Biblica® Open Lao Contemporary Version
ເຢເຣມີຢາ 38
ເຢເຣມີຢາຖືກໂຍນລົງໃນນໍ້າສ້າງທີ່ບໍ່ມີນໍ້າ
ເຊຟາຕີຢາລູກຊາຍຂອງມັດທານ, ເກດາລີຢາລູກຊາຍຂອງປັດຊູ, ເຢຮູການ1 ລູກຊາຍຂອງເຊເລມີຢາ ແລະ ປັດຊູລູກຊາຍຂອງມັນກີຢາໄດ້ຍິນສິ່ງທີ່ເຢເຣມີຢາກໍາລັງບອກປະຊາຊົນທັງໝົດເມື່ອລາວໄດ້ກ່າວວ່າ, “ພຣະເຈົ້າຢາເວກ່າວວ່າ: ‘ຜູ້ໃດກໍຕາມທີ່ອາໄສຢູ່ໃນນະຄອນນີ້ຈະຕາຍເພາະສົງຄາມ, ການອຶດຢາກອາຫານ ຫລື ໂລກລະບາດ, ແຕ່ຜູ້ໃດກໍຕາມທີ່ຍອມຈໍານົນຕໍ່ຊາວບາບີໂລນ2ຈະມີຊີວິດຢູ່. ພວກເຂົາຈະໜີເອົາຊີວິດລອດ; ພວກເຂົາຈະມີຊີວິດຢູ່’. ແລະ ພຣະເຈົ້າຢາເວກ່າວວ່າ: ‘ເຮົາຈະມອບເມືອງນີ້ໄວ້ໃນມືຂອງກອງທັບຂອງກະສັດແຫ່ງບາບີໂລນຢ່າງແນ່ນອນ ແລະ ພວກເຂົາຈະຢຶດເມືອງນີ້’ ”.
ແລ້ວບັນດາຂ້າລາຊະການກໍໄດ້ເວົ້າກັບກະສັດວ່າ, “ຜູ້ຊາຍຄົນນີ້ສົມຄວນຕາຍ. ລາວກໍາລັງເຮັດໃຫ້ພວກທະຫານທີ່ຍັງເຫລືອຢູ່ໃນເມືອງນີ້ເສຍກໍາລັງໃຈ, ຕະຫລອດຈົນປະຊາຊົນທັງໝົດດ້ວຍ, ຍ້ອນສິ່ງທີ່ລາວກໍາລັງເວົ້າກັບພວກເຂົານັ້ນ. ຜູ້ຊາຍຄົນນີ້ບໍ່ໄດ້ຄິດຫາປະໂຫຍດແກ່ປະຊາຊົນເຫລົ່ານີ້ ແຕ່ຄິດຫາຄວາມຈິບຫາຍມາໃຫ້ພວກເຂົາ”.
ກະສັດເຊເດກີຢາໄດ້ຕອບວ່າ, “ລາວຢູ່ໃນມືຂອງເຈົ້າແລ້ວ, ເຮົາບໍ່ສາມາດເຮັດອັນໃດຂັດຂວາງພວກເຈົ້າໄດ້”.
ດັ່ງນັ້ນ ພວກເຂົາຈຶ່ງໄດ້ຈັບເຢເຣມີຢາໄປ ແລະ ເອົາລາວລົງໄປໃນນໍ້າສ້າງທີ່ບໍ່ມີນໍ້າຂອງມານກີຢາລູກຊາຍຂອງກະສັດ, ເຊິ່ງເປັນນໍ້າສ້າງທີ່ຢູ່ໃນເດີ່ນຂອງທະຫານເຝົ້າຍາມ. ພວກເຂົາໄດ້ໃຊ້ເຊືອກຢ່ອນລາວລົງໄປໃນນໍ້າສ້າງທີ່ບໍ່ມີນໍ້າ; ມີແຕ່ຂີ້ຕົມ ແລະ ເຢເຣມີຢາກໍຈົມລົງໃນຂີ້ຕົມນັ້ນ.
ເມື່ອເອເບັດເມເຫລັກ,3 ຊາວກູເຊ4 ເປັນຂ້າລາຊະການຄົນໜຶ່ງໃນວັງຂອງກະສັດໄດ້ຍິນວ່າ, ພວກເຂົາໄດ້ຢ່ອນເຢເຣມີຢາລົງໃນນໍ້າສ້າງ. ໃນຂະນະທີ່ ກະສັດກຳລັງນັ່ງຢູ່ທີ່ປະຕູເບັນຢາມິນ, ເອເບັດເມເຫລັກໄດ້ອອກໄປທີ່ວັງ ແລະ ໄດ້ກ່າວກັບກະສັດວ່າ, “ຂ້າແດ່ກະສັດຂອງຂ້ານ້ອຍ, ຄົນເຫລົ່ານີ້ໄດ້ເຮັດສິ່ງຊົ່ວຮ້າຍຕໍ່ຜູ້ທຳນວາຍເຢເຣມີຢາ. ພວກເຂົາໄດ້ຖິ້ມລາວລົງໃນນໍ້າສ້າງ, ລາວຈະຕ້ອງອົດອາຫານຈົນຕາຍ ເມື່ອບໍ່ມີເຂົ້າຈີ່ເຫລືອຢູ່ໃນນະຄອນອີກ”.
ແລ້ວກະສັດໄດ້ສັ່ງເອເບັດເມເຫລັກ ຊາວກູເຊວ່າ, “ຈົ່ງນຳຄົນສາມສິບຄົນໄປກັບເຈົ້າ ແລະ ດຶງຜູ້ທໍານວາຍເຢເຣມີຢາຂຶ້ນມາຈາກນໍ້າສ້າງກ່ອນທີ່ລາວຈະຕາຍ”.
ດັ່ງນັ້ນ ເອເບັດເມເຫລັກກໍໄດ້ນຳຄົນໄປກັບລາວ ແລະ ໄປທີ່ຫ້ອງໜຶ່ງຢູ່ໃຕ້ດິນຄັງໃນວັງ. ລາວເອົາເສື້ອຜ້າທີ່ຂາດ ແລະ ເສື້ອເກົ່າແລ້ວຈາກທີ່ນັ້ນ ແລ້ວມັດໃສ່ກັບເຊືອກຢ່ອນລົງໄປໃຫ້ເຢເຣມີຢາໃນນໍ້າສ້າງ. ເອເບັດເມເຫລັກຊາວກູເຊໄດ້ບອກເຢເຣມີຢາວ່າ, “ຈົ່ງເອົາເສື້ອທີ່ຂາດ ແລະ ເສື້ອເກົ່ານີ້ຮອງຂີ້ແຮ້ໄວ້ເພື່ອວ່າເຊືອກຈະບໍ່ບາດ”. ເຢເຣມີຢາກໍໄດ້ເຮັດຕາມ, ແລ້ວພວກເຂົາກໍດຶງເຢເຣມີຢາຂຶ້ນມາດ້ວຍເຊືອກ ແລະ ຍົກລາວອອກມາຈາກນໍ້າສ້າງ. ແລະ ເຢເຣມີຢາກໍຍັງຢູ່ໃນເດີ່ນຂອງທະຫານເຝົ້າຍາມ.
ເຊເດກີຢາຖາມເຢເຣມີຢາອີກ
ຕໍ່ມາ ກະສັດເຊເດກີຢາໄດ້ສົ່ງຄົນໄປນຳເອົາຜູ້ທຳນວາຍເຢເຣມີຢາມາ ແລະ ໄດ້ພາລາວມາທີ່ທາງປະຕູທີສາມຂອງວິຫານຂອງພຣະເຈົ້າຢາເວ. ກະສັດໄດ້ກ່າວກັບເຢເຣມີຢາວ່າ, “ເຮົາຈະຂໍຖາມເຈົ້າບາງຢ່າງ, ຢ່າປິດບັງສິ່ງໃດຈາກເຮົາ”.
ເຢເຣມີຢາໄດ້ເວົ້າກັບວ່າ, “ຖ້າຂ້ານ້ອຍຕອບທ່ານໄດ້, ທ່ານຈະບໍ່ຂ້າຂ້ານ້ອຍບໍ? ເຖິງແມ່ນວ່າຖ້າຂ້ານ້ອຍໄດ້ໃຫ້ຄຳປຶກສາແກ່ທ່ານ, ທ່ານກໍຈະບໍ່ຟັງຂ້ານ້ອຍ”.
ແຕ່ກະສັດເຊເດກີຢາກໍໄດ້ເຮັດຄໍາສາບານນີ້ກັບເຢເຣມີຢາຢ່າງລັບໆວ່າ: “ພຣະເຈົ້າຢາເວມີຊີວິດຢູ່ແນ່ນອນຢ່າງໃດ, ຜູ້ທີ່ໄດ້ໃຫ້ລົມຫາຍໃຈແກ່ພວກເຮົາ, ເຮົາຈະບໍ່ຂ້າເຈົ້າ ຫລື ຈະບໍ່ມອບເຈົ້າໃຫ້ແກ່ຄົນທີ່ຢາກຈະຂ້າເຈົ້າ”.
ແລ້ວເຢເຣມີຢາໄດ້ກ່າວກັບກະສັດເຊເດກີຢາວ່າ, “ພຣະເຈົ້າຢາເວ ອົງຜູ້ມີລິດອໍານາດຍິ່ງໃຫຍ່, ພຣະເຈົ້າແຫ່ງອິດສະຣາເອນກ່າວວ່າ: ‘ຖ້າທ່ານຍອມຈໍານົນຕໍ່ພວກນາຍທະຫານຂອງກະສັດແຫ່ງບາບີໂລນ, ທ່ານຈະລອດຊີວິດ ແລະ ເມືອງນີ້ຈະບໍ່ຖືກເຜົາຖິ້ມ; ທ່ານເອງ ແລະ ຄອບຄົວຂອງທ່ານຈະມີຊີວິດຢູ່. ແຕ່ຖ້າທ່ານບໍ່ຍອມຈໍານົນຕໍ່ພວກນາຍທະຫານຂອງກະສັດແຫ່ງບາບີໂລນ, ເມືອງນີ້ຈະຖືກມອບໄວ້ໃນມືຂອງຊາວບາບີໂລນ ແລະ ພວກເຂົາຈະເຜົາເມືອງນີ້ຖິ້ມ; ທ່ານເອງກໍຈະໜີບໍ່ພົ້ນຈາກພວກເຂົາ’ ”.
ກະສັດເຊເດກີຢາໄດ້ກ່າວກັບເຢເຣມີຢາວ່າ, “ເຮົາຢ້ານພວກຢິວຫັນໄປຫາຊາວບາບີໂລນ, ເພາະຊາວບາບີໂລນອາດຈະມອບເຮົາໄວ້ໃຫ້ພວກເຂົາກໍໄດ້ ແລະ ພວກເຂົາຈະປະຕິບັດຕໍ່ເຮົາຢ່າງໂຫດຮ້າຍ”.
ເຢເຣມີຢາໄດ້ຕອບວ່າ, “ພວກເຂົາຈະບໍ່ມອບທ່ານ, ຈົ່ງເຊື່ອຟັງພຣະເຈົ້າຢາເວໂດຍເຮັດຕາມສິ່ງທີ່ຂ້ານ້ອຍບອກທ່ານ. ແລ້ວມັນຈະເປັນໄປໄດ້ດ້ວຍດີສໍາລັບທ່ານ ແລະ ທ່ານຈະມີຊີວິດລອດ. ແຕ່ຖ້າທ່ານບໍ່ຍອມຈໍານົນ, ພຣະເຈົ້າຢາເວໄດ້ສໍາແດງໃຫ້ແກ່ຂ້ານ້ອຍດັ່ງນີ້ວ່າ: ແມ່ຍິງທຸກຄົນທີ່ຢູ່ໃນວັງຂອງກະສັດຢູດາຍຈະຖືກນຳເອົາໄປໃຫ້ພວກນາຍທະຫານຂອງກະສັດແຫ່ງບາບີໂລນ. ແມ່ຍິງເຫລົ່ານັ້ນຈະກ່າວກັບທ່ານວ່າ,
“ ‘ພວກມິດສະຫາຍທີ່ທ່ານເຊື່ອໄວ້ວາງໃຈ
ພວກເຂົາໄດ້ຫລອກລວງທ່ານ ແລະ ເອົາຊະນະທ່ານແລ້ວ.
ເມື່ອຕີນຂອງທ່ານກໍໄດ້ຈົມຢູ່ໃນຂີ້ຕົມ;
ພວກມິດສະຫາຍກໍໄດ້ປະຖິ້ມທ່ານໄປແລ້ວ’.
“ບັນດາເມຍ ແລະ ພວກລູກຂອງທ່ານຈະຖືກນຳໄປມອບໃຫ້ຊາວບາບີໂລນ. ທ່ານເອງຈະໜີໄປບໍ່ພົ້ນຈາກມືຂອງພວກເຂົາ ແຕ່ຈະຖືກກະສັດແຫ່ງບາບີໂລນຈັບໄປ ແລະ ເມືອງນີ້ຈະຖືກເຜົາຖິ້ມເສຍ5”.
ກະສັດເຊເດກີຢາໄດ້ກ່າວກັບເຢເຣມີຢາວ່າ, “ຢ່າໃຫ້ຜູ້ໃດຮູ້ກ່ຽວກັບການສົນທະນາກັນນີ້, ບໍ່ດັ່ງນັ້ນເຈົ້າອາດຈະຕາຍ. ຖ້າພວກຂ້າລາຊະການໄດ້ຍິນວ່າເຮົາໄດ້ລົມກັບເຈົ້າ ແລະ ພວກເຂົາມາຫາເຈົ້າ ແລະ ເວົ້າກັບເຈົ້າວ່າ, ‘ຈົ່ງບອກພວກເຮົາມາວ່າເຈົ້າໄດ້ເວົ້າຫຍັງກັບກະສັດ ແລະ ທ່ານໄດ້ກ່າວຫຍັງກັບເຈົ້າ; ຢ່າປິດບັງສິ່ງໃດຈາກພວກເຮົາເລີຍ ບໍ່ດັ່ງນັ້ນ ພວກເຮົາຈະຂ້າເຈົ້າ’, ຈາກນັ້ນຈົ່ງບອກພວກເຂົາວ່າ, ‘ຂ້ອຍອ້ອນວອນຂໍກະສັດຢ່າສົ່ງຂ້ອຍກັບໄປທີ່ເຮືອນຂອງໂຢນາທານເພື່ອຈະຕາຍຢູ່ທີ່ນັ້ນ’ ”.
ແລ້ວພວກຂ້າລາຊະການກໍມາຫາເຢເຣມີຢາ ແລະ ຖາມລາວ, ແລ້ວລາວກໍໄດ້ບອກພວກເຂົາຕາມທີ່ກະສັດໄດ້ສັ່ງໄວ້ລາວທຸກຢ່າງ. ສະນັ້ນ ພວກເຂົາບໍ່ໄດ້ເວົ້າອັນໃດກັບລາວອີກ, ເພາະບໍ່ມີຜູ້ໃດໄດ້ຍິນການສົນທະນາກັນຂອງລາວກັບກະສັດ.
ແລະ ເຢເຣມີຢາກໍຍັງຢູ່ໃນເດີ່ນຂອງທະຫານເຝົ້າຍາມຈົນເຖິງວັນທີເຢຣູຊາເລັມໄດ້ຖືກຢຶດ.
ການລົ້ມຈົມຂອງເຢຣູຊາເລັມ
(2ກສ 25:1-12; ຢມຢ 52:4-16)
ນີ້ແມ່ນເລື່ອງເຢຣູຊາເລັມຖືກຢຶດໄດ້ຢ່າງໃດ:
Source notes (5)
- Footnote ພາສາເຮັບເຣີວ່າ ຢູຄັນເປັນອີກຮູບໜຶ່ງຂອງເຢຮູຄັນ
- Footnote ຫລື ຊາວຄານເດອາ ເຊັ່ນດຽວກັບຂໍ້ 18, 19 ແລະ 23
- Footnote ຄົງຈະເປັນຄົນທີ່ມາຈາກຕອນເທິງຂອງເຂດແມ່ນ້ຳນິນ
- Footnote ຫລື ຂັນທີ
- Footnote ຫລື ແລະ ທ່ານຈະເປັນເຫດເຮັດໃຫ້ນະຄອນນີ້ຖືກເຜົາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.