່ສູ້ພຣະເຈົ້າຢາເວ ແລະ ບໍ່ໄດ້ເຊື່ອຟັງພຣະອົງ. ແຕ່ບັດນີ້ ເຮົາຈະປ່ອຍເຈົ້າໄປໃຫ້ເປັນອິດສະຫລະຈາກໂສ້ທີ່ລ່າມມືຂອງເຈົ້າ. ຈົ່ງໄປບາບີໂລນກັບຂ້ອຍ, ຖ້າເຈົ້າຢາກໄປ, ແລະ ຂ້ອຍຈະເບິ່ງແຍງເຈົ້າ; ແຕ່ຖ້າເຈົ້າບໍ່ຢາກໄປກໍບໍ່ຕ້ອງໄປ. ເບິ່ງແມ, ດິນແດນທັງໝົດກໍໄດ້ວາງຢູ່ຕໍ່ໜ້າເຈົ້າແລ້ວ; ເຈົ້າຈະໄປໃສກໍໄດ້ຕາມທີ່ຕ້ອງການ” ແຕ່ກ່ອນທີ່ເຢເຣມີຢາຈະຈາກໄປນັ້ນ,1 ເນບູຊາຣາດານກໍເວົ້າອີກວ່າ, “ຈົ່ງກັບຄືນເມືອຫາເກດາລີຢາ ລູກຊາຍຂອງອາຮີກຳ, ຫລານຊາຍຂອງຊາຟານ, ເຊິ່ງກະສັດແຫ່ງບາບີໂລນໄດ້ແຕ່ງຕັ້ງໃຫ້ເບິ່ງແຍງເມືອງຕ່າງໆຂອງຢູດາຍ, ແລະ ຈົ່ງໄປອາໄສຢູ່ກັບລາວໃນທ່າມກາງປະຊາຊົນ ຫລື ເຈົ້າຈະໄປໃສກໍໄດ້ຕາມທີ່ຕ້ອງການ”.
ແລ້ວເນບູຊາຣາດານກໍໄດ້ເອົາອາຫານ ແລະ ມອບຂອງຂັວນໃຫ້ເຢເຣມີຢາ ແລ້ວກໍປ່ອຍລາວໄປ. ສະນັ້ນ ເຢເຣມີຢາຈຶ່ງໄດ້ໄປຫາເກດາລີຢາ ລູກຊາຍຂອງອາຮີກຳທີ່ມີຊະປາ ແລະ ໄດ້ອາໄສຢູ່ກັບລາວໃນທ່າມກາງປະຊາຊົນທີ່ຍັງເຫລືອຢູ່ໃນດິນແດນນັ້ນ.
ເກດາລີຢາຖືກຂ້າ
(2ກສ 25:22-26)
ເມື່ອບັນດານາຍທະຫານກອງທັບທັງໝົດ ແລະ ທະຫານຂອງພວກເຂົາຍັງຢູ່ກາງທົ່ງໄດ້ຍິນວ່າກະສັດແຫ່ງບາບີໂລນໄດ້ແຕ່ງຕັ້ງເກດາລີຢາ ລູກຊາຍຂອງອາຮິກຳເປັນຜູ້ປົກຄອງດິນແດນ ແລະ ໃຫ້ລາວຮັບຜິດຊອບເບິ່ງແຍງພວກຜູ້ຊາຍ, ແມ່ຍິງ ແລະ ເດັກນ້ອຍທີ່ເປັນຄົນທຸກຍາກທີ່ສຸດໃນດິນແດນ ແລະ ປະຊາຊົນທີ່ບໍ່ໄດ້ຖືກຈັບໄປເປັນຊະເລີຍທີ່ບາບີໂລນ, ພວກເຂົາໄດ້ມາຫາເກດາລີຢາທີ່ມີຊະປາຄື: ອິດຊະມາເອນລູກຊາຍຂອງເນທານີຢາ, ໂຢຮານານ ແລະ ໂຢນາທານລູກຊາຍຂອງກາເຣຢາ, ເສຣາອີຢາລູກຊາຍຂອງຕັນຮູເມັດ, ບັນດາລູກຊາຍຂອງເອຟາອີຈາກເນໂຕຟາ ແລະ ຢາອາຊານີຢາ2 ລູກຊາຍຊາວມາອາກາ ແລະ ທະຫານຂອງພວກເຂົາ. ເກດາລີຢາລູກຊາຍຂອງອາຮິກຳ, ຫລານຊາຍຂອງຊາຟານໄດ້ສາບານກັບພວກເຂົາ ແລະ ເພື່ອເຮັດໃຫ້ພວກເຂົາໝັ້ນໃຈ. ລາວໄດ້ເວົ້າວ່າ, “ຢ່າຢ້ານທີ່ຈະຮັບໃຊ້ຊາວບາບີໂລນ3, ຈົ່ງຕັ້ງຖິ່ນຖານໃນດິນແດນ ແລະ ຮັບໃຊ້ກະສັດແຫ່ງບາບີໂລນ, ແລ້ວທຸກສິ່ງຈະເປັນໄປໄດ້ດ້ວຍດີສຳລັບພວກເຈົ້າ. ຂ້ອຍເອງຈະຢູ່ທີ່ມີຊະປາ ເພື່ອເປັນຜູ້ຕາງໜ້າຂອງພວກເຈົ້າກັບຊາວບາບີໂລນທີ່ຈະມາຫາພວກເຮົາ, ແຕ່ພວກເຈົ້າຈົ່ງເກັບກ່ຽວໝາກອະງຸ່ນ, ໝາກໄມ້ໃນລະດູຮ້ອນ ແລະ ນໍ້າມັນໝາກກອກ, ແລ້ວກໍເກັບພວກມັນໄວ້ໃນໄຫຂອງພວກເຈົ້າ ແລະ ອາໄສຢູ່ຕາມເມືອງຕ່າງໆທີ່ພວກເຈົ້າໄດ້ຢຶດຄອງ”.
ເມື່ອຊາວຢິວທັງໝົດຢູ່ໃນໂມອາບ, ອຳໂມນ, ເອໂດມ ແລະ ປະເທດອື່ນໆທັງໝົດໄດ້ຍິນວ່າກະສັດແຫ່ງບາບີໂລນໄດ້ປະຄົນທີ່ຍັງເຫລືອໄວ້ຢູ່ໃນຢູດາຍ ແລະ ໄດ້ແຕ່ງຕັ້ງເກດາລີຢາລູກຊາຍຂອງອາຮີກຳ, ລູກຊາຍຂອງຊາຟານເປັນຜູ້ປົກຄອງພວກເຂົາ, ພວກເຂົາທັງໝົດຈຶ່ງໄດ້ກັບຄືນມາທີ່ດິນແດນຢູດາຍຈາກທຸກປະເທດທີ່ພວກເຂົາໄດ້ກະຈັດກະຈາຍກັນໄປ; ພວກເຂົາຈຶ່ງໄດ້ມາຫາເກດາລີຢາທີ່ມີຊະປາ. ແລ້ວພວກເຂົາກໍເກັບກ່ຽວໝາກອະງຸ່ນ ແລະ ໝາກໄມ້ໃນລະດູຮ້ອນໄດ້ຢ່າງຫລວງຫລາຍ.
ໂຢຮານານລູກຊາຍຂອງກາເຣຢາ ແລະ ນາຍທະຫານກອງທັບທັງໝົດທີ່ຢູ່ກາງທົ່ງໄດ້ມາຫາເກດາລີຢາທີ່ເມືອງມີຊະປາ. ແລະ ເວົ້າກັບເພິ່ນວ່າ, “ທ່ານບໍ່ຮູ້ບໍວ່າ ກະສັດບາອາລີຂອງຊາວອຳໂມນໄດ້ສົ່ງອິດຊະມາເອນລູກຊາຍຂອງເນທານີຢາມາລອບສັງຫານທ່ານ?” ແຕ່ເກດາລີຢາລູກຊາຍຂອງອາຮີກຳບໍ່ໄດ້ເຊື່ອພວກເຂົາ.
ແລ້ວໂຢຮານານລູກຊາຍຂອງກາເຣຢາເວົ້າກັບເກດາລີຢາຢ່າງລັບໆທີ່ມີຊະປາວ່າ, “ຈົ່ງໃຫ້ຂ້ານ້ອຍໄປຂ້າອິດຊະມາເອນ ລູກຊາຍຂອງເນທານີຢາ ແລະ ຈະບໍ່ຜູ້ໃດຮູ້ເລື່ອງນີ້. ເປັນຫຍັງຈຶ່ງປ່ອຍໃຫ້ລາວມາຂ້າທ່ານ ແລະ ເປັນເຫດເຮັດໃຫ້ຊາວຢິວທັງໝົດມາເຕົ້າໂຮມຢູ່ກັບທ່ານຕ້ອງກະຈັດກະຈາຍໄປ ແລະ ພວກຊາວຢູດາຍທີ່ຍັງເຫລືອຢູ່ຕ້ອງໄປສູ່ຄວາມຈິບຫາຍ?”
ແຕ່ເກດາລີຢາລູກຊາຍຂອງອາຮີກຳເວົ້າກັບໂຢຮານານລູກຊາຍຂອງກາເຣຢາວ່າ, “ຢ່າເຮັດແບບນັ້ນ! ສິ່ງທີ່ເຈົ້າກຳລັງເວົ້າກ່ຽວກັບອິດຊະມາເອນນັ້ນບໍ່ແມ່ນຄວາມຈິງດອກ”.
Source notes (3)
- Footnote ຫລື ເຢເຣມີຢາໄດ້ຕອບວ່າ
- Footnote ພາສາເຮັບເຣີວ່າ ເຢຊານິຢາ ເປັນອີກຮູບໜຶ່ງຂອງ ຢາອາຊານິຢາ
- Footnote ຫລື ຊາວຄານເດອາ ເຊັ່ນດຽວກັບຂໍ້ 10
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.